San Marcos 15 - Popoluca Sayula New Testament

Jesús mit Pilato

¹ Icus̈ʉwij, ni-acochigʉjʉu judíujat imʉjpa̱nijat, na'waywájat, jeme i-ajque's̈capay ley, mit nu'pʉjʉn judíujat ijefejat. Iguicutsumdá̱jcaj Jesús, imunʉs̈cau pa Pilato icʉ'jugum.

² Mit Pilato i-ucyo't: —¿Mi̱j ayé is̈rejyat judíujat? Je' iguipo'n: —Iyacs̈ta'cway lo que inyʉmpay.

³ Mit judíujat imʉjpa̱nijat i-acusa̱tcau mayo'c.

⁴ I-ucyo'twatu Pilato, inʉm: —¿Is̈capo'mp nes̈ʉ̱n? E'p pʉjʉn cosajat is̈tu-acusa̱tcap.

⁵ Po Jesús nes̈ʉ̱n capo'nu hasta nigu-épijyʉu Pilato.

I-ac-ago'jcʉjʉp Jesús

⁶ Cada ma̱s̈ʉjw Pilato i-acjo'ní̱c tu'c presu jeme je'jat iyo'tcámpay.

⁷ Mit it tu'c presu inʉ'jyway Barrabás. Je' tsʉ̱nau cuytujugum mit icumpajlat ni'c ago'jcau en tu'c tsuguin.

⁸ Icóygaj ayé jayaujuc, chu̱chiu iguiyo'tcaja Pilato ma wat as̈am iguiwatí̱c cada ma̱s̈ʉjw.

⁹ Pilato ipo'ngʉs̈: —¿Inwangap tʉ-acjo'ngʉs̈awa'n judíujat irejyat?

¹⁰ Ni'c ijawiu ni'c judíujat imʉjpa̱nijat i-ano'jcau Jesús, jemni'c iguiyájcaj Pilato icʉ'jugum.

¹¹ Po judíujat imʉjpa̱nijat i-acochigʉs̈ ayé jayaujuc ni'c más oy ma yo'tcaja Pilato ma igui-acjo'ngajac Barrabás.

¹² I-ucyo'tcʉs̈atu Pilato, inʉm: —¿Tipaj inwangap tʉs̈wajtawa'n ayé jeme inyʉmgapay ni'c judíujat irejyat?

¹³ Je'jat ya̱s̈cada̱jcawatu, inʉmgau: —¡Yajca cunu̱s̈ni'c!

¹⁴ Po Pilato inʉmgʉs̈au: —¿Ti mal iwat? Po je'jat ya̱s̈cada̱jcau más mʉgʉc: —¡Yajca cunu̱s̈ni'c!

¹⁵ Mit Pilato por iguiwa'n itanwa'n oy mit nʉ'jcopac jayau, i-acjo'ngʉs̈au Barrabás. Imanda̱t ma raunipʉ'nga Jesús, mit iyajcʉs̈au soldájat icʉ'jugujmat pa ma yajca cunu̱s̈ni'c.

¹⁶ Mit soldájat imunʉs̈cau Jesús hasta palaciuni'c mam itsʉ̱na gobernador. Mit iya̱s̈pʉ'ngau ma minga nu'pʉjʉn soldájat jemay.

¹⁷ Mit je'jat icutigatscau Jesús mit jamuc moraduway. Iguique'cs̈caj tu'c apitcorona, icomgajau icopacni'c.

¹⁸ Mit chu̱chigau iguisaluda̱tca de burla, inʉmgau: —Mi̱ tʉsaluda̱tcap, judíujat is̈rejyat.

¹⁹ Mit itumoyta̱jcau tu'c pʉ̱yan icopacni'c. Mit icutsujcu'tcau mit nicos̈atenda̱jcʉjʉu de burla.

²⁰ Cʉs̈ iguiburlá̱tcaj, ichi'tcajau ijamuc moraduway, mit icutigatscau Jesús mit je' ijamuc. Mit i-acpichingau pa iguiyajcawa'n cunu̱s̈ni'c.

Iyajcap Jesús cunu̱s̈ni'c

²¹ Mit nas̈pate to̱uni'c tu'c jayau inʉ'jyway Simón, je' tsʉ̱nau nʉ'jcopac Cirene mit je' Alejandro mit Rufo ite̱jtat. Mit Simón i-actutsʉmgau ayé cunu̱s̈.

²² Imunʉs̈cau Jesús en tu'c lugar inʉ'jyway Gólgota, ayé inʉmo'jcʉp, Lugar de Animacopac.

²³ Imoygau je' vinu motic mit cuy-acnʉ' inʉ'jyway mirra, po je' igapʉctso̱wu.

²⁴ Mit cʉs̈ iyajcau cunu̱s̈ni'c. Mit ayé soldájat i-i̱jcajau apuesta pa igui-e'pcawa'n pʉn ipʉgáj Jesús ijamuc, mit wename igui-acpás̈angajaj ijamuc.

