Hechos 13 - Popoluca Sayula New Testament

Cupʉcpajyat i-acnʉs̈cau Bernabé mit Saulo

¹ Mit wejpu'n i-ijt profetajat mit ajque's̈pajyat entre cupʉcpajyat Antioquiajway, mit ayʉ̱́jat ayé: Bernabé, Simón jeme inʉ'jywayey Niger, Lucio Cirenejway, mit Manaén jeme imuye'cway Herodes jeme manda̱tway Galileajway na̱s̈, mit Saulo.

² Tu'c s̈ʉjw je'jat iservia̱tcajau el Señor Dios, mit ayuna̱tcau. Wejpu'n iguinʉjm Espíritu Santu: —Apartá̱tcajac Bernabé mit Saulo ni'c tʉnya̱s̈cʉs̈ pa ma watca tu'c yos̈ pa ʉ̱.

³ Mit cʉs̈ ayuna̱tcau mit ora̱tcau, mit cʉs̈ iyajcajau icʉ'jat je'jat iyucuinmat, mit imunidespidia̱tcʉjʉu.

Bernabé mit Saulo en Chipre

⁴ Mit Espíritu Santu i-ajyu'tcʉs̈ Bernabé mit Saulo, mit je'jat nʉs̈cau pa nʉ'jcopac Seleucia, mit de jem nʉs̈cau barcuni'c pa ayé isla inʉ'jyway Chipre.

⁵ Icóygaj en ayé puertu Salamina, inʉmdacyo'ygau Dios ipalabra mam i-adora̱tca judíujat. Mit Juan nʉcs̈ mit je'jat mit imajyigʉs̈.

⁶ Mit ituyo'ygau nu'pʉjʉn ayé isla hasta icojy nʉ'jcopac Pafos, mit jem iguipá̱tcaj tu'c jayau judíu inʉ'jyway Barjesús. Ayé jayau tu'c tso'c mit tu'c we̱tpayna', inʉm ni'c Dios igui-ajyu't.

⁷ Ayé tso'c tsʉ̱nau mit tu'c jayau inʉ'jyway Sergio Paulo, mit je' manda̱t en ayé isla mit je' i-is̈cap may. Mit je' iya̱s̈cʉs̈ ma minga Bernabé mit Saulo, ni'c iwan iguimarawa'n Dios ipalabra.

⁸ Mit ayé tso'c inʉ'jyey Elimas, mit i-atujcʉs̈ ayé jayajwat ni'c igawanu ma cupʉc ayé manda̱tpay.

⁹ Mit cʉs̈ Saulo jeme inʉ'jywayey Pablo tsʉ̱nau mʉgʉc Espíritu Santu ijo̱tni'c, mit icu-e'pca̱t ayé jayau,

¹⁰ mit inʉjmau: —¡Mi̱ inwe̱jta̱jcʉs̈p jayajwat mit mima̱lo'c, mi̱ is̈jayau Awayagatsna', mit inga-e'po'jcʉp cosa oyway! ¿Tini'c is̈actogoyda'c tu'c cosa yacs̈icway jeme iyacway el Señor Dios?

¹¹ Mit jinap el Señor Dios is̈castiga̱táj, mit mi̱ miwinchiyáj, mit inga-e'páj neti pa tu'c tiempu. Mit cʉs̈ cuchítimiu je', mit iche'n pʉn iguicʉ'ju'pámpay ni'c wínchiganu.

¹² Mit cʉs̈ ayé manda̱tpay igui-is̈ lo que jatway, icupʉc Dios, ni'c nigu-épijyʉu cuandu iguimárajwaj el Señor Dios i-ama̱s̈an.

Bernabé mit Saulo en Antioquía Pisidiajway na̱s̈

¹³ Pablo mit icumpajlat pichingau Pafos, mit coygau nʉ'jcopac Perge Panfiliajway na̱s̈. Po Juan icuyaguigʉs̈ je'jat, mit pituc pa Jerusalén.

¹⁴ Mit ipíchingaj Perge, coygau nʉ'jcopac Antioquía Pisidiajway na̱s̈. Cʉs̈ tu'c po'cs̈ans̈ʉjw tʉgʉygau mam i-adora̱tca judíujat, mit nitsʉ̱nda̱jcʉjʉu pa imaraugawa'n.

¹⁵ Cʉs̈ iguicótscaj ley mit profetajat ilibrujat, jeme encargá̱tijcatway jem inʉmgajau ma ya̱s̈ca ayé mechc jayajwat ma nas̈ca, mit inʉmgajau: —Jayajwat, te intsawigáj ayʉ̱́j nʉ'jcopac jayajwat, oyap incotsca.

