Hechos 3 - Popoluca Sayula New Testament

I-ac-oytangau tu'c cu̱s̈uwáy

¹ Pedro mit Juan nʉs̈cau tuwitic pa templuni'c a las tres de la tarde, ni'c en ayé hora itu-ora̱tcaway je'jat.

² Mit cada s̈ʉjw iyajcau templutʉc-auni'c tu'c jayau cú̱s̈uway desde ima̱m iguita̱c. Mit ayé tʉc-ajw inʉ'jy la Hermosa. Ayé cu̱s̈uwáy iyo'tcʉs̈ap limosna jeme tʉgʉygapay templuni'c.

³ Ayé cu̱s̈uwáy igui-is̈cʉs̈ Pedro mit Juan ni'c tʉgʉygap templuni'c, iyo'tcʉs̈au ma iguimoygac limosna.

⁴ Pedro mit Juan icu-e'pca̱tcau ayé jayau. Cʉs̈ Pedro inajau: —E'pcac ʉjtsat.

⁵ Wejpu'n je' i-is̈cʉs̈ ayé jayajwat, inʉmpayta ni'c iguimoygáj tanti.

⁶ Pedro inʉjmau: —Tʉnga-aguep plata ne oro, po tʉmo'áj lo que tʉnaguepay. Nitendá̱jcʉ mit yo'y ni'c is̈mo'áj maj Jesucristu Nazaretway.

⁷ Mit Pedro i-actajnau i-oyimaycʉ' ayé cu̱s̈uwáy mit i-ajca's̈ʉ'c. Mit majpʉc jaran ita'jnat mit ita'nyo'c.

⁸ Mit iguimojy tu'c tsut, nitenda̱jcʉu jaran mit yo'y. Mit imutʉgʉygʉs̈ templuni'c, mit jem iyo'jy, mit tsut, mit i-oyninʉm Dios.

⁹ Mit nu'pʉjʉn jayajwat i-is̈cau ayé jayau iyo'y mit igui-oyninʉm Dios.

¹⁰ Mit i-is̈capcau ayé jayau, mit ijawigau ni'c je' ayé jeme tsʉ̱naway templutʉc-auni'c pa iguiyo'twa'n limosna, mit ayé tʉc-ajw inʉ'jy la Hermosa. Mit nigu-épigʉjʉu may mit ni-apʉ̱tigʉjʉu ni'c we'n iguijat ayé jayau.

Lo que inʉmway Pedro

¹¹ Ayé cu̱s̈uwáy jeme oytanway igacuyaguigʉs̈u Pedro mit Juan. Mit nu'pʉjʉn jayajwat nigu-épigʉjʉu mit nigutomigʉjʉu mam je'jat itsʉ̱nga en ayé corredor inʉ'jyway Salomón.

¹² Igui-is̈ wename Pedro, inʉmgʉs̈au ayé jayajwat: —Jayajwat Israelway, ¿tini'c inyigu-épigʉjʉ? ¿Tini'c ʉjtsat is̈-e'pcap? Inyʉmgapayta ni'c ʉjtsatu más tʉ-ojyat, mit inyʉmgap ni'c ʉjtsatu tʉnaguepcap maj pa tʉs̈acyo'yda̱jcawa'n ayʉ̱́j cu̱s̈uwáy.

¹³ Ayé caje' ʉjtsat tʉnwatcap. Iwat iDiosat Abraham, Isaac, Jacob, ayé nate̱jtat ámbanuway. Mit ayé nije'yu Dios i-oyninʉm iway Jesús jeme inyajcaway autoridajat icʉ'jugujmat. Mit ayé gobernador Pilato ijawan igui-acjo'nwa'n Jesús, po mijchat ingawangawu we'n.

¹⁴ Mijchat ingawangawu Jesús mit je' tu'c jayau oyway mit je' tu'c jayau yacs̈icway, mit inyo'tcajau Pilato ma is̈acjo'ngajac tu'c ago'cpayna'.

¹⁵ Mit inac-ago'jcʉjʉu ayé Jesús jeme nas̈moygapay vida, po Dios i-acjutucta̱c mam itsʉ̱nga á̱nimajat, mit ʉjtsat tʉn-is̈cau ni'c jutucta̱c.

¹⁶ Mit ayʉ̱́j cu̱s̈uwáy jeme in-e'pcapay mit inis̈capcapay, icupʉc Jesús, mit jemni'c Dios iguimoy maj pa i-oytanwa'n. Como tʉncupʉjcap Jesús, bien oytanic itsʉ̱na ayʉ̱́j jayau as̈am is̈-e'pca.

¹⁷ ’Jayajwat, mijchat mit injefejat inac-ago'jcʉjʉu Jesús, po tʉnjawip ni'c ingajawigawu lo que inwatcaway.

¹⁸ Po Dios icumplia̱t wename lo que i-ajque's̈caway nu'pʉjʉn iprofetajat. Je'jat inʉmgau ni'c it ti iguitunas̈ ayé Cristu jeme Dios i-ajyu'tway.

¹⁹ Jemni'c pi cuyaguiga inma̱lway to̱jwat mit pʉ́jcaja Dios i-oyway to̱u, pa we'n Dios is̈chi'tcajáj inma̱jlat, mit we'n el Señor i-acmi'náj tu'c tiempu natutsʉ̱ngámpay oy.

²⁰ Mit Dios i-acmi'nájatu Jesucristu as̈am is̈nʉmgajau ámbanu, mit Jesús je' ayé Cristu inatsʉ̱ngapay.

²¹ Ayʉ̱́j Jesús itp ti itsʉ̱nawa'n tsajpni'c hasta ayé s̈ʉjw cuandu Dios igui-oyacwa'n yacs̈ic nu'pʉjʉn cosajat. We'n iguinʉmgʉ́s̈aj ámbanu ayé profetajat icupiugʉs̈way.

²² Mit Moisés inʉmgʉs̈au nate̱jtat ámbanuway: “El Señor Dios i-acmi'náj tu'c profeta as̈am je' tʉs̈acmin ʉ̱, mit je' pichináj mijchat infamiliani'jcat. Inmaraugáj nu'pʉjʉn cosa is̈nʉmgajámpay.

²³ Ni'c Dios i-actogoyáj nu'pʉjʉn jeme igamarawámpay ayé profeta, mit cajatsʉ̱ngáj mit Dios ijayajwat. We'n iguinʉjm Moisés.”

²⁴ ’Mit nu'pʉjʉn profetajat desde Samuel hasta jinap inʉmgauni'c jatcáj ayʉ̱́j cosajat jeme jatcapay jinap.

²⁵ Lo que inʉmgaway profetajat, ayé pa mijchat pi tsʉ̱nga oy, mit impʉctsougau ayé acuerdu jeme iwatway Dios mit nate̱jtat ámbanuway. Ni'c Dios inʉjmau Abraham: “Pichináj infamiliani'c tu'c jeme ibendiciona̱támpay nu'pʉjʉn familia en nu'pʉjʉn mundu.”

²⁶ Dios i-acmijnʉ'c iway pa mijchat, mit i-acjutucta̱c pa je' is̈bendiciona̱tcáj, pa nu'pʉjʉn mijchat pi cuyaguiga inma̱lway to̱jwat.