²⁵ Jopoyít a las nueve iguiyájcaj cunu̱s̈ni'c.

²⁶ Ija'ygau tu'c letreru pa ma jawiga tini'c iguicastigá̱tca Jesús, inʉm ayé letreru: “JE' JUDIUJAT IREJYAT.”

²⁷ Itumuyajcawey jem icunu̱s̈ni'jcat mechc nu'mpajyat, tu'c i-oyim mit tu'c i-anajyim.

²⁸ Mit wejpu'n icumplia̱jt jeme tsʉ̱napay ja'yic Dios ilibruni'c: “Je' tsʉ̱nau mit malwatpayna'jat.”

²⁹ Mit jeme nas̈capay itucotscau je', i-acyʉgʉngau icópajcat de burla, inʉmgau: Mi̱j ayé inyʉmpay ni'c inacyʉnʉnmanagáj templu mit inajca's̈ʉ'gáj en tu̱gup s̈ʉjw,

³⁰ jinap nisalvá̱jtʉ mi̱jyu mit manac cunu̱s̈ni'c.

³¹ Mit itucotscawey je' judíujat imʉjpa̱nijat mit jeme i-ajque's̈capay ley, inʉmgau je'jatu: Isalva̱tcʉs̈ japu̱jtat, po je'yu ca-oyap inisalva̱jtʉ.

³² Ma mánagama cunu̱s̈ni'c Cristu Israejlatway irey pa nas̈-e'pcawa'n mit pa nas̈cupʉjcawa'n. We'ney iguitucotscau ayé nu'mpajyat jeme iyajcaway icunu̱s̈ni'jcat mit je'.

Nat i-o'jc Jesús

³³ Icojy pu̱ts̈ʉjw, cuchítimiu nu'pʉjʉn na̱s̈ hasta las tres de la tarde.

³⁴ Mit a las tres de la tarde Jesús ya̱s̈ mʉgʉc, inʉm: Eloi, Eloi, ¿lama sabactani? Ayʉ̱́j inʉmo'jcʉp: Oh Dios, ¿tini'c is̈cuyaguiu ʉ̱?

³⁵ Mit una̱c jeme tsʉ̱ngaway jem iguimáraugaj, inʉmgau: Márauga, iya̱s̈p profeta Elías.

³⁶ Po tu'c jayau ipujʉ'jc, i-acs̈o'c tu'c jamucmoch mit vinagre. Iguiyajc pʉ̱yani'c, i-ajcutomijyau Jesús i-auni'c pa ma tsu'ts, inʉm: Mo' laj, na-e'pcáj te mi'náj profeta Elías igui-acmanacp.

³⁷ Mit Jesús iya̱s̈ mʉgʉc, o'c.

³⁸ Mit ayé cortina templutujugumay na̱tmo't inimechcláji desde yucm hasta pa'tm.

³⁹ Mit tu'c capitán jeme tsʉ̱naway tom mam Jesús, igui-is̈ ni'c wename i-o'jc, inʉm: Iyacs̈ta'cway ayʉ̱́j jayau Dios iway.

⁴⁰ Tsʉ̱ngawey jem una̱c to's̈aywájat jeme i-is̈caway yagatsu. Tsʉ̱ngau mit je'jat María Magdalajway, Salomé, mit María ima̱jmat Jacobo jeme más majtsʉcway mit José.

⁴¹ Cuandu itsʉ̱naj Jesús Galilea, ayʉ̱́jat iguinatspoguigau mit iguimajyigau, mit we'ney iguiwátcaj japu̱t to's̈ajyat jeme mingaway mit je' Jerusalén.

Ini̱pcap Jesús

⁴² Icutsu'jítij ayé s̈ʉjw, ni-oyajcʉjʉu pa iguipʉctsougawa'n po'cs̈ans̈ʉjw.

⁴³ Min jaran José Arimateajway. Ayʉ̱́j tu'c mʉjayau nije'yu judíujat ijefejat, mit i-atsʉ̱napate-ey hasta Dios imanda̱twa'n, mit je' capʉ̱tu pa itʉgʉywa'n mam Pilato, mit iyo'jtau Jesús icuerpu pa iguini'pwa'n.

⁴⁴ Mit Pilato nigu-épijyʉu ni'c o'guiganu Jesús. Mit iguiya̱s̈ capitán, i-ucyo't te o'guiganu.

⁴⁵ Igui-actujawiu capitán ni'c o'guiganu, je' imoy José Jesús icuerpu.

⁴⁶ Mit cʉs̈ José ijuy tu'c sábana. Igui-acmanajc Jesús, icupitmo'n je' mit ayé sábana, mit icom en tu'c á̱nimacʉt jeme pactajicway tsa'ni'c, mit i-acpogol tu'c tsa' hasta á̱nimacʉt-auni'c.

⁴⁷ Mit María Magdalajway mit María José ima̱m i-is̈cau mam iguiyájcaj Jesús.