Tito 1 - Popoluca Sayula New Testament

Pablo ija'jyap Tito

¹ Ʉ̱ Pablo. Tʉnservia̱jtap Dios mit tʉs̈-apóstol Jesucristu ni'c je' tʉs̈ajyu't. Tʉs̈yac pa tʉs̈actugupʉjcʉs̈wa'n más jeme Dios icupiugʉs̈way, mit pa ma is̈capca lo que iyacs̈ta'cway pa ma adora̱tca Dios.

² Naservia̱tcajap Dios ni'c je' nas̈moygap vida cacʉs̈ámpay, mit ayé na-atsʉ̱ngap. Mit ayé Dios jeme cawe̱tpay nas̈prometia̱tcajau ayé vida desde ámbanu.

³ Mit meru itiempuni'c Dios nas̈actujawigau lo que inʉmway ni'c tʉs̈yac pa tʉs̈nʉmdacyo'ywa'n ayé, ni'c we'n tʉs̈manda̱t ayé Dios jeme nas̈salva̱tcapay.

⁴ Mi̱ tʉsaluda̱tp, Tito, ni'c tʉ-e'p as̈am tʉ̱wáy iyacs̈ta'cway ni'c incupʉcp lo que ʉ̱ tʉncupʉcpay. Dios Nate̱jat mit el Señor Jesucristu jeme nas̈salva̱tcapay pi is̈moygac favor, pi is̈-ayo̱wis̈cac, pi is̈moygac paz.

Ti iwatámpay Tito en ayé isla Creta

⁵ Ʉ̱ tʉyac mi̱ en ayé isla Creta pa pi oyac nu'pʉjʉn cosa jeme togoypay, mit pa pi yajcʉs̈ jayajwat ma cuida̱tca cupʉcpajyat en cada nʉ'jcopac as̈am tʉmanda̱jt mi̱.

⁶ Cupiu jeme catsʉ̱napay culpa̱tic, jeme ijtʉpay tu'gujyu ito's̈ay. Iwajyat ma cupʉjca mit nepʉn maganʉm ni'c yo'ygapnaj mal, mit maganʉmga ni'c cajayaumaygap.

⁷ Ni'c jeme icuida̱tpay cupʉcpajyat magatsʉ̱na malninʉmic ni'c je' yos̈watp mit Dios. Maganimʉjninʉjmʉ je'yu, maga-awa'ni-í̱c, caje' mu'gajayau, caje' tsuguinjayau, magawanwit jaytumi̱n,

⁸ ma pʉctsou oymanac tʉcyo'ypajyat, ma wa'n lo que oyway, magatʉ'tswatu neti, ma yo'y yacs̈ic, ma yo'y limpiu as̈am Dios iguiwa'n, ma jawi lo que iwatpay,

⁹ ma mutan mʉgʉc Dios ipalabra jeme iyacs̈ta'cway as̈amu tʉs̈ajque's̈cajaj pa ma oya-ey itsawi mit oyway ama̱s̈an, pa we'n i-awatujcʉs̈áj jeme inʉmgapay jatu'c cosa.

¹⁰ Ni'c itp mayo'c jayajwat jeme cajayaumaygapay, jeme tʉ'tscotscapay, jeme iwe̱jta̱jcapay jayajwat, po más iwatcap ayé cosajat ayé judíujat.

¹¹ Aye'jat oy na-awatujcʉs̈ ni'c i-actogoyda̱jcap tu'c familia. I-ajque's̈cap jeme ca-oyway pa igui-actsʉ̱ngawa'n tumi̱n.

¹² Mit tu'c je'jat iprofetajat inʉm ni'c Cretajatway we̱tí̱jcap, mit je'jat as̈am mal-aníma̱jtat, caygapu po candʉ'jnat pa iyos̈watcawa'n.

¹³ Ayʉ̱́j iyacs̈ta'cway lo que inʉmway ayé profeta. Jemni'c che'cta̱jcʉs̈ mʉgʉc pa ma cupʉjca iyacs̈ta'cway.

¹⁴ Magacupʉjca we̱tcuentujat i-ampiugapay judíujat. Magawatca cuenta iguimanda̱tcáj jayajwat jeme icuyaguigapay lo que iyacs̈ta'cway.

¹⁵ Nu'pʉjʉn tsʉ̱nap limpiu pa jeme ipensa̱tcapay limpiu, po pa jeme ipensa̱tcapay mal mit jeme cacupʉjcapay, nejʉmay cosa iga-e'pcap limpiu, mit ipensa̱tcap puru mal, mit catu'mp ijo̱jtat cuandu iguiwatca mal.

¹⁶ Inʉmgap ni'c i-is̈capcap Dios, po caje' iyacs̈ta'cway ni'c igawatcap oy. Mit Dios iga-e'po'jcʉs̈ʉp ayé jayajwat ni'c cajayaumaygap, mit nunca ca-oyap iguiwatca oy.