Tito 3 - Popoluca Sayula New Testament

Nat iyo'ygawa'n cupʉcpajyat

¹ Tsawigʉs̈ ma jayaumayga iguimanda̱tcáj gobernadojrat mit autoridajat, ma cuji'cs̈iga iguiwatcawa'n nu'pʉjʉn cosa oyway.

² Magatucotsca nepʉn, magatsuguinwatca, ma jayawanga, ma respeta̱tca nu'pʉjʉn jayajwat.

³ Mit ʉjtsat ámbanu natontojo'jcatate, nagajayaumaygawu, natsʉ̱ngapate togoyic, nawatcawey lo que iyo'tway najo̱jtat mit lo que nas̈jo̱tju'pcaway, nawatí̱jcau mal, na-angau jeme ijtʉpay, mit jayajwat nas̈-angawey mit nani-angʉjʉu nanu'pʉjʉjnat.

⁴ Po ayé Dios jeme nas̈salva̱tcaway nas̈actujawigau ni'c je' oyo'c, mit je' iwangʉs̈p nu'pʉjʉn jayajwat.

⁵ Je' nas̈salva̱tcau ni'c nas̈-ayo̱wis̈cau, caje' ni'c nawatcau oy pa Dios nas̈pʉctsougáj. Je' nas̈limpia̱tcau pa nanamjátca, mit Espíritu Santu nas̈watcau as̈am namjayajwat.

⁶ Mit Dios nas̈moygau Espíritu Santu mit may favor ni'c nacupʉjcap Jesucristu jeme nas̈salva̱tcapay,

⁷ mit je' nas̈yacs̈icninʉmgap ni'c nas̈wano'jcau, pa we'n napʉctsougáj ayé vida cacʉs̈ámpay jeme na-atsʉ̱ngapay.

⁸ Iyacs̈ta'cway ayé tʉnyʉmway. Mit tʉnwamp pi ajque's̈ ayʉ̱́j cosajat, pa we'n jeme icupʉjcapay Dios ma cuji'cs̈iga iguiwatcawa'n oy. Oy nawátca we'n, ni'c ayé pichimp oy pa nu'pʉjʉn jayajwat.

⁹ Camwatcʉs̈ cuenta jeme tʉ'tscotscapay, jeme inʉ'jutcapay ampay jayajwat, jeme i-acchu̱chigapay tsuguin mit jeme ituni-ago'jcʉjʉpay ley. Mit ayé jalmanu mit caservia̱tp pa neti.

¹⁰ Te tu'c jayau iwatp división mit cupʉcpajyat, che'cta'c mechpac mit te cajayaumayp, ingajamunipʉjcʉp.

¹¹ Injawip ni'c tu'c jayau wename'way yo'yp togoyic mit iwatp mal, mit tsʉ̱nap condena̱tic ni'c we'n iguiwat.

Pablo itsawip Tito

¹² Cuandu tʉ-ajyu'jtawa'n Artemas o Tíquico, cuji'cs̈i inmi'nwa'n nʉ'jcopac Nicópolis mam tʉtsʉ̱nawa'n, ni'c tʉmpensa̱tp jem tʉs̈nas̈wa'n payic.

¹³ Majyigʉs̈ Zenas abogajna' mit we'ney Apolos, mit nʉs̈ yacta̱jcʉs̈ oymanac, mit moygʉs̈ ma iguigatogoygac neti.

¹⁴ Mit we'ney ma pʉctanga ayé cupʉcpajyat mam intsʉ̱nga pa iguiwatcawa'n cosa oyway, pa ma majyiga jeme nesita̱tijcatway, ma pichin oy lo que iwatcapay.

Ultimu saludu

¹⁵ Nu'pʉjʉn tsʉ̱ngapay mit ʉ̱ is̈saluda̱tcap. Saluda̱tcʉs̈ ayé cupʉcpajyat jeme nas̈wangapay. Dios pi is̈moygac favor minu'pʉjʉjnat. Amén.