EFESIOS 4 - Dios Tatanchispaq Musuq Rimayninkuna

Ujllapi kayta pakanamanta

¹ Chayrayku nuqa, pichus Apu Tatarayku jap'isqa kachkaspa, imaynatachus Diospaq wajasqankuna puriykachakunanku ajinata puriykachakunaykichispaq qankunaman mañarikuykichis, imaynatachus qankunaqa karqankichis ajinata.

² Qankunaqa llamp'u sunquyuq jinataq munakuqkuna kaychis; ajinapas suyay sunquwan qankunapura ujmanta uj munakuywan uyart'anakuychis;

³ sumaqpi kayniqmanta tukuyman ujchasqata kachichkan chay Ch'uwa Ajayuniqmanta jamuq ujchakuytaqa amapuni chinkachiychischu.

⁴ Uj sapa iglesialla jinataq uj sapa Ajayullawanmi kan, jinataq Diosqa uj sapa suyay sunquyuq kanaykichispaqllam qankunaman wajasunkichis.

⁵ Uj sapa Apu Tatalla, uj sapa iyawniylla, uj sapa bawtismulla;

⁶ jinataq uj sapa tukuypaq Tatan Diosllam kan, pichus tukuyjawapi kachkan, jinataq tukuyniqtam imatapas ruwan, jinataq payqa tukuypim kakuchkallantaq.

⁷ Chaywampas nuqanchismanta sapa ujmi imaynatachus Cristoqa quyta munachkarqawanchis ajinamanjina jap'iqan.

⁸ Chayraykum Qilqasqakunapiqa ajinata nin: “Jap'isqakunata paywan kuska apakupuspam janaqpachaman chimpapurqan, runakunamantaq atiykunata qurqan” –nispa.

⁹ Chaywampas “chimpapurqan” nichkan chayqa, ¿imaniytataq munanri? Chayqa ñawpaqta kaypachaman uraqamunmi niytam munan.

¹⁰ Jinaspataq, mayqinchus uraqamuchkarqan chayqa, pichus janaqpachamanta niqtimpas astawan janaqkaqman imantinta junt'aykuchinapaq chimpapuchkarqan chay kikinllataqmi.

¹¹ Pay kikillantaqmi wakinkunamanqa kachasqakuna kanankupaq jinataq ujkunaman Diospaq sutimpi willaqkuna kanankupaq, wakinkunamanqa sumaq willaykunata willanankupaq, wajkunamantaq llaqtan michiqkuna jinataq yachachiqkuna kanankupaq tiyt'achirqan.

¹² Ajinamantam ch'uwa llaqtapi kaqkunamanqa uj jayway llank'aypaq jinataq mayqinchus Cristopaq aychan kachkan chay iglesiapaq wiñarinampaqmi wakicharqan.

¹³ Tukuy nuqanchis iyawniyniqta ujchasqa kayman jinataq Diospaq Churin riqsinaman chayananchispaq ajinata ruwarqan. Ajinamanta iyawniyniqpi machu runaman tukupunanchispaq, jinataq imaynachus Cristo kachkan ajina kikinman chayananchispaq.

¹⁴ Kunanqa manañam uña wawakunajina kapusunñachu, ujta yuwakuchkanku chhikamantataq wajtañataq yuwapunku ajinataqa, paykunaqa usqhayllatam sipitamanjina churaq sallqa runakunapaq llulla yachachiyninkunawan sallqaykuchikunku.

¹⁵ Astawampas, munakuyqa imachus chiqan kachkan chayllatapunim rimachinawanchisqa, ajinamanta tukuy ima ruwasqanchispi juch'uymanta juch'uy astawan Cristoman rijch'akunanchispaq, pichus iglesiapaq umanmi.

¹⁶ Jinataq Cristoniqtam tukuy iglesiapi kaqkunaqa imachus sapa uj ruwananku kachkan chayta ruwaspa sumaqta ujchakupunku; jinallataq tukuy chaypi kaqkunachus ruwanankuta allinta ruwanku chhikaqa, tukuy iglesiam munakuypi sayarispa sumaqta wiñatatapun.

