Juda 1 - Biblia Pume

Juda judi jearëremȩdejȩrȩ quëna̧ji̧ri̧ pio ji̧ri̧.

¹ Danȩrȩ, jo̧rȩtarequededibe. ¿Jabënȩrȩ? ¿Jabëti̧ cjianȩrȩ? ‘Jabë cjo̧ro̧ cjia jirodiro̧da’ quëna̧ jo̧rȩtamȩrȩ go̧ȩpe chjadürequededibe ca̧ oti̧. Danȩrȩ, Juda quȩmȩrequede cüdë. Santiago pio ju̧i̧di ja̧mȩrequede. Ado Jechu Quiricho pio ju̧i̧ ja̧ mu̧i̧tjoi̧mȩrȩ ja̧beparequede. Ado Ütë tjamo̧ pio judi ëna̧diäa̧ oa cjo̧ro̧ji̧ri̧ pio ji̧ri̧iäpȩmo̧ ma̧ȩ oa go̧ȩpe chjadürequededibe, Ama̧i̧ Ütërë ea̧ chja̧oerä cjo̧ro̧ji̧ri̧ oa, Jechu Quiricho pio judi jida̧ oa cjo̧ro̧ji̧ri̧ oa.

² Ji̧dë u̧i̧ ji̧ra̧pe bagari̧ eatädidibe Ütë tjamo̧ judi. Ado ji̧dë u̧i̧ ji̧ra̧pe bagari̧ cjäri̧ri̧ cjia datädidibe peaja̧di, mȩnȩro̧ a̧dë chjäte ma̧ chjupi̧ cjiari̧ jo̧rȩtarea̧mi̧ dari̧.

Na̧e chiachji̧vä oëra̧ a̧ra̧ano̧ji̧ri̧ pio ji̧ri̧iä u̧i̧pea̧ oa cjiachea oa.

³ Danȩrȩ ca̧ oti̧, ea tjamo̧requededibe. Ado danȩrȩ, cüdë pio dibëiäpȩmo̧ pearä tarupë go̧ȩpatea̧ ji̧, jabechji̧ järi tjamo̧remȩrequede a̧ro̧rȩ Jechu pio ju̧i̧iä chjätärea̧ daea̧ pio ju̧i̧ chjiari go̧ȩpapea̧ ji̧, a̧ro̧rȩ ji̧mo̧ ma daea̧ chjätärea̧ pio ju̧i̧ chjiari. Jabo cüdë pio ju̧i̧ chjiari go̧ȩpatea̧ ji̧, ano̧ mirȩ jo̧rȩtamȩpea̧requede. 'Aja̧, ‘oëra̧ a̧ra̧no̧ji̧ri̧ pio ji̧ri̧ chjiari chi̧dëeapea̧ chiaquiji̧ri̧da, ado pio ju̧i̧iä cja̧rȩmo̧ ma̧ȩ oa go̧ȩpe chjadüpea̧ chiaquiji̧ri̧da’ quëna̧ jo̧rȩtamȩrȩ ano̧ mire go̧ȩpe chjadümȩpea̧requede yaba̧. Ado pio ju̧i̧iä a̧ro̧rȩ chjätärea̧ daea̧ pio ju̧i̧ chjiari go̧ȩpatea̧ ji̧, ano̧ mire go̧ȩparequededibe ma̧ȩ oa chjadëri̧ jidapea̧ pio ju̧i̧ chjiari, tjamo̧i̧ cjiari̧ baämȩ ma̧ȩ pio ju̧i̧ chjadëri̧ jidapea̧ pio ju̧i̧ chjiari. Danȩrȩ ca̧ oti̧, chi̧dëeatarequededibe mȩnȩro̧ chjuari̧ dëbëpe chjaotä eami̧ oëra̧ a̧ra̧ano̧rea̧ oa, a̧de a̧ra̧ano̧rea̧ pio ju̧i̧, ado cja̧rȩmo̧ ma̧ȩpe bagami̧ da oa. Danȩrȩ, tjamo̧i̧ cjiari̧ baämȩ ma̧ȩ pio ju̧i̧ yürürëremȩdiibe Ütë tjamo̧ judi, a̧ro̧rȩ bucho ana̧ goapea̧ oa, a̧ro̧rȩ chjadëri̧ boeapea̧ oa, pio jiro ma̧ȩ üdë tjaoëpe bagachea oa. Tjamo̧ davä. Pio jiro ma̧ȩ üdë chjadëri̧ jida̧ oa goapea̧ oa yürürëremȩdiibe, tutia̧ oa cjiami̧ dari̧ cjiaji̧ri̧ pumȩ pio ji̧ri̧iäpȩmo̧.

