Hechos 24 - Popoluca Sayula New Testament

Pablo nicowajnʉu mam Félix

¹ Iguinás̈caj cinco s̈ʉjw, coygau ayé mʉjpa̱nij Ananías mit una̱c na'waywájat, mit tu'c abogado inʉ'jyway Tértulo, mit nipresenta̱tcʉjʉu mam ayé gobernador pa igui-acusa̱tcawa'n Pablo.

² Cuandu iguimumíngaj Pablo, Tértulo chu̱chiu igui-acusa̱t je', mit inʉjmau ayé gobernador: —Por mi̱ oyo'gu natsʉ̱nga mit nepʉn nas̈camunyajcap, mit como inis̈capo'cp, may cosa oyway is̈wajt pa nu'pʉjʉn ayʉ̱́j na̱s̈.

³ Siempre ʉjtsat mit jeme tsʉ̱ngapay nu'pʉjʉn lugajrat tʉmpʉctsougap lo que inwatway, mit tʉnʉmgajap ni'ctiyu̱s̈, oh Félix más mimʉjninʉmicway.

⁴ Mit pa tʉgajomiwa'n más, tʉyo'jtap pi is̈maraugac s̈ʉ̱n ni'c mi̱ inaguepo'cp calma.

⁵ Tʉmpa̱tcau ni'c ayʉ̱́j jayau Pablo nas̈jomi-o'jcap, mit je' i-acchu̱chip tsuguin jʉmba'tu mam judíujat. Ayʉ̱́j jayau imanda̱tp tu'c grupu inʉmgapay nazarenujat.

⁶ Ayʉ̱́j jayau iwaney iguijinwa'n tʉntemplujat, mit cuandu tʉs̈actángaj, tʉnwangau tʉs̈juzga̱tcawa'n as̈am iguinʉm tʉnlejyat.

⁷ Po tʉs̈pʉctʉgʉygau ayé mʉjcapitán Lisias, mit tʉs̈chi'tcajau tʉncʉ'jugujmat.

⁸ Mit inʉmgʉs̈au jeme i-acusa̱tcapay je' ma minga mam mi̱. Mi̱ oyap is̈-ucyo't ayʉ̱́j jayau pa is̈jawiwa'n nu'pʉjʉn ayʉ̱́j cosajat tʉntu-acusa̱tcapay.

⁹ Mit ayé judíujat inʉmgau ni'c iyacs̈ta'cway nu'pʉjʉn inʉmway Tértulo.

¹⁰ Mit cʉs̈ ayé gobernador iwajtau seña Pablo ma cots. Mit cʉs̈ Pablo inʉm: —Como tʉnjawip ni'c pa mayap s̈iwit is̈manda̱tcʉs̈ jayajwat ayʉ̱́j na̱s̈atway, tʉnwamp tʉnicowajnʉwa'n mam mí̱.

¹¹ Lo que ʉ̱ tʉnyʉmámpay, oyap is̈-ucyo'tcʉs̈ te iyacs̈ta'cway. Cani-ijtʉp doce s̈ʉjwat tʉcojy Jerusalén pa tʉs̈adora̱twa'n Dios.

¹² Mit tʉs̈capa̱tcawu ni'c tʉnwat mal. Tʉngamuninʉjmʉp nepʉn ne tʉnga-apʉcmugu jayajwat ma tsuguinwatca, ne templuni'c, ne mam i-adora̱tca judíujat, ne nʉ'jcopacni'c.

¹³ Ayʉ̱́j jayajwat ca-oyap iguicomproba̱tca ayé cosajat jeme tʉs̈tu-acusa̱tcapay jinap.

¹⁴ Po ayʉ̱́j tʉnʉjmap: Je'jat inʉmgap ni'c tʉnajque's̈p jatu'c ama̱s̈an, po tʉnadora̱tpey tʉnte̱jtat ámbanuway iDiosat, mit tʉncupʉcp nu'pʉjʉn jeme tsʉ̱napay ja'yic Moisés ileyni'c mit profetajat ilibruni'jcat.

¹⁵ Tʉncupʉcp as̈am je'jat iguicupʉjca, ni'c Dios i-acjutucta̱jcʉs̈áj o'guijcatway, oyjayajwat mit maljayajwatey.

¹⁶ Mit jemni'c tʉngawamp tʉtsʉ̱nawa'n culpa̱tic mam igui-e'p Dios, mit we'ney mam igui-e'pca jayajwat.

¹⁷ ’Mit may s̈iwijtat tʉyo'y jaynʉ'jcopacni'jcat, mit cʉs̈ tʉnʉcs̈ pa tʉntʉcmayna̱s̈ pa tʉs̈yacwa'n limosna mit ofrenda.

¹⁸ Mit una̱c judíujat Asiajatway tʉs̈pa̱tcau templuni'c, mit wejpu'n tʉniprepara̱jtʉu as̈am iguinʉm Moisés iley. Tʉgayo'yu mit may jayajwat ne mit tsuguinwatpajyat.

¹⁹ Ayé jayajwat itp ti imingawa'n yam pa tʉs̈acusa̱tcáj te tʉnwatcʉs̈au tanti.

²⁰ Tegaje', ma nʉmga ayʉ̱jat jeme tsʉ̱ngapay yam te tʉnwatcʉs̈au mal cuandu tʉtsʉ̱́naj iyos̈tujugujmat.

²¹ Dejuru tʉs̈acusa̱tcap ni'c cuandu tʉtsʉ̱́naj mam je'jat tʉnmucotscʉs̈ mʉgʉc, tʉnyʉm: “Ʉ̱ is̈juzga̱tcap jinap ni'c tʉncupʉcp ni'c jutucta̱jcáj á̱nimajat. We'n iguinʉjm Pablo.”

²² Iguimarajw we'n Félix, mit como ijawip nat icupʉjca Jesús ijayajwat, iyajcʉs̈au pa jatu'mbac, inʉmgʉs̈au ayé judíujat: —Imi'nwa'n ayé mʉjcapitán Lisias, wejpu'n tʉs̈-arregla̱twa'n in-asuntujat.

²³ Mit imanda̱t tu'c capitán ma guarda̱t Pablo, po ma iguimo'ac s̈ʉ̱n libertad, ma mo' laj i-amigujat ma iguitʉcyo'ygac, mit ma iguimajyigac.

²⁴ Iguinás̈caj una̱c s̈ʉjwat, coygau Félix mit ito's̈ay Drusila, mit je' judía. Mit cʉs̈ i-acmin Pablo ma iguinʉjmac nat iguicupʉjcawa'n Jesucristu.

²⁵ Mit Pablo inʉmgʉs̈au ni'c jayajwat itp ti iguiwatcawa'n oy, mit magawatcada̱jca neti, mit inʉmgʉs̈au ni'c mi'náj tu'c tiempu cuandu Dios ijuzga̱twa'n. Mit ni-apʉ̱tijyʉu Félix, mit inʉjmau: —Jinap nʉs̈, cuandu tʉs̈aguepwa'n tiempu, tʉya̱s̈patu.

²⁶ Félix i-atsʉ̱napate te Pablo iguimo'áj tumi̱n pa igui-acjo'nwa'n. Jemni'c iguiya̱s̈í̱jc pa iguimu-ampiwa'n.

²⁷ Icʉs̈ mechc s̈iwit, Félix pichinuw de gobernador, mit tʉgʉy tu'c nam gobernador inʉ'jyway Porcio Festo. Mit como Félix iwan itanwa'n oy mit judíujat, iyac Pablo ma tan presu.