San Mateo 19 - Popoluca Sayula New Testament

Ca-oy nas̈actogoyda'c cʉ'pa't

¹ Cʉs̈ Jesús iguinʉmgʉ́s̈aj wename, je' pichin Galilea mit coy Judeajway na̱s̈ tuganʉ-ájw Jordán.

² Mit may jayajwat iguinatspoguigau, mit i-ac-oytangʉs̈ jem jeme yo'ygaway tu'nij.

³ Mit mingau fariseujat mam je' itsʉ̱na, mit i-ucyo'tcau pa iguiproba̱tcawa'n, inʉmgau: —¿Oy tu'c jayau iguicuyaguiwa'n ito's̈ay te iguiwajtap tanti?

⁴ Jesús ipo'ngʉs̈: —¿Inganicotscap Dios ilibruni'c nat iguiwajt primer jayau? Je' iwat qui'chay mit to's̈ay.

⁵ Mit inʉm Jesús: “Jemni'c tu'c jayau iyagáj ite̱t mit ima̱m, mit ipʉgáj ito's̈ay, mit ayé mechcat jatcáj as̈am tu'gu.”

⁶ Mit we'n ayé mechcatway jatcau tu'gujyu. Jemni'c jeme Dios i-acnipʉjcʉs̈ʉway, nepʉn maga-acniguyáguijyʉ.

⁷ Mit je'jat i-ucyo'tcawatu: —¿Tini'cpaj Moisés iguinʉjm ni'c tu'c jayau oyap iguiwat yos̈tʉcm tu'c noc pa iguicuyaguiwa'n ito's̈ay?

⁸ Jesús inʉmgʉs̈au: —Moisés is̈moygau laj is̈cuyaguigawa'n into's̈ajyat ni'c mijchat micopacmʉgʉgo'jcat. Po más primeru Dios iganʉmu we'n.

⁹ Mit tʉnʉmgʉs̈ap ni'c pʉmba'tu icuyaguiyámpay ito's̈ay mit te iguigachajyo'jyap, ayé jayau chajyo'yáj ni'c ipʉgáj jatu'c to's̈ay. Mit pʉn ipʉgámpay tu'c to's̈ay cuyáguiyicway, ayé jayau chajyo'yámpey.

¹⁰ Iguinʉmgajau ipʉctampajyat: —Te wename ijatwa'n tu'c jayau mit ito's̈ay, mejor naganicʉ'pá̱jtʉ.

¹¹ Mit Jesús inʉmgʉs̈au: —Nu'pʉjʉn jayajwat ca-oyap igui-entendia̱tca ayʉ̱́j tʉnyʉmpay. Solo ijawigáj jeme Dios i-actujawigʉs̈ámpay.

¹² Ni'c itp jayajwat jeme ca-oyapay inicʉ'pá̱tcʉjʉ ni'c tu'nijat desde iguita̱jcau ima̱jmat. Mit itp jayajwat jeme ca-oyapay inicʉ'pá̱tcʉjʉ ni'c jayajwat igui-actu'ngʉjʉu. Mit itp jayajwat nimajmoygʉjʉpay pa iganicʉ'pa̱tcʉjʉwa'n ni'c más iwangap iguimanda̱tcáj Dios. Jeme oyapay iguipʉctsou ayʉ̱́j tʉnyʉmpay, ma pʉctsou.

Jesús ibendiciona̱tcʉs̈p ya̱waywájat

¹³ Mit imumingajau ya̱waywájat pa ma yajcʉs̈a icʉ'jat iyucuinmat mit ma ora̱tcʉs̈a. Mit ipʉctampajyat igamoygawu laj ma munas̈ca.

¹⁴ Po Jesús inʉm: —Moyga laj ya̱waywájat ma minga mam ʉ̱ mit camatújca, ni'c jayajwat jeme jatcámpay as̈am ayʉ̱́j ya̱waywájat, je'jat iguimanda̱tcáj Dios.

¹⁵ Mit iyajcʉs̈au icʉ'jat, mit cʉs̈ pichin jem.

