Hechos 19 - Popoluca Sayula New Testament

Pablo coy Efeso

¹ Mit mientras Apolos itsʉ̱naj Corinto, Pablo nʉcs̈ ta'nam copac-awa'tsajmat hasta icojy nʉ'jcopac Efeso. Mit imunipa̱tcʉs̈ʉu jem una̱c cupʉcpajyat.

² Pablo i-ucyo'tcʉs̈: —¿Impʉctsougau Espíritu Santu cuandu incupʉ́jcaj? Mit iguipo'ngau: —Nes̈ʉ̱n tʉnganimaraugap te itp Espíritu Santu.

³ Mit cʉs̈ Pablo i-ucyo'tcʉs̈: —¿Nat inyinʉ'gutémgʉjʉj? Mit iguipo'ngau: —Tʉninʉ'gutemgʉjʉu as̈am Juan igui-ajque's̈.

⁴ Mit Pablo inʉmgʉs̈au: —Juan inʉ'gutemgʉs̈ jayajwat pa ma jawiga nu'pʉjʉjnat ni'c icuyaguigaway ima̱lway to̱jwat, mit inʉmgʉs̈au jayajwat ma cupʉjca ayé jayau jeme iguinatspoguiyámpay. Ayé inʉmo'jcʉp Jesús, ayé Cristu i-ajyu'tway Dios.

⁵ Iguimáraugaj we'n, ninʉ'gutemgʉjʉu ni'c ipʉctsougau el Señor Jesús.

⁶ Mit Pablo iguiyajcʉ́s̈aj icʉ'jat iyucuinmat, Dios imoygʉs̈ Espíritu Santu, mit cotscau en jatu'c ajwat, mit inʉmgau lo que Dios igui-actunʉmgaway.

⁷ Mit nu'pʉjʉn je'jat como doce jayajwat.

⁸ Tu̱gup po' Pablo nʉs̈í̱c mam judíujat i-adora̱tca. Mit je' capʉ̱tu icotswa'n. Imucotscʉs̈ mit inʉmgʉs̈au ma cupʉjca ni'c manda̱táj Dios.

⁹ Mit copacmʉgʉcwatcau una̱c mit igawangawu cupʉjca, mit imalninʉmgau ayé oyway noticia mam iguimárauga jayajwat. Cʉs̈ Pablo ni-aparta̱jtʉu mam je'jat mit imunʉs̈cʉs̈ cupʉcpajyat, mit cada s̈ʉjw iguimucotscʉs̈ en tu'c escuela mam i-ajque's̈ tu'c jayau inʉ'jyway Tiranno.

¹⁰ Mit wename iguiwajt pa mechc s̈iwit hasta iguimáraugaja el Señor Jesús ipalabra nu'pʉjʉn judíujat jeme tsʉ̱ngaway Asiajway na̱s̈, mit we'ney jeme caje'jatway judíujat.

¹¹ Mit Dios i-actuwat Pablo milagru majatway.

¹² Mit ayé pa̱yujat mit jamujcat jeme Pablo itsʉjcʉs̈way itsapcu'tcajau iyucuinmat tu'nijatway, mit oytangau jaran, mit demo̱nyujat pichingau mam je'jat.

¹³ Mit una̱c judíujat jeme yo'ytacyo'ygaway oyau igui-acpichinga demo̱nyujat, mit iwangau iguinʉ'jutcajawa'ney el Señor Jesús inʉ'jy pa iguitu-acpichingawa'n demo̱nyujat. Mit cada jayau inʉmgajau demo̱nyujat: —Ʉ̱ tʉmanda̱tcʉs̈p pi pichinga inʉ'jyni'c ayé Jesús jeme Pablo inʉmdacyo'ypay.

¹⁴ Mit it tu'c jayau judíu mit je' mʉjpa̱nij mam judíujat itsʉ̱nga, mit inʉ'jy Esceva. Je' ijtʉu siete iwayna'jat, mit je'jat i-acpichingapey demo̱nyujat.

¹⁵ Po cuandu iguiwátcaj we'n, cotsta̱c ayé demo̱nyu, inʉm: —Tʉnis̈cap Jesús, mit tʉnis̈cap pʉn ayé Pablo, po mijchat tʉga-is̈capcʉs̈p.

¹⁶ Mit ayé jayau jeme ijtʉway demo̱nyu itutsutcʉs̈ mit más ijtʉu maj que je'jat, idomina̱tcʉs̈ mit imuquitaugʉs̈ hasta po'jcau de ayé tʉjc sin jamuc mit bien golpia̱tijcat.

¹⁷ Mit nu'pʉjʉn judíujat jeme tsʉ̱ngaway Efeso mit we'ney jeme caje'jatway judíujat ijawigau nat iguijatcau, mit nu'pʉjʉn ni-apʉ̱tigʉjʉu, mit i-oyninʉmgau el Señor Jesús.

¹⁸ Mit mayo'c jeme cupʉjcaway mingau, mit inʉmgau nu'pʉjʉn mal iwatcaway.

¹⁹ Mit we'ney mayo'c jayajwat jeme ipʉctangaway tso'c imumingau ilibrujat mit ino'ctiningau mam igui-e'pcaj nu'pʉjʉn jayajwat. Mit i-acpichingau cuenta pʉjʉn itsou ayé librujat, mit ipa̱tcajau itsou como cinquenta mil tumi̱n de plata.

²⁰ Mit we'ney más inʉmdacyo'ygajau el Señor ipalabra, mit ijtʉu poder, mit cupʉjcau más jayajwat.

