San Mateo 17 - Popoluca Sayula New Testament

Jesús tigatsp iforma

¹ I-íjtʉj seis día Jesús imunʉs̈cʉs̈ Pedro, Jacobo mit imajtsʉc Juan, mit imunʉs̈cʉs̈ aparte en tu'c yucmay copac.

² Mit Jesús jat oymanac mam igui-e'pca je'jat, mit cuquijan iwindugʉt as̈am s̈ʉjw ique's̈, mit po'p ijajt ijamuc as̈am tu'c luz ta'cs̈pay mʉgʉc.

³ Mit ayé tu̱gup pʉctampajyat i-is̈cau ique's̈tá̱jcaj Moisés mit Elías, mit imu-ampiugau Jesús.

⁴ Cʉs̈ Pedro inʉjmau Jesús: —Señor, oyo'gu natsʉ̱́nga yam. Te inwamp, tʉnwatcáj yam tu̱gup tʉcwájat, tu'c pa mi̱, tu'c pa Moisés, mit jatu'c pa Elías.

⁵ Mit Pedro cotspnajate, iguicutujcau tu'c po'p wintuc jeme quijampay, mit Dios cots wintucni'c, inʉm: —Ayʉ̱́j ayé tʉnwáy jeme tʉnwampay, mit je' tʉs̈acji'jcap tʉnjo̱jt. Márauga je'.

⁶ Iguimáraugaj we'n ayé pʉctampajyat, je'jat nijas̈manajcʉjʉu jaran mit ni-apʉ̱tigʉjʉu.

⁷ Po cʉs̈ Jesús icutomigʉs̈ mit iyajcʉs̈au icʉ'jat, inʉm: —Ca's̈ʉ'jca mit campʉ̱tcawit.

⁸ Mit iyuc-e'pcaj, nepʉn igaja-is̈cawu, ja-itu'gumu Jesús.

⁹ Imanactá̱jcaj copacni'c, Jesús imanda̱tcʉs̈, inʉm: —Camnʉmgaja nepʉn ayé visión lo que Dios is̈actu-is̈caway hasta tʉjutucta'cwa'n ʉ̱ jeme tʉjatway jayau, ni'c tʉjutucta'gáj mam itsʉ̱nga á̱nimajat.

¹⁰ Mit ipʉctampajyat igui-ucyo'tcau: —¿Tini'cpaj iguinʉmga jeme i-ajque's̈capay ley ni'c itp ti imijnʉ'cwa'n ayé profeta Elías?

¹¹ Jesús ipo'ngʉs̈: —Iyacs̈ta'cway Elías mijnʉ'gáj mit i-oyagáj nu'pʉjʉn cosajat.

¹² Po tʉnʉmgʉs̈ap ni'c minway Elías, mit jayajwat iga-is̈capcawu, mit je' tigapa'tu iwatcajau. We'ney ʉ̱ jeme tʉjatway jayau tʉs̈actunas̈cámpey.

¹³ Mit cʉs̈ ayé pʉctampajyat nimoygʉjʉu cuenta ni'c je' cotsp de Juan nʉ'gutempay.

Jesús i-ac-oytamp tu'c qui'chna'

¹⁴ Mit icóygaj mam itsʉ̱nga ayé jayaujuc, tu'c jayau icutomiu Jesús mit nicos̈atenda̱jcʉu ita'ná̱m, inʉm:

¹⁵ —Señor, ayo̱wis̈ tʉnwáy ni'c iguipʉguí̱cp s̈e'm mit itunas̈o'cp. Itp veces ca'p jʉngʉtʉm mit nʉ'jugum.

¹⁶ Mit jatʉnmumingʉs̈au impʉctampajyat po ca-oyawu igui-ac-oytánga.

¹⁷ Mit Jesús ipo'n: —¡Ayʉ̱́j jinapay jayajwat cacupʉjcap nes̈ʉ̱n mit ma̱lo'jcat! ¿Hasta jutim tʉtsʉ̱nawa'n mit mijchat? ¿Hasta jutim tʉ-aguepcʉs̈awa'n calma? Mumingajac yam ayé qui'chna'.

¹⁸ Mit Jesús imucots mʉgʉc ayé demo̱nyu, mit iguipichijnau ijo̱jtugum ayé qui'chna', mit oytan jaran.

¹⁹ Mit cʉs̈ ipʉctampajyat imucotscau Jesús aparte, mit inʉmgau: —¿Tini'c ʉjtsat ca-oyawu tʉs̈acpíchingaja ayé demo̱nyu?

²⁰ Jesús inʉmgʉs̈au: —Ca-oyawu is̈acpíchinga ni'c migacupʉjcap nes̈ʉ̱n. Iyacs̈ta'cway tʉnʉmgʉs̈ap ni'c te micupʉjcap s̈ʉ̱ntiticna, ayé as̈am tu'c titic mostaza-semilla ijat mʉj, mit oyáj is̈nʉ́mgaja ayʉ̱́j copac: “Niju'jpʉ pa jatu'c laj”, mit niju'jpʉ̱́j. Mit oyáj is̈watca nu'pʉjʉn cosajat.

²¹ Po demo̱nyujat as̈am ayʉ̱́jway capichináj te naga-ora̱tp mit te naga-ayuna̱tp.

Jesús inʉmpatu ni'c o'gáj

²² Cuandu Jesús iyo'jy Galileajway na̱s̈ mit ipʉctampajyat, inʉm: —Ʉ̱ jeme tʉjatway jayau tʉs̈yajcáj jayajwat icʉ'jugujmat,

²³ mit tʉs̈ago'jcáj, po tʉjutucta'gájatu imutu̱gupay s̈ʉjw. Mit tu'no'c ijo̱jtat ipʉctampajyat.

Natso'gáj tumi̱n impuestu

²⁴ Icóygaj nʉ'jcopac Capernaum, iguicutomigau Pedro jeme ique'chumgapay tumi̱n impuestu pa templu, mit igui-ucyo'tcau: —¿Igatso̱cp tumi̱n impuestu in-amayipajyat?

²⁵ Pedro ipo'ngʉs̈ ni'c jo̱. Mit itʉgʉjy tujugum, Jesús ipo'n jaran Pedro: —¿Nat is̈jawi Simón? ¿Rejyat en ayʉ̱́j mundu ique'chumgapey ijayajwat o pe'ta̱majyatu?

²⁶ Pedro iguipo'n ni'c pe'ta̱majyatu i-actutso̱jcap. Mit cʉs̈ Jesús inajau: —Entonce ijayajwat igatso̱jcap neti.

²⁷ Po magacutu'mpʉjca, nʉs̈ lagunani'c mit com ins̈uyan, mit acs̈wáy ins̈ujyʉ'gámpay, inawa̱jtsáj i-ajw mit impa̱jtáj tu'c tumi̱n mit ayé oyap is̈tutso'c pa namechcat. Munʉs̈ ayé tumi̱n mit moygʉs̈ pa ʉ̱ mit pa mi̱.