⁴ Jabo cjäri̧ madiro̧jo̧ȩ, o judiro̧ ado cja̧rȩmo̧ ma̧ȩpe bagarea̧mi̧ dari̧ a̧ra̧ano̧tämi̧ cjiadiro̧jo̧ȩ. Danȩrȩ, Ütë tjamo̧ ja̧ pumȩdë pio judiro̧ goadi chjare yu̧ë a̧dopaji̧ri̧pea̧dirȩ pio dibë nö̧ta. Ado judiro̧ coëma̧ cjiari̧ cjo̧ro̧cji̧ quëna̧ jape chjaodirȩ pio dibë u̧i̧papea̧ oa, mȩnȩro̧ u̧ipea̧ oa jo̧rȩtapea̧ oa, mȩnȩro̧ pio jibë chjiari na̧e chiachea oa. Jabechji̧ mȩnȩro̧ pio jibëiäpȩmo̧ darä, ‘Jabechji̧ pumȩ chjadëdiro̧da, ma̧ȩ coëma oa a̧ra̧ano̧diro̧da’ quëna̧ jo̧rȩtatä eatadiro̧dibe. Jabo cjäri̧ madirȩ ca̧ oti̧, chji̧ chjadëdë maeara̧ jo̧rȩtaji̧ri̧rȩ a̧ra̧ano̧dirȩ judiro̧. Jabechji̧ judiro̧ ni̧bä chjaoro ma̧i̧ dari̧ yo̧dirȩ: “Aja̧, Ütërë cjäri̧ri̧ cjia da̧ chja̧oerä cjo̧ro̧mȩ pio judi china̧chja pio ji̧ri̧ baë ëba mo̧a̧ chjaorä judi, dami̧ti̧ idi̧ da oa japarä judi, jabechji̧ chjadëde” yo̧dirȩ. Jabo cjäri̧ madiro̧jo̧ȩ ca̧ oti̧, Jechu Quiricho pio ju̧i̧ chjuari jiadadiro̧jo̧ȩ, ado pio ju̧i̧ ja̧ chja̧oerä cjo̧ro̧dëri̧ cjiadirȩ. Jabechji̧ ‘Ano̧mȩ tjamo̧ pio judidida’ quëna̧tärea̧ ji̧, ‘tjamo̧ yo̧mȩ pio judi tjamo̧dida’ quëna̧tärea̧ ji̧, quëna̧dë madirȩ. Ado pio ju̧i̧iä pio jiro pumȩ pio ji̧ri̧ chjiari jabërä go̧ȩpea̧ oa cjiarëremȩde ma̧ȩ üdë no̧mȩ tjamo̧ri ja̧. Tjamo̧ davä. Judiro̧ cjiadiäa̧ japamitërä ana̧ri̧ bape chjaopea̧ pio ju̧i̧ chjiari jabërä go̧ȩpea̧ oa cjiarëremȩde.

⁵ Danȩrȩ, mȩnȩro̧ pio yoa ma̧ȩ oa peadëri ja̧ dabaji̧ri̧pea̧räbo, jabechji̧ jo̧rȩta tänȩtämi̧ cjiarequededibe mȩnȩro̧ nö̧tadärari̧ dabapea̧ oa. Danȩrȩ, Ütë tjamo̧ judi icharaita pio ji̧ri̧ Ejito quȩmȩ chiriri pio judiri go̧dü tänȩa̧rä, jabechji̧ chjadëri̧ go̧dü tänȩrëremȩdejȩrȩ. Jabo ja̧dëa ji̧ japamitë chjätä ëte, ¿tjana̧ oa japarëremȩdejȩrȩ? Tjana̧ oadë, jabechji̧ ja̧bo tänȩrëremȩdejȩrȩ o ji̧ri̧, pio jȩaiäpȩmo̧ tjamo̧ri̧ quëna̧dërëreji̧ri̧ pio ji̧ri̧. Aja̧, pio ju̧i̧ jo̧rȩta tänȩtämi̧ cjiarequededibe.

⁶ Ado danȩrȩ, a̧dëräpȩ cjiarëreji̧ri̧ mu̧i̧tjoi̧ pio ji̧ri̧ chjiaribo jo̧rȩta tänȩtämi̧ cjiarequededibe. Danȩrȩ, Ütë tjamo̧ judi tjamo̧ yo̧rea̧ yürürëremȩdejȩrȩ. Jabo o judiro̧, cjäri̧ madiro̧jo̧ȩ, Ütë tjamo̧ judi pio jibëiäpȩmo̧ yürüa̧ ja̧beparea̧ pio ju̧i̧ badëri̧ daji̧ri̧rȩ jiadarëreji̧ri̧diro̧jo̧ȩ. Ado Ütë tjamo̧ judi jibë cjiadiä tänȩrërea̧räpȩ chjadëri̧ cjiadiätärea̧ ji̧, judi yürüa̧ cjo̧ro̧mȩräpȩ ju̧ri̧ chjadëri̧ cjiadiätärea̧ ji̧, cjäri̧ madirȩ, cjiadiädëri̧ cjiarëreji̧ri̧dirȩ. Jabechji̧ tüdüa̧mi̧ darä chjadëri̧ cjiadiätärea̧ ji̧, cjiadiädëri̧ cjiarëreji̧ri̧dirȩ, jabo a̧dëri pio judiri birarëreji̧ri̧dirȩ. Ado pio ju̧i̧iä ma̧i̧ da bagönȩräpȩ ju̧ri̧ chjuari̧ tutia̧ oa cjiadirȩ yaba̧, goarijädëmȩ chatu chiamȩ chjipararira̧ yura̧ oa cjiaji̧ri̧rȩ. Aja̧, chaärea̧räpȩ ju̧ri̧ chjuari̧ tutia̧ oa cjiadirȩ bape chjaoa̧ oa cjiabëmi̧, a̧dë chjäte uapai̧ da doro ütara ëte bape chjaoa̧ oa cjiabëmi̧.