²¹ Mit cʉs̈ Pablo pensa̱t inʉs̈wa'n pa Macedoniajway na̱s̈ mit Acayajway na̱s̈, mit cʉs̈ pensa̱tey pa inʉs̈wa'n Jerusalén. Inʉm Pablo: Cʉs̈wa'n tʉs̈tuyo'y jem, itpey ti tʉnʉs̈wa'n pa Roma.

²² I-acnʉs̈cʉs̈ pa Macedoniajway na̱s̈ Timoteo mit Erasto jeme iguimajyigaway, mit je' tan pa tu'c tiempu Asiajway na̱s̈.

Iwatcau tu'c ya's̈na̱s̈ en Efeso

²³ Mit wejpu'n iwatcau tu'c ya's̈na̱s̈ mʉjo'cway ni'c imutsuguinwatcau jeme icupʉjcaway Jesús i-oyway noticia.

²⁴ I-acchu̱chiu tsuguin tu'c plateru inʉ'jyway Demetrio. Je' iwat tiyu̱s̈tʉcwájat de plata pa tu'c tiyu̱s̈ inʉ'jyway Diana, mit jeme iguimuyos̈watcaway i-actsʉ̱ngau may tumi̱n.

²⁵ Mit Demetrio i-apʉcmujcau nu'pʉjʉn jayajwat jeme ijatcaway nije'yu yos̈, mit inʉmgʉs̈au: —Jayajwat, injawigap ni'c natu-actsʉ̱ngap may tumi̱n ayʉ̱́j yos̈,

²⁶ mit in-e'pcap lo que iwatpay Pablo, mit inmaraugap ni'c je' inʉmp ni'c caje' diosat ayé tiyu̱s̈at jeme cʉ'wátijcatway, mit i-actugupʉjcʉs̈p we'n may jayajwat, caje' solo Efesojatway po we'ney casi nu'pʉjʉn Asiajatway.

²⁷ Mit oyap nas̈cʉs̈cajap nayos̈at, mit we'ney igajawangajáj itemplu ayé tiyu̱s̈ Diana jeme más mʉjninʉmicway, mit igaja-oyninʉmgáj ayé Diana jeme i-adora̱tcapay nu'pʉjʉn Asiajatway, mit nu'pʉjʉn mundu.

²⁸ Iguimáraugaj we'n, awa'nigau jaran, mit cʉs̈ ya̱s̈cau, inʉmgau: —¡Mʉjninʉmic ayé Diana pa Efesojatway!

²⁹ Mit nʉ'jcopac jayajwat igajawigawu ti iwatcámpay. Mit i-actangau mechc Macedoniajway jayajwat, Gayo mit Aristarco, mit je'jat Pablo icumpajlat. Mit imunʉs̈cau jaran pa mam iguiwatca asamblea.

³⁰ Mit Pablo iwan inʉs̈wa'n mam itsʉ̱nga apʉcmúguijcat, po cupʉcpajyat igamoygawu laj ma nʉs̈.

³¹ Mit Pablo ijtʉu una̱c amigujat, mit je'jat autoridajat Asiajway na̱s̈. Je'jat i-ajyu'tcau razón Pablo magatʉgʉy mam itsʉ̱nga apʉcmúguijcat.

³² Mit ya̱s̈cada̱jcau. Una̱c inʉmgau tu'c cosa mit ja-una̱c inʉmgau jatu'c cosa, mit igajawigawu ti iwatcáj. Mit mayo'c je'jat igajawigawu tini'c ini-apʉcmújcʉjʉj.

³³ Mit una̱c jayajwat i-actujawigau Alejandro ti jatway, mit judíujat iwangau je' ma cots pa je'jat, mit i-acnʉs̈cau pa mam icótscaj. Wejpu'n Alejandro iwat seña mit icʉ' pa magacotsca, iwanate iguicowangʉs̈wa'n judíujat.

³⁴ Po cuandu iguijáwigaj ni'c je' judíu, ya̱s̈pʉ'ngau nu'pʉjʉjnat como mechc hora, mit inʉmgau: —¡Mʉjninʉmic ayé Diana pa Efesojatway!

³⁵ Mit cʉs̈ nitenda̱jcʉu ayé ja'ypay en ayé nʉ'jcopac, igaja-ajcotscʉs̈ujyu mit inʉmgʉs̈au: —Jayajwat Efesojatway, nu'pʉjʉn jayajwat ijawigap ni'c ayʉ̱́j nʉ'jcopac Efeso iguarda̱tcajap itemplu ayé tiyu̱s̈ Diana jeme mʉjninʉmicway jeme ca'way tsajpni'c.

³⁶ Como nepʉn ca-oyap iguinʉm ni'c caje' iyacs̈ta'cway, más oy pigajacotscawit, mit camwatcada̱jca neti te migapensa̱tcap oy.

³⁷ Inmumingau ayʉ̱́j jayajwat, mit iganiwatcap mal intempluni'jcat, ne iganitucotscap intiyu̱s̈at Diana.

³⁸ Te Demetrio mit jeme iguimuyos̈watcapay itcʉjʉp ti i-arregla̱tcámpay, jemni'c i-it yos̈tʉjc mit autoridajat pa igui-arregla̱tcawa'n i-asuntujat.

³⁹ Mit te inwangap jatu'c cosa, autoridajat ma watca tu'c asamblea iyacs̈ta'cway pa is̈-arregla̱tcawa'n in-asuntujat.

⁴⁰ Jinap natsʉ̱ngap en peligru. Oyap nas̈acusa̱tcap ni'c nawangap tsuguin ni'c nawatcau ayʉ̱́j ya's̈na̱s̈, ni'c ca-oyap nas̈nʉmga tini'c nani-apʉcmújcʉjʉj.

⁴¹ Iguinʉmgʉ́s̈aj we'n, iacnʉs̈cʉs̈ ayé jayaujuc.