Jechurë Na̧rȩrërea̧ Ma̧ȩ 10 - Biblia Pume

A̧dërämȩ ja̧ mu̧i̧tjoi̧ pio judi goa jana̧de puria̧ oa cjiaremȩ go̧ȩ i boi̧chji̧ oa

¹ Ja̧dëa ji̧ daea̧requede ado cja̧rȩmo̧ mu̧i̧tjoi̧ oa. Ju chiamȩ tjamo̧ oa daea̧reconȩ a̧dëri biramȩ oa. Go̧a̧ra̧ ëra̧ pio ju̧ri̧ra̧ ina̧mi̧ dari̧ bira̧mȩ oa daea̧reconȩ. Ado ju̧i̧ ja̧ tjübë uëmo̧ cjiaremȩde jochebürüri üdë. Jibëa̧ chamacho üdë ma̧i̧ dari̧ tataremȩde do pio judimi̧ dari̧. Ado jibëa̧ yai ju üdë, cja̧rȩmȩ gärimȩ go̧a̧ti̧mi̧ dari̧ cjiaremȩde.

² Ado jibëa̧ ichirä ado cja̧rȩmo̧ go̧ȩ i oa goaremȩde puria̧ oa cjiamȩ go̧ȩ i boi̧chji̧ oa, mu̧i̧ ia̧ oa cjiamȩ oa. Ado jibëa̧ ta üdë, mu̧i̧ chjuari ja̧ ta pio judi boë cjaeä cjiaremȩde ui ana̧räpȩ ju̧ri̧. Ado cja̧ȩta̧ra̧ri ja̧ ta üdë daburäpȩmo̧ boë cjaeä cjiaremȩde.

³ Ja̧dëa ji̧ to̧bari̧ ëna̧diämȩrȩ yo̧a̧dejȩ, pja̧rȩmȩrȩ goae tarari̧ co̧a̧mi̧ ta̧rëri̧. Ado judi ëna̧diäa̧ ji̧, dörö eari̧ cjiaji̧ri̧ judiro̧, cja̧ȩta̧ra̧ ichiri yo̧a̧ri̧rȩ cjiaji̧ri̧ pio judiro̧ dëbë yo̧a̧diro̧jo̧ȩ. To̧bari̧, dörö eami̧ ta̧rëri̧ ni̧bäji̧ri̧rȩ dëbë yo̧a̧diro̧jo̧ȩ.

⁴ Ado judiro̧ pea dëbë yo̧a̧ pio ju̧i̧ go̧ȩpaeno̧paremȩrequede, jabo a̧dëri ni̧bämȩ pio judi chjaodëri̧ tuti yo̧a̧dique: —Cjäri̧ made —yo̧a̧dique—. Go̧ȩpadëpea̧de. Goadipea̧de. Judiro̧ yo̧a̧ pio judi go̧ȩpadëpea̧de. Dörö eari̧ cjiaji̧ri̧ judiro̧, cja̧ȩta̧ra̧ ichiri yo̧a̧ri̧rȩ cjiaji̧ri̧ judiro̧ yo̧a̧ pio judi go̧ȩpadëpea̧de —yo̧a̧dique. Ado pio ju̧i̧iä go̧ȩpadëa̧reconȩ.

⁵ Ja̧dëa ji̧ cüdë daea̧ mu̧i̧tjoi̧ üdë, daburäpȩmo̧, ui ana̧räpȩmo̧ yai cjara cjiamȩ üdë, cja̧rȩmȩ tara̧ daburo cjiamȩ üdë, ado cja̧ȩta̧ra̧ri ja̧ tara̧ ui ana̧rä cjiamȩ üdë, uëräpȩmo̧ are gatëa̧dejȩ jibëa̧ ichi ju oa, mu̧i̧ chjuari ja̧ ichi ju pio ju̧i̧. A̧dëräpȩmo̧ arë gatëa̧dejȩ.

⁶ Ado jibëa̧ ichira̧ a̧dëräpȩmo̧ goë mitëmȩrȩ tarupea̧de ni̧bäpea̧ ji̧. Ja̧di ta̧rëri̧ yo̧a̧dique: —Danȩ Juan —yo̧a̧dique—. Ji̧dë ma jidatadëpade Ütë tjamo̧ judi jabo jabechji̧, jënȩ pearä judi ütarë jo̧rȩtarërea̧mi̧ japadäräpade —yo̧a̧dique—. Aja̧, Ütë tjamo̧ ja̧ quȩrä tjamo̧i̧ cjiari̧ yo̧mȩrȩ ma̧ȩ yürürequedemȩ, teracabari̧ yo̧rea̧ decjiari̧. Bucho ana̧ cjiamȩ pio ju̧i̧ ja̧ quȩrä, a̧dë oa Pareapamȩ pio ju̧i̧ ja̧ quȩrä, dabu oa, ado ui ana̧ oa Pareapamȩ pio ju̧i̧ ja̧ quȩrä ma̧ȩ yürürequedemȩ judi jo̧ȩra̧pe japadäräpea̧ pio ju̧i̧ chjiari. Tjamo̧ davä. Pio judimo̧de. Uirä cjo̧ro̧mȩ chjö̧na̧i̧ oa Pareapamȩ pio judide. Daburo cjo̧ro̧mȩ chjö̧na̧i̧ oa Pareapamȩ pio judide. Ado pio ju̧i̧ ja̧ quȩrä tjamo̧i̧ cjiari̧ yo̧mȩrȩ ma̧ȩ yürürequedemȩ, teracabari̧ yo̧rea̧ decjiari̧. Aja̧, jidatadëmȩrȩ japadäräpade davä jënȩ pearä jo̧rȩtarërea̧mi̧.

