Hechos 15 - Popoluca Sayula New Testament

Iwatcau tu'c asamblea Jerusalén

¹ Mit wejpu'n una̱c jayajwat mingau Judeajway na̱s̈ pa Antioquía, mit i-ajque's̈cajau hermanujat, inʉmgau: Te migatsʉ̱ngap marca̱tic as̈am ayé costumbre iyacway Moisés, ca-oyáj inyisalva̱tcʉjʉ.

² Pablo mit Bernabé catsʉ̱ngawu en acuerdu mit je'jat, mit imuninʉmgʉjʉu may ayé jayajwat. Mit cʉs̈ hermanujat inʉmgau ni'c Pablo mit Bernabé mit ja-una̱c hermanujat ma nʉs̈ca pa Jerusalén. Ma nʉs̈ca mam itsʉ̱nga apóstojlat mit jayajwat icuida̱tcapay cupʉcpajyat pa ma arregla̱tca ayé asuntu mit je'jat.

³ Mit cupʉcpajyat Antioquíajway oy iguiyacta̱jca Pablo mit Bernabé. Mit inás̈caj pa Fenicia mit Samariajway na̱s̈, i-ampiugajau ni'c chu̱chiway iguicupʉjca Jesús jeme caje'jatway judíujat. Mit i-acji'cta̱jcajau ijo̱jtat nu'pʉjʉn hermanujat.

⁴ Mit icóygaj Jerusalén, iguipa̱jtsougau cupʉcpajyat, apóstojlat mit jayajwat icuida̱tcapay cupʉcpajyat, mit i-ampiugajau nu'pʉjʉn cosa lo que Dios iwatway mit je'jat.

⁵ Po una̱c fariseujat jeme cupʉjcaway nitenda̱jcʉjʉu mit inʉmgajau: —Itp ti nas̈marca̱tcawa'n ayé cupʉcpajyat jeme caje'jatway judíujat, mit itp ti nas̈manda̱tcawa'n ma guarda̱tcaja Moisés iley.

⁶ Mit ni-apʉcmujcʉjʉu apóstojlat mit ayé jayajwat icuida̱tcapay cupʉcpajyat pa ma pensa̱tca en ayé asuntu.

⁷ Cʉs̈ ininʉ́mgʉjʉj, nitenda̱jcʉu Pedro, mit inʉmgʉs̈au: —Hermanujat, mijchat injawigap ni'c ijtʉnup tiempu Dios tʉs̈cupi̱u pa tʉs̈nʉmgʉs̈awa'n oyway noticia ayé jayajwat jeme caje'jatway judíujat, pa je'jat ma cupʉjca Jesús.

⁸ Dios ijawip nat itsʉ̱na najo̱jtat. Je' i-actujawigʉs̈ ni'c ipʉctsougʉs̈áj ni'c imoygʉs̈ Espíritu Santu pa je'jat as̈am ʉjtsat nas̈moygau.

⁹ Dios niwe'nu igui-e'pcʉs̈ je'jat as̈am nas̈-e'pcap ʉjtsat, ni'c je' ilimpia̱tcʉs̈au ijo̱jtat jeme cupʉjcaway.

¹⁰ Mit jinap, ¿tini'c is̈probá̱tca Dios? Ayé ley as̈am tu'c tsʉm u'tspay, ¿tini'c is̈ajcu'tcaja cupʉcpajyat ma tsʉmga? Mit ne nate̱jtat ámbanuway ne ʉjtsat ca-oyawu nas̈munʉs̈ca.

¹¹ Po nacupʉjcap ni'c nanisalva̱tcʉjʉ̱́j ni'c el Señor Jesús nas̈moygap favor, mit je'jat we'ney.

¹² Mit cʉs̈ nu'pʉjʉn je'jat cajacotscawu, mit imaraugau Bernabé mit Pablo, mit je'jat i-ampiugau nat Dios iguimoygau poder pa ma watca milagru majatway, mit ma acnigu-épigʉjʉ jayajwat jeme caje'jatway judíujat.

¹³ Icʉ́s̈caj cotspay, Jacobo inʉmda̱c: —Hermanujat, máraugac.

¹⁴ Simón nas̈ampiugajau ni'c Dios por primera vez imoygʉs̈ favor jayajwat caje'jatway judíujat. Je' iwan iguicupiugʉs̈wa'n jayajwat mam je'jat pa ma iguicupʉjcac.

¹⁵ Mit ayé jat as̈am iguinʉ́mgaj ámbanu ayé profetajat, as̈am itsʉ̱na ja'yic Dios ilibruni'c:

¹⁶ Inʉm Dios: En ayé s̈ʉjwat tʉpitugáj mit tʉnwajtájatu David itemplu jeme ca'way, mit tʉn-oyagáj mam itogoyda̱jc, mit tʉnajca's̈ʉ'gájatu.

¹⁷ Pa japu̱t jayajwat ma che'nga el Señor Dios, mit we'ney nu'pʉjʉn pe'ta̱mayna'jat jeme tʉs̈cupʉjcapay.

¹⁸ We'n iguinʉm el Señor Dios, mit je' iyac ma jawiga nu'pʉjʉn ayʉ̱́j cosajat desde ámbanu.

¹⁹ ’Mit Jacobo siguia̱t iguinʉm: Jemni'c tʉs̈nʉm ni'c nagamunyájca jeme caje'jatway judíujat, jeme chu̱chiway iguicupʉjca Dios.

²⁰ Po naja'ygajáj ni'c maganijingʉjʉ mit cayan icotscajaway tiyu̱s̈at, magachajyo'yga mit magacaygawit aníma̱jtat ahorcá̱tijcatway, mit we'ney magacayga nipin.

