San Marcos 9 - Popoluca Sayula New Testament

¹ Jesús inʉmgʉs̈awey: —Iyacs̈ta'cway tʉnʉmgʉs̈ap ni'c una̱c jeme tsʉ̱ngapay yam ca-o'jcáj hasta tega-e'pcap imi'nwa'n ayé tiempu imanda̱twa'n Dios mit maj.

Jesús tigatsp iforma

² I-íjtʉj seis s̈ʉjwat, Jesús imunʉs̈cʉs̈ Pedro, Jacobo mit Juan, mit imunʉs̈cʉs̈ itu'gujmatu en tu'c yucmay copac, mit jem jat oymanac Jesús, je'jat iwindugʉtʉjmat.

³ Mit cuquijan ijamuc mit po'p ijajt as̈am nieve, hasta nejʉmay putspay ca-oyap igui-acpo'pi más po'p.

⁴ Mit iguique's̈ta̱jcajau Elías mit Moisés, imu-ampiugap Jesús.

⁵ Mit Pedro inʉjmau Jesús: —Amáyipay, oyo'gu natsʉ̱́nga yam. Tʉnwatcáj tu̱gup tʉcwájat, tu'c pa mi̱, tu'c pa Moisés mit jatu'c pa Elías.

⁶ Pedro inʉm we'n ni'c ni-apʉ̱tigʉjʉu, mit je' igajawiwu ti inʉmámpay.

⁷ Mit min tu'c wintuc jeme iguicutujcaway je'jat, mit imaraugau ni'c cotsp Dios wintucni'c, inʉmgʉs̈au: —Ayʉ̱́j ayé tʉnwáy jeme tʉnwampay, mijchat márauga je'.

⁸ Mit iyuc-e'pca, igaja-is̈cawu nepʉn mit je'jat, ja-itu'gumu Jesús.

⁹ Imanactá̱jcaj en ayé copac, Jesús inʉmgʉs̈au: Camnʉmgaja nepʉn lo que in-is̈caway hasta ʉ̱ jeme tʉjatway jayau tʉjutucta'cwa'n mam itsʉ̱nga á̱nimajat.

¹⁰ Mit ijayaumaygau lo que iguinʉmgajaway po ni-ucyo'tcʉjʉu je'jatu tini'c iguinʉm ni'c jutucta'gáj mam itsʉ̱nga á̱nimajat.

¹¹ Mit i-ucyo'tcau Jesús: —¿Tini'c iguinʉmga jeme i-ajque's̈capay ley ni'c itp ti imijnʉ'cwa'n ayé profeta Elías?

¹² Mit Jesús ipo'ngʉs̈: —Iyacs̈ta'cway Elías mijnʉ'cp pa igui-oyajcʉs̈wa'n nu'pʉjʉn cosajat. Po we'ney itsʉ̱na ja'yic Dios ilibruni'c ni'c ʉ̱ jeme tʉjatway jayau tʉntunas̈áj mit tʉs̈-ano'jcáj jayajwat.

¹³ Mit tʉnʉmgʉs̈ap ni'c minway Elías mit je'jat iguiwatcajau tigapa'tu as̈am itsʉ̱na ja'yic Dios ilibruni'c lo que iguijatámpay je'.

Tu'c qui'chna' ijtʉpay demo̱nyu

¹⁴ Icojy Jesús mam itsʉ̱́ngaj japu̱t ipʉctampajyat, i-is̈ ni'c mayo'c jayau tsʉ̱nau apitucje̱guic mam je'jat, mit una̱c jeme i-ajque's̈capay ley imuninʉmgʉjʉu je'jat.

¹⁵ Mit igui-ís̈caj Jesús, nu'pʉjʉn ayé jayajwat nigu-épigʉjʉu jaran, mit ipujʉ'jcaj mam je', isaluda̱tcau.

¹⁶ Mit Jesús i-ucyo'tcʉs̈: —¿Tini'c inyinʉ́mgʉjʉ?

¹⁷ Mit iguipo'n tu'c jayau tsʉ̱naway jayau-awa'tsam, inʉm: —Amayipay, tʉmumijnau tʉnwáy ni'c igui-ajcu-u̱mip tu'c demo̱nyu,

¹⁸ mit jʉmgapa'tu mam igui-actamp, igui-ajca'p mʉgʉc, mit qui'chna' iyacp au-o'pac mit i-ajcʉrrʉchp itʉ̱jtsat, mit cumʉgʉguip. Mit tʉnyo'tcʉs̈au impʉctampajyat ma acpíchingaja ayé demo̱nyu, po ca-oyawu.