⁷ Ado danȩrȩ, pio ji̧ri̧ uëri jo̧rȩta tänȩtämi̧ cjiarequededibe no̧mȩ tjamo̧ri ja̧ cjo̧ro̧rëreji̧ri̧ pio ji̧ri̧ chjiari, mȩnȩro̧ pio ji̧ri̧ chjiari a̧dë jo̧rȩtadëpe bagachea oa. Danȩrȩ, Chodoma quȩmȩ bë ma̧ri̧rä cjo̧ro̧rëreji̧ri̧ pio ji̧ri̧, ado Gomora quȩmȩ bë ma̧ri̧rä cjo̧ro̧rëreji̧ri̧ pio ji̧ri̧ a̧dë jo̧rȩtatä eadërequededibe. Ado Chodoma bë ma̧ri̧ yuroti̧ cjiamȩ bë ma̧ri̧ bori̧rä cjo̧ro̧rëreji̧ri̧ pio ji̧ri̧bo a̧dë jo̧rȩtadëpea̧de. Jabechji̧ pio judiro̧borë jiadarëreji̧ri̧diro̧jo̧ȩ Ütë tjamo̧ ju̧i̧, a̧dëräpȩ cjiarëreji̧ri̧ mu̧i̧tjoi̧ pio judiro̧ jiadami̧ dari̧. Danȩrȩ, Ütë tjamo̧ pio ju̧i̧ jiadaji̧ri̧rȩ yürürëreji̧ri̧dirȩ jibëa̧ icjara oa a̧dë chjäte idi̧ dari̧ japapea̧ oa, china̧chja pio ju̧i̧ japapea̧ oa. Jabechji̧ jibëa̧ iodë pio ji̧mo̧i̧ chjadëri̧ ëba mo̧a̧tärea̧ ji̧, cjäri̧ madirȩ, a̧dë chjäte ma̧i̧ dari̧ japarëreji̧ri̧dirȩ. Jabechji̧ jibëa̧ io pio ji̧ri̧ ano̧ mire dae ja̧bo dae ja̧bo daji̧ri̧pea̧diro̧jȩrȩ, ado peaja̧di dari̧ japarëreji̧ri̧ni̧rȩ ivi jini̧ro̧. Jabechji̧ jibëa̧ iodë maea oa dae ja̧bo darërea̧ ji̧, ano̧ mire dae ja̧bo dae ja̧bo daji̧ri̧pea̧ni̧ro̧jȩrȩ jibëa̧ io pio ji̧ri̧. Jabechji̧ dami̧ti̧ chjai̧dë oa jape chjaoji̧ri̧rȩ cjo̧ro̧rëreji̧ri̧dirȩ. Ado pio ju̧i̧iä Ütë tjamo̧ judi bape chjaorëremȩdejȩrȩ cjo̧dëra̧ pio ju̧ri̧ra̧. Ado pio ju̧i̧iä ca̧ oti̧, na̧rȩrea̧mi̧ dari̧ cjiadiäa̧dirȩ yaba̧. Tjamo̧ davä. Ütë tjamo̧ pio ju̧i̧ jiadaji̧ri̧ pio ji̧ri̧, 'jabechji̧ cjo̧dëra̧ pio ju̧ri̧ra̧ bape chjaopadiji̧ri̧da, bucho ana̧ gäri cjitëmȩ cjo̧dëra̧ pio ju̧ri̧ra̧ bape chjaopadiji̧ri̧da’ quëna̧ na̧rȩrea̧mi̧ dari̧ cjiadiäa̧dirȩ, o ji̧ri̧iäpȩmo̧ uapai̧ dari̧ na̧rȩpea̧ oa, pio ji̧ri̧ chjadëri̧ na̧e chiaparȩpea̧ oa.

⁸ Ado danȩrȩ ca̧ oti̧, pio jiro pumȩ judiro̧ no̧mȩ tjamo̧ri ja̧ Ütë tjamo̧ pio ju̧i̧ chjuari̧ jiadarërea̧mi̧ jiadadirȩ peaja̧di dibëa̧ chjarerä goadi chjare yu̧ë a̧dopaji̧ri̧ pio judiro̧. Jabechji̧ jënȩro̧ dami̧ti̧ canȩjäa̧ oaiä, jënȩro̧ canȩjäa̧ chja̧oerä cjo̧ro̧a̧ oaiä, jënȩro̧ darämi̧ cjia̧ pio ju̧i̧iä, ‘jaeboquëda, cüdë jo̧rȩta̧mi̧ japapai̧ daquëda’ quëna̧ jo̧rȩtaji̧ri̧rȩ ma̧i̧ da chjai̧dëti̧ oa jape chjaodirȩ japarea̧mi̧dë pio ju̧i̧, jibëa̧ icjararä chjai̧dëri pio judiri cjitëmȩ china̧chja pio ju̧i̧. Jabechji̧ Ütë tjamo̧ pio ju̧i̧ ta̧rëdiätärea̧ ji̧, cjäri̧ madiro̧jo̧ȩ, ta̧rëdiädë madiro̧jo̧ȩ. ‘Jabechji̧ tjamo̧ yo̧dëmȩdida, Ütë tjamo̧ pio judi tjamo̧ yo̧dëmȩdida, ado pio ju̧i̧ ja̧ chja̧oerä cjo̧ro̧dëquëda’ quëna̧ jo̧rȩtaji̧ri̧rȩ yo̧dirȩ, chjuari̧ jiadaji̧ri̧rȩ. Ado danȩrȩ ca̧ oti̧, Ütë tjamo̧ pio ju̧i̧ jiada̧ pio ju̧i̧ uëri ya̧mi̧ ta̧rëri̧ ni̧bädirȩ a̧dëräpȩ cjiaji̧ri̧ mu̧i̧tjoi̧ pio ji̧ri̧ chjiari. Jabechji̧ judiro̧ pio ji̧ri̧ ba chia jo̧rȩtatärea̧ ji̧, pio ji̧ri̧ chjiari chjai̧dëri̧ ni̧bädëtärea̧ ji̧, jabechji̧ chjai̧dëri̧ ni̧bädirȩ pio ji̧ri̧ chjiari.

