APOCALIPSIS 4 - Dios Tatanchispaq Musuq Rimayninkuna

Janaqpachapi yupaychay

¹ Qhawarispataq janaqpachapiqa uj wisq'arasqa punkutam rikurqani. Jinaspataq ima kunkatachus ñawpaqpi uyarichkarqani chaytaq pututu phukurisqajina kunkayuq kachkarqan chaymi ajinata niwan: “Kayman chimpamuy, jinaspataq imakunachus kay chhikamanta ruwakuchkanqa chaykunatam rikuchisqayki.” –nispa.

² Chay chhikapitaq Ajayupaq atiyninwan apaykachasqam taripakupurqani, jinaspataq janaqpachapi churasqa uj tiyanatam rikurqani, chay tiyanapitaq uj tiyachkaqtam rikurqani.

³ Chay tiyanapi tiyachkarqan chaytaq achkha chaniyuq k'anchachkaq rumikunaman rijch'akuqmi karqan, chay tiyana muyuriypitaq uj lliphipichkaq rumiman rijch'akuq k'anchachkaq k'uychim karqallantaq.

⁴ Tiyana muyuriypiqa waj iskaychunka tawayuq tiyanakunatam rikurqani, chaykunapitaq iskaychunka tawayuq machulakunam tiyarachkarqanku; paykunataq yuraq p'achawan p'achallt'asqam karqanku, umankupitaq uj quri pilluwan churqatasqam karqanku.

⁵ Chay tiyanamantataq llijullijukuna, waqach'akuykuna jinataq qhunqhunkunam lluqsimurqan; chay tiyana ñawpaqimpitaq qanchis nina wiyakunam lawrachkarqanku, chaykunaqa Diospaq qanchis ajayunkunam kanku.

⁶ Tiyana ñawpaqimpiqa uj quchaman rijch'akuqmi karqan, chaytaq qhispillujina ch'uwam karqan. May chhikapichus tiyana kachkarqan chay chawpi chhikapi jinataq chay muyuriypiqa, tawa kawsachkaqkunam karqan, paykunataq ñawpaniqpi jinataq qhipaniqpi ñawikunawan junt'aykusqam karqanku.

⁷ Chay kawsachkaqkunamanta ñawpaqkaqqa uj machuq'araman rijch'akuqmi karqan, iskaykaqtaq uj turuman rijch'akuq, kimsakaqtaq runaman rijch'akuq, tawakaqtaq uj phawachkaq ankaman rijch'akuqmi karqallantaq.

⁸ Sapa uj tawantin kawsaqkunaqa suqta lijrayuqmi karqanku, jinaspataq pataniqmanta jinataq ukhuniqmanta ñawikunawan junt'aykusqam karqan. Paykunataq p'unchaypas tutapas manam ajina niyta sayt'achkarqankuchu: “¡Ch'uwa, ch'uwa, ch'uwam tukuy atiyniyuq Dios Tataqa, pichus karqampuni, kakuchkanmi jinataq jamunqam!” –nispa.

⁹ Chay kawsaqkunaqa pichus chay tiyanapi tiyachkarqan jinataq pichus wiñaypaq kawsachkan chayman yupaychayta, athunchayta jinataq yuspärayta sapa kuti qurqanku chhikataq,

¹⁰ iskaychunka tawayuq machulakunaqa paypaq ñawpaqimpim killpiykukurqanku jinaspataq yupaycharqanku, pillunkunata tiyana chhikaman chhuqaspataq ajinatam nirqanku:

¹¹ “Tatayku jinataq Diosniyku, yupaychanayku chanim kanki, athunchanaykupaq jinataq atiyniyuq kanaykipaq chaninmi kanki, imaraykuchus qanmi tukuy imatapas ruwarqanki: munayniykimantam imapas kan jinataq chaykunapas ruwasqa karqan.” –nispa.