San Mateo 15 - Popoluca Sayula New Testament

Lo que nas̈actuwatpay mal

¹ Mit iguicutomigau Jesús una̱c fariseujat mit jeme i-ajque's̈capay ley. Je'jat mingau Jerusalén, mit i-ucyo'tcau Jesús:

² —¿Tini'c impʉctampajyat igajayaumaygap ayé costumbre itcʉjʉway ampay jayajwat? Je'jat igacupujcap icʉ'jat icaygawa'n as̈am ʉjtsat tʉs̈watca.

³ Jesús ipo'ngʉs̈: —¿Mit tini'c is̈cajayaumáyga lo que imanda̱tway Dios? Mijchat solo inwangap incostumbrejatu.

⁴ Ni'c Dios imanda̱t: “Oyninʉm inte̱t mit inma̱m”, mit jeme itucotsámpay ite̱t o ima̱m, ayé jayau ma o'c.

⁵ Po mijchat inyʉmgap ni'c tu'c jayau oyap iguinʉ́jma ite̱t o ima̱m: “Caja-oyap tʉmajyi mit tumi̱n ni'c tʉnmoyway Dios lo que tʉmo'ámpayate”,

⁶ mit ayé jayau inʉmway we'n, cajatsʉ̱nap obliga̱tic iguimajyiwa'n ite̱t o ima̱m. We'n is̈ajque's̈ca mijchat mit inyajcau jalmanu lo que inʉmway Dios ni'c más inwangap incostumbrejat.

⁷ ¡Mijchatu miniwe̱tcʉjʉp! Oyo'gu Dios igui-actunʉjm profeta Isaías lo que inwatcapay mijchat, inʉm:

⁸ Ayʉ̱́j jayajwat i-auni'jcatu tʉs̈-oyninʉmgap, po ijo̱tni'jcat tʉs̈cawangap iyacs̈ta'cway.

⁹ Jalmanu tʉs̈-adora̱tcap, Ni'c i-ajque's̈cap tu'c ama̱s̈an lo que inʉmgapay jayajwat.

¹⁰ Mit Jesús iguiya̱s̈cʉs̈ jayaujuc, inʉmgʉs̈au: —Márauga, mit entendiá̱tca tʉnʉmgʉs̈ámpay.

¹¹ Nas̈ca-actuwatcap mal ayé cayan nacompay na-auni'c, po nas̈actuwatcap mal jeme pichimpay najo̱tni'jcat.

¹² Mit cʉs̈ Jesús iguicutomigau ipʉctampajyat, iguinʉmgajau: —¿Ingajawip ni'c fariseujat icutu'mpʉjcau iguimarauga lo que inyʉmgʉs̈away?

¹³ Po Jesús ipo'ngʉs̈: —Nu'pʉjʉn cujy igani̱pway tʉnte̱t Dios jeme tsʉ̱napay tsajpni'c, itáj ti iguiwis̈cawa'n.

¹⁴ Mijchat camwatca cuenta ayé fariseujat. Je'jat as̈am winchat mit iwejnu'pcajap winchat. Mit te tu'c winch icʉ'ju'p jatu'c winch, inimechquij cʉmdʉgʉygáj en tu'c cʉt.

¹⁵ Mit Pedro inʉjmau Jesús: —Actujawigac ti inʉmo'jcʉp ayé inyʉmway.

¹⁶ Jesús inʉmgʉs̈au: —¿Ne mijchat ingani-entendia̱tcap ayé?

¹⁷ Injawigap ni'c nu'pʉjʉn nacaypay, ayé tʉgʉyp na-auni'c, mit ayé coyp natinchayni'c mit pichimpatu.

¹⁸ Po ayé mal jeme pichimpay na-auni'c, aye mimp najo̱tni'c, mit ayé nas̈actuwatcap mal.

¹⁹ Ni'c najo̱tni'c imi'n ayé mal napensa̱tcapay, na-ago'cwa'n, nachajyo'ywa'n, nanu'mwa'n, nas̈we̱twajtawa'n jatu'c jayau, natucotswa'n.

²⁰ Ayʉ̱́j mal mimp najo̱tni'c mit nas̈actuwatcap mal. Po nas̈ca-actuwatcap mal te nagacupujp nacʉ'jat nacaywa'n as̈am ayé costumbre iwatcapay fariseujat.

Nat icupʉc tu'c to's̈ay Canaánway

²¹ Mit ipichijn jem Jesús, nʉcs̈ pa ayé na̱s̈at Tiro mit Sidón.

