APOCALIPSIS 3 - Dios Tatanchispaq Musuq Rimayninkuna

Sardes iglesiaman willay

¹ Sardes iglesiapaq angelninman qilqay: ‘Pichus Diospaq qanchis ajayunkunayuq jinataq qanchis quyllurkunayuq kachkan chayqa ajinatam nin: Tukuy ima ruwasqaykitaqa nuqam yachani, tukuyninku kawsachkaqmanta riqsisunki chhikapas wañusqa kasqaykimantaqa yachallanitaqmi.

² Rijch'ariy jinaspataq ima allin ruwaykunatachus ruwachkanki chaykunata astawan allin kanampaq kallpacharikuy, chaywampas chay allin ruwayniykikunaqa wañupuchkanñam, imaraykuchus Diosniypaq ñawpaqimpiqa manam ancha sumaqta ruwachkankichu.

³ Ima yachachiytachus jap'iqachkarqanki chaymantaqa yuwarikuypuni, chayman qatiy jinasptaq Diosman kutirimpuy. Manachus rijch'arisqa kachkanki chhikaqa, imaynatachus suwaqa jamun ajinatam manaraq suyachkanki chhika qanman jamusaq.

⁴ Chaywampas chay Sardes iglesiapiqa uj jayk'ayuq p'achankunata mana qhillichakuspa puriykachakuqkunam kanku; paykunaqa nuqawan kuskam yuraq p'achayuq puriykachanqaku, imaraykuchus chaypaqqa chaniyuqmi kanku.

⁵ Pikunachus mana walt'aykunamanta atipachkaq lluqsimunqaku chaykunaqa, ajina yuraq p'achayuqmi kanqaku, jinaspataq sutinkutaqa manam kawsay p'anqamanta jurquwachachkasaqchu, manachayqa Tataypaq jinataq angelninkunapaq ñawpaqimpim paykunaman riqsikupusaq.

⁶ ¡Imatachus Diospaq Ajayun iglesiakunaman nichkan chaytaqa, pichus ninriyuq kachkan chayqa uyarichun!

Filadelfia iglesiaman willay

⁷ “Filadelfia iglesiapaq angelninman qilqallaytaq: ‘Pichus ch'uwa jinataq chiqankaq kachkan, pichus qhapaq suyu apaykachaq Davidpaq wasi wisq'arananta jap'ichkan, mayqintachus wisq'aran chhikaqa manam pipas wisq'aykunmanchu, wisq'aykun chhikataq manam pipas wisq'arallanmantaqchu chayqa ajinatam nin:

⁸ Tukuy imatachus ruwachkanki chaytaqa nuqam yachani. Qhawariy, qan ñawpaqiykipiqa uj wisq'arasqa punkutam churani, mayqintachus manam pipas wisq'aykuyta atichkanmanchu, qantaq pisi kallpa kanki chhikapas, rimayniykunataqa uyariwankim jinaspataq manam nuqaman mana riqsiq tukuchkarqankichu.

⁹ Supaypaq tantakuyninman puriqkunaman jinataq pikunachus mana judío runakuna kachkaspa judío runakunam kayku nispa llullakuspa puriykachanku chaykunamanqa, nuqam chakiyki pampaman killpiykukuspa jamunankupaq ruwasaq, ajinamanta nuqapaq qanman munakusqayta yachanankupaq.

¹⁰ Ama sayk'uspa puriykuy nispa kamachisqaytaqa uyariwankim, chayraykum tukuy kaypachaman mana walt'aykuna jamuchkanqa chhikaqa nuqa qanman waqaychakusqayki, ajinamanta tukuy kaypachapi tiyaqkunaman pimanchus iyawninku chayta yanarinaypaq.

¹¹ Usqhayllam jamuchkani. Imachus kapusunki chaytaqa allinta waqaychakuy, ajinamanta imatachus jap'iqanayki kachkan chayta ama pipas qichuqanasunkipaq.

¹² Pikunachus mana walt'aykunamanta atipachkaq lluqsimunqaku chaykunamanqa, Diosniypaq wasimpiqa wasi japqasiqkuna kanankupaqmi churasaq, jinaspataq chay chhikamantaqa manam jayk'aqpas lluqsimpunqakuchu. Paykunapim Diosniypaq sutinta jinataq llaqtampaq sutintapas qilqaykullasaqtaq, mayqinchus Diosniypaq janaqpachanmanta jamuq musuq Jerusalén nisqam, musuq sutiytapas paykunapi qilqaykullasaqtaqmi.

¹³ ¡Imatachus Diospaq Ajayun iglesiakunaman nichkan chaytaqa, pichus ninriyuq kachkan chayqa uyarichun!’

Laodicea iglesiaman willay

¹⁴ “Laodicea iglesiapaq angelninman qilqallaytaq: Pichus Ajina kachun nisqa kachkan, pichus mana llullakuq jinataq chiqan irkataq kachkan, pichus Diospaq tukuy ruwasqankunapaq qallariynin kachkan chayqa ajinatam nin:

¹⁵ Tukuy ima ruwasqaykitaqa nuqam yachani. Manallataq chiri jinataq q'uñipas kasqaykitaqa yachanim ¡Ichapas ujpita chiri manachayqa q'uñi kaynayki allin kanman!

¹⁶ Manam chiripas q'uñipas kachkankichu manachayqa llaphim kanki, chaymantam simiymanta waq'aqirqusqayki.

¹⁷ Imaraykuchus qanqa qhapaqmi kani, tukuy imapas nuqapaqqa allillanmi kakuchkan, manallataqmi imamantapas pist'achikuchkanichu nispam ninki. Chaywampas uj khuyay, mana imayuq, wajcha, ñawsa jinataq q'arapacha kasqaykimantaqa manam riparakuchkankichu.

¹⁸ Chayrayku, imachus chiqampi qhapaqyachisunki chayta nuqamanta rantikunawaykipaq kunariyki. P'achallikunaykipaqqa yuraq p'achata nuqamanta rantikuway, ajinamanta chay p'inqay q'arapacha puriykachasqaykita qatqatakunaykipaq, jinataq ñawiykikunaman churaykukuspa manaña ñawsa kanaykipaq uj jampita rantikullawaytaq.

¹⁹ Pikunamanchus nuqa munakuni chaykunamanqa k'amiykuni jinallataq yachachinim. Ajinaqa tukuy sunquykiwan Diosman kutirimpuy.

²⁰ Qhawariy, nuqaqa punkuykipim wajakumuchkani, kunkayta uyarispachus punkuta wisq'aramuwanki chhikaqa, wasiykimanmi waykumusaq, jinaspataq qanwan kuskam mikhukusaq.

²¹ Pikunachus mana walt'aykunamanta atipachkaq lluqsimunqaku chaykunamanqa, tiyakunay chhikapim uj chhikata qusaq, imaynatachus nuqaqa atiparqani jinaspataq Tataypaq tiyakunan chhikapi tiyarikupurqani ajinata.

²² ¡Imatachus Diospaq Ajayun iglesiakunaman nichkan chaytaqa, pichus ninriyuq kachkan chayqa uyarichun!’ ”