San Mateo 6 - Popoluca Sayula New Testament

Nat nas̈yacwa'n limosna

¹ ’Nicuidá̱tcʉjʉ. Campensa̱tca is̈watcawa'n oy jayau-awa'tsam pa je'jat is̈-e'pcáj. Ni'c te inwatcap we'n, is̈camoygáj nejʉmay premiu Dios Nate̱jat tsajpni'cway.

² Mit is̈yajcawa'n limosna pa pro̱wjwájat, camactujawiga nu'pʉjʉn jayajwat lo que inwatcapay, ni'c we̱tpajyat we'n iguiwatca mam i-adora̱tca judíujat mit calleni'c. Je'jat niwatcʉjʉpu as̈am oyjayajwat pa jayajwat ma nʉmga ni'c iwatcap oy. Iyacs̈ta'cway tʉnʉmgʉs̈ap ni'c je'jat ipʉctsougaway ayé fama iwangapay.

³ Mit is̈yajcawa'n limosna pa pro̱wijat, camactujawiga ne in-amigujat.

⁴ Pa we'n anu'mu is̈yajcawa'n inlimosna mit Dios Nate̱jat jeme i-e'pay lo que inwatpay anu'mu is̈moygáj premiu.

Nat na-ora̱tcawa'n

⁵ ’Mit in-ora̱tcawa'n, camwatcawit as̈am we̱tpajyat ni'c je'jat iwangap i-ora̱tcawa'n tena mam i-adora̱tca judíujat mit calle esquinani'jcat. Iwatcap we'n pa ma igui-e'pcac jayajwat. Iyacs̈ta'cway tʉnʉmgʉs̈ap ni'c je'jat ipʉctsougaway ayé fama iwangapay.

⁶ Po in-ora̱tcawa'n tʉ́gʉyga intujugujmat mit atújca tʉc-ájw, mit in-ora̱tcajáj Dios Nate̱jat intu'gujmatu, mit Dios Nate̱jat jeme i-e'pay lo que inwatpay anu'mu is̈moygáj premiu.

⁷ ’Mit in-ora̱tcawa'n, camtʉ'ts-ora̱tcayu as̈am iguiwatca ayé jayajwat iga-is̈capcapay Dios, ni'c je'jat inʉmgap ni'c Dios iguimaraugáj te cotscap mayo'c.

⁸ Camwatca as̈am je'jat ni'c Dios Nate̱jat ijawip lo que inyesita̱tcapay antes is̈yo'tcajawa'n.

⁹ Mijchat orá̱tca yename: Nate̱jat, mi̱ mitsʉ̱nap yucm, ʉjtsat yam tʉ-oyninʉ́mga mi̱.

¹⁰ Mi̱ yam manda̱t. Tʉwátca lo que mi̱ inwa'námpay. As̈am yucm iguiwatca, wename-ey ʉjtsat yam tʉwátca na̱s̈ni'c.

¹¹ Moygac mi̱ tʉncaygámpay pa cada s̈ʉjw,

¹² Mit perdoná̱tcajac lo que tʉpʉjquijatway, as̈am ʉjtsat yam tʉmperdona̱tcap jeme tʉs̈pʉjquijatway.

¹³ Mit cammoygac laj tʉs̈tenta̱tcáj, po libra̱tcac de nu'pʉjʉn mal. Ni'c mi̱ ayé mimanda̱tpay, mit inaguep nu'pʉjʉn poder, mit mi̱ mi-oyninʉmic pa nu'pʉjʉn tiempu. Amén.

¹⁴ ’Ni'c te imperdona̱tcap jayajwat jeme is̈watcajapay mal, we'ney Dios Nate̱jat tsajpni'cway is̈perdona̱tcámpey,

¹⁵ po te ingaperdona̱tcap jayajwat jeme is̈watcajapay mal, we'ney Dios Nate̱jat is̈caperdona̱tcámpey ayé mal inwatcapay.

Nat na-ayuna̱twa'n

¹⁶ ’Mit inayuna̱tcawa'n, camniwatcʉjʉ triste as̈am ayé we̱tpajyat. Je'jat niwatcʉjʉp triste pa jayajwat ma igui-e'pcac ni'c ayuna̱tcap. Iyacs̈ta'cway tʉnʉmgʉs̈ap ni'c je'jat ipʉctsougaway ayé fama iwangapay.

