APOCALIPSIS 16 - Dios Tatanchispaq Musuq Rimayninkuna

¹ Ch'uwa chhikamanta lluqsimuq uj athun kunkatam uyarirqani, chay kunkataq qanchis angelkunaman ajinatam nirqan: “Puriychis, jinaspataq Diospaq phiñakuynin junt'a kachkan chay qanchis pusillukunata kaypacha jallp'a pataman jich'awachamuychis” –nispa.

Diospaq phiñakuynin junt'a qanchis pusillukuna

² Ñawpaqkaq angel purirqan jinaspataq kaypacha jallp'a patamanmi pusillunta jich'awachamurqan; chhikataq tukuy pikunachus wak'apaq ch'ikullinniyuq karqanku jinataq lantintapas yupaycharqanku chay runakunamanqa uj manchay nanaykukuq lliqi unquymi jap'iykurqan.

³ Iskaykaq angeltaq qucha patamanmi pusillunta jich'awacharqan, jinaspataq uj wañuchisqa runapaq yawarninjinam quchapaq ununqa yawarman tukupurqan, jinaspataq quchapi tukuy imachus kawsachkan chaykunam wañurapurqanku.

⁴ Kimsakaq angeltaq mayukuna jinataq unu p'ullp'umuqkuna patamanmi pusillunta jich'awacharqan, jinaspataq tukuy chaykunaqa yawarmanmi tukupurqanku.

⁵ Chhikamantataq unujawapi atiyniyuq kachkan chay angelpaq ajina nisqantam uyarirqani: “Qan, pichus kanki jinataq karqankipuni, kayjinata ñak'arichinapaqqa chiqanmi kanki munasqa Dios Tata,

⁶ imaraykuchus paykunaqa ch'uwa llaqtaykipaq jinataq willaqniykikunapaq yawarnintam jich'arqanku, chayraykum kunanqa paykunaman yawarta ujyanankupaq qunki. ¡Paykunaqa chay jap'iqanapaq chaniyuqmi kanku!” –nispa.

⁷ Jaywana pata chhikamanta lluqsimuq uj kunka ajina nimuqtam uyarirqani: “Arï, tukuy atiyniyuq Dios Tata, qanmi chiqan kayniykiwan jinataq chiqanwan juchanchankiqa” –nispa.

⁸ Tawakaq angeltaq intimanmi pusillunta jich'aykurqan, jinaspataq intimanqa runakunaman ruphaykunampaqmi atiyta qurqanku.

⁹ Jinaspataq tukuyninkum manchachkay ruphaykusqa kapurqanku; chaywampas manam Diosman kutirimuchkarqankuchu, manallataqmi payman yupaychachkarqankuchu, manachayqa astawanmi pichus kay ñak'ariykunajawapi atiyniyuq kachkan chaypaq imaymana mana allin rimaykunata rimarqanku.

¹⁰ Phichqakaq angeltaq wak'apaq tiyanan kachkan chay patamanmi pusillunta jich'awacharqan, jinaspataq qhapaq suyunqa ch'amakapim kapurqan. Runakunataq nanaymantaqa qallunkunatam k'uturakurqanku;

¹¹ ajina kachkaqtimpas paykunaqa manam saqra ruwayninkunata saqichkarqankuchu, manachayqa chay nanayninkurayku jinataq lliqi unquyninkuraykuqa astawanmi janaqpacha Diospaq mana allin rimaykunata rimarqanku.

¹² Suqtakaq angeltaq Éufrates athun mayu patamanmi pusillunta jich'awacharqan, jinaspataq inti lluqsimuyniqmanta jamuq qhapaq suyu apaykachaqkunapaq chimpamunankupaqmi ununta ch'akirquchirqan.

¹³ Lijrayuq pallipaq, wak'apaq jinataq llulla willaqpaq siminkunamantaqa, jamp'atuman rijch'akuq kimsa millay saqra ajayukunam lluqsiramurqanku.

¹⁴ Chaykunataq millay saqra supaykunapaq ajayunkunam karqanku, paykunam musphay ruway rikuchiykunata ruwarqanku. Paykunaqa tukuy atiyniyuq Dioswan maqanakunankupaqmi tukuy kaypacha qhapaq suyukuna apaykachaqkunata tanthapinapaq lluqsiramurqanku. Chaytataq jayk'aqchus Diospaq athun juchanchana p'unchaynin chayamunqa chhikam ajinata ruwanqaku.

¹⁵ “Rijch'arisqa kachkaychis, imaraykuchus nuqaqa suwajinam jamusaq. Kusikuyniyuqmi pichus rijch'arisqa kachkan jinataq q'arapacha uj p'inqayta mana qhiparanapaq p'achanta waqaychakuchkan chayqa.”

¹⁶ Chhikataq qhapaq suyu apaykachaq runakunataqa hebreo rimaypi Harmagedon nisqa kachkan chay chhikamanmi tanthapimurqanku.

¹⁷ Qanchiskaq angeltaq wayraniqmanmi pusillunta jich'awacharqan, jinaspataq ch'uwa chhikamantaqa uj ajina nimuq kunkam lluqsimurqan: “¡Ruwasqañam kapun!” –nispa.

¹⁸ Chhikataq llijullijukuna, kunkakuna jinataq qhunqhunkuna imam karqan, kaypacha jallp'ataq manchaytam kharkhatirqan, chaytaq runa kasqanmantapacha ajina kharkhatiy mana jayk'aqpas kaqmi karqan.

¹⁹ Athun llaqtataq kimsamanmi phatmikurqan, kaypacha llaqtakunataq lluqllaykupurqankum; chhikataq Diosqa athun Babilonia llaqtamantam yuwatatarikurqan, ajinamanta phiñakuynimpi ñak'arichinapaq.

²⁰ Tukuy qucha chawpipi kaq jallp'akuna jinataq urqukunantinmi manaña kapurqankuchu,

²¹ janaqpachamantataq manchay athun chhijñikunam runakunajawaman t'akarakumurqan, chay chhijñikunataq ñaqa uj kustala chhika llasakunam karqan, runakunataq chay chijñi chayamusqanraykuqa Diosjawapi imaymana mana allin rimaykunatam rimarqanku, imaraykuchus ancha manchana asut'iymi karqan.