San Marcos 6 - Popoluca Sayula New Testament

Jesús coyp Nazaret

¹ Ipichijn jem Jesús, coy itʉcmayna̱s̈, mit iguinatspoguigau ipʉctampajyat.

² En tu'c po'cs̈ans̈ʉjw Jesús chu̱chiu ajque's̈pay mam i-adora̱tca judíujat, mit mayo'jcat jeme imaraugaway nigu-épigʉjʉu mit inʉmgau: —¿Jʉm iguipʉc ayʉ̱́j jayau ayé i-ajque's̈pay? ¿Pʉn igui-actupʉctan? ni'c nas̈acnigu-épigʉjʉp lo que iwatpay.

³ Ayʉ̱́j ayé cuys̈echpayna', María iwayna', mit ijtʉp imajtsʉjcat Jacobo, José, Judas mit Simón, mit imajtsʉcma̱jmat yam itsʉ̱ngájtsat nanʉ'jcopacni'jcat. Mit je'jat igapʉctsougawu Jesús.

⁴ Po Jesús inʉmgʉs̈au: —Más i-oyninʉmgap tu'c profeta jaynʉ'jcopacni'c. Po itʉcmayna̱s̈ni'c iga-oyninʉmgap, ne ije̱wayna'jat, ne itʉcm tsʉ̱ngapay.

⁵ Mit ca-oyawu iguiwat jem nejʉmay milagru, solo iyajcʉs̈au icʉ'jat iyucuinmat una̱c tu'nijatway mit i-ac-oytangʉs̈.

⁶ Mit Jesús nigu-épijyʉu ni'c je'jat igawangawu iguicupʉjcáj. Mit nʉcs̈ ajque's̈tacyo'ypay mam i-itca titic nʉ'jcopacwájat.

Jesús i-ajyu'tp doce ipʉctampajyat

⁷ Iguiya̱s̈cʉs̈ ayé doce pʉctampajyat, chu̱chiu igui-ajyu'tcʉs̈ cʉjmechc cʉjmechc, mit imoygʉs̈ poder pa igui-acpichingawa'n demo̱nyujat.

⁸ Mit imanda̱tcʉs̈ ma munʉs̈ca ipórto̱jnatu to̱uni'c, po magamunʉs̈ca ma̱s̈anʉ̱n, ne morral, ne tumi̱n.

⁹ Mit ma comga icʉ'ajcat, po magamunʉs̈ca mechc chec.

¹⁰ Mit inʉmgʉs̈awey: —Jʉmba'tu mam intʉgʉygawa'n en tu'c tʉjc, jem intangawa'n hasta impichinganuwa'n jem.

¹¹ Mit te itp tu'c lugar mam is̈capʉctsougáj ne is̈camaraugap, impichingawa'n jem, cus̈ícs̈ca pu's̈na' jeme itpay inta'ni'jcat pa ma jawiga ni'c je'jat ma̱lo'jcat. Iyacs̈ta'cway tʉnʉmgʉs̈ap ni'c jayajwat tsʉ̱ngapay en ayé lugar itunas̈o'jcáj más mʉgʉc que ayé maljayajwat Sodomajatway mit Gomorrajatway en ayé s̈ʉjw ijuzga̱twa'n Dios.

¹² Ipíchingaj je'jat, inʉmdacyo'ygau ni'c itp ti nas̈cuyaguiwa'n nama̱lway to̱u.

¹³ Mit i-acpichingau may demo̱nyujat, mit tu'nijatway ijatscajau aceite, mit i-ac-oytangau.

Nat i-o'jc Juan nʉ'gutempayna'

¹⁴ Nu'pʉjʉn jayajwat ijawigau ti iwatway Jesús, jemni'c rey Herodes ijawiwey, mit inʉm: —Ayʉ̱́j dejuru Juan nʉ'gutempayna' mit je' jutucta̱c mam itsʉ̱nga á̱nimajat, jemni'c Dios iguimoyp poder pa iguiwatwa'n nu'pʉjʉn cosa.

¹⁵ Mit una̱c inʉmgau: —Profeta Elías ayé. Mit ja-una̱c inʉmgau: —Ayé jayau tu'c profeta as̈am profetajat ámbanuway.

¹⁶ Po iguimarajw Herodes, inʉm: —Juan, jeme tʉnacpus̈tujcʉway icopac, jutucta̱cway.

¹⁷ Ni'c Herodes i-ajyu't pa ma actanga Juan, mit icutsumda̱jcau mit icuytʉjcomgau, ni'c we'n iguiwajn Herodías. Ni'c Herodías ito's̈ayate Felipe, po Herodes ito's̈ayját, mit Felipe ayé Herodes ije̱way.

