Hechos 17 - Popoluca Sayula New Testament

Iwatcau tu'c ya's̈na̱s̈ en Tesalónica

¹ Inás̈caj nʉ'jcopajcat Anfípolis mit Apolonia, coygau nʉ'jcopac Tesalónica mam judíujat i-ítcʉjʉj itʉjcat mam i-adora̱tca.

² Mit Pablo, as̈am iguiwatí̱c, tʉgʉy mam je'jat, mit imucotscʉs̈ tu̱gup viaje po'cs̈ans̈ʉuni'jcat.

³ Mit i-actujawigʉs̈ ti inʉmo'jcʉp Dios ilibru, ni'c Cristu it ti iguitunas̈ mit ijutucta̱jc mam itsʉ̱nga á̱nimajat. Mit inʉm: —Ayé Jesús jeme tʉnʉmgʉs̈apay, ayé ayé Cristu i-ajyu'tway Dios.

⁴ Mit una̱c judíujat icupʉjcau Jesús, mit imunipʉjcʉjʉu Pablo mit Silas. Mit cupʉjcawey mayo'c griegujat jeme i-adora̱tcaway Dios, mit mayo'c to's̈ajyat jeme mʉjninʉ́mijcatway.

⁵ Wejpu'n judíujat jeme igacupʉjcaway Jesús, awa'nigau, mit i-apʉcmujcau una̱c maljayajwat jeme ca-itcʉjʉway yos̈. Igui-apʉcmújcaj tu'c jayaujuc, iwatcau tu'c ya's̈na̱s̈ nʉ'jcopacni'c, mit nʉs̈cau tuwitic Jasón itʉcm, ni'c iwangau igui-acpichingawa'n Pablo mit Silas mam itsʉ̱nga jayaujuc.

⁶ Po igapa̱tcawu jem. Mit cʉs̈ imunʉs̈cau Jasón mit una̱c hermanujat pa mam itsʉ̱nga autoridajat en ayé nʉ'jcopac, mit ya̱s̈cau, inʉmgau: —Mingawey yam jeme imunyajcapay nu'pʉjʉn jayajwat en ayʉ̱́j mundu.

⁷ Mit Jasón ipʉctsougʉs̈ ayé jayajwat, mit nu'pʉjʉn as̈am je'jat igawatcap as̈am iguimanda̱jt rey César, po inʉmgap ni'c itp jatu'c rey inʉ'jyway Jesús.

⁸ Mit iguimáraugaj lo que inʉmgaway judíujat, ya̱s̈cada̱jcau nʉ'jcopac jayajwat, mit pensa̱to'jcau autoridajat en ayé nʉ'jcopac.

⁹ Jasón mit ayé jayajwat jeme tsʉ̱ngaway mit je' iyajcau fianza, mit cʉs̈ i-acjo'ngau.

Bereajwayna'jat ipʉctsougajau Dios ipalabra

¹⁰ Mit cʉs̈ hermanujat tsu'm igui-acnʉ́s̈caj jaran Pablo mit Silas hasta nʉ'jcopac Berea. Icóygaj jem, tʉgʉygau mam judíujat i-adora̱tca.

¹¹ Mit Bereajwayna'jat más oyjayajwat que Tesalónicajatway ni'c ipʉctsougajau jaran Dios ipalabra, mit cada s̈ʉjw iche'ngau Dios ilibruni'c pa igui-e'pcawa'n te iyacs̈ta'cway lo que inʉmgapay Pablo mit Silas.

¹² Jemni'c iguicupʉ́jcaj Jesús mayo'c Bereajwayna'jat. Mit may griegujat cupʉjcau, to's̈ajyat oyninʉ́mijcatway mit jayajwat.

¹³ Mit judíujat Tesalónicajway ijawigau ni'c Pablo inʉmdacyo'yey Dios ipalabra en Berea. Mit cʉs̈ nʉs̈cau, mit jem i-acya̱s̈cada̱jcawey nʉ'jcopac jayajwat.

¹⁴ Mit cʉs̈ hermanujat i-acnʉs̈cau jaran Pablo pa lama̱t-auni'c, po Silas mit Timoteo tangau jem.

¹⁵ Mit jeme nʉs̈caway mit Pablo, imunʉs̈cau pa nʉ'jcopac Atenas. Mit Pablo inʉmgʉs̈au ma nʉ́mgaja Silas mit Timoteo ma minga jaran mam je'. Cʉs̈ nʉs̈cau.

Pablo imucotscʉs̈ Atenaswayna'jat

¹⁶ Mit Pablo i-atsʉ̱ngʉs̈ jem Atenas, mit tu'no'c ijo̱jt igui-is̈ ni'c it mayo'c tiyu̱s̈at en ayé nʉ'jcopac.

¹⁷ Jemni'c iguimucotscʉs̈ judíujat mam i-adora̱tca, mit japu̱jtat jeme i-adora̱tcaway Dios. Mit cada s̈ʉjw iguimucotscʉs̈ jeme imunipa̱tcʉs̈ʉway plazani'c.

