San Mateo 18 - Popoluca Sayula New Testament

Pʉn más mʉjninʉmic

¹ En ayé tiempu Jesús iguicutomigau ipʉctampajyat, mit igui-ucyo'tcau: —¿Pʉn tsʉ̱náj más mʉjninʉmic mam imanda̱t Dios?

² Mit Jesús iya̱s̈ tu'c qui'chwáy, mit iyac es̈pu̱tum.

³ Mit inʉm: —Iyacs̈ta'cway tʉnʉmgʉs̈ap ni'c te migatigatscap pa injatcawa'n as̈am qui'chwájat, nunca ca-oyáj is̈manda̱tcap Dios.

⁴ Jemni'c jeme canimʉjninʉjmʉ́mpay as̈am ayʉ̱́j qui'chwáy, je' tsʉ̱náj más mʉjninʉmic mam imanda̱t Dios.

⁵ Jeme ipʉctsowámpay tu'c qui'chwáy as̈am ayʉ̱́jway ni'c ʉ̱ tʉs̈wamp, casi ʉ̱ tʉs̈pʉctso̱p.

Lo que nas̈actuwatpay mal

⁶ ’Mit pʉmba'tu i-actuwatámpay mal tu'c ayʉ̱́j jayawájat jeme tʉs̈cupʉjcapay, más oy nacutsúmijya tu'c mʉjway pa̱wan iyo'cni'c mit naca'tstʉgʉy lama̱tjugum mam ijuqui.

⁷ ¡Pro̱wij de jayajwat jeme tsʉ̱ngapay en ayʉ̱́j mundu ni'c i-actuwatcap mal imupro̱wije̱wajyat! Ni'c en ayʉ̱́j mundu siempre itáj cosa nas̈actuwatpay mal, po ¡pro̱wij de ayé jayau jeme nas̈jomipay nas̈watwa'n mal!

⁸ ’Jemni'c te incʉ' o inta'n is̈actuwatp mal, camjatuwat mal as̈am impus̈tucpay ayé. Más oy pi tan en ayʉ̱́j vida as̈am cʉ'tuguic o cu̱s̈u mit caje' is̈aguepwa'n mechc incʉ' o mechc inta'n pa is̈ca'tstʉgʉygáj jʉngʉtʉm mam igapi'chwa'n.

⁹ Mit te inwijn is̈actuwatp mal, camja-e'p ayé mal as̈am inchi'tpay inwijn. Más oy pi tan en ayʉ̱́j vida mit tu'gu inwijn, mit caje' is̈aguepwa'n mechc inwijn pa is̈ca'tstʉgʉygáj jʉngʉtʉm.

Borregu tógoyicway icuentu

¹⁰ ’Cuidaj is̈yajcawa'n menus tu'c ayʉ̱́j jayawájat. Ʉ̱ tʉnʉmgʉs̈ap ni'c je'jat i-ángejlat tsʉ̱ngap tsajpni'c mit siempre tsʉ̱ngap mit tʉnte̱t Dios.

¹¹ Mit ʉ̱ jeme tʉjatway jayau tʉmín pa tʉs̈salva̱tcʉs̈wa'n jeme tógoyijcatway.

¹² ’Tʉnampiwáj tu'c cuentu pa pi pensa̱tca. Te tu'c jayau ijtʉp cien borregu mit te iguitogojyap tu'c, iyagáj ayé noventa y nueve borregujat, mit nʉs̈áj iguiche'n copac-awa'tsam ayé jeme togoyway.

¹³ Mit te ipa̱tp ayé tógoyicway, iyacs̈ta'cway tʉnʉmgʉs̈ap ni'c más ji'gáj ijo̱jt que por ayé noventa y nueve borregujat jeme catógoyijcatway.

¹⁴ We'ney Dios Nate̱jat jeme tsʉ̱napay tsajpni'c igawamp ma togoy netu'c ayʉ̱́j jayawájat.

Nat nas̈perdona̱twa'n nahermanu

¹⁵ ’Mit te inhermanu is̈wajtau mal, nʉs̈ cots mit je' intu'gujmatu mit naja ni'c is̈wajtau mal. Mit te je' is̈po'mp oy, mitsʉ̱nájatu oy mit inhermanu.

¹⁶ Po te je' is̈po'mp mal, che'n tu'c o mechc jayau pa ma marauga nu'pʉjʉn inʉmpay, pa we'n itáj mechc o tu̱gup testigujat contra je'.

¹⁷ Po te igawatcʉs̈p cuenta ayé testigujat, ajque's̈cʉ́s̈a cupʉcpajyat jeme ni-apʉcmujcʉjʉpay. Mit te igamaraugʉs̈p ne cupʉcpajyat, yajca ma tan as̈am tu'c pe'ta̱may jayau, mit as̈am tu'c ique'chumpay demás impuestujat.

