San Mateo 12 - Popoluca Sayula New Testament

Iwis̈cap trigu po'cs̈ans̈ʉuni'c

¹ Mit en tu'c po'cs̈ans̈ʉjw Jesús nas̈ trigujugum. Mit cayo'jcʉjʉu ipʉctampajyat mit chu̱chiu iguiwis̈ca trigu, mit icaygau.

² Mit igui-ís̈caj we'n ayé fariseujat, inʉmgajau Jesús: —¡E'pnaj! Impʉctampajyat iwatcap jeme ca-oyway nas̈watwa'n po'cs̈ans̈ʉuni'c.

³ Po Jesús inʉmgʉs̈au: —¿Inganicotscap Dios ilibruni'c lo que iwatway David mit jeme imuyo'ygʉs̈way cuandu icayo'jcʉjʉj?

⁴ Je' tʉgʉy Dios itempluni'c mit icaygau ayé ma̱s̈anʉ̱n jeme bendiciona̱ticway, mit ayé ca-oyate iguicaywa'n je' ne jeme imuyo'ygʉs̈way, ni'c ayé yaguic pa judíujat ipa̱nijat.

⁵ ¿O inganicotscapey leyni'c mam itsʉ̱na ja'yic? Ayé pa̱nijat templutujugumay yos̈watcau po'cs̈ans̈ʉuni'c, mit catsʉ̱ngap condena̱tic por ayé.

⁶ Po tʉnʉmgʉs̈ap ni'c yam tʉtsʉ̱na mit mijchat, mit ʉ̱ más tʉ-oyninʉmic que ayé templu mam inadora̱tca.

⁷ Inʉm Dios ilibruni'c: “Tʉnwamp jayajwat ma ayo̱wis̈ca imupro̱wije̱wajyat, mit caje' tʉs̈ago'jcajáj aníma̱jtat pa ʉ̱.” Pi jawiga-ate ti inʉmo'jcʉp ayé, ingacondena̱tcájate jeme iganiwatpay neti.

⁸ Ni'c ʉ̱ jeme tʉjatway jayau, ʉ̱ tʉnactamp ayé po'cs̈ans̈ʉjw.

Tu'c jayau o'guicway icʉ'

⁹ Mit ipichijn jem Jesús, tʉgʉy mam judíujat i-adora̱tca.

¹⁰ Mit jem itsʉ̱naj tu'c jayau jeme o'guicway icʉ'. Mit ayé jayajwat i-ucyo'tcau Jesús pa i-oyawa'n igui-acusa̱tca, i-ucyo'tcau: —¿Oy nas̈ac-oytanwa'n tu'c jayau tu'nijway po'cs̈ans̈ʉuni'c?

¹¹ Jesús inʉmgʉs̈au: —Te tu'c jayau mam mijchat ijtʉp tu'c borregu mit te cʉmdʉgʉyp en tu'c cʉt po'cs̈ans̈ʉuni'c, ¿is̈jawiga iga-acpichináj jaran?

¹² Tʉnʉmgʉs̈ap ni'c más valia̱tp tu'c jayau que tu'c borregu. Jemni'c oy nas̈watwa'n cosa oyway po'cs̈ans̈ʉuni'c.

¹³ Mit cʉs̈ Jesús inʉjmau ayé jayau: —Acyacs̈ incʉ'. Mit je' i-acyacs̈ icʉ' mit oytan jaran, mit tan as̈am jatu'cway icʉ'.

¹⁴ Mit ipíchingaj fariseujat, ni-acochigʉjʉu pa igui-ago'jcawa'n Jesús.

Tu'c mozo cupiwicway

¹⁵ Iguijawij Jesús ni'c we'n iguipensá̱tcaj ayé fariseujat, pichin jem. Mit iguinatspoguigau mayo'c jayajwat mit i-ac-oytangʉs̈ nu'pʉjʉn.

¹⁶ Mit imucotscʉs̈ mʉgʉc maga-actujawiga nepʉn.

¹⁷ Inʉmgʉs̈au we'n pa ma cumplia̱t lo que inʉmway ayé profeta Isaías, inʉm:

¹⁸ Inʉm Dios: E'pca tʉnmozo jeme tʉncupi̱way. Tʉnwano'cp je' mit tʉs̈acji'jcap tʉnjo̱jt. Ʉ̱ tʉnmo'áj tʉmpoder, mit inʉmgʉs̈áj ma watca iyacs̈ta'cway jeme tʉs̈ca-is̈capcapay.

¹⁹ Je' catsuguinwatáj ne cabullawatáj, mit nepʉn igamarawáj icots calleni'c.