¹⁹ Ipo'ngʉs̈ Jesús: —¡Ayʉ̱́j jinapay jayajwat cacupʉjcap nes̈ʉ̱n! ¿Hasta jutim tʉtsʉ̱nawa'n mit mijchat? ¿Hasta jutim tʉmajmoygʉs̈wa'n mijchat? Mumíngajac ayé qui'chna'.

²⁰ Mit cʉs̈ imumingajau qui'chna'. Po demo̱nyuna' igui-is̈ Jesús, ayé qui'chna' igui-actupʉc s̈e'm mit igui-ajca'u na̱s̈ni'c, mit quitawí̱c mit iyac au-o'pac.

²¹ Mit Jesús i-ucyo'jtau qui'chna' ite̱t: —¿Pʉjʉn tiempujanu i-íjtʉj desde iguijat ayʉ̱́j? Iguipo'n ayé jayau: —Desde titicwáynaj,

²² mit mayo'c viaje iguica'tstʉgʉyp jʉngʉtʉm mit nʉ'jugum pa igui-ago'gáj. Po te oyap mi̱ is̈wat tanti, ayo̱wis̈cac mit majyigac.

²³ Jesús inʉjmau: —Te oyap incupʉc. Ni'c te nacupʉcp, oyap nas̈wat nu'pʉjʉn cosa.

²⁴ Mit cʉs̈ qui'chna' ite̱t ya̱s̈ mʉgʉc, inʉm: —Tʉngupʉcp po majyiyac pa tʉcupʉc más.

²⁵ Igui-is̈ Jesús ni'c iguicutomibʉ'ngap ayé jayaujuc, iche'cta̱c demo̱nyuna', inʉjmau: —Mi̱ inajcu-u̱migʉs̈p jayajwat mit inga-acmaraugʉs̈p. Tʉnʉjmap, pichin mam je' mit camjatʉgʉyatu mam je'.

²⁶ Mit cʉs̈ demo̱nyuna' ya̱s̈, mit i-actupʉgatu s̈e'm ayé qui'chna', mit pichin mam je'. Mit iyajcau qui'chna' as̈am o'guic, hasta mayo'c jayajwat inʉmgau ni'c o'guiganu.

²⁷ Po Jesús, igui-actájnaj icʉ', i-ajca's̈ʉ'c, mit qui'chna' nitenda̱jcʉu.

²⁸ Itʉgʉjy Jesús tujugum, igui-ucyo'tcau ipʉctampajyat itu'gujmatu, inʉmgau: —¿Tini'c ʉjtsat ca-oyawu tʉs̈acpíchingaja ayé demo̱nyu?

²⁹ Jesús ipo'ngʉs̈: —Itp ti na-ora̱twa'n mit na-ayuna̱twa'n, ni'c solo we'n oyap nas̈acpichin demo̱nyujat as̈am aye'way.

Jesús inʉmgʉs̈apatu ni'c o'gáj

³⁰ Ipíchingaj jem, nas̈cau Galileajway na̱s̈, po Jesús igawanu nepʉn ma jawi,

³¹ ni'c i-ajque's̈cʉs̈au ipʉctampajyat, inʉm: —Ʉ̱ jeme tʉjatway jayau tʉs̈yajcáj jayajwat icʉ'jugujmat, mit tʉs̈ago'jcáj. Po cuandu tʉs̈ago'jcáj, tʉjutucta'gáj imutu̱gupay s̈ʉjw.

³² Po je'jat igajawigawu lo que inʉmway Jesús, mit ipʉ̱tcau igui-ucyo'tcawa'n.

Pʉn más manda̱táj

³³ Mit coygau Capernaum. Itsʉ̱́naj tujugum, Jesús i-ucyo'tcʉs̈: —¿Ti inyʉmdacmingau to̱uni'c?

³⁴ Po je'jat igapo'ngawu neti, ni'c to̱uni'c inʉmdacmingau pʉn más manda̱táj.

