Hechos 4 - Popoluca Sayula New Testament

Icuytʉjcomgau Pedro mit Juan

¹ Pedro mit Juan imucotscapnajate ayé jayajwat, mingau mam je'jat judíujat ipa̱nijat, mit ayé jefe imanda̱tway soldajat templuni'cway, mit saduceujat.

² Je'jat awa'nigau ni'c Pedro mit Juan i-ajque's̈cajau nʉ'jcopac jayajwat mit inʉmgajau ni'c jutucta̱jcáj nu'pʉjʉn á̱nimajat as̈am Jesús ijutucta̱jc.

³ Mit cʉs̈ i-actangau Pedro mit Juan, mit icomgau cuytujugum hasta jatu'c s̈ʉjw ni'c tsu'jito'ganu.

⁴ Po mayo'c imaraugaway Dios ipalabra cupʉjcau. Mit it como cinco mil jayajwat jeme cupʉjcaway.

⁵ Mit icus̈ʉwij jatu'c s̈ʉjw ni-apʉcmujcʉjʉu Jerusalén judíujat ijefejat, na'waywájat mit jeme i-ajque's̈capay ley.

⁶ Mit jemey itsʉ̱́naj Anás mʉjpa̱nijna', mit Caifás, Juan, Alejandro mit nu'pʉjʉn mʉjpa̱nijat ifamiliajat.

⁷ Mit imumingau Pedro mit Juan mit iyajcau es̈pu̱tum, mit i-ucyo'tcau: —¿Pʉn is̈manda̱tcap? ¿Pʉn is̈moygau laj is̈ac-oytangawa'n tu'nijatway?

⁸ Mit Espíritu Santu mʉgʉc itsʉ̱na Pedro ijo̱tni'c, mit inʉmgʉs̈au: Jefejat de ayʉ̱́j nʉ'jcopac mit na'waywájat Israelway,

⁹ jinap is̈-ucyo'tcap ʉjtsat ni'c tʉnwatcajau oy tu'c jayau tu'nijway. Injawi-o'jcʉjʉp nat i-oytajn.

¹⁰ Nu'pʉjʉn mijchat mit nu'pʉjʉn Israelway jayajwat ma jawiga ni'c oytanic itsʉ̱na ayʉ̱́j jayau mam is̈-e'pca ni'c ijtʉp poder Jesucristu Nazaretway. Ayé Jesús mijchat inyajcau cunu̱s̈ni'c mit Dios i-acjutucta̱c.

¹¹ Jesús as̈am ayé tsa' jeme ingawangaway mitʉcwatpayna'jat, po ayé tsa' it itajn pa iguitsʉmtsowa'n nu'pʉjʉn, ni'c Dios i-oyninʉm iway.

¹² Mit nejʉmay jatu'c jayau ca-oyap nas̈salva̱tcap. Solo Dios iyac Jesús pa nas̈salva̱tcáj, mit ca-itp nepʉn en ayʉ̱́j mundu jeme oyámpay nas̈salva̱tcap.

¹³ Igui-ís̈caj ni'c capʉ̱tcap Pedro mit Juan, mit iguijáwigaj ni'c igajatcap mayo'c noc ne caje' mʉjninʉmijcatway, je'jat nigu-épigʉjʉu mit nimoygʉjʉu cuenta ni'c imuyo'ygau Jesús.

¹⁴ Mit igui-ís̈caj ni'c ayé jayau jeme oytanway tenap mit je'jat, ca-oyawu iguinʉmga neti.

¹⁵ Mit imanda̱tcau Pedro mit Juan ma pichinga mam itsʉ̱nga apʉcmuguijcat, mit cʉs̈ judíujat ijefejat je'jatu ni-acochigʉjʉu,

¹⁶ inʉmgau: —¿Ti nawatcáj mit ayʉ̱́j jayajwat? Ni'c iyacs̈ta'cway iwatcau tu'c milagru mʉjway, mit nu'pʉjʉn jeme tsʉ̱ngapay Jerusalén ijawigap, mit ʉjtsat ca-oyap nas̈nʉmga ni'c ca̱j.

¹⁷ Mit pa nʉ'jcopac jayajwat maganʉmdacyo'yga más lo que inʉmgapay ayʉ̱́j jayajwat, janga nache'cta̱jca mʉgʉc pa magaja-ajque's̈caja nepʉn lo que inʉmway Jesús.

¹⁸ Mit iya̱s̈cau ma minga Pedro mit Juan mam ayé jefejat itsʉ̱nga, mit imanda̱tcau ni'c nepʉn magaja-ajque's̈caja lo que inʉmway Jesús.

¹⁹ Mit cʉs̈ Pedro mit Juan inʉmgajau: —Oy pi pensa̱tca jʉmay más iwa'náj Dios, tʉjayaumaygawa'n mijchat o tʉs̈jayaumaygawa'n Dios.

²⁰ Ni'c itp ti tʉs̈nʉmgawa'n lo que tʉn-is̈caway mit tʉnmaraugaway.