²⁰ Como je' oyjayawo'c, imoygʉs̈áj maj jayajwat débijlatway, ni'c je'jat as̈am tu'c pʉ̱yan pu'tsicway, mit as̈am tu'c mecha wi's̈o'cpay. Je' imajyigʉs̈áj hasta iguimanda̱twa'n yacs̈ic nu'pʉjʉn.

²¹ Mit jeme tʉs̈ca-is̈capcapayate, icupʉjcáj je'. We'n iguinʉjm Dios.

Jeme itucotscapay Espíritu Santu

²² Mit cʉs̈ Jesús imumingajau tu'c jayau winchic mit u̱m, ni'c ijtʉu demo̱nyu. Mit Jesús i-ac-oytan jaran mit cotsta̱c ayé u̱m, mit e'pta̱c.

²³ Mit nu'pʉjʉn ayé jayajwat nigu-épigʉjʉu mit inʉmgau: —¿Is̈jawiga ayʉ̱́j ayé pichinway David ifamiliani'c pa nas̈salva̱tcáj?

²⁴ Iguimáraugaj we'n ayé fariseujat, inʉmgau: —Ayʉ̱́j Jesús i-acpichingʉs̈p demo̱nyujat ni'c iguimoyp poder Beelzebú jeme imanda̱tpay nu'pʉjʉn demo̱nyujat.

²⁵ Iguijawij Jesús ni'c we'n ipensa̱tca, inʉmgʉs̈au: —Te jayajwat en tu'c na̱s̈ tsuguinwatcap, je'jatu nicʉs̈cʉjʉ̱́j. Mit te en tu'c nʉ'jcopac o te en tu'c tʉjc tsuguinwatcap je'jatu, ca-oyáj itsʉ̱nga jec.

²⁶ Mit te Awayagatsna' ni-acpichijnʉp je'yu, ayé je'yu tsuguinwatp. ¿Natpaj imanda̱twa'n jec?

²⁷ Mijchat inyʉmgap ni'c ʉ̱ tʉnacpichingʉs̈p demo̱nyujat ni'c tʉs̈moyp poder Beelzebú. ¿Injayajwat te? ¿Pʉn inʉ'jyni'c igui-acpichingawa'n demo̱nyujat? Jemni'c je'jat tangap testigu contra mijchat.

²⁸ Po ʉ̱ tʉnacpichingʉs̈p demo̱nyujat ni'c tʉs̈moyp poder Dios i-Espíritu. Ayʉ̱́j pa pi jawiga ni'c manda̱tnup Dios mam mijchat.

²⁹ ’Nepʉn ca-oyap itʉgʉy itujugum majaguepayna' pa iguinu'jmawa'n lo que ijtʉpay, solo te icutsumda̱jcʉ'cp, mit we'n oyap iguinu'jma lo que ijtʉpay je' itujugum.

³⁰ ’Jeme tʉs̈camutʉgʉypay ʉ̱, ayé ni'c tʉs̈cawamp. Mit jeme iga-apʉcmucpay jayajwat ma tʉs̈cupʉjcac, ayé tʉs̈-amp ni'c i-acs̈is̈cada̱cp jayajwat.

³¹ ’Mit ʉ̱ tʉnʉmgʉs̈ap ni'c Dios oyáj iguiperdona̱tcʉs̈a nu'pʉjʉn jayajwat jeme iwatcapay mal mit nu'pʉjʉn itucotscapay Dios. Po je' igaperdona̱táj nunca jeme itucotscapay Espíritu Santu.

³² Mit jeme tʉs̈tucotspay ʉ̱ jeme tʉjatway jayau, Dios oyámpey iguiperdona̱t. Po jeme itucotsámpay Espíritu Santu, Dios igaperdona̱táj ne jinap, ne en ayé tiempu mi'námpay.

Tu'c cujy na-is̈cap por ifruta iyacpay

³³ ’Ní̱pca tu'c oyway cujy mit iyagáj oyway fruta. Po te inyi̱pcap tu'c ma̱lway cujy iyagáj ma̱lway fruta. Ni'c tu'c cujy na-is̈cap por ifruta iyacpay.

³⁴ ¡Mijchat as̈am mitsanajyat! ¿Nat is̈nʉmgawa'n cosa oyway te mima̱lo'jcat? Ni'c jayajwat inʉmgap lo que ipensa̱tcapay ijo̱tni'jcat.

³⁵ Tu'c jayau oyway iguarda̱tp ijo̱tni'c lo que oyway, mit inʉmp puru cosa oyway. Mit tu'c jayau ma̱lway iguarda̱tp ijo̱tni'c lo que ma̱lway, mit inʉmp puru cosa ma̱lway.

³⁶ Iyacs̈ta'cway tʉnʉmgʉs̈ap ni'c en ayé s̈ʉjw ijuzga̱twa'n Dios, jayajwat ipo'ngáj as̈amu itʉ'tscótscaj.