¹⁷ Po inayuna̱tcawa'n, pi yo'yga bien oyáguic, ma ji'jca injo̱tat,

¹⁸ pa jayajwat maga-e'pca ni'c mi-ayuna̱tcap, solo ma is̈-e'pcac Dios Nate̱jat jeme tsʉ̱napay mit mijchat, mit je' is̈moygáj premiu.

Riqueza tsajpni'cway

¹⁹ ’Camapʉcmujca may tumi̱n yam na̱s̈ni'c mam igui-actogoygáj wech mit chijtit, mit mam nu'mpajyat itʉctʉ́gʉyga mit inu'mga.

²⁰ Pensá̱tca más pa intsʉ̱ngawa'n oy tsajpni'c, mit ayé as̈am tu'c riqueza jeme catogoypay, mit wech ne chijtit iga-actogoygáj, ne nu'mpajyat cacoygap jem.

²¹ Jeme iwangapay may tumi̱n yam na̱s̈ni'c, ayé iguijo̱tju'pcap. Mit jeme iwangapay itsʉ̱ngawa'n oy tsajpni'c, solo pensa̱tcáj pa tsajpni'c.

Tu'c luz pa navida

²² ’Dios nas̈yajcajau nawijn. Je' iwamp na-e'pca puru cosa oyway pa natsʉ̱nga oy. Mit we'n natsʉ̱ngáj oy as̈am jeme yo'ygapay mam i-it luz.

²³ Po te nawijnat natu-e'pcap puru cosa ma̱lway, natsʉ̱ngáj mal as̈am jeme yo'ygapay chitimicni'c, mit we'n Dios iluz nas̈caservia̱tcajap ni'c nawangap puru mal.

Dios mit riquezajat

²⁴ ’Tu'c jayau ca-oyap i-ijtʉ mechc ijayc ni'c i-anáj tu'c mit iwa'náj jatu'c, o i-oyninʉmáj tu'c mit imalninʉmáj jatu'c. We'ney ca-oyap is̈wánga Dios te inwangap más intumi̱jnat.

Nagapensá̱tca

²⁵ ’Jemni'c tʉnʉmgʉs̈ap: Campensa̱tí̱jca ti incaygámpay o ti in-u̱jcámpay. Ne campensa̱tca pa jamuc, ti incomgámpay. Como Dios nas̈moygap vida, ayé más valia̱tp, mit je' nas̈moygámpey nacaygámpay mit nacomgámpay.

²⁶ E'pca jonwájat jeme que̱jcapay yucm. Je'jat cani̱pcap ne cachijcap ne ca-itcʉjʉp mam iguiguarda̱tcawa'n cayan, po Dios Nate̱jat tsajpni'cway i-ajcaygʉs̈p. Mijchat más mivalia̱tcap que jonwájat.

²⁷ Mit te pensa̱to'cp tu'c jayau, ¿is̈jawiga oyáj iye'c jatu'c pulgada más?

²⁸ ’¿Mit tini'c impensa̱to'jca pa injamujcat? E'pca ayé liriupíjijcat cuyjugumay, nat iye'jca. Je'jat cayos̈watcap ne igapi'tcap jamuc.

²⁹ Ʉ̱ tʉnʉmgʉs̈ap ni'c ne rey Salomón mit nu'pʉjʉn i-oymanagui ca-oyawu itsʉ̱na cutigatsic as̈am ayé pijicwájat.

³⁰ Po te Dios icuida̱tp ma'tswájat cuyjugumay, mit te ayé ma'jts ye'jcap majat mit jatu'c s̈ʉjw nacomgap jʉngʉtʉm, ¿is̈jawiga Dios is̈cacuida̱tcáj más mijchat? Mijchat migacupʉjcap may.

³¹ Jemni'c campensa̱tí̱jca. Camnʉmga: ¿ti nacaygáj? ¿Ti na-u̱jcáj? o ¿Ti nacomgáj?

³² Ni'c ayé jayajwat iga-is̈capcapay Dios ipensa̱to'jcap igui-aguepcawa'n ayé cosajat, po pa mijchat Dios Nate̱jat tsajpni'cway ijawip ni'c inyesita̱tcap nu'pʉjʉn ayé cosajat.

³³ Che'jnʉ'jca pa is̈manda̱tcáj Dios mit pi watca yacs̈ic nu'pʉjʉn as̈am je' iguiwa'n, mit nu'pʉjʉn ayé cosajat inaguepcámpey.

³⁴ Jemni'c campensa̱tí̱jca ti jatámpay jobom, ni'c cadas̈ʉjw tigatsp lo que jatámpay. Más oy napensá̱tca pa jinapay s̈ʉjw mit ayé mal imumimpay.