APOCALIPSIS 13 - Dios Tatanchispaq Musuq Rimayninkuna

Quchamanta lluqsimuq wak'a

¹ Qanchis umayuq jinataq chunka waqrayuq qucha ukhumanta lluqsimuq uj wak'atam rikurqani. Sapa uj waqrapitaq uj pilluwan churqatasqam karqan, umankunapitaq Diosman juch'uychaq sutikuna churqatasqam karqallantaq.

² Kay rikusqay wak'aqa, uj machuq'araman rijch'akuqmi karqan; chakinkunataq ukumaripaq chakinkunajina, simintaq machuq'arapaq siminjinallataq. Lijrayuq pallitaq atiyninta jinataq tiyakunan chhikatam qurqan, ajinapas ancha munayniyuq kayta imam qurqan.

³ Ujkaq umanqa wañunampaqjina chhuqriykusqam karqan; chaywampas chay chhuqriykusqaqa jampisqam kapurqan, jinaspataq tukuy kaypacha runakunaman musphararqanku, chhikamantataq chay wak'amanmi qatipurqanku.

⁴ Lijrayuq pallimanqa wak'aman atiy qusqanraykum yupaycharqanku, jinataq wak'amampas ajinata nispa yupaycharqallankutaqmi: “¿Pitaq kay wak'ajina kanri? ¿Pitaq paywan maqanakunmanri?” –nispa.

⁵ Chay wak'amanqa Diosjawamanta imaymana mana allinkuna rimaykunata rimananta jinallataq tawachunka iskayniyuq killakuna atiyniyuq kanantapas saqirqallankutaqmi.

⁶ Chhikataq ajinatam ruwarqan; Diosman, wasinman jinataq tukuy janaqpachapi kaqkunaman chay wak'aqa mana allin rimaykunawan sutichayta qallarirqan.

⁷ Diospaq ch'uwa llaqtanwan atipjanakama maqanakunantapas saqirqallankutaqmi; jinaspataq imaymana rijch'ayniyuq runakunajawapi, llaqtakunajawapi, rimaykunajawapi jinataq suyukunajawapi atiyniyuq kanampaqmi atiyta qurqanku.

⁸ Pikunapaq sutinkunachus wañuchispa jaywasqa kachkarqan chay Uwijapaq kawsay p'anqampi mana qilqaykusqa kachkan, tukuy chaykunam chay wak'aman yupaychanqaku. Chay p'anqaqa manaraq Dios kaypachata tiyt'achichkarqan chaymanta niqtimpas ñawpaqtañam qilqasqa kapurqan.

⁹ Pichus ninriyuq kachkan chayqa uyarikuchun:

¹⁰ “Pikunachus wataykusqa purinanku kanqa chaykunaqa wataykusqam purinqaku; jinallataq pikunachus athun kuchilluwan wañuchisqa kananku kachkan chaykunaqa, athun kuchilluwan wañuchisqallataqmi kanqaku.” Kaypim ch'uwa llaqtapaq kallpayuq kasqan jinataq iyaw niynimpas rikukunqa.

Kaypachamanta chimpamuq wak'a

¹¹ Chhikamantataq kaypachamanta chimpamuq waj wak'atam rikurqani. Chaytaq mut'u uwijapaq waqranjina iskay waqrakunayuqmi karqan, chaywampas lijrayuq pallijinam rimarqan.

¹² Paytaq ñawpaqkaq wak'apaq ñawpaqimpiqa payjina atiyniyuqllataqmi karqan. Jinaspataq mayqinchus wañuy chhuqrinmanta jampisqa kachkasqa chay ñawpaqkaq wak'aman kaypacha tukuy runankunantin yupaychanankupaqmi mat'iykuchkarqan.

¹³ Athun musphay ruwaykunatapas ruwallarqantaqmi. Janaqpachamantaqa runakunapaq rikuchkasqantam kaypachamam ninatapas uraqachimurqan.

¹⁴ Ñawpaqkaq wak'apaq ñawpaqimpi ruwanampaq saqichkarqanku chay rikuchiykunaniqtam kaypachapi kawsaq runakunaman sallqaykurqan, jinaspataq mayqin wak'achus athun kuchilluwan chhuqriykusqa kachkarqan chaywampas kawsakuchkallarqan chaypaq uyan lantintam lluch'irquchirqan.

¹⁵ Iskaykaq wak'amantaq chay ñawpaqkaq wak'apaq uyan lantin lluch'irqusqa kachkarqan chayman kawsayta qunapaq atiytam qurqanku, ajinamanta chay wak'apaq lantinqa rimayta atinampaq jinataq tukuy pikunachus payman mana yupaychayta munachkanku chaykunaman wañurachinampaq.

¹⁶ Jinallataq juch'uykunaman, athunkunaman, qhapaqkunaman, pist'achikuq wajchakunaman, kacharisqakunaman jinataq wata runakunaman ima pañaniq makipi jinataq uma ñawpaniqpi uj ch'ikullita tukuyninkuman churanankupaqmi kamachirqan.

¹⁷ Jinaspataq, manachus chay ch'ikulliyuq, manachayqa wak'apaq sutinniyuq, jinataq sutimpaq yupayninniyuq kachkan chhikaqa manañam pipas ranjayta jinataq rantikutapas atipurqankuchu.

¹⁸ Kaypim yachayqa riqsikunqa; pichus yuwaywan jap'iqachkan chayqa wak'apaq yupayninta yupthapichun, chay yupaytaq runapaq yupayninmi. Chay yupayqa suqta pachaq suqtachunka suqtayuqmi.