¹⁸ ’Iyacs̈ta'cway tʉnʉmgʉs̈ap ni'c yam na̱s̈ni'c lo que inyʉmgajámpay tʉnjayajwat ni'c ca-oy iguiwatca, Dios tsajpni'cway inʉmámpey ni'c ca-oy iguiwatca, mit yam na̱s̈ni'c lo que inyʉmgajámpay ni'c oy ma watca, Dios tsajpni'cway inʉmámpey ni'c oy ma watca.

¹⁹ ’Mit tʉnʉmgʉs̈apey: Te mechc jayajwat mam mijchat tsʉ̱ngap en acuerdu yam pa iguiyo'tcajawa'n Dios ti iwangámpay, je'jat iguimoygáj tʉnte̱t Dios jeme tsʉ̱napay tsajpni'c.

²⁰ Ni'c te mechc o tu̱gup jayajwat tsʉ̱ngap apʉcmuguic ni'c ʉ̱ tʉs̈cupʉjcap, jemey tʉtsʉ̱nawa'n mit je'jat.

²¹ Mit cʉs̈ Pedro icutomiu Jesús mit i-ucyo't: —Señor, ¿pʉjʉn veces tʉs̈perdona̱twa'n tʉnhermanu te tʉs̈wajtap mal? ¿Hasta siete veces?

²² Jesús inajau: —Tʉganajap pi perdona̱t hasta siete veces, po más oy pi perdona̱tí̱c inhermanu. Camwat cuenta pʉjʉn veces is̈wajtap mal.

Mechc jayajwat pʉ́jquijatway

²³ ’Jemni'c oyap nas̈tumuquips̈ nat imanda̱t Dios. Ayé as̈am tu'c rey jeme iwanway iguique'chumgʉs̈wa'n imozojat jeme iguitangajaway pʉjqui.

²⁴ Mit ichú̱chij igui-acpichin cuenta, imumingajau tu'c imozo jeme iguipʉjquiway tu'c tumi̱njuc mayway.

²⁵ Po ayé mozo como ca-oyawu iguitso'c, ijayc manda̱t ma to'jca ayé jayau mit we'ney ito's̈ay mit iwaywájat mit nu'pʉjʉn ijtʉpay pa iguitso̱jcupa̱tiwa'n ayé cuenta.

²⁶ Mit cʉs̈ ayé mozo nicos̈atenda̱jcʉu mam ijayc mit iyo'jtau, inʉm: “Señor, aguep calma mit ʉ̱ mit tʉtso'gáj nu'pʉjʉn tʉ̱pʉjquiway.”

²⁷ Mit ijayc igui-ayo̱wis̈ ayé mozo mit iperdona̱jtau nu'pʉjʉn iguipʉjquiway, mit iyac libre.

²⁸ ’Po ipichijn ayé mozo, imunipa̱jtʉu tu'c imumozoje̱way jeme iguipʉjquiway cien pesu. Mit igui-actajn iyo'cni'c, inajau: “Tso'gac lo que is̈pʉjquiway.”

²⁹ Mit cʉs̈ imumozoje̱way nicos̈atenda̱jcʉwey ita'ná̱m mit iyo'jtau, inʉm: “Aguep calma mit ʉ̱, mit tʉtso'gáj nu'pʉjʉn tʉ̱pʉjquiway.”

³⁰ Po je' igawanu iguiperdona̱t, oy iguicotsnas̈ mit icom cuytujugum hasta iguitso'cwa'n jeme iguipʉjquiway.

³¹ Igui-ís̈caj we'n japu̱t mozojat, tu'ngau ijo̱jtat, mit nʉs̈cau iguinʉ́mgaja ijaycat nu'pʉjʉn jeme jatway.

³² Mit ijaycat iya̱s̈ ayé mozo, mit inajau: “¡Mi̱ mi tu'c mozo ma̱lway! Tʉperdona̱jtau nu'pʉjʉn is̈pʉjquiway ni'c is̈jomiu.

³³ Mit mi̱ ingajatu is̈-ayo̱wis̈ inmumozoje̱way as̈am tʉ-ayo̱wis̈ mi̱.”

³⁴ Mit cʉs̈ awa'no'c itajn ijayc, mit i-entrega̱t jaran ayé mozo ma castiga̱tca mit ma comga cuytujugum hasta iguitso'cwa'n nu'pʉjʉn ayé tumi̱njuc iguipʉjquiway.

³⁵ Mit cʉs̈ Jesús inʉmgʉs̈au: —Wename-ey is̈watcajáj tʉnte̱t Dios jeme tsʉ̱napay tsajpni'c te ingaperdona̱tcap inmupro̱wije̱wajyat mit nu'pʉjʉn injo̱jtat.