Hechos 6 - Popoluca Sayula New Testament

Icupiugau siete jayajwat

¹ En ayé s̈ʉjwat tʉgʉygau más may cupʉcpajyat, mit cada s̈ʉjw i-acpas̈angau cayan pa nesita̱tijcatway. Mit jeme cotscaway griegu-ajw imuniqueja̱tcʉjʉu jeme cotscaway hebreu-ajw. Ayé griegujat inʉmgau ni'c hebreujat más i-is̈cu'tcau je'jat icu-o'cwájat, mit iga-is̈cu'tcawu tantu griegujat icu-o'cwájat.

² Mit cʉs̈ ayé doce apóstojlat i-apʉcmujcau nu'pʉjʉn cupʉcpajyat, mit inʉmgajau: —Ca-oy tʉs̈cuyaguigajawa'n Dios ipalabra pa tʉs̈cuida̱tcawa'n pro̱wijat.

³ Hermanujat, che'nga siete jayajwat mam mijchat mit je'jat intumuyajcáj ma majyiga cu-o'cwájat. Ayé siete jayajwat ma tsʉ̱nga oyninʉmijcat, ma tsʉ̱na mʉgʉc Espíritu Santu ijo̱tni'jcat, mit ma is̈capca may.

⁴ Mit ʉjtsat tʉ-ora̱ti̱jcáj mit tʉnajque's̈tacyo'ygajáj Dios ipalabra.

⁵ Mit nu'pʉjʉn ayé jayajwat iguigusta̱tcau lo que ipensa̱tcaway ayé apóstojlat. Mit cʉs̈ icupiugau Esteban tu'c jayau jeme cupʉcway may mit mʉgʉc itsʉ̱na Espíritu Santu ijo̱tni'c. Icupiugawey Felipe, Prócoro, Nicanor, Timón, Parmenas mit Nicolás Antioquíajway jeme niwajtʉway judíu.

⁶ Ayé siete jayajwat imumingau pa mam itsʉ̱nga ayé apóstojlat. Mit cʉs̈ i-ora̱tcajau Dios, mit iyajcajau icʉ'jat iyucuinmat pa ma pʉctsouga ayé yos̈.

⁷ Mit inʉmdacyo'ygajau más el Señor ipalabra, mit más may cupʉcpajyat imutʉgʉygau Dios en ayé nʉ'jcopac Jerusalén, mit may judíujat ipa̱nijat icupʉjcau Jesucristu.

Esteban

⁸ Dios imoy Esteban may favor mit poder, mit i-acnigu-epigʉs̈ʉu jayajwat mit iwat milagrujat majatway mam itsʉ̱nga jayajwat.

⁹ Mit it jem tu'c grupu judíujat inʉmgajapay Libertujat, mit itcʉjʉu tʉjc mam i-adora̱tca. Je'jat coygau mam Esteban itsʉ̱na mit mingawey una̱c Cirenejatway, Alejandríajatway, Ciliciajatway mit Asiajatway. Mit je'jat imuninʉmgʉjʉu Esteban.

¹⁰ Po ca-oyawu je'jat iguipo'nga lo que Esteban iguinʉmgajaway, ni'c je' cots as̈am tu'c jayau i-is̈capay, ni'c Espíritu Santu igui-actunʉm nu'pʉjʉn.

¹¹ Mit itso̱jcau una̱c jayajwat ma we̱tca, mit ma nʉmga ni'c imaraugau Esteban iguitucojts Moisés mit Dios.

¹² Mit i-acochigau ayé jayaujuc mit we'ney na'waywájat, mit jeme i-ajque's̈capay ley. Mit nigutomigʉjʉu mam Esteban, i-actangau mit imunʉs̈cau pa yos̈tujugum mam itsʉ̱nga judíujat ijefejat.

¹³ Mit iche'ngau we̱tpay testigujat jeme inʉmgámpay: —Ayʉ̱́j jayau catentamp iguitucots ayé templu aparta̱ticway pa Dios, mit itucojtsap Moisés iley,

¹⁴ ni'c tʉnmaraugau iguinʉjm ni'c ayé Jesús Nazaretway i-acyʉnʉnmanagáj ayé templu, mit itigatsáj ayé costumbrejat jeme Moisés nas̈yajcajaway.

¹⁵ Mit judíujat ijefejat mit nu'pʉjʉn jeme tsʉ̱ngaway yos̈tujugum igui-ís̈caj Esteban, i-is̈cau ni'c iwindugʉt jat as̈am tu'c ángel iwindugʉt.