San Marcos 7 - Popoluca Sayula New Testament

Lo que nas̈actuwatpay mal

¹ Mingau Jerusalén fariseujat mit una̱c jeme i-ajque's̈capay ley, mit nigutomigʉjʉu mam Jesús.

² Mit je'jat i-is̈cau una̱c Jesús ipʉctampajyat caygap mit calimpia̱tic icʉ'jat, ayé inʉmo'jcʉp ni'c igacupujcawu icʉ'jat as̈am iguiwatca fariseujat. Mit i-acusa̱tcau.

³ Ni'c fariseujat mit nu'pʉjʉn judíujat icupʉjcapnaj ampay jayajwat icostumbrejat, ni'c te igacupujcap icʉ'jat may veces, cacaygap.

⁴ Mit ipitujcanuwa'n mercaduni'c, te canigupujcʉjʉp, cacaygap. Mit it japu̱t costumbrejat jeme iguarda̱tcaway: icupujcap vasujat natu-u̱cpay, s̈a̱nujat, pus̈anchijmat mit icatrejat.

⁵ Ayé fariseujat mit jeme i-ajque's̈capay ley i-ucyo'tcau Jesús: —¿Tini'c impʉctampajyat iguigaguardá̱tca ampay jayajwat icostumbrejat? ni'c icáyga, igacupujcap icʉ'jat as̈am ʉjtsat tʉs̈wátca.

⁶ Jesús ipo'ngʉs̈: —Mijchatu miniwe̱tcʉjʉp. Iyacs̈ta'cway lo que inʉmway Isaías de mijchat, as̈am itsʉ̱na ja'yic Dios ilibruni'c, inʉm Dios: Ayʉ̱́j jayajwat i-auni'jcatu tʉs̈-oyninʉmgap, po tʉs̈cawangap mit nu'pʉjʉn ijo̱jtat.

⁷ Jalmanu tʉs̈-adora̱tcap, ni'c i-ajque's̈cap tu'c ama̱s̈an lo que inʉmgapay jayajwat.

⁸ Incuyaguigaway lo que Dios imanda̱tway mit injayaumaygajap jayajwat icostumbrejat, ni'c incupujcap s̈a̱nujat mit vasujat natu-u̱cpay, mit inwatcap japu̱t cosajat wename'way.

⁹ Inʉmgʉs̈awey Jesús: —Inyajcap jalmanu lo que imanda̱tway Dios pa is̈guarda̱tcawa'n incostumbrejat.

¹⁰ Ni'c Moisés inʉm: “Oyninʉm inte̱t mit inma̱m”, mit “ma o'c ayé jayau jeme itucotsámpay ite̱t o ima̱m.”

¹¹ Po mijchat inyʉmgap ni'c tu'c jayau oyap iguinʉ́jma ite̱t o ima̱m ni'c igamajyigʉs̈áj, solo inʉmgʉs̈áj Corbán, ayé inʉmo'jcʉp ni'c imoyway Dios nu'pʉjʉn lo que ijtʉpay.

¹² Mit cʉs̈wa'n inyʉmgap ni'c caja-itp ti iguimajyigʉs̈wa'n ite̱t ne ima̱m.

¹³ Como we'n is̈wátca, inyajcap jalmanu Dios ipalabra ni'c inmunʉs̈capnaj in-ampaycostumbrejat. Mit mayo'c cosajat is̈wátca wename'way.

¹⁴ Mit iya̱s̈cʉs̈atu ayé jayajwat, inʉmgʉs̈au: —Maraugac minu'pʉjʉjnat mit entendiá̱tca lo que tʉnyʉmpay.

¹⁵ Jeme nacaygapay nas̈ca-actuwatcap mal. Nas̈actuwatcap mal jeme pichimpay najo̱tni'jcat.

¹⁶ Te tu'c jayau ijtʉp ita̱tsʉc pa iguitumarawa'n, ma marau lo que tʉnyʉmpay.

¹⁷ Ipichijn Jesús jayau-awa'tsam, tʉgʉy tujugum, mit ipʉctampajyat igui-ucyo'tcau ti inʉmo'jcʉp ayé inʉmgʉs̈away.

