San Mateo 22 - Popoluca Sayula New Testament

Cʉ'pa't icuentu

¹ Mit Jesús i-ampiugʉs̈awatu cuentujat, inʉmgʉs̈au:

² —Natumuquips̈p nat imanda̱twa'n Dios. Ayé as̈am tu'c rey jeme iwatway tu'c ma̱s̈ʉjw ni'c nicʉ'pa̱jtʉp iway.

³ Mit i-ajyu'tcʉs̈ imozojat ma aya̱s̈mujca jeme tsʉ̱ngaway imvita̱tic pa ayé ma̱s̈ʉjw, po aye'jat igawangawu imingawa'n.

⁴ Mit i-ajyu'tcʉs̈atu japu̱t mozojat, inʉm: “Nʉmgʉs̈a jeme tsʉ̱ngapay imvita̱tic ni'c oyáguiganu cayan, i-ago'jcaway turujat mit aníma̱jtat jeme tʉnacye'cpʉjcʉs̈way, mit oyáguiganu itsʉ̱na nu'pʉjʉn. Nʉ́s̈ca cʉ'pa'tnic.”

⁵ Po je'jat igawatcawu cuenta. Tu'c nʉcs̈ icamni'c, mit jatu'c nʉcs̈ to'cche'mpay.

⁶ Mit japu̱jtat i-actangau ayé mozojat, mit iwatcajau mal, mit i-ago'jcau.

⁷ Iguimarajw ayé rey, awa'niu jaran. Mit i-ajyu't isoldajat, mit icʉs̈pʉ'ngau ayé ago'cpayna'jat, mit ino'jcʉs̈au inʉ'jcopajcat.

⁸ Mit cʉs̈ inʉmgʉs̈au imozojat: “Oyáguiganu ayé cʉ'pa't po jeme tsʉ̱ngaway imvitátic tʉs̈carespeta̱tcawu.

⁹ Jinap nʉ́s̈ca calleni'jcat, mit imvitá̱tca pʉnu impa̱tcámpay ma minga cʉ'pa'tni'c.”

¹⁰ Mit pichingau ayé mozojat calleni'jcat, mit i-apʉcmujcau nu'pʉjʉn ipa̱tcaway, oyjayajwat mit maljayajwat. Mit may jayajwat coygau en ayé cʉ'pa't.

¹¹ ’Mit ayé rey min igui-e'pcʉs̈ jeme tsʉ̱ngaway imvita̱tic. Mit i-is̈ jem tu'c jayau jeme cacutígatsicway mit cʉ'pa'tjamuc.

¹² Mit ayé rey inajau: “Amigu, ¿nat intʉgʉjy yam ni'c ingamuyo'yp incʉ'pa'tjamuc?” Mit ayé jayau capo'nu.

¹³ Mit cʉs̈ ayé rey inʉmgʉs̈au jeme majyigapay: “Tsúmgaja ayé jayau icʉ' mit ita'n, mit ca'tspíchinga pe'ta̱m chitimicni'c. Ni'c jem jayajwat ijʉygawa'n mit jem iguitunas̈cawa'n mʉgʉc.”

¹⁴ Ni'c Dios mayo'c iguiya's̈ jayajwat, po icupiugʉs̈áj jeme jayaumaygapay.

I-ucyo'tcap te itso̱jcáj tumi̱n impuestu

¹⁵ Cʉs̈ nʉs̈cau fariseujat, mit ni-acochigʉjʉu nat igui-ajca'ugawa'n Jesús mit lo que inʉmpay.

¹⁶ Mit fariseujat i-ajyu'tcau ipʉctampajyat mit Herodes ijayajwat pa mam je' itsʉ̱na, mit iguinʉmgajau: —Amayipay, tʉnjawigap ni'c inyʉmp lo que iyacs̈ta'cway, mit yacs̈ic is̈ajque's̈a Dios ito̱u. Ingawatp cuenta nepʉn ni'c niwe'nu is̈-e'pcʉs̈ jayajwat.

¹⁷ Nʉmgajac nat mi̱ impensa̱t: ¿Oy nas̈mo'wa'n rey César tumi̱n impuestu, o ca-oy?

¹⁸ Po Jesús ijawiu ni'c pensa̱tcap mal, mit inʉmgʉs̈au: —Mijchatu miniwe̱tcʉjʉp, ¿tini'c is̈proba̱tcap?

¹⁹ Actu-e'pcac ayé tumi̱n intutso̱jcapay impuestu. Mit iguimumingajau tu'c tumi̱n.

²⁰ Mit Jesús i-ucyo'tcʉs̈: —¿Pʉn ayé iretratu mit inʉ'jy tsʉ̱napay ja'yic tumi̱ni'c?

²¹ Iguipo'ngau: —César ayé. Cʉs̈ Jesús inʉmgʉs̈au: —Moyga César lo que César ije'way, mit moyga Dios lo que Dios ije'way.

²² Iguimáraugaj we'n, nigu-épigʉjʉu. Mit cʉs̈ iyajcau Jesús mit nʉs̈cau.