³⁷ Ni'c Dios is̈yacs̈icninʉmgáj te micotscau oy, mit is̈condena̱tcáj te micotscau mal.

Maljayajwat i-e'po'jcʉjʉp milagru

³⁸ Mit cʉs̈ jeme i-ajque's̈capay ley mit fariseujat iguinʉmgajau: —Amayipay, tʉnwangap tʉs̈-e'pcawa'n tu'c milagru inwatámpay pa ma it tu'c seña ni'c mi̱ Dios is̈ajyu't.

³⁹ Po Jesús ipo'ngʉs̈: —Jinapay jayajwat ma̱lo'jcat mit cacumplia̱tcap. Je'jat i-e'po'jcʉjʉp tu'c seña mʉjway. Po nepʉn igajawatáj seña, ni'c itway tu'c seña mʉjway en ayé tiempu itsʉ̱naj profeta Jonás.

⁴⁰ Ni'c as̈am Jonás itsʉ̱naj tu̱gup s̈ʉjw mit tu̱gup tsu' itinchayjo̱jtugum ayé mʉjway acs̈, wename-ey ʉ̱ jeme tʉjatway jayau tʉtsʉ̱náj tu̱gup s̈ʉjw mit tu̱gup tsu' na̱s̈cʉtʉm.

⁴¹ En ayé s̈ʉjw ijuzga̱twa'n Dios, ayé jayajwat jeme tsʉ̱ngaway nʉ'jcopac Nínive nitenda̱jcʉjʉ̱́j pa iguicondena̱tcawa'n jinapay jayajwat. Ni'c Nínivejatway icuyaguigau ima̱lway to̱jwat cuandu icotstacyo'jy Jonás. Mit jinap yam tʉtsʉ̱na mit mijchat, mit ʉ̱ más tʉmʉjninʉmic que Jonás, po mijchat ingacuyaguigap inma̱lway to̱jwat.

⁴² En ayé s̈ʉjw ijuzga̱twa'n Dios, ayé reina jeme minway sur nitenda̱jcʉ̱́j pa iguicondena̱tcʉs̈wa'n jinapay jayajwat. Ni'c je' min yagats pa iguimarawa'n lo que ijawiway rey Salomón. Mit jinap yam tʉtsʉ̱na mit mijchat, mit ʉ̱ más tʉmʉjninʉmic que rey Salomón, po mijchat ingawangap is̈maraugáj.

Tu'c demo̱nyu pitucpatu

⁴³ ’Cuandu tu'c jayau iguipichijnap ijo̱jtugum tu'c demo̱nyu, ayé demo̱nyu yo'yp pa mam igatsʉ̱na nepʉn, mit iche'mp lugar mam ipo'cs̈wa'n, po igapa̱tp neti.

⁴⁴ Mit cʉs̈ je' ipensa̱t: “Tʉpitugájatu tʉntʉcm mam tʉpichijn.” Mit icojy jem, ipa̱t ayé jayau as̈am tu'c tʉjc ca-ijtʉpay nepʉn, pe'tic mit bien oyaguic.

⁴⁵ Mit cʉs̈ ayé demo̱nyu nʉcs̈ mit imumin jasiete demo̱nyujat jeme más ma̱jlatway que je'. Mit aye'jat itutʉgʉygau ayé jayau mit tangau jem. Mit ayé jayau jat más pior que as̈am i-ijt. Wename-ey iguijatcáj jinapay jayajwat ma̱lo'jcatway.

Jesús ima̱m mit imajtsʉcwájat

⁴⁶ Mit Jesús imucotscʉs̈pnajate ayé jayajwat, pe'tá̱m itsʉ̱ngaj ima̱m mit imajtsʉcwájat. Je'jat iwangau iguimucotscawa'n Jesús.

⁴⁷ Mit tu'c jayau iguinʉjmau: —¡Nʉs̈ e'p! Pe'ta̱m itsʉ̱nga inma̱m mit inmajtsʉcwájat, mit iwangap is̈mucotscáj.

⁴⁸ Po Jesús ipo'n ayé jayau jeme iguimumijnaway ayé noticia: —¿Pʉn ayé tʉn-e'pay as̈am tʉnma̱m mit tʉnmajtsʉcwájat?

⁴⁹ Mit cʉs̈ iquips̈cʉs̈ mam itsʉ̱́nga ipʉctampajyat, inʉm: —¡E'pca! Ayʉ̱́j tʉn-e'pcʉs̈pey as̈am tʉnma̱m mit tʉnmajtsʉcwájat.

⁵⁰ Ni'c pʉmba'tu jeme iwatpay lo que iwampay tʉnte̱t Dios jeme tsʉ̱napay tsajpni'c, ayé tʉn-e'p as̈am tʉnmajtsʉcwájat mit tʉnma̱m.