EFESIOS 5 - Dios Tatanchispaq Musuq Rimayninkuna

¹ Diospaq munasqa wawankunajina qankunaqa payjina kanapaq kallpacharikuychis.

² Ancha munakuywan tukuyman jaywaychis, imaynatachus Cristoqa nuqanchisman munakurqawanchis jinataq Diosman uj sumaq q'apachkaq jaywayjina nuqanchisrayku wañurqan ajinata.

³ Qankunaqa imaynatachus ch'uwa llaqtaqa puriykachanan kachkan ajinatam puriykachanaykichisqa: amapuni millay qhilli ruwaykunamantapas, maykaq qhilli jinataq mich'a ruway juchakunamantapas rimarquychischu.

⁴ Ama mana allin rimaykunatapas, pisi sunqu yuway rimaykunatapas, mana wakikuq rimaykunatapas rimaychischu, imaraykuchus kaykunaqa manam pipaqpas allinchu kachkan. Astawampas simiykichiswanqa Diosman yupaychanakaqpaq rimarquychis.

⁵ Millay khuchi alquchakuy jucha ruwaqkuna, manachayqa pikunachus chay tukuy kaqkunayuq kachkaspa astawan munakuchkallanku chaykunaqa, Imaraykuchus chayqa waj dioskunamampas yupaychana kachkanman ajinam. Paykunapaq, Cristopaq jinataq Diospaq qhapaq suyunman mana waykunankumantaqa allintam qankunaqa yachankichis.

Cristopaq k'anchayninwan k'ancharisqa kawsanamanta

⁶ Ch'usaq qasi rimaykunawan ama piwampas sallqaykuchikuychischu, imaraykuchus kaykunaraykum Diospaq manchay asut'iyninkunaqa pikunachus payman mana uyarichkanku chaykunajawaman jamun.

⁷ Qankunaqa amapuni chayjina runakuna chawpipi pitukuychischu.

⁸ Qankunaqa ñawpaqpi ch'amaka ukhupim kawsakurqankichis, chaywampas kunanqa Apu Tataman ujchasqa kapusqaykichisraykuqa k'anchaypim kawsakupunkichis. Ajinaqa imaynatachus k'anchaypi kaqkunaqa puriykachanku ajinata qankunaqa puriykachakuychis,

⁹ imaraykuchus k'anchayqa munakuywan jinataq chiqan kaywanmi imatapas ruwachiwanchis.

¹⁰ Imachus Apu Tatapaq sunqunman chayachkaq kachkan chaytapuni allinta qhawaqarikuspa ruwaychis.

¹¹ Ama pikunachus ch'amakapi kachkanku chaykunapaq ruwayninkunapi imatapas paykunawan kuska ruwaychischu; astawampas paykunataqa k'anchayniqman qatatirqumuychis.

¹² Pakaykunapaq pakapi ruwasqankumanta rimarqunapas p'inqakunajinam;

¹³ chaywampas, jayk'aqchus tukuy imakuna sut'i chhikaman churasqa kapun chhikaqa, tukuy imakunam sut'inchasqa kapun,

¹⁴ imaraykuchus tukuy imakunachus sut'i chhikaman churasqa kachkan chaykunaqa, k'anchaywampunim rikuchikunku. Chayraykum ajinata qilqarqanku: “Qan puñuchkanki chayqa, rijch'arimuy; wañusqakuna chawpimanta jatarimpuy, jinaspataq Cristo qanman k'ancharimusunki” –nispa.

¹⁵ Ajinaqa, sumaqta qhawaqarikuspapuni puriykachakuychis. Ama pisi sunqu runakunajina kawsaychischu, manachayqa allin yachaywan kawsakuychis.

¹⁶ Sapa kuti allin ruwaykuna ruwanaykichispaq pacha kachkaqtin allinkunata ruwaychis, imaraykuchus mana allin p'unchaykunapim kawsakunchis.

¹⁷ Ama pisi sunqukunajina puriykachaychischu; manachayqa imatachus Apu Tataqa qankunapaq ruwanaykichista munachkan chayta yachqatamuychis.

¹⁸ Ama machaykukuychischu, imaraykuchus chayqa imaymana mana allinkunatam yanjachisunkichis; astawampas Ch'uwa Ajayuwan junt'aykusqa kaychis.

¹⁹ Jayk'aqchus tantakunkichis chhikaqa q'uchukunata, takiykunata jinataq yupaychay q'uchukunata takirikuspa tukuy sunquwan Diosman yupaychariychis.

²⁰ Dios Tatamanqa tukuy imakunamanta Tata Jesucristopaq sutimpi yuspärayta quychispuni.

Iyaw niq runapaq wasimasinkuna chawpipi ruwayninkunamanta

²¹ Cristoman uyarikuq kasqaykichisraykuqa, qankunapura ujmanta uj uyart'anakuychis.

²² Qhariyuq warmikunaqa, imaynatachus Cristoman uyarinku ajinata qusankuman uyart'achunku.

²³ Imaraykuchus qhariqa warmimpaq umanmi, imaynatachus Cristoqa iglesiapaq uman kachkan ajinata, chay iglesiataq paypaq aychanmi; payllataqmi iglesiapaq qhispichiqninqa.

²⁴ Chaywampas, imaynatachus iglesiaqa Cristoman uyart'achkan, kikillantataqmi qhariyuq warmikunaqa imantimpi qusankuman uyart'ananku.

²⁵ Warmiyuq qharikuna: imaynatachus Cristoqa iglesiaman munakuspa kawsaynintapas payrayku apt'akuchkarqan ajinallatataqmi qankunaqa warmiykichisman munakuychis.

²⁶ Kaytaqa iglesiapaq ch'uwa kanampaqmi ajinata ruwarqan, sumaq pichasqa kanampaqtaq unuwan jinataq rimayninwan kuskachaspam mayllaqarqan,

²⁷ ajinamantam pay kikin iglesiataqa sumaq k'anchaynimpi athunchasqata, mana uj juch'uy ch'iqiykusqata, mana ima sip'uyuqta jinataq mana uj juch'uypas qhillichasqata, manachayqa sumaq ch'uwa jinataq chiqan iglesiata puskatakurqan.

²⁸ Warmiyuq qhariqa imaynatachus pay kikinta munakun, ajinallatataqmi warminta munakunanqa. Pichus warminta munakun chayqa, pay kikinmi munakuchkan.

²⁹ Imaraykuchus manam pipas pay kikintaqa chhiqnikuchkanmanchu, manachayqa allintam mikhuchin jinataq p'achallichimpasqa, imaynatachus Cristoqa iglesiawan ruwachkan ajinata,

³⁰ imaraykuchus iglesiaqa Cristopaq aychanmi. Nuqanchistaq chay aychapaq uj chhikankunaman kanchis.

³¹ “Chayraykum, qhariqa warminwan ujchakunapaq tatanta jinataq mamantawan saqipunqa, jinaspataq iskayninku uj sapa runallaman tukupunqaku.”

³² Kaypim ima athunchus Diospaq chiqan yuwaynin pakapi kachkarqan chayqa rikuchikun. Nuqataq, Cristomanta jinataq Iglesiamanta rimanapaqmi kaytaqa apaykachani.

³³ Ajina kaqtinqa, qankunamanta sapa ujmi imaynatachus pay kikin munakuchkan ajinata warminta munakunan, warmitaq qusanmanqa tukuy sunqum uyart'anan.