¹⁸ Mit Juan inʉjmau Herodes: —Ca-oy is̈to's̈ayjatwa'n inje̱way ito's̈ay.

¹⁹ Mit Herodías i-ano'c Juan mit iwan ma o'c, po ca-oyawu iguiwat neti,

²⁰ ni'c Herodes ipʉ̱t Juan ni'c ijawiu ni'c Juan tu'c jayau yacs̈icway mit igawatu nejʉmay mal. Mit Herodes icuida̱t Juan mit iwan iguimarawa'n. Po iguimarajw, pʉ̱jtʉgʉy mit igajawiwu ti iwatáj.

²¹ Mit coy tu'c oyway tiempu pa Herodías, ni'c Herodes iwat tu'c cayna̱s̈ ni'c itso̱u is̈ʉjw. Mit i-imvitatcʉs̈ manda̱tpajyat, capitájnat mit mʉjayajwat Galileajatway.

²² Mit tʉgʉy echpay Herodías iwayma̱m, mit inijat Herodes mit jeme tsʉ̱ngaway me̱s̈ani'c, mit reyna' inʉjmau ayé quis̈ay: —Yo'jtac ti inwa'námpay mit tʉmo'áj.

²³ Tʉjura̱jtap ni'c tiyu is̈yo'jtámpay tʉmo'áj hasta es̈pu̱t lo que tʉnmanda̱tpay.

²⁴ Ipichijn ayé quis̈ay, i-ucyo't ima̱m: —¿Ti tʉnyo'jtáj? Mit iguipo'n je': —Yo'jta icopac Juan nʉ'gutempayna'.

²⁵ Mit tʉgʉy jaran mam ayé rey mit iyo'jtau, inʉm: —Tʉnwamp is̈mo'áj jaran icopac Juan nʉ'gutempayna' puna̱tuni'c.

²⁶ Cʉs̈ ayé rey tu'no'c ijo̱jt, po ca-oyawu iguinʉm ni'c ca̱j, ni'c ijura̱jtau mit iguimaraugawey jeme tsʉ̱ngaway me̱s̈ani'c.

²⁷ Mit ayé rey i-ajyu't jaran tu'c soldáj pa iguimumijnawa'n Juan icopac.

²⁸ Cʉs̈ ayé soldaj nʉcs̈, iguipus̈tújcaj Juan icopac cuytujugum, imumijnau icopac puna̱tuni'c, mit i-entrega̱jtau quis̈ayma̱m ayé copac, mit je' imoy ima̱m.

²⁹ Iguimáraugaj we'n Juan ipʉctampajyat, mingau mit ipʉjcajau Juan icuerpu mit imunʉs̈cau pa iguini̱pcawa'n.

Jesús i-ajcaygʉs̈p cinco mil jayajwat

³⁰ Cʉs̈ ayé apóstojlat ni-apʉcmujcʉjʉu mit Jesús, mit i-ampiugajau nu'pʉjʉn lo que iwatcaway mit lo que i-ajque's̈caway.

³¹ Mit inʉmgʉs̈au: —Janga ʉjtsatu mam igatsʉ̱na nepʉn pa napo'cs̈cawa'n s̈ʉ̱n. Inʉm we'n Jesús ni'c it mayo'c jayajwat jeme nʉs̈capay mit mingapay, jemni'c ca-itcʉjʉp tiempu ne pa icaygawa'n.

³² Cʉs̈ nʉs̈cau je'jatu ajni'c mam igatsʉ̱na nepʉn.

³³ Po mayo'c jayajwat igui-is̈caway inʉs̈ca, mit igui-is̈capcau, mit nʉs̈cau pujʉ'c nu'pʉjʉn nʉ'jcopac jayajwat, mit je'jat cojyʉ'jcau mit nigutomigʉjʉu mam Jesús.

³⁴ Ipichijn ajni'c Jesús, i-is̈atu mayo'c jayau, mit i-ayo̱wis̈cʉs̈ ni'c que's̈cau as̈am borregujat jeme ca-itcʉjʉpay jeme igui-aquepmujcapay. Mit chu̱chiu igui-ajque's̈cʉs̈a mayo'c cosajat.

³⁵ Mit cuandu tsu'jito'ganu, coygau mam je' ipʉctampajyat, mit inʉmgajau: —Yam ca-itp tʉjcat mit tsu'jito'ganu.

³⁶ Acnʉs̈cʉs̈ ayʉ̱́j jayajwat mam iguipa̱tcawa'n tʉjcat mit jem ma juyga ma̱s̈anʉ̱n, ni'c ca-itcʉjʉp ti icaygámpay.

³⁷ Po Jesús inʉmgʉs̈au: —Moyga mijchat ma cayga. Mit je'jat iguinʉmgajau: —¿Is̈jawi nʉs̈áj tʉs̈juyga dos mil pesos ma̱s̈anʉ̱n pa tʉs̈moygawa'n ma cayga?