Cristopiqa musuq kawsaymi kan

¹⁷ Kaymi Tatapaq sutimpi imatachus niykichis jinataq kunariykichispas chayqa: ama Diosman mana riqsiq runakunajina kawsapuychisñachu, imaraykuchus paykunaqa pantasqa yuwayninkumajinam kawsakunku,

¹⁸ jinallataq yuwayninkupas mana allin yuwaykunawan ch'amakaykusqam. Paykunaqa Diosniqmanta jamuq kawsaywanqa manam kusikunkuchu, imaraykuchus rumi sunqu kasqankuraykuqa manam imatapas yachachkankuchu.

¹⁹ Mana p'inqayniyuq kapunku jinataq mana allin ruwaykunaman jap'iykukupunku, ajinamanta imaymana qhilli ruwaykunatam imatapas mana manchaspa ruwapunku.

²⁰ Chaywampas qankunaqa manam ajina kawsanapaqchu Cristoman riqsinkichis,

²¹ imaraykuchus chiqantapunim payjawamantaqa sumaq willaykunata uyarirqankichis, jinaspataq rimayninmanjina imaynatachus qankunapaq kawsakunaykichista pay munachkan ajinatam Jesuspi kachkan chay chiqan kaymanjina kawsayta yachaqapunkichis.

²² Chayrayku qankunaqa imaynatachus ñawpaq kawsayniykichispi kawsakurqankichis chayjina kawsaytaqa saqiwachapunaykichismi, ajinamanta imachus ñawpaq kawsayniykichispi karqankichis chayta wajniqman chhuqawachapunaykichispaq, imaraykuchus tukuy chaykunaqa imaymana mana allin sallqa yuwaykunaraykum jucha ruwaykunawan chhaqruykukuspa t'unarqukupurqan.

²³ Qankunaqa musuqmantam yuwayniykichispi yuwapunaykichis,

²⁴ jinaspataq qankunaqa musuq runakunam kapunaykichis, imaynatachus Diosqa payjina rijch'akuqta ruwakuchkarqawanchis ajinata, mayqinchus uj chiqan jinataq ch'uwa kawsaypim rikuchikun.

Imayna kawsakunamanta

²⁵ Ajinaqa amaña astawan llullakupuychischu, manachayqa sapa uj runamasinman imachus chiqan kachkan chayta niychis, imaraykuchus tukuyninchismi Cristopaq aychan kachkan chay iglesiapi kaqkuna kanchis.

²⁶ Phiñakuspaqa ama juchaman jalaykuychischu; chay phiñakusqaykichistaq ama tutamanta inti jalaykunankama kachunchu.

²⁷ Supaymanqa ama qankunaman pantachinampaq uj juch'uy chhikatapas saqiychischu.

²⁸ Pichus suwakuyta yacharqan chayqa, makinkunawan llank'ayta qallarispa amaña suwakupuchunchu, ajinamanta pist'achikuqkunaman imawampas yanaparinampaq.

²⁹ Ama millay rimaykunata rimarqupuychisñachu, manachayqa ima rimaykunachus iglesiata ñawpaqman puririchichkan jinataq pikunachus uyarichkanku chaykunaman allimpi yuwatatarichichkan chay sumaq rimaykunallata rimarqupuychis.

³⁰ Ama Diospaq Ch'uwa Ajayumpaq llakikunanta saqiychischu, imaraykuchus wiñaypaq qhispichiyta qupusunkichis chhikaqa, chaywanmi qankunaqa Diospaq kaqninkunajina riqsisqa kanaykichispaq ch'ikulliykusqa kapunkichis.

³¹ Qankunamantaqa, ima sunqu nanay kaqtapas, phiñakuykunatapas, qallanakuykunatapas, sutichjanakuykunatapas jinataq tukuy imaymana saqra kaykunatapas karuniqman tanqawachapuychis.

³² Qankunaqa, ujmanta uj sumaq khuyapayakuq runakuna kaychis, jinallataq qankunapurapas pampacharinakuychis, imaynatachus Diosqa qankunaman Cristoniqta pampachachkarqasunkichis ajinata.