San Lucas 24 - Popoluca Sayula New Testament

Jutucta̱c Jesús

¹ Icus̈ʉwij ayé primer s̈ʉjw s̈amana, jopoyito'gu i-óygaj ayé to's̈ajyat mam ini'pigui Jesús, mit imunʉs̈cau ayé perfume pa'cs̈u'cpay jeme i-oyajcaway. Mit nʉs̈cau mit je'jat japu̱t to's̈ajyat.

² Mit ipa̱tcau ni'c chi'tiganu ayé tsa' cʉt-auni'cway.

³ Mit itʉ́gʉygaj, igapa̱tcajawu icuerpu el Señor Jesús.

⁴ Mit igajawigapate ti iwatcáj, mit cʉs̈ mechc jayajwat nitenda̱jcʉjʉu mam je'jat mit quijan ijamujcat.

⁵ Mit como ni-apʉ̱tigʉjʉu, nicos̈atenda̱jcʉjʉu na̱s̈ni'c, mit iguinʉmgajau ayé mechc jayajwat: —¿Tini'c is̈che'nga á̱nimacʉtni'c jeme caja-o'guicway?

⁶ Je' capʉn yam, jutucta̱cway. Nijawiga lo que Jesús is̈nʉmgajaway cuandu itsʉ̱naj mit mijchat Galilea.

⁷ Inʉm: Ʉ̱ jeme tʉjatway jayau it ti tʉs̈yajcáj maljayajwat icʉ'jugujmat, mit tʉs̈yajcáj cunu̱s̈ni'c, mit tʉjutucta'gáj imutu̱gupay s̈ʉjw.

⁸ Mit je'jat inijawigau lo que inʉmway Jesús.

⁹ Mit ipíchingaj mam i-it ayé á̱nimacʉt, inʉmgajau ayé oyway noticia ayé once pʉctampajyat mit japu̱t jayajwat.

¹⁰ Mit María Magdalajway, Juana, María Jacobo ima̱m, mit japu̱t to's̈ajyat i-ajque's̈cajau ayé apóstojlat.

¹¹ Po ayé apóstojlat inʉmgapayta ni'c itʉ'tsnʉmgapu, mit igacupʉjcawu.

¹² Po ica's̈ʉ'jc Pedro, nʉs̈ pujʉ'c pa mam i-it ayé á̱nimacʉt, mit i-e'ptʉgʉjy, solo i-is̈ ayé sábanajat, mit nigu-épijyʉu ni'c we'n ijajt, mit pitucnuw pa itʉcm.

Lo que jatway to̱uni'c Emaús

¹³ En ayé nije'yu s̈ʉjw mechc pʉctampajyat nʉs̈cau pa tu'c nʉ'jcopacwáy inʉ'jyway Emaús jeme tsʉ̱napay doce kilómetros de Jerusalén.

¹⁴ Mit je'jat i-ampiutacnʉs̈cau nu'pʉjʉn cosajat jeme jatway.

¹⁵ Mit merute i-ampiutacnʉ́s̈ca, Jesús nigutomijyʉu mit nʉs̈ tuwitic mit je'jat.

¹⁶ Mit je'jat i-is̈cau Jesús po ca-oyawu igui-is̈cápca jaran.

¹⁷ Mit Jesús inʉmgʉs̈au: —¿Ti inampiutacnʉs̈cap? ¿Mit tini'c itu'n injo̱jtat?

¹⁸ Mit iguipo'n tu'c inʉ'jyway Cleofas, inʉm: —Mi̱ jinapo'cnaj incojy Jerusalén, mit jemni'c ingajawip ti jatway ayʉ̱́j s̈ʉjwat.

¹⁹ Mit Jesús inʉmgʉs̈au: —¿Ti jat? Mit iguinʉmgajau ti iguijatway Jesús Nazaretway. Je' tu'c profeta ijtʉway poder, mit inʉm majatway cosajat mam igui-e'p Dios mit mam igui-e'pca-ey nu'pʉjʉn jayajwat.