⁹ Jabo chia chia, jauëcharea̧ chiamȩborë ja̧di dari̧ japadërëremȩde Mi̧gë judi. Tjamo̧ davä. Ütë tjamo̧ ja̧ mu̧i̧tjoi̧ tjamo̧ pio judi, Mi̧gë quȩmȩ pio judi ja̧di dari̧ japadërëremȩde. Jabechji̧ judi Ütë tjamo̧ ja̧ mu̧i̧tjoi̧räbo, judi jauëchja tjamo̧räbo, jabechji̧ jibëa̧ ma̧na̧ri̧ jo̧rȩtamȩrȩ ya̧mi̧ ta̧rëri̧ ni̧bädërëremȩdejȩ Ichiae pio ju̧i̧. Jabechji̧ Mi̧gë judi Ichiae pio ju̧i̧ nö̧ta dëbë ni̧bätarërea̧rä, Moiche pio ju̧i̧rea̧ ja̧ icjara oa chjadëri̧ jidapea̧ pio ju̧i̧ chjiari dëbë ni̧bätarërea̧rä, jabechji̧ jibëa̧ ma̧na̧ri̧ jo̧rȩtamȩrȩ japadëa̧de. Jibëa̧ ma̧na̧ri̧ jo̧rȩtamȩrȩ ya̧mi̧ ta̧rëri̧ aechide ni̧bädëa̧dejȩ, jabo Ütë tjamo̧ ja̧ ma̧ȩra̧ pio ju̧ri̧ra̧ dëbë yo̧rëremȩdejȩ. Ado pio ju̧i̧iä jabechji̧, “Ano̧mȩ pio judi ya̧tädimȩ” yo̧mȩrȩ yo̧rëremȩdejȩ Ichiae pio ju̧i̧iäpȩmo̧.

¹⁰ Jabo pio jiro pumȩ judiro̧, oëra̧ a̧ra̧ano̧ji̧ri̧ pio judiro̧, cjäri̧ madirȩ, jënȩro̧ tjamo̧ri̧ dabadë pio ju̧i̧ chjiari ya̧mi̧ ta̧rëri̧ ni̧bädirȩ, airi̧ cjia airi̧ cjiaji̧ri̧rȩ. Tjamo̧ davä. Jënȩro̧ tjamo̧ri̧ dabadë pio ju̧i̧ badë jo̧rȩtadiro̧jo̧ȩ. Jabechji̧ chirirä cjo̧ro̧ji̧ri̧ pio judiro̧mi̧ dari̧ japadirȩ toiavaremi̧ darë. Jabechji̧ toiavarerë urëdi oa jo̧rȩtarea̧mi̧dëde. Tjamo̧ri̧ jo̧rȩtarea̧ chji̧ chiadë maeade, jabo jibëa̧ icjarari pio judiri cjitëmȩ pio ju̧i̧mo̧i̧ japamȩde. Ado peaja̧dimi̧ dari̧ cjo̧ro̧dirȩ pio jiro pumȩ judiro̧. Jabechji̧ tjamo̧ri̧ jo̧rȩtadëmȩ chji̧ri pio judiri cjitëmȩ jo̧rȩtarea̧ra̧ pio ju̧ri̧ra̧ jo̧rȩtadirȩ, dami̧ti̧ chjai̧dë oa jape chjaoji̧ri̧rȩ. Ado pio ju̧i̧iä, dëdë, tjamo̧ri̧ boadäräa̧ oa cjiami̧ dari̧ cjiapadirȩ chjai̧dë pio ju̧i̧iä, chjadëdë tjamo̧pe bagarea̧mi̧ dari̧, yuroparea̧mi̧ dari̧.

¹¹ Ado pio ju̧i̧iä a̧dë chjäte uapai̧ dari̧ bape chjaopadejȩrȩ pio jiro pumȩ ji̧ri̧ Ütë tjamo̧ judi. Jabechji̧ Ada̧ ja̧ joja pio ju̧i̧ cho̧rëdiä jo̧rȩtadiro̧jo̧ȩ, Cai̧ quȩmȩrea̧ pio ju̧i̧. Tjamo̧ davä. Pio judi jo̧rȩtarërea̧ no̧mi̧ darä jo̧rȩtaji̧ri̧rȩ tai̧mi̧ dari̧ cjo̧ro̧dirȩ, pio ju̧i̧ cho̧rëdiädëtärea̧ ji̧, jibëa̧ durimȩ pio ju̧i̧ ja̧bo tänȩmȩ pio ju̧i̧ cho̧rëdiädëtärea̧ ji̧. Jabechji̧ pio judi Ütë tjamo̧ pio ju̧i̧ chjuari̧ jiadarërea̧mi̧ jiadadiro̧jo̧ȩ peaja̧di. Ado danȩrȩ, Barama̧ quȩmȩrea̧ pio judimi̧ dari̧ jape chjaodirȩ peaja̧di. Jabechji̧ chëre boarea̧ pio ju̧i̧mo̧i̧ jo̧rȩtaji̧ri̧rȩ u̧i̧padiro̧jȩrȩ pumȩ ji̧ri̧. Tjamo̧ davä. Chëre pio ju̧i̧mo̧i̧ jo̧rȩtaji̧ri̧rȩ u̧i̧pe u̧i̧pe a̧ra̧ano̧diro̧jȩrȩ ba chia maea oa mitërea̧ dapea̧ oa. Ado Core quȩmȩrea̧ pio judimi̧ dadirȩ peaja̧di. Jabechji̧ Moicherea̧ pio ju̧i̧, tjamo̧ yo̧mȩ pio ju̧i̧ chjuari̧ jiadarëremȩdejȩ. Jabo Core judi ja̧di dari̧ japea̧ ba oa, ana̧ tjamo̧ri̧ bape chjaoa̧ oa cjiarëremȩde uapai̧ da tjamo̧ra̧. Ado pio jiro pumȩ pio judiro̧borë ana̧ tjamo̧ri̧ bape chjaoa̧ oa cjiapadirȩ jënȩro̧ chjuari̧ jiada̧ ba oa.

