San Lucas 13 - Popoluca Sayula New Testament

Cuyáguiga inma̱lway to̱jwat

¹ En ayé nije'yu tiempu tsʉ̱ngau jem una̱c jayajwat mit i-ampiugajau Jesús ni'c Pilato i-ac-ago'jcʉs̈ʉu una̱c Galileajway jayajwat, mit wejpu'n meru-ey iguisacrificá̱tca aníma̱jtat pa Dios.

² Mit Jesús inʉmgʉs̈au: —¿Is̈jawiga ayé galileujat más iwatcau mal que japu̱t galileujat ni'c más itunas̈cau?

³ Tʉnʉmgʉs̈ap ni'c ca̱j. Te mijchat ingacuyaguigapey inma̱lway to̱jwat, mitogoygámpey.

⁴ O ¿is̈jawiga ayé dieciocho jayajwat jeme iguituca'ugaway ayé torre jeme tsʉ̱napay barrio Siloé mit igui-ago'jcau? ¿Is̈jawiga ni'c je'jat más culpa̱tijcat que nu'pʉjʉn jayajwat tsʉ̱ngapay Jerusalén?

⁵ Tʉnʉmgʉs̈ap ni'c ca̱j. Te mijchat ingacuyaguigapey inma̱lway to̱jwat, mitogoygámpey.

Tu'c higueracujy igawatpay itʉjm

⁶ Jesús itumuquips̈ey ayʉ̱́j cuentu: —Tu'c jayau ijtʉu tu'c higueracujy ni'pic i-uvajugum, mit min igui-e'p te iwatnup itʉjm, po igapa̱jtawu neti.

⁷ Mit inajau uvacuida̱tpayna': “E'pnaj, ijtʉnup tu̱gup s̈iwit tʉmimp tʉs̈-e'p te iwatnup itʉjm ayʉ̱́j higueracujy, mit tʉngapa̱jtap neti. Pus̈pichin mejor, ¿pa chan igui-ocupa̱t na̱s̈?”

⁸ Mit iguipo'n: “Señor, tsac ma tan ayʉ̱́j s̈iwit hasta tʉs̈ataje̱cwa'n i-a̱m, mit tʉnyajcáj abono pa ma wat itʉjm.

⁹ Mit na-e'pcáj te iwatáj itʉjm. Mit te igawatp, napus̈pichingáj.”

Jesús i-ac-oytamp tu'c to's̈ay mugus̈cówicway

¹⁰ Mit Jesús i-ajque's̈ po'cs̈ans̈ʉuni'c mam judíujat i-adora̱tca.

¹¹ Mit jem itsʉ̱naj tu'c to's̈ay ijtʉpay tu'c mal-espíritu, mit igui-actsʉ̱nau tu'nij pa dieciocho s̈iwit, mit ayé to's̈ay yo'y mugus̈cówic mit nes̈ʉ̱n ca-oyawu ini-acniyacs̈ʉ.

¹² Jesús igui-is̈, imuya̱s̈ mit inajau: —Hija, is̈libra̱táj Dios de ayé enfermedad.

¹³ Mit iyajcau icʉ' iyucuinm, mit ayé to's̈ay ni-acniyacs̈ʉu jaran, mit i-oyninʉm Dios.

¹⁴ Po jeme encarga̱ticway mam i-adora̱tca judíujat, igui-is̈ we'n, awa'niu ni'c Jesús i-ac-oytan ayé to's̈ay po'cs̈ans̈ʉuni'c. Mit inʉmgʉs̈au jayajwat: —Seis s̈ʉjw itp ti nayos̈watcawa'n, mit en ayé s̈ʉjwat mínga pa pi is̈ac-oytangac, mit caje' po'cs̈ans̈ʉuni'c.

¹⁵ Mit iguipo'n el Señor: —Mijchatu miniwe̱tcʉjʉp. ¿Is̈jawiga ingaquejcap imbuejyat o imburrujat alambrajugum pa is̈acnʉ-u̱jcawa'n po'cs̈ans̈ʉuni'c?

¹⁶ Mit ayʉ̱́j to's̈ay pichin Abraham ifamiliani'c, mit Awayagatsna' i-actu'nijtsʉ̱nap dieciocho s̈iwitanu. ¿Is̈jawiga ca-oy nas̈libra̱twa'n po'cs̈ans̈ʉuni'c?

¹⁷ Iguinʉjm we'n, nu'pʉjʉn imutsuguijnat winchu̱cta̱jcau. Po nu'pʉjʉn nʉ'jcopac jayau ji'cta̱jcau ijo̱jtat ni'c Jesús iwat puru cosa majatway.

Mostaza-semilla icuentu

¹⁸ Mit Jesús i-ampiugʉs̈au tu'c cuentu pa ma jawiga ni'c Dios ijayajwat mayigáj, inʉm: —Tʉ-actujawigʉs̈áj nat imanda̱t Dios.