²⁰ Mit judíujat imʉjpa̱nijat mit autoridajat i-entrega̱tcau Jesús pa ma o'c, mit iyajcau cunu̱s̈ni'c.

²¹ Po ʉjtsat tʉnatsʉ̱ngapate ni'c je' ilibra̱táj Israelway jayajwat, mit jinap ijtʉnup tu̱gup s̈ʉjw desde iguiyájcaj cunu̱s̈ni'c.

²² Mit tʉs̈acnigu-épigʉjʉu una̱c to's̈ajyat jeme tsʉ̱ngaway mit ʉjtsat. Ni'c je'jat nʉs̈cau jopoyito'gu pa mam iguiní̱pcaj.

²³ Mit como igapa̱tcajawu icuerpu, pitujcau mit inʉmgau ni'c i-is̈cau tu'c visión ni'c iguique's̈ta̱jcajau ángejlat, mit je'jat iguinʉmgajau ni'c Jesús jutucta̱cway.

²⁴ Mit una̱c jeme tsʉ̱ngapay mit ʉjtsat oygau mam i-it ayé á̱nimacʉt mit ipa̱tcau as̈am iguinʉ́mgaj ayé to's̈ajyat, po je' iga-is̈cawu.

²⁵ Mit cʉs̈ Jesús inʉmgʉs̈au: —Mijchat inga-entendia̱tcap neti, mit mʉgʉgo'c incopajcat pa is̈cupʉjcawa'n nu'pʉjʉn inʉmgaway profetajat.

²⁶ ¿Is̈jáwiga Cristu igatunas̈ájate we'n antes inʉs̈wa'n tsajpni'c mam i-oymanagui?

²⁷ Mit Jesús chu̱chiu igui-ajque's̈cʉ́s̈a nu'pʉjʉn jeme tsʉ̱napay ja'yic Dios ilibruni'c lo que je' iguijatámpay. Mit i-ocupa̱t Moisés ilibrujat mit we'ney nu'pʉjʉn profetajat ilibrujat.

²⁸ Mit icóygaj en ayé nʉ'jcopac mam inʉs̈ca, Jesús niwajtʉu as̈am nʉs̈ámpay más yagats.

²⁹ Po je'jat ijomigau ma tan, inʉmgajau: —Tan mit ʉjtsat ni'c tsu'jito'ganu mit tʉgʉynup s̈ʉjw. Mit Jesús tʉgʉy pa itanwa'n mit je'jat.

³⁰ Itsʉ̱naj mit je'jat me̱s̈ani'c, ipʉc ma̱s̈anʉ̱n, ibendiciona̱t, i-emgada̱c, mit imoygʉs̈.

³¹ Mit cʉs̈ ijawigau ni'c je' Jesús mit i-is̈capcau, po i-is̈togoygau jaran.

³² Mit inʉmgau je'jatu: —Nas̈acji'jcajau najo̱jtat cuandu nas̈mu-ampiutacmingau to̱uni'c mit cuandu nas̈ajque's̈cajau Dios ilibru.

³³ Mit ca's̈ʉ'jcau en ayé nije'yu hora mit pitujcanuw pa Jerusalén, mit ipa̱tcau ayé once pʉctampajyat apʉcmuguijcat, mit jeme tsʉ̱ngaway mit je'jat.

³⁴ Mit inʉmgau: —Iyacs̈ta'cway jutucta̱cway el Señor mit ique's̈ta̱jcau Simón.

³⁵ Mit i-ampiugau jeme iguijatcaway to̱uni'c, mit nat igui-is̈cápcaj Jesús cuandu igui-emgada̱jc ayé ma̱s̈anʉ̱n.

Jesús ique's̈ta̱jcʉs̈ap ipʉctampajyat

³⁶ Mit je'jat cotscapnajate, Jesús nitenda̱jcʉu es̈pu̱tum, mit inʉmgʉs̈au: —Dios pi is̈moygac paz.

