APOCALIPSIS 9 - Dios Tatanchispaq Musuq Rimayninkuna

Phichqakaq pututu

¹ Phichqakaq angel pututunta phukurimurqan chhikataq, janaqpachamanta uj quyllur kaypachaman jalaqamuchkasqa chaytam rikurqani; chaymantaq ukhupachaman waykuna jutk'upaq punku wisq'anantam qurqanku.

² Ukhupachaman waykuna jutk'upaq punkuntam wisq'ararqan, chay ukhumantataq uj athun junch'amantajinam q'usñi lluqsimurqan; chay q'usñintaq intita jinataq janaqpachantintam ch'amakaykuchirqan.

³ Chay q'usñimantataq t'isku t'iskukunam lluqsiramurqanku jinaspataq tukuy kaypachajawamanmi ch'iqiwacharqanku; chay t'isku t'iskukunamantaq alacran kurukunajina kaniykukuq kanankupaq atiytam qurqanku.

⁴ Chaykunataq kaypachapi kaq q'umir qurakunaman jinataq maykaq sach'akunamampas ama chhuqrinchamunankupaq kamachisqam karqanku, manachayqa pikunachus Diospaq ch'ikullinta umankupi mana apachkanku chaykunaman kaniykunankupaq kamachisqam karqanku.

⁵ Chaywampas runakunata ama wañuchinankupaq, manachayqa kaniykuspa phichqa killakuna nanaykuchinankupaq kamachisqam karqanku. Chay nanaytaq uj alacran kurupaq kaniykusqanjinam karqan.

⁶ Chay p'unchaykunapi runakunaqa wañuytam maskanqaku, chaywampas manam taripanqakuchu; wañupuytam munanqaku, wañuytaq paykunamantaqa phawaripunqam.

⁷ T'isku t'iskukunaqa maqanakuyman purqaruq silla uywakunajina wakicharisqam karqanku; umankupiqa qurimanta ruwasqa pilluwan churqatasqajinam karqanku, uyankunataq runapaq uyanman riqch'akuqmi karqan.

⁸ Warmikunapaq chujchanjina chujchayuqmi karqanku, kirunkunataq machuq'arapaq kirunkunajinam karqan.

⁹ Aychankunataq jirumanta ruwasqa maqanakuna p'achayuqjinam karqanku, lijrankunapaq ch'aqwamusqantaq imaynatachus tupjanaman phawaq achkha silla uywakuna ch'aqwamuchkanku ajinam karqan.

¹⁰ Chupankunataq alacran kurukunapaq chupanjina arikunayuqmi karqan, chaypitaq phichqa killa junt'a runaman chhuqriykunapaq atiyniyuqmi karqanku.

¹¹ Chay t'iskut'iskukunapaq kurajkaqnintaq mayqinchus ukhupachapaq angelnin kachkan chaymi karqan, sutintaq hebreo rimaypiqa Abadón nisqam karqan, griego rimaypitaq Apolión nisqallataq.

¹² Chaymi ñawpaqkaq t'unarqukuy karqan, chaywampas iskaywanraqmi jamunan kachkarqan.

Suqtakaq pututu

¹³ Suqtakaq angel pututunta phukurimurqan chhikataq, mayqin qurimanta ruwasqa jaywana patachus Diospaq ñawpaqimpi kachkarqan chaypaq tawa waqrankuna chawpimanta uj kunka wajach'akumuqtam uyarirqani.

¹⁴ Chay kunkataq pututuyuq kachkarqan chay suqtakaq angelmanqa ajinatam nirqan: “Éufrates athun mayu qayllapi watasqa kachkanku chay tawa angelkunata paskaray” –nispa.

¹⁵ Chhikataq chay tawa angelkunam paskarasqa karqanku, ajinamanta kimsakaq chhika runakunata wañurachinankupaq, imaraykuchus paykunaqa chay pachapaq, chay p'unchaypaq, chay killapaq jinataq chay watapaq wakichasqam kasqaku.

¹⁶ Jinaspataq pikunachus silla uywakunapi maqanakuchkarqanku chaykunapaq iskay waranqa waranqa pallapallakuna kasqankutam uyarirqani.

¹⁷ Ajinatam musquypijina chay silla uywakunata rikurqani, jinaspataq pikunachus chay uywakunajawapi tiyqatasqa kachkarqanku chaykunaqa, ninajina puka jijichkaq, llawlli jinataq q'illu maqanakuna p'achawan wijsa patapi churaykusqam karqanku. Chay silla uywakunataq machuq'arapaq umanjina umakunayuqmi karqanku, sinqanmantataq nina, q'usñi jinataq azufre imam lluqsimurqan.

¹⁸ Chay uywakunapaq sinqanmanta nina, q'usñi jinataq azufre lluqsimuqwantaq, kimsakaq chhika runakunam wañurapurqanku.

¹⁹ Chay silla uywakunapaq atiyninqa sinqampi jinataq chupampim karqan; imaraykuchus chupankunaqa mach'aqwayakunajinam karqan, umankunawantaq runakunaman chhurincharqanku.

²⁰ Chay ninawan, q'usñiwan jinataq azufrewan mana wañurachkarqanku chay puchuq runakunataq, mana allin ruwayninkunataqa manam saqichkarqankuchu, millay saqra supaykunaman jinataq runapaq ruwasqan dioskunaman yupaychaytapas manallataqmi saqichkarqankuchu. Astawampas rumimanta, k'ullumanta, qurimanta, qulqimanta jinataq jirumanta ruwasqa illakunaman, mayqinkunachus mana rikuq, mana uyariq jinataq mana puriykachaq kachkanku chaykunamanqa astawanmi yupaycharqanku.

²¹ Manallataqmi runa wañuchiytapas, layqakuytapas, millay khuchi juchakuna ruwaytapas jinataq suwakuytapas saqichkarqankuchu.