⁷ Danȩ Juan —yo̧a̧dique—, cjiadiäa̧mȩ mu̧i̧tjoi̧ judi, a̧dërämȩ ja̧ mu̧i̧tjoi̧ pio judi jibëa̧ pjurarea̧ra̧ pjurarä, 6 mu̧i̧tjoi̧ judiro̧ jibëa̧ pjurarea̧ra̧ pjura̧ duri oa pjurarä, jabechji̧ Ütërë pearä judi goadi ütarë jo̧rȩtarërea̧ pio ju̧i̧ japadäräpade. Tjamo̧ davä. Jënȩ Ütërë ea jana̧ chjadüa̧ oa ni̧bäji̧ri̧ pio ji̧ri̧iäpȩmo̧ pearä ea jana̧ chjadürërea̧mi̧, jibëa̧ mu̧i̧tjoi̧rëreji̧ri̧ pio ji̧ri̧iäpȩmo̧ pearä ea jana̧ chjadürërea̧mi̧, tjamo̧ri̧ japadäräpade. Aja̧, ja̧di ta̧rëri̧ yo̧mȩrȩ yo̧a̧dique ju chiamȩ mu̧i̧tjoi̧ üdë.

⁸ Ja̧dëa ji̧ ado ni̧bäa̧dique coa ni̧bäremȩ üdë, a̧dëri pio judiri ni̧bäremȩ üdë. Ja̧di ta̧rëri̧ yo̧a̧dique: —Jävä —yo̧a̧dique—. Mitë jävä puria̧ oa cjiaremȩ go̧ȩ i pio ju̧i̧. Mu̧i̧tjoi̧ pio ju̧i̧iä mitëvä. Danȩ, ui ana̧ yuroro yai cjara cjiamȩ pio ju̧i̧ ja̧ ichiräde. Ui ana̧räpȩmo̧, daburäpȩmo̧ yai cjara cjiamȩ pio ju̧i̧ ja̧ ichiräde. Mitë jäjo̧ȩ —yo̧a̧dique.

⁹ Pio ju̧i̧ ta̧rëa̧ oaiä, jäa̧requede mu̧i̧tjoi̧ pio ju̧i̧iäpȩ. Ado puria̧ oa cjiaremȩ go̧ȩ i boi̧chji̧ pio ju̧i̧ coaiäpȩmo̧ yürütä yo̧a̧reconȩ. Ado ja̧dëa ji̧ coa goë yürümȩrȩ yo̧a̧dique: —Jaevä. Mitëvä —yo̧a̧dique—. Jabo pio ju̧i̧ juratä earequedemȩ. Goae tjamo̧padimȩ na̧ yarä. Ȩmi̧ tarari̧ goaepadimȩ, jabo na̧ acärä ëcarami̧ tarari̧ japapadimȩ. Jabo jabechji̧, jurajo̧ȩ —yo̧a̧dique.

¹⁰ Ado coa yo̧a̧ oaiä, mitëa̧reconȩ. Puria̧ oa cjiaremȩ go̧ȩ i boi̧chji̧ pio ju̧i̧ mitëa̧reconȩ. Ado jura̧reconȩ. Ȩmi̧ tara oa jurareconȩ goae tjamo̧ oa. Jabo pio ju̧i̧ arecö̧a duri oa, ëëami̧ tarari̧ cjitëa̧dique ca̧ acäri pio judiri.

¹¹ Ado ja̧dëa ji̧ ado yo̧a̧dique ju chiamȩ mu̧i̧tjoi̧ üdë: —Aja̧, Ütë tjamo̧ judi pio mȩaiäpȩmo̧ ea jana̧ chjadüa̧ pio ju̧i̧ ado ni̧bä chjaopea̧ chiarenȩ —yo̧a̧dique—. Aja̧, Ütërë pumȩ pio ji̧ri̧iäpȩmo̧ japapea̧ pio ju̧i̧ chjiari, judi ea jana̧ chjadüa̧ pio ju̧i̧ chjiari ado ni̧bä chjaopea̧ chiarenȩ. Tjamo̧ davä. Ütë tjamo̧ judi chiri nö̧tai̧ oa cjo̧ro̧ji̧ri̧ pumȩ pio ji̧ri̧iäpȩmo̧ japapea̧ pio ju̧i̧ chjiari ni̧bä chjaopea̧ chiarenȩ. Judi ado cja̧rȩmo̧ jo̧rȩtarea̧ chiaji̧ri̧ pumȩ pio ji̧ri̧iäpȩmo̧ japapea̧ pio ju̧i̧ chjiari, ado cja̧rȩmo̧ ma̧ȩ oa ni̧bäji̧ri̧ pumȩ pio ji̧ri̧iäpȩmo̧ japapea̧ pio ju̧i̧ chjiari, judi ado cja̧rȩmo̧ taruri ja̧ pumȩ pio ji̧ri̧iäpȩmo̧ japapea̧ pio ju̧i̧ chjiari, ado judi chiri ütëti̧ pio ji̧ri̧iäpȩmo̧ japapea̧ pio ju̧i̧ chjiaribo, ado ni̧bä chjaopea̧ chiarenȩ, Ütërë ea jana̧ chjadüa̧ duri pio ju̧i̧. Aja̧, ja̧di ta̧rëri̧ yo̧mȩrȩ yo̧a̧dique mu̧i̧tjoi̧ üdë, ju chiamȩrȩ.