¹⁶ Mit cʉs̈ Pablo nitenda̱jcʉu, mit iwat tu'c seña magacotsca, mit inʉmgʉs̈au: —Jayajwat Israelway, mit mijchat impʉ̱tcapay Dios, maraugac:

¹⁷ Ayé Israelway jayajwat iDiosat icupiugʉs̈ nate̱jtat ámbanuway, mit i-acjatcʉs̈ majyat cuandu itsʉ̱ngaj as̈am pe'ta̱majyat Egiptojway na̱s̈, mit Dios i-acpichingʉs̈ jem mit ipoder.

¹⁸ Mit pa cuarenta s̈iwit Dios icuida̱tcʉs̈ mam igatsʉ̱naj nepʉn.

¹⁹ Mit Dios i-actuvencia̱tcʉs̈ siete nʉ'jcopajcat tsʉ̱ngapayate Canaánway na̱s̈, mit imoygʉs̈ ina̱s̈at pa Israejlatway.

²⁰ Mit cʉs̈ Dios iyac juezat mit je'jat juzga̱tcau pa cuatrocientos cincuenta s̈iwit hasta imijn profeta Samuel.

²¹ Mit wejpu'n iyo'tcajau Dios ma iguimoygac tu'c rey, mit Dios imoygʉs̈ Saúl, Cis iway, tu'c jayau jeme pichinway Benjamín ifamiliani'c, mit je' manda̱t cuarenta s̈iwit.

²² Mit cʉs̈ Dios ichi't Saúl, mit imoygʉs̈ David pa rey. Mit Dios i-oyninʉm David, inʉm: “David, Isaí iway, ayé tu'c jayau i-acji'cpay tʉnjo̱jt, mit je' iwatáj nu'pʉjʉn lo que tʉnwampay.”

²³ Mit Dios i-acmin Jesús David ifamiliani'c pa iguisalva̱tcʉs̈wa'n Israelway jayajwat, ni'c we'n iguiprometia̱jt Dios.

²⁴ Antes imijn Jesús, Juan inʉmdacyo'y ni'c nu'pʉjʉn Israelway jayajwat ma cuyaguiga ima̱lway to̱jwat mit ma ninʉ'gutemgʉjʉ.

²⁵ Iguicʉs̈ Juan ayé yos̈ Dios iguimoyway, inʉm: “¿Is̈jawiga tʉpʉn ʉ̱? Ʉ̱ tʉgaje' Cristu, po mimp tʉnmugus̈á̱m tu'c jayau, mit tʉs̈camerecia̱tp tʉs̈quejawa'n icʉ'ac.”

²⁶ ’Jayajwat, mijchat mipichingau Abraham ifamiliani'c, mit mijchat impʉ̱tcap Dios. Pa mijchat Dios is̈ajyu'tcajau ayʉ̱́j noticia pa is̈tunisalva̱tcʉjʉwa'n.

²⁷ Mit jeme tsʉ̱ngaway Jerusalén mit ijefejat, igajawigawu pʉn ayé Jesús. Mit cada po'cs̈ans̈ʉjw icotscap profeta ilibrujat po iga-entendia̱tcap ti inʉmo'jcʉpay. Mit cuandu iguicondená̱tcaj Jesús, je'jat icumplia̱tcau lo que inʉmgaway ayé profetajat.

²⁸ Mit igapa̱tcajawu nejʉmay causa pa i-o'cwa'n Jesús, po majawe'naj iyo'tcajau Pilato ma ac-ago'jcʉ.

²⁹ Mit iwatcajau Jesús nu'pʉjʉn cosa jeme itway ja'yic pa iguijatáj, mit cʉs̈ ichi'tcau cunu̱s̈ni'c mit icomgau á̱nimacʉtni'c.

³⁰ Po Dios i-acjutucta̱c Jesús mam itsʉ̱nga á̱nimajat.

³¹ Mit pa mayo'c s̈ʉjwat Jesús ique's̈ta̱jcʉs̈au ayé jayajwat jeme iguimuyo'ygaway desde Galilea hasta Jerusalén, mit jinap je'jat inʉmdacyo'ygap ni'c iyacs̈ta'cway Jesús jutucta̱c.

³² ’Mit ʉjtsat tʉnʉmgajapey tu'c oyway noticia ni'c Dios iwat tu'c promesa pa nate̱jtat ámbanuway, ni'c i-acmi'náj pʉn iguisalva̱tcámpay.

³³ Mit ʉjtsat nas̈wajyat nate̱jtat ámbanuway mit pa ʉjtsat Dios icumplia̱t ipromesa cuandu igui-acjutucta̱jc Jesús. As̈am itsʉ̱na ja'yic salmu segunduway mam iguinʉm Dios: “Mi̱ tʉ̱wáy, ʉ̱j ayé tʉmoyway vida.”

³⁴ Dios i-acjutucta̱c Jesús mam itsʉ̱nga á̱nimajat pa magapu̱tstogoy. Pa pi jawiga ni'c iyacs̈ta'cway ayé, Dios inʉm ilibruni'c yename: “Tʉmoygʉs̈áj cosa ojyatway lo que tʉmprometia̱jtaway David.”