¹² Jabo danȩrȩ ca̧ oti̧, pio jiro pumȩ judiro̧, pio dibë nö̧ta ëba a̧dopea̧ oaiä a̧dë chjäte idi̧dade. Tjamo̧ davä. Mȩnȩro̧ a̧doparä, mȩnȩro̧ ori̧ bagari̧ ëba cjiapea̧ oa a̧doparä, mȩnȩro̧ ëba jurapea̧ oa a̧doparä, mȩnȩro̧ Jechu ja̧ icjara oa jo̧rȩtaji̧ri̧rȩ ëba jurapea̧ oa a̧doparä, cjäri̧ made, dibëa̧ a̧doparea̧ üdë cjari̧dami̧ dari̧ cjiade pio judiro̧borë ëba a̧dopea̧ oaiä. Jabechji̧ judiro̧ pio dibë nö̧ta ëba a̧dopapea̧ ji̧ idëri̧ cjiatärea̧ ji̧, judiro̧ ma̧i̧ dari̧ japea̧ oaiä idëri̧ cjiatärea̧ ji̧, cjäri̧ madirȩ, idëri̧ cjiarea̧ taradëdirȩ, jabo pio dibë nö̧ta ëba a̧dopatämi̧ cjiadiro̧dibe pio dibë ana̧ri̧ oëra̧diä tänȩpea̧ oa. Jabechji̧ ma̧i̧ da oëadëji̧ri̧dirȩ. Ado ui yürüdëmȩ go̧a̧ra̧ ëmi̧ dari̧ cjo̧ro̧dirȩ. Tjamo̧ davä. Dibë ma̧diä cjia tänȩa̧ oaiä, dibë u̧i̧pe chjaoa̧ oaiä, ui yürüdëmȩ go̧a̧ra̧ ëmi̧ dadirȩ. Danȩrȩ, pjaepa üdë chia ma̧na̧diibe go̧a̧ra̧ ë pio ju̧i̧. Jabo chjadëri̧ cjütärea̧ ji̧, ui oa chjadëri̧ yürütärea̧ ji̧, a̧dodë madiibe jabomo̧ u̧i̧pami̧ dari̧ japadiibe ji̧dëri̧. Peaja̧dimi̧ dari̧ japadiro̧dibe pio jiro pumȩ judiro̧. Tjamo̧ri̧ a̧dodëpadiro̧dibe, jabomo̧ u̧i̧pe chjaodiro̧dibe. Ado danȩrȩ, pio jiro pumȩ judiro̧ jurarea̧ yürüdëmȩ tomi̧ dadirȩ peaja̧di. Jabechji̧ chjadëri̧ chiami̧ dari̧ cjo̧ro̧tärea̧ ji̧, jurarea̧ mitërea̧mi̧ dapea̧rä mitërea̧mi̧ dari̧ chiatärea̧ ji̧, mȩnȩro̧ mairi̧ jurami̧ dari̧ jurapea̧ oa chjadëri̧ yürümi̧ dari̧ cjo̧ro̧tärea̧ ji̧, cjäri̧ madiro̧dibe ca̧ oti̧, yürürea̧ chiadë madirȩ jabomo̧ ma̧diä cjia tänȩdiro̧dibe. Tjamo̧ davä. Pio jiro oëra̧ a̧ra̧ano̧ji̧ri̧ pio judiro̧ yürürea̧ chiadë madirȩ. Jabechji̧ jabërä ja̧boa̧ tara, tacö̧remȩ üdë dairäpȩ a̧rȩmi̧ dari̧ go̧dü tänȩa̧ oa cjia tara, jabechji̧ yürürea̧mi̧dë madiro̧dibe.

¹³ Jabechji̧ pio jiro pumȩ judiro̧ tüdüa̧mi̧ darä cjo̧ro̧tärea̧ ji̧, jibëa̧ icjararä chjai̧dë oa boadäräa̧ oa goami̧ dari̧ cjo̧ro̧tärea̧ ji̧, cjäri̧ madirȩ, ma̧i̧ da baämȩ gö̧ma̧mi̧ dari̧ japaji̧ri̧dirȩ. Danȩrȩ, ma̧i̧ da pupuripea̧rä, jabechji̧ ui gö̧ma̧ üdë pjuru ji̧ra̧ tjamo̧ oa chia ma̧na̧de yuroräpȩmo̧, dami̧ti̧ cjari̧da oa, dabu chia oa, cjara cjara chia oa, cho̧ jere oa. Ado peaja̧dimi̧ dari̧ japadirȩ pio jiro oëra̧ a̧ra̧ano̧ji̧ri̧ pio judiro̧. Jabechji̧ gö̧ma̧ üdë dami̧ti̧ cjari̧da oa yuroräpȩmo̧diä tänȩmi̧ dari̧ japadirȩ peaja̧di pio jiro pumȩ judiro̧. Jabechji̧ judiro̧ dami̧ti̧ idi̧ oa jape chjaoa̧ oaiä, judiro̧ ma̧i̧ da chjai̧dë oa jape chjaoa̧ oaiä, jabechji̧ yuroräpȩmo̧ chia ma̧na̧mi̧ dari̧ na̧rȩ chjaodiro̧dibe dami̧ti̧ chjai̧dë oa. Ado pio ju̧i̧iä ca̧ oti̧, abürü bagamȩmi̧ dari̧ cjiadirȩ peaja̧di. Jabechji̧ abürü bagamȩ üdë jibëa̧ no̧rämo̧ chjadëri̧ baätärea̧ ji̧, ütara̧ tjamo̧i̧ baätärea̧ ji̧, cjäri̧ made, ütara̧ tjamo̧i̧ bagadëmȩde, jabo oëra̧ti̧ oa baäde cja̧rȩmȩ no̧rämo̧ bagurarea̧ decjiari̧. Ado peaja̧dimi̧ dadirȩ pio jiro oëra̧ a̧ra̧ano̧ji̧ri̧ pio judiro̧. Danȩrȩ, judiro̧ cja̧rȩmȩ coëma maea oa a̧ra̧ano̧tärea̧ ji̧, coëma cjiari̧ baämȩ no̧rämo̧ tai̧mi̧ dari̧ cjo̧ro̧tärea̧ ji̧, cjäri̧ madirȩ, oëra̧ti̧ oa ni̧bäji̧ri̧mi̧ dari̧ a̧ra̧ano̧diro̧jȩrȩ. Ado pio ju̧i̧iä pio judiro̧ a̧dë chjäte bagönȩ tjamo̧räpȩ ju̧ri̧ bucho ana̧ tutia̧ oa cjiapadirȩ, goarijädëmȩ bagönȩ tjamo̧räpȩ ju̧ri̧.

