APOCALIPSIS 8 - Dios Tatanchispaq Musuq Rimayninkuna

Qanchiskaq limiykusqa ch'ikulli

¹ Jayk'aqchus Uwijaqa qanchiskaq limiykusqa ch'ikullita p'akiykurqan chhikataq, janaqpachapiqa uj ñaqa kuska pacham ch'inlla karqan.

Qanchis pututukuna

² Chhikamantataq Diospaq ñawpaqimpi qanchis angelkuna sayarachkaqtam rikurqani, paykunamantaq qanchis pututukunatam qurqanku.

³ Chhikamantataq qurimanta ruwasqa uj kupala phichana jap'irisqam uj angelqa jamurqan, jinaspataq jaywana patapaq ñawpaqimpim sayarikurqan. Paymantaq tiyana ñawpaqimpi kachkarqan chay qurimanta ruwasqa jaywana patapim Diospaq ch'uwa llaqtampaq mañakusqankunawan kuska jaywanampaq achkha kupalata qurqanku.

⁴ Chay kupalapaq q'usñisqantaq ch'uwa llaqtampaq mañakuyninkunawan kuskam angelpaq makinmanta Diospaq ñawpaqinman chimparqan.

⁵ Chhikataq chay angelqa kupala phichanata jap'irqan, jinaspataq jaywana patamanta nina sansakunata apaqaspa chaywan junt'aykuchirqan, jinaspam kaypachajawaman t'akawachamurqan; chhikataq qhunqhunkuna, qapariykuna, llijullijukuna jinataq uj jallp'a kharkhariy imam karqan.

⁶ Chay qanchis angelkuna pikunachus qanchis pututukuna jap'irisqa karqanku chaykunaqa phukurinapaqmi wakichakurqanku.

Ñawpaqkaq tawa pututukuna

⁷ Ñawpaqkaq angel pututunta phukurimurqan chhikataq, kaypachajawamanqa chhijñi jinataq ninawanmi paraykumurqan, chaytaq yawarwan chhaqruykusqam karqan. Chaywantaq kaypachapaq kimsakaq chhikanmi ruphaykupurqan, chaywam kuskataq sach'akunapas jinataq q'umir jach'ukunamantapas kimsakaq chhikanllataqmi ruphaykupurqallantaq.

⁸ Iskaykaq angel pututunta phukurimurqan chhikataq, nina lawrachkaq uj athun urqumanjina rijch'akuqmi qucha chawpiman chhuqaykusqa karqan; jinaspataq quchamanta kimsakaq chhikanmi yawarman tukupurqan.

⁹ Tukuy quchapi kawsaqkunamantaqa kimsakaq chhikanmi wañurapurqanku, jinataq yampukunamantapas kimsakaq chhikanllataqmi t'unarqusqa kapurqanku.

¹⁰ Kimsakaq angel pututunta phukurimurqan chhikataq, nina wiyajina lawrachkaq uj athun quyllurmi janaqpachamanta phawaqamurqan, chaytaq mayukuna jinataq unu p'ullp'umuqjawamanmi jalaqamurqan.

¹¹ Chay quyllurtaq K'allk'u nisqa sutiyuqmi karqan; jinaspataq unukunamantaqa kimsakaq chhikanmi k'allk'uman tukupurqanku, chay k'allk'u unu ujyarasqankuraykutaq achkha runakunam wañurapurqanku.

¹² Tawakaq angel pututunta phukurimurqan chhikataq, intiqa kimsakaq chhikanmi chhuqrisqa kapurqan, killapas quyllurkunapas ajinallataqmi kimsakaq chhikan chhuqrisqa kapurqallankutaq. Ajinamantam chaykunamanta kimsakaq chhikan ch'amakaman tukupurqanku, jinaspataq kimsakaq chhikanllataqmi p'unchaypas tutapas manaña k'anchayninta qupurqankuchu.

¹³ Chhikamantataq qhawarirqani, jinaspataq janaqpacha chawpipi phawaykachachkaq uj ankatam rikurqani, paypaq athun kunkanwan ajinata niqtam uyarirqani: “¡Wakin kimsayuq angelkuna pututunkuta phukurimuchkanqaku chhikaqa, kaypachapi kawsaqkunawan imalla kachkanqa!” –nispa.