¹⁸ Mit jem itsʉ̱ngaj una̱c i-estudia̱tcaway lo que i-ajque's̈capay epicúreojat, mit ja-una̱c i-estudia̱tcau lo que i-ajque's̈capay estoicojat. Mit je'jat imu-ampiugau Pablo. Mit una̱c inʉmgau: —¿Ti nas̈nʉmgajáj ayʉ̱́j jayau jeme cotso'cpay? Mit ja-una̱c inʉmgau: —Ayʉ̱́j i-ajque's̈tacyo'yp nam diosat. Inʉmgau we'n ni'c Pablo inʉmdacyo'jyau Jesús i-oyway noticia, mit inʉm ni'c Jesús jutucta̱c.

¹⁹ Mit imunʉs̈cau Pablo pa tu'c laj inʉ'jyway Areópago mam iguiwatí̱jca asamblea. Mit inʉmgajau: —¿Jawi te is̈nʉmgajáj ti inʉmo'jcʉp ayʉ̱́j namay ama̱s̈an inajque's̈pay?

²⁰ Ni'c is̈actumaraugap cosajat nunca tʉnganimaraugapay. Tʉnwangap tʉs̈jawigawa'n ti inʉmo'jcʉp ayʉ̱́j cosajat.

²¹ Inʉmgau we'n ni'c nu'pʉjʉn Atenaswayna'jat mit pe'ta̱majyat jemay inas̈cap tiempu puru pa iguinʉmgawa'n o iguimaraugawa'n tu'c cosa namay.

²² Mit Pablo nitenda̱jcʉu es̈pu̱tum mam je'jat en ayé laj inʉ'jyway Areópago, inʉmgʉs̈au: —Jayajwat Atenasatway, tʉn-e'p ni'c más inwano'jcap tiyu̱s̈at.

²³ Ni'c cuandu tʉnas̈, tʉn-is̈ intempluni'jcat, mit tʉmpa̱t tu'c altar mam itsʉ̱na ja'yic yename: “PA DIOS NAGA-IS̈CAPCAPAY”. Mit ayé Dios inadora̱tcap mmit inga-is̈capcap pʉn ayé. Mit jinap ayé Dios tʉ-actu-is̈capcʉs̈áj.

²⁴ ’Dios iwat mundu mit nu'pʉjʉn cosa itpay yam, mit je' imanda̱tp tsajp mit na̱s̈. Je' igatutsʉ̱nap templujat cʉ'wátijcatway.

²⁵ Mit ʉjtsat ca-oyap nas̈májyiga Dios. Je' igawamp neti, ni'c je' imoygʉs̈p vida pa nu'pʉjʉn, mit je' ayé nas̈moygapay s̈e'm pa natsʉ̱ngawa'n oy, mit je' nas̈moygap nu'pʉjʉn cosajat.

²⁶ ’Mit Dios iwatcʉs̈ nu'pʉjʉn jayajwat ni-as̈amu pa ma tutsʉ̱nga nu'pʉjʉn na̱s̈, mit je' iyac tu'c tiempu pa itutsʉ̱ngámpay, mit iyac ayé lugar mam itsʉ̱nawa'n cada jayau.

²⁷ Dios iwat we'n pa jayajwat ma iguiche'ngac je', mit te iche'ngap oymanac ipa̱tcáj Dios, ni'c Dios tom itsʉ̱na mam nu'pʉjʉn ʉjtsat.

²⁸ Ni'c je' ayé nas̈moygapay vida, mit por je' nayo'ygap, mit na̱itcau por je', as̈am iguinʉ́mgaj poetajat inyʉ'jcopacni'cway. Mit inʉmgawey: “Ʉjtsat nas̈wajyatey Dios.”

²⁹ Como ʉjtsat nas̈wajyat Dios, naganʉmgawit ni'c Dios as̈am tu'c tiyu̱s̈ cʉ'waticway de oro, plata o tsa'. Dios caje' as̈am jayajwat iguipensá̱tca.

³⁰ Mit ampay jayajwat iwatcau mal po Dios igawatcʉs̈u cuenta ni'c iga-is̈capcawu neti, po jinap imanda̱tp nu'pʉjʉn jayajwat jʉmgapa'tu ma cuyaguiga ima̱lway to̱jwat.

³¹ Ni'c Dios icupi̱u tu'c s̈ʉjw itujuzga̱tcʉs̈ámpay nu'pʉjʉn jayajwat en ayʉ̱́j mundu, mit ijuzga̱tcʉs̈áj yacs̈ic nat je' iguijawi natsʉ̱́nga. Mit Dios iyac Jesús pa nas̈juzga̱tcáj. Dios nas̈actujawigap ni'c iyacs̈ta'cway ayé ni'c i-acjutucta̱c Jesús mam itsʉ̱nga á̱nimajat.

³² Mit ayé jayajwat imaraugau Pablo iguinʉjm ni'c á̱nimajat jutucta̱jcáj, mit una̱c itus̈i̱jcau, mit ja-una̱c inʉmgajau: —Tʉnmaraugáj jatu'mbac ayʉ̱́j is̈nʉmgajaway.

³³ Mit cʉs̈ Pablo pichin mam je'jat.

³⁴ Po una̱c icupʉjcau Jesús, mit imunipʉjcʉjʉu Pablo. Cupʉjcawey Dionisio Areópagojway, mit tu'c to's̈ay inʉ'jyway Dámaris, mit we'ney japu̱jtat mit je'jat.