²² Mit coy tu'c to's̈ay Canaánway jeme tsʉ̱napay en ayé na̱s̈. Mit je' ya̱s̈, inʉm: —¡Señor, mi̱ mipichin David ifamiliani'c pa is̈salva̱tcáj, ayo̱wis̈ac! ni'c tʉnto'chwáy itunas̈o'cp ni'c ijtʉp tu'c demo̱nyu.

²³ Po Jesús igapo'nu ayé to's̈ay. Mit iguicutomigau ipʉctampajyat mit iguinʉmgajau: —Acnʉ́s̈nu ayé to's̈ay ni'c ya̱s̈tacmimp namugus̈á̱jmat.

²⁴ Jesús ipo'ngʉs̈: —Tʉs̈ajyu't Dios solo pa ayé Israelway jayajwat ni'c je'jat yo'ygap as̈am borregujat tógoyijcatway.

²⁵ Po ayé to's̈ay iguicutomiu mit nicos̈atenda̱jcʉu Jesús iwiná̱m, inʉm: —Señor, majyiyac.

²⁶ Po Jesús inʉjmau: —Ca-oy tʉs̈chi'tcajawa'n tʉnwajyat ima̱s̈anʉ̱jnat pa tʉs̈moygawa'n tacwájat.

²⁷ Iguipo'n ayé to's̈ay: —Jo̱, Señor, po tacwájat icaygap ma̱s̈anʉ̱nco's̈wájat jeme ca'ugapay ijaycat ime̱s̈ani'c.

²⁸ Mit cʉs̈ Jesús ipo'n: —¡Mi̱ mi tu'c to's̈ay micupʉcpay mayo'c! Pi is̈wajtac Dios as̈am is̈wa'n. Mit oytan jaran ito'chwáy.

Jesús i-ac-oytamp may jayau

²⁹ Mit ipichijn jem Jesús, nas̈ laguna-auni'c Galilea. Mit cu't en tu'c copac mit nitsʉ̱nda̱jcʉu jem.

³⁰ Mit iguicutomigau may jayajwat mit imumingajau cu̱s̈ujat, winchat, u̱jmat, tótsijcatway mit japu̱t jayajwat tu'nijatway. Mit iyajcajau ita'ná̱m Jesús, mit je' i-ac-oytangʉs̈.

³¹ Mit ayé jayajwat nigu-épigʉjʉu igui-is̈caj ni'c cotsta̱jcap u̱jmat, mit oytangau tótsijcatway, yo'ygau cu̱s̈ujat, mit e'pta̱jcau winchat. Mit ayé Israejlatway i-oyninʉmgau iDiosat.

Jesús i-ajcayp cuatro mil jayajwat

³² Mit cʉs̈ Jesús iguiya̱s̈cʉs̈ ipʉctampajyat, inʉmgʉs̈au: —Tʉnayo̱wis̈cʉs̈p ayʉ̱́j jayajwat ni'c tu̱gup s̈ʉjwanu itsʉ̱ngaj mit ʉ̱ mit ca-itcʉjʉp ti icaygámpay. Mit tʉngawamp tʉs̈acnʉs̈cʉs̈wa'n sin cay magadesmaya̱tca to̱uni'c.

³³ Cʉs̈ iguinʉmgajau ipʉctampajyat: —¿Jʉm nas̈pa̱tcawa'n may cayan yam mam iga-it tʉjcat pa nas̈ajcu̱s̈cʉjʉwa'n ayʉ̱́j jayaujuc?

³⁴ Jesús inʉmgʉs̈au: —¿Pʉjʉn ma̱s̈anʉ̱n is̈aguepca? Iguipo'ngau: —Tʉnaguepcap siete ma̱s̈anʉ̱n mit una̱c acs̈wájat.

³⁵ Mit Jesús inʉmgʉs̈au ayé jayaujuc ma nitsʉ̱nda̱jcʉjʉ na̱s̈ni'c.

³⁶ Mit iguipʉjcʉs̈ ayé siete ma̱s̈anʉ̱nwájat mit ayé acs̈wájat, inʉjmau Dios ni'ctiyu̱s̈, mit i-emgada̱c mit imoygʉs̈ ipʉctampajyat, mit ipʉctampajyat i-acpas̈angau pa ayé jayajwat.

³⁷ Mit caybʉ'ngau mit cu̱s̈cʉjʉu. Mit cʉs̈ i-apiumujcau siete ca'c patsijcat mit ma̱s̈anʉ̱ncutucwájat jeme icaytangaway.

³⁸ Mit it cuatro mil jayajwat jeme caygaway, aparte to's̈ajyat mit ya̱wájat.

³⁹ Mit Jesús i-acnʉs̈cʉs̈nuw ayé jayaujuc, mit je' tʉgʉy ajni'c, mit nʉcs̈ pa Magdalajway na̱s̈.