EFESIOS 2 - Dios Tatanchispaq Musuq Rimayninkuna

Diosqa Cristoniqtam wañuymanta qhispichiwanchis

¹ Saqra kaypi jinataq juchakuna chawpipi kawsasqaykichisraykuqa, ñawpaqpi qankunaqa wañusqam karqankichis,

² imaraykuchus kaypachapi kaq runakunaqa imaynatachus puriykacharqanku ajinallatataqmi qankunaqa puriykacharqankichis, jinallataq mayqin saqra ajayuchus samay chawpipi atiyniyuq kachkan jinataq Diosman mana uyariqkunaman kallpachachkan chaypaq munaynintam qankunaqa ruwarqankichis.

³ Kayjinamantam ñawpaqpachapi kawsakurqankichisqa, mana allin ruwaykuna yuwayninchiskunata qatispa, jucharara kay aychanchispaq munayninta jinataq chaypaq yuwayninkunata junt'aspa. Chayraykum nuqanchisqa, wakinkunajina astawanraq Diospaq manchay asut'iyninta jap'iqananchis karqanqa.

⁴ Chaywampas Diosqa ancha khuyapayakuyniyuqmi, jinaspataq chay tukuy athun munakuyninwanmi nuqanchisman munakurqawanchis,

⁵ ajinamantam jayk'aqchus juchanchiskunarayku wañusqa kachkarqanchis chhikaqa Cristowan kuska kawsayta quwanchis. Diospaq munakuyninmantam qankunaqa qhispichiyta jap'iqankichis.

⁶ Jinataq Cristo Jesuswan kuska wañusqamanta kawasarichimurqawanchis, jinataq paywan kuskam janaqpachapi tiyarichikupuwasun.

⁷ Kaytaqa, nuqanchisman Cristo Jesuspi munakuyninta jinataq khuyapayakuyninta jamuq p'unchaykunapi rikuchinapaq ajinata ruwarqan.

⁸ Imaraykuchus Diospaq munakuyninraykum qankunaqa iyawniyniqta qhispichiyta jap'iqarqankichis. Kayqa manam qankuna kikimpaq tarikusqaykichisjinachu kachkan, manachayqa Diospaq uj quyninmi chayqa.

⁹ Manallataqmi chaypas qankunapaq kallpaykichiswan taripasqachu kachkan, ajinaqa manam pipas chaymanta athunchakuyta atichkanmanchu.

¹⁰ Imaraykuchus Diosmi nuqanchisman ruwakuwanchisqa. Payllataqmi mayqin ñantachus payqa ñawpaqmantapacha wakicharqan chayniqta qatispa Cristo Jesuspi allin ruwaykuna ruwananchispaq ruwakurqawanchis.

Tukuyninchisqa uj llaqtallam kanchis

¹¹ Ajinaqa qankuna pikunachus mana judío kachkankichis chaykunaqa kayta uyariychis: (pikunachus runaman aychallampi circuncisionta ruwanku, jinataq paykunakikinqa “circuncisión ruwasqa kayku” nispa sutichakunku) chay judío runakunaqa qankunaman “mana circuncisión ruwasqakuna” nispa sutiyasunkichis.

¹² Ñawpaq pachakunapiqa manam Cristoman jap'iqachkarqankichischu, Israel suyumantapas t'ipiqasqam karqankichis, jinataq rimthapiykunapipas mana yupasqa, Diospaq rimaynin qusqankunapipas mana yupasqallataqmi kachkarqankichis. Kaypachapiqa mana Diosniyuq jinataq mana suyay sunquyuq kawsakurqankichis.

¹³ Chaywampas kunanqa, yawarnin jich'asqanrayku Cristo Jesusman ujchasqa kapuspaqa, qankuna pikunachus ñawpaqqa karupi kachkarqankichis chaykunaqa kunan qayllapim kapunkichis.

¹⁴ Cristom nuqanchispaq sumaqpi kayninchisqa. Paymi judiokunamanta jinataq mana judiokunamantawan uj sapa llaqtallata ruwapun, ima pirqachus t'ipjachkarqawanchis chaytaqa ch'usaqtam t'unarqupun, jinataq kikin aychampim ima chhiqninakuychus kachkarqan chaytapas qasiman tukuchipullantaq.

¹⁵ Paymi runakunaman mat'iykuq kamachiykunataqa p'uchukayninman churapun, jinataq pay kikimpi iskaynin chhikakunamantaqa uj sapa musuq llaqtata ruwapun. Ajinamantam sumaq kayta ruwarqan.

¹⁶ Iskay chhiqninakuq llaqtakunataqa, pay kikimpim sumaqman churapun, chakanapi wañusqanwantaq paykunawan uj sapa llaqtallaman tukuchispam Dioswan sumaqthapichipun.

¹⁷ Cristoqa, qankunapaq pikunachus Diosmanta karupi kachkarqankichis jinataq qayllapi kachkarqanku tukuy chaykunaman sumaqpi kay sumaq willaykunata apamunapaqmi jamurqan.

¹⁸ Imaraykuchus Cristoniqtam judiokunapas manachayqa mana judiokunapas uj kikin Ajayuniqta Diosman qayllachakuchuwan.

¹⁹ Chayraykum qankunaqa manaña puriq runakunachu kapunkichis, manallataqmi jallp'aykichismantapas waqniqkunapi kapunkichisñachu, manachayqa ch'uwa llaqtawan kuska kikin munayniyuq jinataq Diospaq wawankunam kapunkichis.

²⁰ Tukuy iglesiapi kaqkunaqa Cristopaq kachasqankuna jinataq Diosmanta willaqkunajawapi ruwasqa wasiman rijch'akuqmi kankichis, chay wasi sayarichisqapitaq Jesusmi ñawpaqkaq wasi japqasiq athun rumiqa.

²¹ Paymi chay wasi pirqataqa thuruta japqasin jinataq Diospaq wasinman tukunankama wiñachin.

²² Jesucristowan ujchakusqaykichisraykum qankunapas chay wasiman tukupullankichistaq, maypichus Diosqa Ajayunniqta kawsakun.