¹⁴ Ado Eno̧ quȩmȩrea̧ pio judiborë ni̧bärëremȩde pio jiro pumȩ pio ji̧ri̧ chjiari. Tjamo̧ davä. No̧mȩ tjamo̧ri ja̧ pio ji̧ri̧ chjiari jabërä ni̧bärëremȩde. Ado Eno̧ quȩmȩrea̧ judi, ¿chjiade? Chjiadëde, jabechji̧ Ada̧ pio judiri ja̧mȩde. Danȩrȩ, Ada̧ judi no̧rirëremȩdejȩ Che pio ju̧i̧. Ado ja̧dëa ji̧ Ada̧ pio judiri ja̧ji̧ri̧ pio judiro̧ ano̧ mire nö̧rirëreji̧ri̧diro̧jȩrȩ pumȩ ji̧ra̧ oa, goëje ji̧ra̧ tjamo̧pe järea̧mi̧ dari̧. Aja̧, 6 co ano̧ mire nö̧rirërea̧ duri oa, Eno̧ quȩmȩ pio judi, Ada̧ pio judiri ja̧mȩ pio judi ara̧ oa cjiarëremȩde. Ado pio judiborë ni̧bärëremȩde jabërä pio jiro pumȩ pio ji̧ri̧ chjiari, oëra̧ a̧ra̧ano̧ji̧ri̧ pio ji̧ri̧ chjiari. Jabechji̧ Ütërë ea jana̧ chjadüa̧ oa ni̧bämȩrȩ ja̧di ta̧rëri̧ yo̧rëremȩde: Ta̧rëchji̧vä. “Aja̧, Ano̧mȩ pio judi acji ma̧na̧pade. Jabechji̧ ütararea̧mi̧dëri̧ cjiaji̧ri̧ pio ji̧ri̧ nö̧ta acji ma̧na̧pade a̧dëriji̧ri̧ mu̧i̧tjoi̧ pio ji̧ri̧ nö̧ta, chjai̧dë chiadëji̧ri̧ pio ji̧ri̧ nö̧ta.

¹⁵ Jabechji̧ pumȩ ütëbodärä oa ütarapea̧ oa, chiriräpȩti̧ oa cjo̧ro̧ji̧ri̧ pio ji̧ri̧ ütarapea̧ oa acji ma̧na̧pade. Ado Ütë tjamo̧ pio ju̧i̧ chjiari jo̧rȩtadëri̧ cjiaji̧ri̧ pio ji̧ri̧, jabechji̧ bape chjaopadejȩrȩ pio jȩaiäpȩmo̧ jiada̧ ba oa, pio jȩaiäpȩmo̧ chjai̧dëri̧ japea̧ ba oa. Aja̧, Ütë tjamo̧ pio ju̧i̧ chjiari jo̧rȩtadëri̧ cjiaji̧ri̧ pio judiro̧, ado Ütë tjamo̧ pio ju̧i̧ chjiari chjai̧dëri̧ ni̧bäji̧ri̧ pio judiro̧, jabechji̧ bape chjaoa̧ oa cjiapadirȩ.” Aja̧, ja̧di ta̧rëri̧ yo̧mȩrȩ yo̧rëremȩde Eno̧ quȩmȩrea̧ pio judi pio jiro pumȩ pio ji̧ri̧ chjiari jabërä.