³⁵ Jemni'c iguinʉjm en jatu'c salmu: “Ʉ̱ is̈cupi̱u mit ingayagáj laj tʉpu̱tstogoy.”

³⁶ Ni'c iyacs̈ta'cway David cuandu itsʉ̱naj, iservia̱tcʉs̈au ijayajwat as̈am Dios iguimanda̱t, mit cʉs̈ o'c, mit je' ini̱pcau mam itsʉ̱ngaj ni'pic ite̱jtat ámbanuway, mit pu̱tstogoy.

³⁷ Po ayé jeme Dios i-acjutucta̱cway, capu̱tstogoyu.

³⁸ Jayajwat, itp ti is̈jawigawa'n ni'c Dios is̈perdona̱tcajáj nu'pʉjʉn mal inwatcaway is̈cupʉjcawa'n Jesús.

³⁹ Moisés iley ca-oyawu is̈yacs̈icninʉmgap, po nu'pʉjʉn icupʉjcapay Jesús, Dios iyacs̈icninʉmgʉs̈áj.

⁴⁰ Nicuidá̱tcʉjʉ pi is̈cajatcac lo que inʉmgaway profetajat, as̈am iguinʉ́mgaj Dios ilibruni'c:

⁴¹ Mijchat mitucotscapay, pi nigu-épigʉjʉ, mit pi togoyga. E'pca ni'c ʉ̱ Dios tʉnwatáj cosa ojyatway intiempuni'jcat, Mit ingacupʉjcáj lo que tʉnwatámpay, maja iguinʉmwa'naj tambʉn.

⁴² Ipíchingaj Pablo mit icumpajlat mam i-adora̱tca judíujat, jeme caje'jatway judíujat iyo'tcajau ma minga en ayé po'cs̈ans̈ʉjw mimpay mit wejpu'n ma ajque's̈caja jatu'mbac.

⁴³ Mit cuandu ipíchingaj, iguinatspoguigau Pablo mit Bernabé may judíujat mit jeme niwatcʉjʉway judíujat jeme i-adora̱tcaway Dios. Mit Pablo mit Bernabé imucotscau mit itsawigau ma tanga mʉgʉc mit Dios ni'c je' nas̈moygap favor.

⁴⁴ Mit icojy jatu'c po'cs̈ans̈ʉjw, ni-apʉcmujcʉjʉu casi nu'pʉjʉn nʉ'jcopac jayau pa iguimaraugajawa'n Dios ipalabra.

⁴⁵ Po judíujat igui-ís̈caj ayé jayaujuc, awa'nigau, mit inʉmgau ni'c caje' iyacs̈ta'cway lo que inʉmpay Pablo, mit itucotscau je'.

⁴⁶ Mit como Pablo mit Bernabé capʉ̱tcawu pa icotscawa'n, inʉmgajau: —Iyacs̈ta'cway it ti tʉs̈nʉmdacyo'ygawa'n Dios ipalabra primeru pa mijchat. Po ingawangajap, mit casi inyʉmgap ni'c is̈camerecia̱tcap vida jeme cacʉs̈ámpay. Jinap tʉnʉs̈cáj pa mam itsʉ̱nga jeme caje'jatway judíujat.

⁴⁷ Ni'c we'n tʉs̈manda̱tcau el Señor Dios, as̈am iguinʉm ilibruni'c: Tʉyacp mi̱ as̈am tu'c luz pa pe'ta̱may jayajwat jatu'c na̱s̈atway, mit pa jayajwat ma nisalva̱tcʉjʉ hasta mam icucʉs̈i mundu.

⁴⁸ Iguimáraugaj we'n jeme caje'jatway judíujat, ji'cta̱jcau ijo̱jtat, mit i-oyninʉmgau el Señor Dios ipalabra, mit cupʉjcau nu'pʉjʉn jeme Dios icupiugʉs̈way pa ma aguepca vida jeme cacʉs̈ámpay.

⁴⁹ Mit inʉmdacyo'ygau el Señor Dios ipalabra en nu'pʉjʉn nʉ'jcopajcat.

⁵⁰ Po judíujat i-acochigau to's̈ajyat jeme i-adora̱tcaway Dios, jeme oyninʉ́mijcatway, mit i-acochigawey mʉjayajwat nʉ'jcopacni'cway, mit inʉmgajau ma acpo'jca Pablo mit Bernabé, mit cʉs̈ i-acpichingau hasta mam icucʉs̈i inʉ'jcopac na̱s̈at.

⁵¹ Wejpu'n Pablo mit Bernabé icus̈ics̈cau pu's̈na' jeme itcʉjʉway ita'ni'jcat pa ma jawiga ni'c ma̱lo'jcat ayé jayajwat. Mit cʉs̈ coygau nʉ'jcopac Iconio.

⁵² Po cupʉcpajyat ji'cta̱jcau ijo̱jtat, mit tsʉ̱nau mʉgʉc Espíritu Santu ijo̱tni'jcat.