²¹ Desde ámbanu itp pʉn i-ajque's̈cajapay Moisés ilibru en cada nʉ'jcopac mam i-adora̱tca judíujat, mit icotscajap cada po'cs̈ans̈ʉjw. We'n iguinʉjm Jacobo.

²² Wejpu'n apóstojlat, ayé jayajwat icuida̱tcapay cupʉcpajyat, mit nu'pʉjʉn cupʉcpajyat inʉmgau ni'c icupiugáj jayajwat entre je'jat, mit i-ajyu'tcáj pa nʉ'jcopac Antioquía pa ma acompaña̱tca Pablo mit Bernabé. Mit cʉs̈ icupiugau ayʉ̱́jat: Judas jeme inʉ'jywayey Barsabás, mit Silas. Mit ayé jayajwat oyninʉmijcat mam hermanujat.

²³ Mit ija'ygau tu'c noc pa je'jat ma entrega̱tca. Inʉm ayé noc yename: “Ʉjtsat apóstojlat, jayajwat icuida̱tcapay cupʉcpajyat, mit hermanujat, tʉnsaluda̱tcap hermanujat jatu'c Ʉa̱s̈atway jeme tsʉ̱ngapay nʉ'jcopac Antioquía, Siriajway mit Ciliciajway na̱s̈.

²⁴ Tʉnmaraugau ni'c una̱c jayajwat pichingau mam ʉjtsat po ʉjtsat tʉnga-ajyu'tcawu je'jat. Mit is̈munyajcap mit lo que inʉmgapay, is̈trastorna̱tcajap incopajcat, ni'c inʉmgap pi nimarca̱tcʉjʉ as̈am judíujat iguiwátcaj, mit pi guarda̱tca ley.

²⁵ Jemni'c tʉs̈wátcaj tu'c acuerdu, mit tʉs̈ca'ugajau oy pa tʉs̈ajyu'tcawa'n jayajwat jeme tʉncupiugaway. Je'jat i-acompaña̱tcáj Bernabé mit Pablo jeme nawano'jcapay. Je'jat nʉs̈áj is̈-e'pcap.

²⁶ Ayé jayajwat iyajcap ividajat en peligru ni'c iwangap el Señor Jesucristu.

²⁷ Mit tʉnajyu'tcapey Judas mit Silas, mit je'jat is̈ajque's̈cajámpey ni-as̈amu.

²⁸ Espíritu Santu tʉs̈actujawigau ni'c tʉga-ajcu'tcaja mijchat nejʉmay tsʉm u'tspay. Solo oy pi watca ayʉ̱́j cosajat:

²⁹ Piganijingʉjʉ mit cayan icotscajaway tiyu̱s̈at, pigacayga nipin mit we'ney aníma̱jtat ahorcá̱tijcatway, mit pigachajyo'ygawit. Mit te inguarda̱tcap ayʉ̱́j cosajat, inwatcáj oy. Dios ma is̈mutangac.”

³⁰ Mit ayé jayajwat i-ajyu'tcaway nʉs̈cau pa Antioquía, mit igui-apʉcmújcaj cupʉcpajyat, i-entrega̱tcajau ayé noc.

³¹ Cʉs̈ iguicótscaj ayé noc, ji'cta̱jcau ijo̱jtat ni'c we'n iguitsawigau.

³² Dios imoygʉs̈ favor Judas mit Silas ma nʉmgaja ipalabra, mit cʉs̈ imucotscau hermanujat, mit i-animá̱tcau mayo'c pa ma siguia̱tca mit Dios.

³³ Iguinás̈caj tu'c tiempu jem, ayé hermanujat imunidespidia̱tcʉjʉu, mit inʉmgajau ma saluda̱tca ayé apóstojlat jeme igui-ajyu'tcaway.

³⁴ Po Silas inʉm ni'c tanáj jem.

³⁵ Pablo mit Bernabé tangau Antioquía, mit i-ajque's̈cajau el Señor Dios ipalabra, mit inʉmdacyo'ygajau Jesús i-oyway noticia, mit we'ney iguiwátcaj japu̱t hermanujat jeme tsʉ̱ngaway mit je'jat.

Pablo i-ecchu̱chip segunduway viaje

³⁶ Iguinás̈caj una̱c s̈ʉjwat, Pablo inʉjmau Bernabé: —Jaga-atu natʉcyo'yga hermanujat. Nanʉs̈cáj en nu'pʉjʉn nʉ'jcopajcat mam nas̈nʉmdacyo'ygajaj el Señor Dios ipalabra, mit na-e'pcáj nat itsʉ̱nga hermanujat.

³⁷ Mit Bernabé iwan iguimunʉs̈wa'n Juan Marcos.

³⁸ Po Pablo igawanu iguimunʉs̈wa'n Juan ni'c je' iguicuyaguigau cuandu itsʉ̱ngaj Panfiliajway na̱s̈, mit ca-oyu mit je'jat pa iguimajyigáj.

³⁹ Mit awa'nigau Pablo mit Bernabé hasta ni-aparta̱tcʉjʉu. Mit Bernabé imunʉcs̈ Marcos, cʉs̈ nʉs̈cau barcuni'c pa Chipre.

⁴⁰ Mit Pablo icupi̱u Silas. Mit hermanujat iyo'tcajau el Señor Dios ma iguimoygac favor, mit cʉs̈ pichingau.

⁴¹ Pablo mit Silas ituyo'ygau Siriajway na̱s̈ mit Ciliciajway na̱s̈, mit i-animá̱tcau cupʉcpajyat ma siguia̱tca mit Dios.