¹⁹ Ayé as̈am tu'c mostaza-semilla, ni'c tu'c jayau imunʉcs̈ ayé semilla mit ini̱p ipe'tni'c, mit ye'c mit jat tu'c cujy mʉjway, mit jonwájat iwatcau ipe'jnat i-awecni'jcat.

Levadura icuentu

²⁰ Mit i-ampiugʉs̈au jatu'c cuentu, inʉm: —Tʉ-actujawigʉs̈áj nat imanda̱t Dios.

²¹ Ayé as̈am levadura, ni'c tu'c to's̈ay ipʉc ayé levadura mit iyac en tu̱gup medida de harina, mit iwat bien motic hasta itimajm mʉj.

Tu'c tʉc-ajw ca-awa'tsicway mʉj

²² Mit Jesús nas̈ nʉ'jcopacni'jcat mit titic nʉ'jcopacwájat, mit i-ajque's̈tacyo'y, mit ipʉc to̱u pa Jerusalén.

²³ Mit tu'c jayau igui-ucyo't: —Señor, ¿is̈jawi camayu nisalva̱tcʉjʉ́mpay? Mit Jesús inʉmgʉs̈au:

²⁴ —Ni-obligá̱tcʉjʉ pa intʉgʉygawa'n en ayé tʉc-ajw ca-awa'tsicway mʉj. Ʉ̱ tʉnʉmgʉs̈ap ni'c mayo'c jayajwat ijawangáj itʉgʉygawa'n, po ca-oyáj.

²⁵ Ni'c tu'c jayau tʉ́jcajway ca's̈ʉ'gáj mit i-atugáj itʉc-ajw, mit mijchat mitangáj pe'ta̱m mit impas̈cajáj tʉc-ajw, mit inyʉmgajáj: “Señor, Señor, awá̱tscajac tʉc-ajw.” Mit je' is̈po'ngáj: “Tʉngajawip mijʉmajyat mijchat.”

²⁶ Mit mijchat inyʉmgajáj: “Mi̱ tʉmunipʉjcʉjʉu mit tʉmucaygau mit inajque's̈tacyo'y tʉnyʉ'jcopacni'jcat.”

²⁷ Po je' is̈nʉmgajáj: “Tʉnʉmgʉs̈ap ni'c tʉngajawip mijʉmajyat. Niju'pcʉjʉ mam ʉ̱ mijchat inwatcapay mal.”

²⁸ Jem injʉygawa'n mit itu'ngawa'n injo̱jtat cuandu is̈-e'pcawa'n Abraham, Isaac, Jacob mit nu'pʉjʉn profetajat mam imanda̱t Dios, mit mijchat mitangáj pe'ta̱m.

²⁹ Ni'c mingáj jayajwat mam ipichin s̈ʉjw mit mam itʉ́gʉynu, mit nortejatway mit surjatway, mit nitsʉ̱nda̱jcʉjʉ̱́j me̱s̈ani'c mam imanda̱t Dios.

³⁰ Márauga. Mayo'c nʉs̈capay jʉpm, tangáj mugus̈á̱m. Mit mingapay mugus̈á̱m, tangáj jʉpm.

Jesús inijʉyp Jerusalén

³¹ En ayé nije'yu s̈ʉjw, mingau una̱c fariseujat, mit inʉmgajau Jesús: —Po'c ni'c Herodes iwamp is̈ago'gáj.

³² Mit Jesús inʉmgʉs̈au: —Ayé Herodes ito'jcʉp maña, po nʉs̈ nʉmgaja yename: “Tʉnacpichimp demo̱nyujat mit tʉnac-oytangʉs̈p jayajwat. Tʉncʉs̈áj tʉnyos̈ hasta iguinʉmwa'n Dios.”

³³ Dios inʉm ni'c itp ti tʉs̈siguia̱jtawa'n ayé to̱u hasta tʉs̈cʉs̈wa'n tʉnyos̈ en ayé nʉ'jcopac Jerusalén. Nʉmic itsʉ̱na ni'c Jerusalén ayé mam igui-ago'jca profetajat.

³⁴ ’Mijchat mitsʉ̱ngapay nʉ'jcopac Jerusalén inago'jcau profetajat, mit impojcajau mit tsa' jeme is̈ajyu'tcajaway Dios. May veces jatʉnwán tʉs̈cuida̱tcʉs̈wa'n injayajwat as̈am tu'c piyu iguicuida̱tcʉs̈ iwaywájat ique̱gampa'tcʉm, po mijchat ingawangawu.

³⁵ Jawiga ni'c inyʉ'jcopajcat tanáj cuyaguiyic. Tʉnʉmgʉs̈ap ni'c ʉ̱ is̈caja-e'pcáj hasta tʉmi'nwa'natu, mit wejpu'n inyʉmgáj: “Oyninʉmic ayé jeme mimpay, ni'c el Señor igui-ajyu't.”