APOCALIPSIS 12 - Dios Tatanchispaq Musuq Rimayninkuna

Wawa unqukuq warmi

¹ Janaqpachapiqa uj manchay athun rikuchiymi rikhurirqan: uj warmim p'achapijina intiwan llayuykusqa rikhurirqan, killataq chakinkuna chhikapim karqan, jinataq chunka iskay quyllurkunayuq uj pilluwan churqatasqa.

² Chay warmitaq wawa unquqmi karqan, jinaspataq wawa unqukuyta munaspam unquyninwan qaparichkarqan.

Lijrayuq palli

³ Janaqpachapiqa waj rikuchiymi rikhurirqallantaq: Uj manchay lijrayuq athun puka pallim rikhurimurqan, chaytaq qanchis umakunayuq, chunka waqrakunayuq jinataq sapa uj umapi quri pillukunawan churqatasqam karqan.

⁴ Chupanwantaq kimsakaq chhika janaqpachapi kaq quyllurkunatam qatatirqan, jinaspataq kaypacha jallp'amanmi t'akawachamurqan. Chay lijrayuq pallitaq wawa unqukunan kachkarqan chay warmipaq ñawpaqimpim sayt'arqan, ajinamanta unqukuqtinjina chay wawanta mikhurqupunapaq.

⁵ Warmitaq uj qhari wawatam unqukurqan, chaymi tukuy kaypacha suyukunata ancha atiyninwan apaykachanqa. Chaywampas chay wawanqa qichuqasqam karqan, jinaspataq Diospaq jinataq tiyanan ñawpaqinman apasqam kapurqan;

⁶ warmitaq ch'usaq qasi pampaniqmanmi phawaripurqan, maypichus Diosqa kimsa wata kuskayuq pacha mikhuchinankupaq uj chhikata paypaq wakicharipusqa.

⁷ Chhikamantataq uj tupjana maqanakuymi janaqpachapi karqan: Angelkunapaq kurajkaqnin Miguelwan jinataq angelninkunawanmi chay lijrayuq palliwan maqanakurqanku. Chay lijrayuq palliqa angelninkunawan kuskaqa maqanakurqankum,

⁸ chaywampas Miguelmanqa manam atipayta atichkarqankuchu, jinaspataq paykunapaqqa manañam janaqpachapi uj chhika kapurqanchu.

⁹ Ajinamantam chay manchay lijrayuq athun palliqa chhuqawachasqa kapurqan. Chaymi ñawpaqpachapi kaq palliqa pichus saqra Supay nisqa kachkan chayqa, payqa tukuy kaypachatam sallqaykurqan. Paywan jinataq angelninkunawanmi kaypachaman chuqawachamusqa kapurqanku.

¹⁰ Chhikataq janaqpachapi uj athun kunka ajina wajach'akumuqta uyarirqani: “Diosninchispaq qhispichiynin, atiynin, jinataq qhapaq suyunqa chayampunñam, jinallataq Mesiasnimpaq atiyniyuq kasqampas chayampullantaqmi; imaraykuchus Diosninchispaq ñawpaqimpi wawqipananchiskunaman tuta p'unchay tumpaykuchkarqan chay tumpaykuqninqa chhuqawachasqam kapun.

¹¹ Wawqipananchiskunaqa Uwijapaq yawar jich'asqanwan jinataq paykunapaq willaykuna willasqankuwanmi atipapunku; kawsayninkuta apt'akuytapas manam manchachkarqankuchu, manachayqa wañunapaqqa wakicharisqam kachkarqanku.

¹² ¡Janaqpachakuna kusikuychis, jinallataq qankuna chaypi kawsakuqkunapas kusikullaychistaq! ¡Chaywampas pikunachus kaypacha jallp'api jinataq quchapi kawsakuchkanku chaykunawanqa imalla kachkanqa, imaraykuchus Supayqa uj chhika pachakunalla kananta yachakupuspaqa ancha phiñarisqam qankunajawaman uraqamuchkan!” –nispa.

¹³ Jayk'aqchus lijrayuq palli kaypacha jallp'aman chhuqawachasqa rikukupurqan chhikaqa, mayqin warmichus wawata unqukuchkasqa chayman qatiykachaytam qallaripurqan.

¹⁴ Chaywampas warmimanqa ankapaq iskay athun lijrankunatam qurqanku, ajinamanta may chhikapichus ch'usaq qasi pampaniqpi kanan kachkarqan chayniqman lijrayuq pallimanta karu chhikaman phawaripunampaq, maypichus kimsa wata kuskayuq mikhuchinanku kachkarqan chay chhikaman.

¹⁵ Lijrayuq pallitaq siminmantaqa unutam lluqsichimurqan, ajinamanta mayuman tukuchispa chay warmiman qatatichinapaq;

¹⁶ Chaywampas kaypacha jallp'am warmita yanaparirqan, imaraykuchus jallp'aqa simintam wisq'ararqan, ajinamantam ima mayutachus lijrayuq palliqa siminmanta lluqsiq unuwan ruwachkasqa chayta uquykupurqan.

¹⁷ Chayta rikuspataq lijrayuq palliqa anchatam phiñarikupurqan, jinaspataq warmipaq mirayninmanta jamuq wakin puchuqkunawan maqanakuqmi purirqan, chaykunataq pikunachus Diospaq kamachiyninkunata uyarinku jinataq Jesuspaq yachachisqankunamanjina mana iskayakuspa puriykuchkanku chaykunam kanku.

¹⁸ Lijrayuq pallitaq qucha ch'ullpaniqpim sayt'apurqan.