¹⁶ Jabechji̧ pio jiro pumȩ judiro̧ chjadëri̧ jo̧rȩtatärea̧ ji̧, ji̧dë ma goaedëri̧ ni̧bädirȩ. Ji̧dë ma ma̧ȩ goaedëti̧ oa ni̧bädirȩ o ji̧ri̧iäpȩmo̧ aechide ya̧ji̧ri̧rȩ. Jabechji̧ judiro̧ tüdüa̧mi̧ darä cjo̧ro̧tärea̧ ji̧, jibëa̧ icjararä chjai̧dëri pio judiri cjitëmȩ jo̧rȩtarea̧ maeara̧ jo̧rȩtaji̧ri̧rȩ cjo̧ro̧dirȩ, dami̧ti̧ chjai̧dë oa jape chjaoji̧ri̧rȩ. Jabechji̧ jibëa̧ chji̧rämo̧ jo̧rȩtaji̧ri̧rȩ cjo̧ro̧dirȩ, ‘o ji̧ri̧ u̧i̧ ba chia tjamo̧quëda’ quëna̧ jo̧rȩtaji̧ri̧rȩ. Tjamo̧ davä ca̧ oti̧. Pio jibë chjiari ji̧dë ma goaeri̧ ni̧bädirȩ. Ado o ji̧ri̧ chjadëri̧ a̧dotärea̧ ji̧, cjäri̧ madiro̧jȩrȩ, jabomo̧ gari̧pe gari̧pe ni̧bädiro̧jȩrȩ goae tarari̧ u̧i̧papea̧ oa, jënȩro̧ dae ja̧bo dae ja̧bo daea̧ pio ju̧i̧ mitërea̧ dapea̧ oa, o judiro̧ pio jibëiäpȩmo̧ cjäri̧ri̧ cjia daji̧ri̧rȩ yürüpea̧ oa.

¹⁷ Jabo danȩrȩ ca̧ oti̧, Ano̧mȩ Jechu Quirichorë chjadüa̧ pio judiro̧ jabërä yo̧rërea̧ pio ju̧i̧ chjadëri̧ jo̧rȩtatäreji̧ri̧nȩrȩ. Aja̧, pio dibë eamȩrȩ yo̧requededibe ca̧ oti̧. Judiro̧ jabërä yo̧rërea̧ pio ju̧i̧, ji̧dë duri oa ano̧ mire cjo̧ro̧paji̧ri̧ pio ji̧ri̧ chjiari jabërä yo̧rërea̧ pio ju̧i̧ chjadëri̧ jo̧rȩtatäreji̧ri̧nȩrȩ.

¹⁸ Danȩrȩ ja̧di ta̧rëri̧ yo̧rëreji̧ri̧dirȩ: “Aja̧, cjiadiärea̧ japamitë üdë ma̧na̧pea̧ ji̧ querediärä, o judiro̧ badë dapadiro̧dibe. Airi̧ cjia airi̧ cjia daji̧ri̧rȩ ya̧padiro̧dibe, chjaocjiaji̧ri̧rȩ. Jabechji̧ Ütë tjamo̧ pio ju̧i̧iä goae tjamo̧dë pio ju̧i̧ jape chjaoji̧ri̧rȩ cjo̧ro̧padirȩ, jibëa̧ icjarari pio judiri cjitëmȩ chjai̧dë pio ju̧i̧mo̧i̧ japaji̧ri̧rȩ” yo̧rëreji̧ri̧dirȩ pio ji̧ri̧ chjiari.

¹⁹ Ado danȩrȩ ca̧ oti̧, pio judiro̧ tjamo̧dirȩ mȩnȩro̧ jadüchiami̧ bubami̧ dari̧ cjo̧ro̧tä eaji̧ri̧ judiro̧. Pio judiro̧ tjamo̧dirȩ mȩnȩro̧ ütëborë Tjo tjamo̧ pio ju̧i̧iä cja̧rȩmȩ chji̧ chiami̧ dari̧ jo̧rȩtadëtä eaji̧ri̧ judiro̧, mȩnȩro̧ ade cjiami̧ dari̧ cjiatä eaji̧ri̧ judiro̧. Jabechji̧ Ütë tjamo̧ ja̧ Tjo pio ju̧i̧ chiadë madiro̧jo̧ȩ. Ado pio ju̧i̧iä Tjo tjamo̧ pio judi jo̧rȩta tänȩa̧mi̧ japadë madirȩ jabo jibëa̧ icjararä chjai̧dëri pio judiri cjitëmȩ jo̧rȩtarea̧ maeara̧ jo̧rȩtaji̧ri̧rȩ jape chjaodirȩ.

²⁰ Jabo danȩrȩ ca̧ oti̧, dibë ea tjamo̧mȩrȩ yo̧mi̧ dari̧ go̧ȩpe chjadürequededibe. Danȩrȩ, dibëa̧ dibëti̧ra̧ chia ju chiaparȩchji̧vä ji̧dë u̧i̧ chjuari̧ quëna̧pea̧ oa. Jabechji̧ Ütë tjamo̧ pio judi yürürërea̧ ma̧ȩ pio ju̧i̧iä ju chiaparȩchji̧vä dibëa̧ dëbëti̧ra̧ chia, to tacö̧ urëdi tjamo̧ oa cjiami̧ dari̧ quëna̧pea̧ oa, ji̧dë u̧i̧ chjuari̧ quëna̧pea̧ oa. Ado Ütë tjamo̧ pio ju̧i̧ ji̧dë ma ni̧bächji̧jo̧ȩ. Jabechji̧ Tjo tjamo̧ pio judi ju chiarea̧ yürüa̧ oaiä, ji̧dë ma ni̧bächji̧jo̧ȩ.

²¹ Ado Ano̧mȩ Jechu Quiricho pio ju̧i̧ jidataji̧ri̧rȩ cjo̧ro̧chji̧vä. Jabechji̧ pio dibë cjäri̧ri̧ cjia damȩ pio ju̧i̧ jidatachji̧jo̧ȩ, ibë bucho ana̧ cjo̧ro̧rea̧ yürera̧pamȩ pio ju̧i̧. Jabo danȩrȩ, mȩnȩro̧ pio ju̧i̧ jidata nö̧ta, mȩnȩro̧ pio yoa chirirä cjo̧ro̧a̧ nö̧ta, jabechji̧ dibëa̧ chja̧oerä cjo̧ro̧dëchji̧vä, jabo Ütërë ea̧ chja̧oerä ji̧dë ma tutia̧ oa cjiami̧ dari̧ cjo̧ro̧chji̧vä oëra̧diärea̧ decjiari̧.

