APOCALIPSIS 14 - Dios Tatanchispaq Musuq Rimayninkuna

Uwijawan jinataq ch'ikullisqa ajllisqakunawan

¹ Qhawarirqani chhikataq Sión urqu patapi sayachkaqtam Uwijata rikurqani. Paywan kuskataq pachaj tawachunka tawayuq waranqa runakunam kachkarqanku, paykunapaq umanku ñawpaniqpiqa Uwijapaq jinataq Tatampaq sutinkunawan qilqaykusqam karqanku.

² Chhikamantataq janaqpachamanta jamuq uj ch'aqwaraytam uyarirqani; chaytaq uj mayu phawchintapaq ch'aqwamusqanjina, uj manchay qhunqhumpaq chayaykumusqanjinam karqan; achkha arpa jasp'iqkunapaq wankamusqanjinam karqan.

³ Jinaspataq tiyana ñawpaqimpi, tawantin kawsaqkunapaq ñawpaqimpi jinataq machulakunapaq ñawpaqimpim uj musuq takiyta q'uchurqanku. Chay takiytaqa manam pipas yachaqayta atirqankuchu, manachayqa pikunachus kawpacha chawpimanta qhispisqa kapurqanku chay pachaj tawachunka tawayuq waranqa runakunallam yachaqayta atirqanku.

⁴ Paykunaqa warmiwan mana puñuykuq runakunam karqanku, warmikunawanqa manam khuchi juchakunata ruwachkarqankuchu. Maymanchus Uwija purichkan chayman pikunachus qatichkanku chaykunam paykunaqa kanku. Runakuna chawpimantaqa Diosman jinataq Uwijaman ñawpaqkaq jaywayjina qhispisqam karqanku.

⁵ Siminkunapiqa manam imakaq llullapas taripakunchu, imaraykuchus paykunaqa imamantapas mana tumpaykunajinam kanku.

Runapaq Churin jinataq suqta angelkunapiwan

⁶ Waj angelta rikurqani, paytaq kuska janaqpachapim phawaykachachkarqan, jinaspataq pikunachus kaypachapi kawsakuchkanku chaykunapaq, tukuy suyukunapaq, tukuy rijch'ayniyuq runakunapaq, tukuy rimay rimaqkunapaq jinataq tukuy llaqtakunapaq imam uj wiñay willayta apachkarqan.

⁷ Athun kunkanwantaq ajinatam nirqan: “Diosman athunchaychis jinaspataq yupaychaychis, imaraykuchus pay juchanchachkanqa chay p'unchaymi chayampunña. Pichus janaqpachata, kaypachata, quchata jinataq unu p'ullp'umuqkunata ruwachkarqan chayman yupaychaychis” –nispa.

⁸ Chhikamantataq iskaykaq angelqa qatirimurqallantaqmi, paytaq ajinatam nirqan: “¡Pichus tukuy suyukunata millay khuchi ruwayninkunawan machaykuchichkarqan chay Babilonia athun llaqtaqa urmaykupunmi!” –nispa.

⁹ Chhikamantataq waj angelmi paykunaman qatirirqan, chay kimsakaq angeltaq athun kunkanwan ajinatam nirqan: “Mayqimpas chay wak'aman jinataq lantinman yupaychanqa, jinallataq ch'ikullintapas uma ñawpaniqpi manachayqa makipi jap'iqanqa chayqa,

¹⁰ Diospaq phiñakusqan asut'iytam jap'iqanqa. Jinaspataq ch'uwa angelkuna jinataq Uwijapaq ñawpaqimpim ninawan jinataq azufrewan ñak'arichisqa kanqa.

¹¹ Pikunachus wak'aman jinataq lantinman yupaychanku chaykunapaq jinataq sutimpaq ch'ikullinta jap'iqachkanku chaykunapaq ñ'akarisqanku q'usñitaq wiñaypaq wiñaynintimpaqmi chimpamun, jinaspataq manam tutapas p'unchaypas samararikunanku kachkanchu” –nispa.

¹² ¡Kaypim ch'uwa llaqtapaq jinataq pikunachus kamachiykunata junt'anku jinataq Jesuspi mana iskayakuspa puriykunku chaykunapaq kallpayuq kasqan rikukunqa!

¹³ Chhikataq janaqpachamanta uj kunka ajinata nuqaman nimuqtam uyarirqani: “Kayta uyariy: ¡Kusikuyniyuqmi kanku pikunachus kunanmanta ñawpaqman Tataman riqsispa wañupunku chaykunqa!” –nispa. Arï, Diospaq ajayunqa ajinatam nin: “Paykunaqa llank'ayninkunamanta samararikupunqakum, imaraykuchus ruwayninkunam paykunawan kuska kakuchkan” –nispa.

¹⁴ Qhawarirqani chhikataq uj yuraq phuyutam rikurqani, chay phuyu patapitaq runapaq churinman rijch'akuqjina runatam rikurqani. Payqa qurimanta ruwasqa pilluwan asqatarisqa jinataq makimpiqa uj aricharisqa jusiña ayarisqam kachkarqan.

¹⁵ Diospaq wasinmantaqa waj angelmi lluqsimurqan, jinaspataq pichus phuyupatapi tiyachkarqan chaymanqa athun kunkanwan ajinata nispam wajach'arqan: “¡Jusiñaykita uqhariy jinaspataq kaypacha urikunata ruturamuspa apthapiyta qallaripuy; imaraykuchus pachaqa chayampunñam, jinaspataq urikunaqa apthapinapaq puqusqañam kapun!” –nispa.

¹⁶ Chhikataq phuyu patapi tiyachkarqan chayqa jusiñanta uqharispam kaypachaman apthapinapaq rutuyta qallarirqan, jinaspataq urikunataqa apthapipurqanmi.

¹⁷ Chhikamantataq waj angelñataqmi mayqin Diospaq wasinchus janaqpachapi kachkarqan chaymanta lluqsimurqan, payqa waj aricharisqa jusiña aparisqallataqmi karqan.

¹⁸ Jaywana patamantaqa waj angelqa lluqsimurqallantaqmi, payqa ninajawapi atiyniyuqmi karqan, jinaspataq ari jusiña aparisqa kachkarqan chay angelmanqa athun kunkanwan ajinata nispam wajarqan: “¡Chay ari jusiñaykita jap'iy jinaspataq kaypachapi kaq uva sach'akunapaq ch'ampankunata chaywan khuchuramuy, imaraykuchus urinkunaqa puqurasqañam kapun!” –nispa.

¹⁹ Chay angeltaq kaypachapim jusiñanwan uvas sach'akunapaq urinkunata khuchurarqan, jinaspataq uj athun quwuñamanmi jich'aykurqan, chaytaq Diospaq phiñakuyninmanmi rijch'akun.

²⁰ Chay uvakunataq llaqtamanta jawaniqpi ch'irwarqusqam karqanku, quwuñamantataq yawarmi lluqsimurqan, chaytukuy yawar lluqsimusqanwantaq ñaqa kunkaman chayachkaqmi uj ñaqa kimsa pachaq waranqa kapaypijina athun pampapim quchayaykukupurqan.