³⁷ Mit je'jat ni-apʉ̱tigʉjʉu jaran, inʉmgapayta ni'c i-e'pcap tu'c espíritu.

³⁸ Po Jesús inʉmgʉs̈au: —¿Tini'c impʉ̱́tca mit impensá̱tca we'n injo̱tni'jcat?

³⁹ E'pca tʉncʉ'jat mit tʉnta'jnat ni'c ʉ̱ tʉnije'yu. Tsʉ́jca mit e'pca, ni'c tu'c espíritu ca-ijtʉp s̈is̈ ne pajc, po ʉ̱ in-e'pcanup ni'c tʉnaguep s̈is̈ mit pajc.

⁴⁰ Iguinʉjm we'n, i-actu-is̈cʉs̈ icʉ'jat mit ita'jnat.

⁴¹ Mit como ji'go'c ijo̱jtat, igacupʉjcawu jaran, mit nigu-épigʉjʉu. Mit Jesús inʉmgʉs̈au: —¿Inaguepcap yam ti tʉncayámpay?

⁴² Mit imoygau tu'c pedazu acs̈tsa' mit tu'c panal chi̱n.

⁴³ Mit ipʉc ayé, mit icay mam je'jat igui-e'pca.

⁴⁴ Mit inʉmgʉs̈au: —Ayʉ̱́j ayé tʉnʉmgʉs̈away cuandu tʉtsʉ̱naj mit mijchat, ni'c it ti icumplia̱twa'n nu'pʉjʉn jeme tsʉ̱napay ja'yic Moisés ileyni'c, profetajat ilibruni'jcat, mit jeme tsʉ̱napay ja'yic salmuni'jcat. It ti icumplia̱jt nu'pʉjʉn tʉs̈jatway.

⁴⁵ Mit cʉs̈ i-actu-entendia̱tcʉs̈ nu'pʉjʉn jeme tsʉ̱napay ja'yic Dios ilibruni'c.

⁴⁶ Mit inʉmgʉs̈au: —We'n itsʉ̱na ja'yic ni'c ayé Cristu i-ajyu'támpay Dios it ti iguitunas̈wa'n mit it ti ijutucta'cwa'n imutu̱gupay s̈ʉjw mam itsʉ̱nga á̱nimajat.

⁴⁷ Ʉ̱ tʉ-ajyu'tcʉs̈áj pi nʉmdacyo'yga ni'c jayajwat ma cuyaguiga ima̱lway to̱jwat pa Dios iguiperdona̱tcajáj nu'pʉjʉn mal iwatcaway. Inyʉmdacyo'ygáj en nu'pʉjʉn na̱s̈at, mit michu̱chigáj yam Jerusalén.

⁴⁸ Mit mijchat mitangáj testigujat ni'c in-is̈cau ayʉ̱́j cosajat.

⁴⁹ Márauga. Tʉnacmi'náj ayé Espíritu Santu jeme iprometia̱tway tʉnte̱t Dios. Mit tánga yam mʉjnʉ'jcopac Jerusalén hasta is̈pʉctsougawa'n ayé poder i-acmi'námpay Dios tsajpni'c.

Cu'tp Jesús tsajpni'c

⁵⁰ Mit Jesús imunʉs̈cʉs̈ ipʉctampajyat hasta nʉ'jcopac Betania, mit iguiyucpʉjc icʉ'jat, ibendiciona̱tcʉs̈.

⁵¹ Mit iguibendiciona̱tcʉs̈, je' pichin mam je'jat itsʉ̱nga, mit Dios iguimunʉcs̈ pa tsajpni'c.

⁵² Mit cʉs̈ igui-adorá̱tcaj je', pitujcanuw pa Jerusalén mit ji'jcau ijo̱jtat.

⁵³ Mitje'jat nʉs̈í̱jcau templuni'c mit i-oyninʉmgau Dios. Yam icʉs̈.