²¹ Mit cʉs̈ iguiche'ctá̱jcaj mʉgʉc i-acjo'nganuw ni'c igapa̱tcawu nat iguicastiga̱tcawa'n. Judíujat ijefejat más ipʉ̱tcau nʉ'jcopac jayajwat, ni'c nu'pʉjʉn ayé jayajwat i-oyninʉmgau Dios ni'c we'n iguijat ayé jayau cú̱s̈uway.

²² Ni'c iguijat tu'c mʉjway milagru, ni'c ayé jayau jeme oytanway ijtʉu más de cuarenta s̈iwit.

Cupʉcpajyat i-ora̱tcajap Dios

²³ Mit igui-acjo'ngaj Pedro mit Juan, je'jat nʉs̈cau pa mam itsʉ̱nga icumpajlat mit i-ampiugajau nu'pʉjʉn lo que iguinʉmgajaway judíujat imʉjpa̱nijat mit na'waywájat.

²⁴ Iguimáraugaj we'n, nu'pʉjʉjnat i-ora̱tcajau Dios, inʉmgajau: —Señor, mi̱ inmanda̱tp nu'pʉjʉn, mi̱j ayé miDios jeme inwatway tsajp, na̱s̈ mit lama̱t mit nu'pʉjʉn lo que itpay jem.

²⁵ Mi̱ inmozo David inactunʉm wename: ¿Tini'c itsuguinwátca jayajwat? mit ¿tini'c jayajwat iguipensa̱tca cosa ca-ojyatway?

²⁶ Ayé rejyat ayʉ̱́j mundujway ca's̈ʉ'jcau, mit ayé manda̱tpajyat ni-apʉcmujcʉjʉu, contra el Señor Dios mit contra ayé Cristu icupi̱way Dios.

²⁷ ’Mit siguia̱t igui-ora̱tcaja Dios, inʉmgau: Señor, iyacs̈ta'cway ni-apʉcmujcʉjʉu en ayʉ̱́j nʉ'jcopac contra Jesús inway oyway jeme incupi̱way. Ni-apʉcmujcʉjʉu Herodes mit Poncio Pilato, mit pe'ta̱majyat mit jayajwat Israelway.

²⁸ Mi̱ inyʉm desde ámbanu ni'c we'n iguiwatcawa'n ayé maljayajwat, mit jemni'c ijajt we'n, ni'c itp ti icumplia̱twa'n lo que inyʉmway.

²⁹ Señor, e'pnaj nat tʉs̈che'cta̱jcap, mit ʉjtsat mi̱ is̈mozojat, majyigac tʉgapʉ̱́tca tʉs̈nʉmgajawa'n impalabra.

³⁰ Mi̱ inaguep poder. Ac-oytangʉs̈ jayajwat, wat milagrujat mit acnigu-epigʉ́s̈ʉ nu'pʉjʉn jayajwat. Wat we'n pa ma e'pca ni'c ijtʉp poder Jesús inway oyway. We'n iguinʉ́mgajaj Dios.

³¹ Mit cʉs̈ i-orá̱tcaj, yʉgʉn ayé na̱s̈ mam itsʉ̱ngaj apʉcmuguijcat, mit Dios imoygʉs̈ Espíritu Santu pa nu'pʉjʉn je'jat, mit cʉs̈ je'jat capʉ̱tcawu iguinʉ́mgaja Dios ipalabra.

Cupʉcpajyat tsʉ̱ngau en acuerdu

³² Mit ayé jayajwat jeme cupʉjcaway tsʉ̱ngau en acuerdu, mit nepʉn igaguarda̱tu neti pa je'yu, po nu'pʉjʉn itcʉjʉu icosajat pareju entre nu'pʉjʉjnat.

³³ Mit Dios imoygʉs̈ may poder apóstojlat, mit we'n i-actujawigau jayajwat ni'c el Señor Jesús jutucta̱c, mit Dios imoygʉs̈ may favor pa nu'pʉjʉn ayé cupʉcpajyat.

³⁴ Mit nepʉn catsʉ̱nawu nesita̱tic entre ayé hermanujat, ni'c nu'pʉjʉn jeme itcʉjʉway na̱s̈at o tʉjcat ito'ctʉgʉygau, mit imumingau itumi̱jnat de ayé biejnat ito'jcaway,

³⁵ mit iyajcau itumi̱jnat mam itsʉ̱nga apóstojlat, mit je'jat i-acpas̈angau ayé tumi̱n pa cada jayau nesita̱ticway.

³⁶ Wejpu'n it tu'c jayau inʉ'jyway José, mit apóstojlat inʉ'jymoygau Bernabé, ayé inʉmo'jcʉp tu'c jayau iconsola̱tpay jayajwat. Ayé jayau pichin Leví ifamiliani'c, mit ye'c Chiprejway na̱s̈.

³⁷ Mit ayé jayau ijtʉu tu'c na̱s̈, mit ito'ctʉgʉy, mit imumin ayé tumi̱n, mit i-entrega̱tcʉs̈au apóstojlat.