APOCALIPSIS 6 - Dios Tatanchispaq Musuq Rimayninkuna

Ñawpaqkaq tawa limiykusqa ch'ikullikuna

¹ Jayk'aqchus Uwijaqa ñawpaqkaq limiykusqa ch'ikullita p'akiykurqan chhikataq, kawsachkaqkunamanta ujkaqpaq qhunqhunjina kunkawan ajina nisqantam uyarirqani: “¡Jamuy!” –nispa.

² Qhawarirqani jinaspataq uj yuraq silla uywatam rikurqani, chay uywa patapi tiyqatasqa kachkarqan chaytaq makimpiqa uj mich'i aparisqam karqan. Paymantaq uj pillutam qurqanku, jinaspataq atipachkaqmi atipanapaq lluqsirqan.

³ Jayk'aqchus Uwijaqa iskaykaq limiykusqa ch'ikullita p'akiykurqan chhikataq, kawsachkaqkunamanta iskaykaqpaq ajina nisqantam uyarirqani: “¡Jamuy!” –nispa.

⁴ Jinaspataq waj silla uywam lluqsimurqan. Chaytaq pukam karqan, pichus chay uywa patapi tiyqatasqa kachkarqan chaytaq tukuy kaypachamanta sumaqpi kayta qichuqanapaq jinataq runakunapaq paykunapura wañurachikunankupaq atiy qusqam karqan; jinaspataq uj athun kuchillutam qurqanku.

⁵ Jayk'aqchus Uwijaqa kimsakaq limiykusqa ch'ikullita p'akiykurqan chhikataq, kawsachkaqkunamanta kimsakaqpaq ajina nisqantam uyarirqani: “¡Jamuy!” –nispa. Qhawarirqani jinaspataq uj yana silla uywatam rikurqani, pichus chay uywa patapi tiyqatasqa kachkarqan chaytaq makimpi uj tupu aparisqam karqan.

⁶ Jinaspataq chay tawantin kawsachkaqkuna chawpimanta ajina nimuq uj kunkatam uyarirqani: “Uj p'unchay llank'aspa kallpasqawanqa uj phuqtu trigullatam rantikunqaku, jinallataq kimsa phuqtu siwarataqa uj p'unchay llank'aspa kallpasqawanmi rantikunqaku; chaywampas wiswita jinataq vinukaqtaqa ama qasiman tukjachiychu” –nispa.

⁷ Jayk'aqchus Uwijaqa tawakaq limiykusqa ch'ikullita p'akiykurqan chhikataq, kawsachkaqkunamanta tawakaqpaq ajina nisqantam uyarirqani: “¡Jamuy!” –nispa.

⁸ Qhawarirqani jinaspataq uj q'illu silla uywatam rikurqani, pichus chay uywa patapi tiyqatasqa kachkarqan chaypaq sutinqa Wañuy nisqam karqan. Paypaq qhipantataq imachus wañuypaq qhapaq suyun lanti kachkan chaymi jamuchkarqallantaq, jinaspataq tupjaykunawan, yariqaykunawan, unquykunawan jinataq sach'a kurukunawan wañurachinampaqmi kaypachapaq kuskanmanta kuskanjawapi atiyta qurqanku.

Phichqakaq jinataq suqtakaq limiykusqa ch'ikullikuna

⁹ Jayk'aqchus Uwijaqa phichqakaq limiykusqa ch'ikullita p'akiykurqan chhikataq, pikunachus Diospaq willayninta willasqankurayku jinataq chay willaypi tukuy sunqu iyaw nisqankurayku ñak'awachasqa kachkarqanku chaykunatam jaywana patapaq ukhuniqnimpi rikurqani.

¹⁰ Paykunataq athun kunkawan ajinata nirqanku: “Tukuy atiyniyuq ch'uwa jinataq chiqan, kaypacha runakunataqa ¿nuqaykuman wañurachiwanku chaymantaqa jayk'aqtaq juchanchaykunki jinataq nuqaykumanta sayqatakuspa asut'iykunkiri?” –nispa.

¹¹ Chhikataq yuraq p'achakunatam qurqanku, jinaspataq: “Diosman jaywasqankupi qankunajina wañuchisqa kananku kachkan chay wawqimasiykikunapaq kayman junt'asqa chayamunankukama uj juch'uy pachata suyariychis” –nispam nirqanku.

¹² Jayk'aqchus Uwijaqa suqtakaq limiykusqa ch'ikullita p'akiykurqan chhikataq, qhawarirqani jinaspataq uj manchay jallp'a kharkhatiymi karqan. Intiqa yana ch'amakamanmi tukupurqan, killapas yawarjina pukamanmi tukupurqallantaq,

¹³ jinataq imaynatachus wayrawan thalarqusqa higo sach'apaq urinkuna t'akarakumuchkan ajinatam quyllurkunapas janaqpachamanta kaypachaman t'akarakumurqanku.

¹⁴ Janaqpachaqa imaynatachus uj qarata k'iruykunchis ajinatam chinkawachapurqan, tukuy athun urqukunapas jinataq qucha chawpipi kaq jallp'akunapas may chhikapichus kachkanku chaymantaqa wajniqman kuyurichisqam kapurqanku.

¹⁵ Kaypachapi kaq qhapaq suyukuna apaykachaqkunataq urqu chawpipi kaq qarqa jutk'ukunapim pakaykukupurqanku, paykunawan kuskataq pallapallakunapaq kurajkaqninkuna, qhapaq runakuna, kaypachapi atiyniyuq runakuna, tukuy wata runakuna jinataq kacharisqa runakunantinmi pakaykukurqanku;

¹⁶ jinaspataq urqukunaman jinataq qarqakunamanqa ajinatam nirqanku: “¡Pichus tiyanapi tiyachkan chaymanta jinataq Uwijapaq phiñakuyninmanta pakaykurinawaykichispaq nuqaykujawaman urmaykumuychis!” –nispa.

¹⁷ Imaraykuchus manchay asut'iy p'unchayqa chayampunñam, jinaspataq ¿pitaq sayarinmanri?”