Nat ijutucta̱jcawa'n á̱nimajat

²³ En ayé s̈ʉjw mingau saduceujat mam Jesús itsʉ̱na, mit je'jat inʉmgap ni'c cajutucta̱jcáj á̱nimajat. Mit i-ucyo'tcau je'.

²⁴ Inʉmgau: —Amayipay, inʉm Moisés ni'c te tu'c jayau o'cp mit te igayacp iway, imajtsʉc nicʉ'pa̱jtʉ̱́j mit i-ajch ito's̈ay pa ma ijtʉ iway por i-ajch, magacʉs̈ ayé familia.

²⁵ Mit it siete muta̱cje̱wajyat mam tʉtsʉ̱́nga. Mit jeme más ajchcopacway nicʉ'pa̱jtʉu, mit cʉs̈ o'c, mit igayagu iway. Mit je' iyac ito's̈ay, mit ipʉgatu imajtsʉc jeme iguinatspoguipay.

²⁶ Mit ni-as̈amu iguijat segunduway, tercerway mit we'ney imusieteway ipʉjcau is̈ta'c ayé to's̈ay, o'cpʉ'ngau mit igawatcajawu iway ayé to's̈ay.

²⁷ Mit cʉs̈ o'guey ayé to's̈ay.

²⁸ Ijutucta̱jcawa'n nu'pʉjʉn á̱nimajat, ¿pʉn de ayé sieteway ipʉgáj ayé to's̈ay? ni'c inisietejatij ito's̈ayjátcau.

²⁹ Jesús ipo'ngʉs̈: —Ca-oyap is̈pensa̱tca ne ingajawigap jeme tsʉ̱napay ja'yic Dios ilibruni'c, ne ingajawigap ni'c Dios ijtʉp maj.

³⁰ Ni'c ijutucta̱jcawa'n nu'pʉjʉn á̱nimajat canicʉ'pa̱tcʉjʉ̱́j, ne igawatcáj cʉ'pa't. Je'jat tsʉ̱ngáj as̈am Dios i-ángejlat tsajpni'cway.

³¹ Ingajawigap ni'c jutucta̱jcáj nu'pʉjʉn á̱nimajat ni'c ingani-entendia̱tcap lo que is̈nʉmgajaway Dios.

³² Inʉm: “Ʉ̱ tʉs̈Dios Abraham, tʉs̈Dios Isaac mit tʉs̈Dios Jacob.” Dios iga-e'pcʉs̈p ayé jayajwat as̈am o'guijcatway. Je' Dios pa jeme tsʉ̱ngapnajway.

³³ Mit iguimáraugaj we'n ayé jayajwat, nigu-épigʉjʉu mit lo que i-ajque's̈way.

Tu'c mandamientu mʉjway

³⁴ Cʉs̈ iguimáraugaj fariseujat ni'c Jesús i-atujcʉs̈au i-ajwat ayé saduceujat, ni-apʉcmujcʉjʉu ayé fariseujat.

³⁵ Mit tu'c fariseu jeme i-is̈capay ley i-ucyo't Jesús pa iguiproba̱twa'n, inʉm:

³⁶ —Amayipay, ¿jʉmay ayé mandamientu más mʉjway jeme tsʉ̱napay leyni'c?

³⁷ Mit Jesús inajau: —“Inwa'náj el Señor inDios mit nu'pʉjʉn injo̱jt, mit nu'pʉjʉn imvida, mit nu'pʉjʉn intupensa̱tpay.”

³⁸ Ayʉ̱́j ayé mandamientu más mʉjway mit más primeruway.

³⁹ Mit segunduway inʉmp casi ni-as̈amu: “Inwa'náj inmupro̱wije̱way as̈am mi̱ inyiwajnʉ.”

⁴⁰ Te nacumplia̱tcap ayʉ̱́j mechc mandamientujat, nacumplia̱tcap nu'pʉjʉn inʉmpay ayé ley, mit we'ney nu'pʉjʉn inʉmgaway ayé profetajat.

Cristu más mʉjninʉmic que David

⁴¹ Mit cuandu itsʉ̱ngaj apʉcmúguijcat fariseujat, Jesús i-ucyo'tcʉs̈,

⁴² inʉm: —¿Ti impensa̱tcap de Cristu? ¿Pʉn je' ite̱t? Iguinʉmgajau: —Ayé David iway ni'c pichin David ifamiliani'c.

⁴³ Mit cʉs̈ Jesús inʉmgʉs̈au: —¿Tini'cpaj Espíritu Santu igui-actunʉjm David ni'c Cristu ayé iSeñor? As̈am iguinʉjm salmuni'c:

⁴⁴ El Señor inʉjmau tʉnSeñor: “Tsʉ̱́na tʉn-oyimaycʉ'ni'c, hasta tʉs̈vencia̱twa'n nu'pʉjʉn inmutsuguijnat.”

⁴⁵ Te David inʉjmau ni'c Cristu ayé iSeñor jeme iguimanda̱tpay, ¿natpaj iguiwayjatwa'n?

⁴⁶ Mit nepʉn ca-oyawu iguipo'n neti. Mit desde ayé s̈ʉjw pʉ̱tcau igui-ucyo'tcawa'n más.