³⁸ Jesús inʉmgʉs̈au: —¿Pʉjʉn ma̱s̈anʉ̱nwájat is̈aguepca? Nʉs̈i, e'pca. Mit igui-ís̈caj, inʉmgajau: —Cinco ma̱s̈anʉ̱nwájat mit mechc acs̈wájat i-it.

³⁹ Mit Jesús inʉmgʉs̈au nu'pʉjʉn ma nitsʉ̱nda̱jcʉjʉ en grupujat mʉyyucuinm.

⁴⁰ Mit nitsʉ̱nda̱jcʉjʉu jem en grupujat de cien jayajwat mit en grupujat de cincuenta.

⁴¹ Mit Jesús iguipʉjcʉs̈ ayé cinco ma̱s̈anʉ̱nwájat mit mechc acs̈wájat, yuc-e'p tsajpni'c, ibendiciona̱t, mit i-emgada̱jcʉs̈ ma̱s̈anʉ̱nwájat mit imoygʉs̈ ipʉctampajyat pa ma moyga ayé jayajwat, mit i-acpas̈angau ayé mechc acs̈wájat pa nu'pʉjʉjnat.

⁴² Mit caybʉ'ngau nu'pʉjʉn jayajwat mit cu̱s̈cʉjʉu.

⁴³ Mit i-apiumujcau doce ca'c patsijcatway mit ma̱s̈anʉ̱ncutucwájat mit acs̈wájat jeme icaytangaway.

⁴⁴ Mit it cinco mil jayajwat jeme caygaway.

Jesús yo'yp lagunayucuinm

⁴⁵ Mit Jesús inʉmgʉs̈au jaran ipʉctampajyat ma tʉgʉyga ajni'c mit ma nʉs̈ʉ'jca je'jatu tuganʉ-ájw mam nʉ'jcopac Betsaida, mientras Jesús i-acnʉs̈cʉs̈p ayé jayaujuc.

⁴⁶ Mit cʉs̈ igui-acnʉs̈cʉs̈ je'jat, nʉcs̈ Jesús en tu'c copac ora̱tpay.

⁴⁷ Icutsu'ij, ajna' tsʉ̱nau es̈pu̱t laguna, mit Jesús itu'gumu itajn na̱s̈ni'c.

⁴⁸ Mit i-is̈cʉs̈ ni'c ipʉctampajyat caja-oyap igui-acyo'yga ajna' ni'c cʉs̈way ijo̱jtat ni'c iguitsactsougap s̈e'mna'. Mit jopoytsu'mnaj imijn Jesús mit yo'y lagunayucuinm, mit iwan igui-ayo'yje̱jcʉs̈wa'n yagatsu.

⁴⁹ Po je'jat i-is̈cau ni'c yo'yp lagunayucuinm, inʉmgapayta ni'c tu'c á̱nima, mit ya̱s̈cau.

⁵⁰ Ni'c nu'pʉjʉjnat i-is̈cau je', mit ni-apʉ̱tigʉjʉu. Po Jesús imucotscʉs̈ jaran, inʉmgʉs̈au: —Camdesmaya̱tca, ni'c ʉ̱ tʉmimp. Campʉ̱tcawit.

⁵¹ Mit Jesús cu't ajni'c mam je'jat, mit tentan ayé s̈e'mna'. Mit je'jat nigu-épigʉjʉu mayo'c.

⁵² Po como igani-entendia̱tcap, inijawiyo'tcau ni'c Jesús ijtʉp poder cuandu igui-emgada̱jc ayé ma̱s̈anʉ̱n.

Jesús i-ac-oytangʉs̈p jayajwat Genesaret

⁵³ Inás̈caj tuganʉ-ájw, coygau Genesaretway na̱s̈, mit i-actentangau ajna' nʉ-auni'c.

⁵⁴ Ipíchingaj ajni'c, jayauna'jat i-is̈capcau jaran Jesús.

⁵⁵ Mit ituyo'ygau nu'pʉjʉn parte ayé na̱s̈, mit iguimáraugaj ni'c Jesús tsʉ̱nap en tu'c parte, chu̱chiu iguimumíngaja tu'nijatway ito'cni'jcat.

⁵⁶ Mit jʉmgapa'tu mam icoja Jesús, te nʉ'jcopajcat, te ciudajat o mam i-it una̱c tʉjcat, calleni'c iguicʉmdá̱jca nu'pʉjʉn tu'nijatway, mit iyo'tcajau laj Jesús pa iguitsʉjcajawa'nu ijamuc-au-á̱m. Mit pʉmba'tu jeme itsʉcway, oytan jaran.