Tu'c ya̱wayna' ricuway

¹⁶ Mit tu'c ya̱wayna' coy mam itsʉ̱na Jesús, mit i-ucyo't: —Amayipay oyway, ¿ti cosa oyway tʉnwatáj pa tʉs̈aguepwa'n vida jeme cacʉs̈ámpay?

¹⁷ Mit Jesús ipo'n: —¿Tini'c is̈-ucyo'tp ti cosa oyway inwatáj? Itp tu'c jeme oyway mit ayé Dios, mit solo je' oyap is̈actujawip cosa oyway. Po te inwamp is̈aguepwa'n vida cacʉs̈ámpay, jayaumay lo que imanda̱tpay Dios.

¹⁸ Mit ya̱wayná i-ucyo't: —¿Jʉmay tʉnjayaumayáj? Mit Jesús iguinʉjmau: —Miga-ago'gáj, migachajyo'yáj, miganu'máj, ingawe̱twajtáj nepʉn.

¹⁹ In-oyninʉmáj inte̱t mit inma̱m, mit inwa'náj inmupro̱wije̱way as̈am mi̱ inyiwajnʉ.

²⁰ Ayé ya̱wayna' ipo'n: —Nu'pʉjʉn ayé tʉnguarda̱tway desde tʉyauya̱waymijn. ¿Ti jatu'c tʉs̈togoyp?

²¹ Jesús iguinʉjmau: —Te inwamp intanwa'n más oy mit Dios, nʉs̈ to'cpʉ'n nu'pʉjʉn inaguepay mit moygʉs̈ pro̱wiwájat, mit mitsʉ̱náj oy tsajpni'c ni'c ayé as̈am tu'c riqueza más oyway, mit cʉs̈wa'n mi'n pa is̈natspoguiyáj.

²² Iguimarajw ayé ya̱wayna' lo que iguinʉjmaway Jesús, tu'no'c ijo̱jt, mit nʉcs̈nuw jaran, ni'c je' ricujo'c.

²³ Mit cʉs̈ Jesús inʉmgʉs̈au ipʉctampajyat: Iyacs̈ta'cway tʉnʉmgʉs̈ap: —Majo'c pa itʉgʉywa'n mam imanda̱t Dios tu'c ricu.

²⁴ Tʉnʉmgʉs̈apey ni'c más fácil pa tu'c camellu inas̈wa'n agu̱s̈acʉtwayni'c que tu'c ricu itʉgʉywa'n en ayé lugar mam imanda̱t Dios.

²⁵ Iguimáraugaj we'n ipʉctampajyat, nigu-épigʉjʉu may, mit inʉmgau: —¿Pʉmpaj oyáj inisalvá̱jtʉ?

²⁶ Po Jesús igui-is̈cʉs̈, inʉmgʉs̈au: —Jayajwat ca-oyap inisalvá̱tcʉjʉ je'jatu, po Dios oyap iguiwat nu'pʉjʉn cosa.

²⁷ Cʉs̈ Pedro iguinajau: —Señor, ʉjtsat tʉncuyaguigaway nu'pʉjʉn mit tʉnatspoguigap mi̱. ¿Tipaj tʉmpʉctsougáj?

²⁸ Mit Jesús inʉmgʉs̈au: —Iyacs̈ta'cway tʉnʉmgʉs̈ap ni'c inamjatwa'natu ayʉ̱́j mundu, ʉ̱ jeme tʉjatway jayau tʉtsʉ̱náj mʉjninʉmic tʉntronuni'c, mit mijchat is̈natspoguigapay jinap mitsʉ̱ngámpey en ayé doce tronujat mit tʉ-actujuzga̱tcʉs̈áj nu'pʉjʉn Israelway jayajwat jeme pichingaway de ayé doce familiajat.

²⁹ Mit pʉmba'tu iyagámpay itʉjc, i-ajch, itsʉ', ite̱t, ima̱m, ito's̈ay, iwajyat mit ina̱s̈at ni'c ʉ̱ más tʉs̈wamp, je' ipʉctsowáj premiu cien veces más, mit ijtʉ̱́j vida jeme cacʉs̈ámpay.

³⁰ Po mayo'c jeme ipensa̱to'jcapay itangawa'n jʉpm, tangáj mugus̈á̱m. Mit jeme mingapay mugus̈á̱m, tangáj jʉpm.