¹⁸ Je' inʉmgʉs̈au: —¿We'ney mijchat miga-entendia̱tcap? ¿Ingajawigap ni'c nas̈ca-actuwatcap mal jeme nacaygapay?

¹⁹ Ni'c cayan nacayp mit nas̈p natinchayni'c mit na-acpichimpatu. Inʉm we'n pa najawi ni'c oy nu'pʉjʉn cayan.

²⁰ Inʉm Jesús: —Nas̈actuwatcap mal jeme pichimpay najo̱tni'jcat.

²¹ Ni'c najo̱tni'c ipichin nu'pʉjʉn mal napensa̱tpay, nachajyo'ywa'n, na-ago'cwa'n,

²² nanu'mwa'n, nas̈wa'nwa'n jayje', nas̈watwa'n mal, nawe̱twa'n, nas̈aguepwa'n may viciu, najayau-anwa'n, natucotswa'n, nanimʉjninʉjmʉwa'n, natontowatwa'n.

²³ Nu'pʉjʉn ayʉ̱́j cosa ma̱jlatway pichimp najo̱tni'jcat mit ayʉ̱́j nas̈actuwatcap mal.

Nat icupʉc tu'c to's̈ay sirofeniciajway

²⁴ Ipichjn jem Jesús, nʉcs̈ pa ayé na̱s̈at Tiro mit Sidón. Mit je' tan en tu'c tʉjc, mit igawanu ma jawi nepʉn po ca-oyawu itsʉ̱na cuyu'tsic.

²⁵ Ni'c tu'c to's̈ay imarau lo que iwatway Jesús, mit je' ito'chwáy ijtʉu demo̱nyu. Mit ayé to's̈ay min jaran mam Jesús mit nicos̈atenda̱jcʉu ita'ná̱m.

²⁶ Mit ayé to's̈ay cots griegu-ajw mit je' sirofeniciajway ni'c ye'c en ayé na̱s̈. Mit iyo'jtau Jesús ma acpichijna ayé demo̱nyu ito'chwáy.

²⁷ Po Jesús inʉjmau: —Tsac ma cajyʉ'jca tʉnwajyat, ni'c ca-oy tʉs̈chi'tcajawa'n tʉnwajyat ima̱s̈anʉ̱n pa tʉs̈moygawa'n tacwájat.

²⁸ Mit je' iguipo'n: —Jo̱, Señor, po tacwájat icaygap ma̱s̈anʉ̱nco's̈wájat me̱s̈apa'tmay jeme inwajyat i-ajca'ugapay.

²⁹ Jesús inʉjmau: —Ni'c we'n impo'jn, nʉs̈, ni'c oytanway into'chwáy. Pichinway ayé demo̱nyu.

³⁰ Icóynuj itʉcm ayé to's̈ay, ipa̱t ayé to'chwáy iche's̈ni'c, mit pichinway ayé demo̱nyu.

Jesús i-ac-oytamp tu'c u̱m

³¹ Ipíchijnatu Tirojway na̱s̈, Jesús nas̈ pa Sidónway na̱s̈ mit nʉ'jcopajcat Decápolis pa icojawa'n laguna Galileajway.

³² Mit imumingajau Jesús tu'c jayau jeme camarapay mit ca-oyap icots oy, mit inʉmgajau ma yajca icʉ' iyucuinm ayé jayau.

³³ Mit iguimupichijn Jesús ayé jayau jatu'c laj, icojmau icʉ'jʉjp ita̱tsʉjcʉtʉm, mit icutsujcu't icʉ'jʉjp mit itsʉjcau ito̱jts.

³⁴ Mit iyuc-e'jp tsajpni'c, s̈ajtogojyʉu mit inajau: —Efata. (Ayʉ̱́j inʉmo'jcʉp: Ma oytan inta̱tsʉc.)

³⁵ Mit marauda̱c jaran, mit oytaney jaran ito̱jts, mit oyo'gu icojts.

³⁶ Mit Jesús inʉmgʉs̈au maganʉmgaja nepʉn, po je'jat más inʉmdacyo'ygau.

³⁷ Mit nigu-épigʉjʉu may, mit inʉmgau: —Oyo'gu iguiwat nu'pʉjʉn. Jeme camaraugapay i-acmarauda̱jcʉs̈p, mit u̱májat i-ajcotsta̱jcʉs̈p.