EFESIOS 3 - Dios Tatanchispaq Musuq Rimayninkuna

Pablopaq iglesia chawpipi ruwaynin

¹ Kayraykum nuqa Pabloqa, Cristo Jesusrayku pikunachus mana judío runakuna kachkankichis chay qankunapaq allimpi kanaykichispaq watasqa kachkani.

² Imaraykuchus qankunaqa yachapunkichisñam, Diosmi qankunaman paypaq ancha khuyapayakuynimpi ima ruwanantachus willanaypaq qankunaman kachamuchkawan chaymantaqa.

³ Diosmi ima ruwananchus pakapi kachkarqan chayta riqsichiwan, chaymantataq uj chhikanta qilqampurqaykichismi.

⁴ Chay qilqasqaytachus ñawirinkichis chhikaqa, imaynatachus Diosqa chay pakasqa kachkarqan chay ruwayninta Cristopi ruwachkasqa chaymanta yachasqaymantaqa riparakunkichismi,

⁵ kay pakasqa kachkarqan chaytataq, manam pimampas ñawpaqpachakunapiqa riqsichikuchkasqachu, chaywampas kunanqa ch'uwa kachasqankunaman jinataq paymanta willaqninkunamanmi Diosqa Ajayuniqta chay yuwayninta riqsichipun.

⁶ Diospaq pakapi kachkarqan chay yuwayninqa kaymi: Jesucristoniqtam tukuy pikunachus waj dioskunaman yupaychaq kachkarqanku chaykunaqa qhispichiyta, jinallataq ima rimayninkunatachus Israel llaqtaman quchkarqan chaykunata ima jap'iqanqaku, ajinamanta uj sapa llaqtata paywan tiyt'achinapaq. Chaypaqtaq imatachus ruwanaykichis kachkan chayqa, sumaq willaykunata iyaw ninaykichisllam.

⁷ Nuqaqa Diospaq munakuyninrayku jinataq khuyapayakuyninraykum kay sumaq willaykunata willanaypaq churasqa kani, pichus ajinamantam chay tukuy athun atiynintaqa rikuchin.

⁸ Nuqaqa tukuy pikunachus Diospaq ch'uwa llaqtampi kachkanku chaykunamanta niqtimpas astawan sullk'akaqmi kani; chaywampas paymi waj dioskunaman yupachaq kachkarqanku chay runakunaman sumaq willaykunata jinataq Cristopaq ancha qhapaqkayninkunamanta willanaypaq chay sumaq llank'ayta quwan.

⁹ Jinallataq ima yuwaynintachus tukuy imaymana kaqkuna ruwaq Diosqa wiñaynintinmantapacha pakapi kachichkarqan chay yuwaynin imaynatataq ruwakurqan chayta qankunaman sut'inchanaypaqmi nuqaman churakuwan.

¹⁰ Ajinamantam iglesianiqta kunanqa tukuy janaqpachapi kaq kallpakuna Diospaq yachaysapa kasqanta riqsinqaku, mayqinchus imaymananiqmanta riqsichikun.

¹¹ Kaytam Diosqa imaynatachus wiñaymantapacha yuwachkasqa chaytaqa Tatanchis Cristo Jesuspi ajinata ruwan.

¹² Jinaspataq Cristopim kachawachasqajina kanchis Diosman qayllachakunanchispaqqa, iyaw nisqanchispi payman qayllachakusqanchisrayku.

¹³ Chayrayku, qankunarayku ñak'arisqaymantaqa ama iskayakunaykichispaq mañarikuykichis, imaraykuchus kay ñak'arisqayqa qankunapaq uj athunchayjinam kanan.

Diosmanta mañarikuna jinataq yupaychana

¹⁴ Chayrayku Dios Tatapaq ñawpaqimpiqa killpiykurikuni,

¹⁵ imaraykuchus tukuy kaypachapi jinataq janaqpachapi kachkan chaykunataqa paymi ruwarqan.

¹⁶ Sumaq k'anchaynimpi athunchasqa qhapaq kayninmanta, sunquykichisman Diospaq Ajayunniqta atiyta jinataq kallpata qankunaman qunasunkichispaq Dios Tataman mañarikuni,

¹⁷ Cristoqa qankunapaq sunquykichispi, iyawniyniqta kawsakuchun, munakuytaq kawsakuyniykichispi allin saphiykusqa jinataq sumaq tiyaykusqa kachun.

¹⁸ Ajinamantam tukuy pikunachus Diospaq ch'uwa llaqtanta tiyt'achinchis chaykunaqa, Cristopaq may sumaq tukuy chhikaman chayachkaq munakuyninta yuwaywan jap'iqapusunchis.

¹⁹ Chay munakuytam riqsinaykichista munani, mayqinchus tukuy ima riqsinanchismanta niqtimpas astawan kurajmi, ajinamanta qankunaqa may athunchus Dios kachkan chaywan junt'aykusqa kanaykichispaq.

²⁰ Kunantaq Diosqa athunchasqa kachun, imaraykuchus nuqanchispi kaq atiyninraykum payqa mañakusqanchismanta jinataq yuwasqanchismanta niqtimpas astawan achkhataraq ruwanman.

²¹ ¡Diosqa, iglesia chawpipi jinataq Cristo Jesuspipas wiñaypaq wiñaynintimpaq sumaq k'anchaynimpi athunchasqa kachun! Ajina kachun.