Daniel 5 - La Sainte Bible en Langue Yipunu

Mulambu ukaga Baltazar

¹ Kaga Baltazar amalambila baneni bandi mulambu uneni; dutalu duogu dumaba tosini; amanu malamu va misu mogu.

² Anomana unu malamu amaruma batu ubega bisanga bilora na bilora jivema abi taji andi Nabucodonosor amagusula o Ndagu Nsambi o Jerusalem. Amaronda ubisalila unuanganga, jogu na baneni bandi na bagatsi bandi na maronda mandi.

³ Kabogu bamabega bisanga bilora abimagusulu o Ndagu Nsambi o Jerusalem, kaga na baneni bandi na bagatsi bandi na maronda mandi bamabisalila unuanga malamu.

⁴ Banonu malamu bamawimbila nyimbu tsibansambi balora na balora jivema na bakunga na bamadilu na bamuiri na bamamanyi.

⁵ Vana temu eni milembu midikaka dimutu mimalabinina na mimasonanga va nsungisini na dingasa mu yibaga yivema yindagu kaga. Kaga amalaba kodu tsimilembu atsimasonanga.

⁶ Mbana kaga amagaangu na yinoru te na murima andi umabakama na mukakala yika usuruga na makulu yika uregama.

⁷ Kaga amagamuga na mangolu yiri banengili abamawijingi bambuelili na banganga na baresitsi; mbana kaga amatsingula batu badiela baBabylone rie: Mutu uotsu aguranga mirendu miemimi nopega divindugulu oduisu biduaru biyinyuru ayivu va gari dumbulu na ubenga na oduaranga musanga ulora nodila yitsiga yimurieru yibufumu.

⁸ Batu badiela botsu bakaga bamakota; tumba basamarungula uranga mirendu nesi uvega kaga divindugulu.

⁹ Adina dimareyimisa kaga na amagaangu na yinoru nesi baneni bandi bamabakama mirima.

Daniel uvindiga evindiyi yisuegu yimirendu

¹⁰ Kaga jimugetu anogulu mambu maka-ga na baneni bandi amakota o yibuku yimulambu na amavosa rie: Aa kaga, kaga abi kaga te na mutubu! Sunsa murima, guyamuelaba yinoru!

¹¹ O bufumu buagu uvu dibaala adivu na yinyunyi yibansambi. Va temu taji agu, dibaala dieni amatulasa yijalala na dujabu na diela adimabagunu na diela dibansambi. La dibandu taji agu kaga Nabucodonosor amamuvayila yivunda yibavanditsi nesi yi-abamawijingi bambuebli nesi yibanganga nesi yibaiesitsi.

¹² Mutu eni, diina diandi Daniel, agu kaga amaluga Beltassar amaba na yinyunyi yiboti na diela na dujabu na dupasu duwalila mandosi nesi uvindiga bimaga nesi dupasu dumambu maranga. Daniel anengulu, jandi oguvega divindugulu dimirendu.

¹³ Mbana Daniel amabegu ombu kaga. Kaga amamuwivula rie: Ndeʼ la Daniel, koli muJuif agumaruyila o Juda agu taji ami amabega?

¹⁴ Nyimagulu misamu miagu yiri ndeʼ guvu na yinyunyi yibansambi na guvu na dujabu na diela dineni.

¹⁵ Babanombeyila batu badiela na jogu abewijingi bambuelili uyitangila mirendu miemimi nopega divindugulu; tumba bagaarungula upindiyila mambu.

¹⁶ Nyimagulu yiri ndeʼ gurungula uvindiga na guna dupasu dumambu maranga. Pa gurungula uranga mirendu miemimi nopega divindugulu dimionyi, guduisu biduaru biyinyuru ayivu va gari dumbulu na ubenga na guduara musanga ulora na gutsana va yitsiga yimurieru o bufumu.

¹⁷ Daniel amawaka kaga rie: Kelisa bisaku biagu na vega miensili miagu ombu mutu ususu; ne nana nyugurangila mirendu noguvega divindugulu dimionyi.

¹⁸ Aa kaga, Nsambi Aguvu Uneni amavega taji agu Nabucodonosor bufumu na buneni na bundumba buotsu.

¹⁹ Mu diambu dibuneni abu amamuvega batu botsu na malongu motsu na mambembu motsu bamamulaba goma na bamamureyimina. Kaga amabokisanga aba amaronda uboka; amamatisanga aba amarondanga na amasundusanga basusu.

²⁰ Tumba anokematisa na dunangu duneni na anogalisa minima andi amatsiemusa yitsiga yiandi yibufumu na amapatulu bundumba buandi.

²¹ Batu bamamubinga na murima andi umakaluga uyibulu na amatsananga o musiru na bibulu. Amajanganga bisinga nderi bangombi na amanogulu disala. Mbana amajaba yiri Nsambi Aguvu Uneni erumi na eveyi durumu ombu agu erondi.

²² Ndeʼ Baltazar aguvu muana andi gusamakesuna diuleba gumajaba mambu meni motsu.

²³ Gumalensa Nsambi jijulu; ava gumabeyisa bisanga biNdagu Nsambi na gumabisalila unuanganga malamu, jenu na baneni bagu na bagatsi bagu na maronda magu. Gumawimbila nyimbu tsibansambi balora jivema nesi balora nesi bakunga nesi abagelabi nesi ugulu nesi ujaba diambu. Gumabusa uyitsa Nsambi aguikelisi muvumu agu nesi amagu motsu.

²⁴ La dibandu Nsambi ama-sindiyila kodu tsieni tsidikaka atsitsirenda mirendu mieni.

²⁵ Gulu mirendu amimarendu rie: MENE, MENE, TEKEL na PARS IN

²⁶ Gulu divindugulu diambu: MENE: Nsambi amatala bilima bidurumu duagu na amadusukisa.

²⁷ TEKEL: gumapitsu va mudodu na gumalabu uviolila ulenga.

²⁸ PERES: bufumu buagu bugabu na buvegu ombu bisi Mede na bisi Perse.

²⁹ Baltazar amavega diruma uduisa Daniel biduaru biyinyuru ayivu va gari dumbulu na ubenga nesi musanga ulora. Bamatubula rie: Daniel otsana va yitsiga yimurieru yibufumu.

³⁰ Vana mukolu eni Baltazar kaga jiBabylone amaboku.