³⁵ Initsʉ̱ndá̱jcʉj Jesús, iya̱s̈cʉs̈ ayé doce pʉctampajyat, inʉmgʉs̈au: —Te tu'c jayau iwamp imanda̱twa'n más, itp ti itanwa'n más mugus̈á̱m de nu'pʉjʉjnat, mit itp ti iguimajyigʉs̈wa'n.

³⁶ Igui-actajn tu'c qui'chwáy, iyac mam je'jat itsʉ̱nga. Mit iguiyucme'jt ayé qui'chwáy, inʉmgʉs̈au:

³⁷ —Pʉmba'tu jeme ipʉctsowámpay tu'c qui'chwáy as̈am ayʉ̱́jway ni'c ʉ̱ tʉs̈wamp, casi ʉ̱ tʉs̈pʉctso̱p. Mit jeme tʉs̈pʉctsowámpay ʉ̱, tʉs̈capʉctsowáj ʉ̱jyu, po ipʉctsowámpey Dios jeme tʉs̈ajyu'tway.

Jeme nas̈ca-atujcapay ʉjtsat

³⁸ Juan iguinʉjmau: —Amayipay, tʉn-is̈cau tu'c jayau ni'c i-acpichimp demo̱nyujat inyʉ'jyni'c, mit tʉngamoygawu laj ni'c je' catsʉ̱nap mit ʉjtsat.

³⁹ Po Jesús inʉm: —Camatujcawit, ni'c te tu'c jayau iwatp milagru tʉnyʉ'jyni'c, ca-oyáj tʉs̈tucotsp.

⁴⁰ Ni'c jeme nas̈ca-atujcapay ʉjtsat, najawigap ni'c ʉjtsat nas̈mutʉgʉygap.

⁴¹ Iyacs̈ta'cway tʉnʉmgʉs̈ap ni'c pʉmba'tu jeme is̈moygámpay tu'c vasu nʉ' ni'c mijchat inmutʉgʉygau Cristu, Dios iguitso'gáj.

Jeme nas̈actuwatpay mal

⁴² ’Pʉmba'tu i-actuwatámpay mal tu'c de ayʉ̱j jayawájat jeme tʉs̈cupʉjcapay, más oy nacutsúmijya tu'c pa̱wan iyo'cni'c mit naca'tstʉgʉy lama̱tjugum.

⁴³ Mit te incʉ' is̈actuwatp mal, mejor camjatutsʉc ayé mal as̈am impus̈tucpay incʉ'. Ni'c más oy intʉgʉywa'n cʉ'tuguic mam i-it vida cacʉs̈ámpay que inyʉs̈wa'n mit mechc incʉ' pa jʉngʉtʉm mam nunca igapi'ch.

⁴⁴ Mit jem iguitunas̈cawa'n maljayajwat mam jʉjn nunca igapi'ch.

⁴⁵ Mit te inta'n is̈actuwatp mal, camjayo'y mam i-it ma̱jlat as̈am impus̈tucpay inta'n. Ni'c más oy intʉgʉywa'n cu̱s̈u mam i-it vida cacʉs̈ámpay que is̈aguepwa'n mechc inta'n pa is̈comgáj jʉngʉtʉm.

⁴⁶ Mit jem iguitunas̈cawa'n maljayajwat mam jʉjn nunca igapi'ch.

⁴⁷ Mit te inwijn is̈actuwatp mal, camja-e'p ayé mal as̈am inchi'tpay inwijn. Ni'c más oy intʉgʉywa'n en ayé lugar mam imanda̱t Dios mit tu'gu inwijn que is̈aguepwa'n mechc inwijn pa is̈comgáj jʉngʉtʉm.

⁴⁸ Mit jem iguitunas̈cawa'n maljayajwat mam jʉjn nunca igapi'ch.

⁴⁹ ’Ni'c nu'pʉjʉn iproba̱tcáj mit jʉjn, mit nu'pʉjʉn aníma̱t icotstʉgʉygajapay Dios, iproba̱tcámpey mit jʉjn.

⁵⁰ Oy ayé ca̱n, po te ca̱n cajapa'c, ¿nat igui-ac-o'mpiwa'n cayan? Mit as̈am ayé ca̱n i-oyi, wename-ey oy pi tsʉ̱nga en paz minu'pʉjʉjnat.