²² Ado danȩrȩ, baebaeami̧ dari̧ jo̧rȩtaji̧ri̧ pio ji̧ri̧, chjara chiami̧ dari̧ jo̧rȩtaji̧ri̧ pio ji̧ri̧, jabechji̧ cjäri̧ri̧ cjia dachji̧jȩrȩ, Ütë tjamo̧ ja̧ ma̧ȩra̧ pio ju̧ri̧ra̧ chjadëri̧ a̧dorea̧mi̧ dari̧.

²³ Ado o ji̧ri̧, uapai̧ dari̧ cjo̧ro̧ji̧ri̧ pio ji̧ri̧, jabechji̧ jo̧ȩra̧pe mitëmi̧ dari̧ a̧dochji̧jȩrȩ cjo̧dë tjori pio judiri mu̧i̧ go̧dü tänȩmi̧ dari̧. Ado o ji̧ri̧ peaja̧di cjäri̧ri̧ cjia daji̧ri̧rȩ a̧dochji̧jȩrȩ ana̧ri̧ oëra̧diäji̧ri̧ pio ji̧ri̧. Jabo uapami̧ dari̧ na̧e chiachji̧vä ca̧ oti̧, pio mȩnȩro̧borë pio jiro chjai̧dë oaiä oëra̧diächea oa, pio mȩnȩro̧borë chjai̧dë oaiä boadäräa̧ oa cjiami̧ dari̧ cjiachea oa.

Cjiadiärea̧ Ma̧ȩ

²⁴ Jabechji̧ Ütë tjamo̧ pio ju̧i̧iäpȩmo̧ ma̧ chjacjiamȩri̧ jo̧rȩtapea̧de yaba̧. Jabechji̧ a̧ro̧rȩ oëra̧diächea oa chjadëri̧ jidarea̧ chiade. A̧ro̧rȩ chjai̧dë oaiä boadäräa̧ oa cjiami̧ dari̧ cjiachea oa peaja̧di chjadëri̧ jidarea̧ chiade. Ado pio ju̧i̧iä jabechji̧, pio ju̧i̧iäpȩmo̧ ma chjacjiamȩri̧ jo̧rȩtapea̧de. Jabechji̧ a̧ro̧rȩ a̧dëräpȩ ju̧ri̧ chjadëri̧ go̧düdäräpea̧ oa, a̧ro̧rȩ pio ju̧i̧iäpȩ chjadëri̧ ëba cjiapea̧ oa, jidarea̧ chiade. Tjamo̧ davä. A̧ro̧rȩ a̧dë chjäte tatari̧ cjiamȩräpȩ chjadëri̧ go̧düdäräpea̧ oa, a̧ro̧rȩ chjai̧dë chiadë maearë co chjami̧ dari̧ cjiadäräpea̧ oa, jabechji̧ jidarea̧ chiade davä, a̧ro̧rȩ pio ju̧i̧ ja̧ dëbëräpȩ a̧dë chjäte ma̧ chiadëri̧ cjiapea̧ oa. Ado pio ju̧i̧iä, dëdë chjacjiamȩri̧ jo̧rȩtapea̧de.

²⁵ Jabechji̧ pio judimo̧de ibëa̧ Ütë judi. Ado cja̧rȩmo̧ pio ju̧i̧iä chjätärea̧ dadë marea̧rȩ jabo pio ju̧i̧iämo̧i̧. Ado pio ju̧i̧iä ji̧dë ma chjacjiamȩri̧ jo̧rȩtapea̧de ca̧ oti̧. Jabechji̧ ibëa̧ Ano̧mȩ Jechu Quiricho judi pio ibë chjiari ano̧ mire ja̧borërea̧ oaiä, chjätärea̧ yürürëremȩdiibe. Ado pio ju̧i̧iä, Jechu judi pio ibë chjiari tuti japea̧ pio ju̧i̧iä, jabechji̧ chjacjiamȩri̧ jo̧rȩtarea̧ darea̧ro̧jo̧ȩ Ütë tjamo̧ pio ju̧i̧. Ado pio ju̧i̧iä jabechji̧, ji̧dë ma chjacjiamȩri̧ jo̧rȩtapea̧de. Pio ju̧i̧iäpȩmo̧ ji̧dë ma ma̧ȩ goaera̧ ni̧bäpea̧de. Jabechji̧ a̧dë chjäte jauëchja cjiari̧ cjiamȩde. Ado cja̧rȩmo̧rȩ nö̧tadärärea̧mi̧dëri̧ cjiamȩde. Jabechji̧ Ano̧mȩ tjamo̧de. Dai oa cjiamȩ ja̧ Ano̧mȩde. Pumȩ ütëbodärä ja̧ Ano̧mȩde. Ado danȩrȩ, pearä judiräri ja̧mȩde. Bucho ana̧mȩde. Jabechji̧ cjiamȩde. Ado pio ju̧i̧iä ji̧dë ma chjacjiamȩri̧ jo̧rȩtapea̧de ca̧ oti̧. Ji̧dë ma ma̧ȩ goaera̧ ni̧bäpea̧de. Aja̧ ca̧ oti̧, ja̧di dari̧ japapea̧de. Aja̧, pio ju̧i̧mo̧i̧ ma̧ȩ oa go̧ȩpe chjadürequededibe ca̧ oti̧. Cjo̧ro̧ cjiachji̧ibe. Dibëa̧ omȩ, Juda