Hechos 10 - Popoluca Sayula New Testament

Pedro mit Cornelio

¹ It tu'c jayau inʉ'jyway Cornelio jeme tsʉ̱naway nʉ'jcopac Cesarea. Ayé jayau tu'c capitán jeme imanda̱tway tu'c soldajúc inʉ'jyway el Italiano.

² Mit Cornelio tu'c jayau i-adora̱tway Dios. Je' mit nu'pʉjʉn itʉcm tsʉ̱ngapay ipʉ̱tcau Dios, mit iyaguí̱c may tumi̱n pa iguimajyiwa'n nʉ'jcopac jayajwat, mit i-ora̱tí̱jcau Dios.

³ Como a las tres de la tarde ayé jayau Dios igui-actu-is̈ claru tu'c visión, mit i-is̈au Dios i-ángel itʉgʉjy mam je' itsʉ̱na, mit iguinʉjmau: —¡Cornelio!

⁴ Mit je' iguicu-e'pca̱jt ayé ángel, ni-apʉ̱tijyʉu, inʉm: —Oh Señor, ¿ti ayʉ̱́j? Mit je' iguinʉjmau: —Dios imarau mam je' itsʉ̱na lo que inyo'jtaway, mit ijawinup ayé tumi̱n inyaguí̱cpay pa pro̱wijat.

⁵ Ajyu'tcʉs̈ jaran inmozojat pa nʉ'jcopac Jope, mit acmi'n Simón eme inʉ'jywayey Pedro.

⁶ Ayé jayau tsʉ̱nap tʉc Simón jeme icurtia̱tpay pa̱gas̈-ác mit ijtʉp itʉjc lama̱t-auni'c, mit Pedro is̈nʉjmáj ti inwatámpay.

⁷ Inʉjcs̈ ayé ángel jeme iguimucotsway Cornelio, imuya̱s̈ mechc imozojat mit we'ney tu'c soldaj jeme i-adora̱tway Dios mit jeme iguimajyiway siempre.

⁸ Mit cʉs̈ i-ampiugʉs̈au nu'pʉjʉn jeme jatway, mit i-ajyu'tcʉs̈ pa nʉ'jcopac Jope.

⁹ Icus̈ʉwij jatu'c s̈ʉjw, je'jat nʉs̈cau to̱uni'c. Mit icóygaj tom ayé nʉ'jcopac, pu̱ts̈ʉjw cu't Pedro tʉcyucuinm azoteani'c pa i-ora̱twa'n.

¹⁰ Mit cayo'jcʉu mʉgʉc, mit iwan icaywa'n. Po mientras iwatcajap icayan, Dios igui-actu-is̈ tu'c visión,

¹¹ mit i-is̈ tsajp awa'tsic, mit manac tu'c cosa jeme que's̈way as̈am tu'c manta mʉjway, mit manac pa na̱s̈ni'c tsumic inimactas̈pij i-esquina.

¹² Mit ayé cosa ijtʉu de nu'pʉjʉn aníma̱jtat jeme itpay na̱s̈ni'c, mit ijtʉwey tsanajyat mit jonwájat.

¹³ Mit imarau ni'c cotsp el Señor, iguinʉjmau: —Ca's̈ʉ'c, Pedro, ago'c mit cay.

¹⁴ Mit cʉs̈ inʉm Pedro: —Ca̱ Señor, nunca tʉnganicayp jeme ca-oyway nas̈caywa'n ne jeme caje'way limpiu.

¹⁵ Mit iguinʉjmawatu imumechcpacway viaje, inʉm: —Jeme Dios inʉmway ni'c limpiu, camnʉmwit ni'c ca-oy nas̈caywa'n.

¹⁶ Mit pa tu̱gup viaje we'n iguinʉjm, mit cʉs̈ ayé manta cu'tnuwatu pa tsajpni'c.

¹⁷ Mit Pedro igajawiwu ti inʉmo'jcʉu ayé visión igui-actu-is̈way Dios. Mit en ayé ratu ayé jayajwat jeme i-ajyu'tcʉs̈way Cornelio i-ucyo'tcau jʉm itsʉ̱na Simón hasta icóygaj Simón itʉc-auni'c.

¹⁸ Mit iguimucótscaj, i-ucyo'tcau te jem ayé itsʉ̱na Simón jeme inʉ'jywayey Pedro.

¹⁹ Mit ipensa̱tpnajate Pedro ti inʉmo'jcʉu ayé visión i-is̈way, cʉs̈ Espíritu Santu iguinʉjmau: —E'pnaj, tu̱gup jayajwat is̈che'ngap.

²⁰ Ca's̈ʉ'c mit manac. Campensa̱t neti pa inyʉs̈wa'n mit je'jat, ni'c ʉ̱ tʉnacmingʉs̈.

²¹ Mit cʉs̈ Pedro manac pa mam itsʉ̱nga ayé jayajwat i-ajyu'tcʉs̈way Cornelio, mit inʉmgʉs̈au: —Ʉ̱j ayé is̈che'ngapay. ¿Tini'c inmíngaj?

²² Mit je'jat inʉmgajau: —Tʉs̈ajyu'tcau tu'c capitán inʉ'jyway Cornelio. Je' tu'c jayau oyway jeme ipʉ̱tpay Dios, mit je' igui-oyninʉmgap nu'pʉjʉn judíujat. Mit tu'c Dios i-ángel iguinʉjmau ni'c je' itp ti is̈ya's̈áj pa inyʉs̈wa'n je' itʉcm, mit imarawáj lo que inyʉmámpay.

²³ Mit cʉs̈ Pedro icomgʉs̈ tujugum mit inʉmgʉs̈au ni'c jem ma nas̈ca tsu'. Mit icus̈ʉwij jatu'c s̈ʉjw, ca's̈ʉ'c mit nʉcs̈ mit je'jat. Mit nʉs̈cau mit je' una̱c hermanujat Jopejatway.

²⁴ Mit jatu'c s̈ʉjw coygau nʉ'jcopac Cesarea. Mit Cornelio i-atsʉ̱ngʉs̈, mit apʉcmuguiganu itsʉ̱ngaj imutʉcmay je̱wajyat mit i-amigujat jeme más iwano'jcʉs̈pay.

²⁵ Mit icojy jem Pedro, pichin jaran Cornelio iguipa̱jtsou, mit nicos̈atenda̱jcʉu Pedro ita'ná̱m ni'c iwan igui-adora̱twa'n.

²⁶ Po Pedro i-ajca's̈ʉ'c mit inʉjmau: —Ca's̈ʉ'c ni'c ʉ̱ tʉjayawey as̈am mi̱.

²⁷ Imucotspnajate, tʉgʉy mit ipa̱tcʉs̈ jem mayo'jcat jeme ni-apʉcmujcʉjʉway.

²⁸ Mit Pedro inʉmgʉs̈au: —Mijchat injawigap ni'c ca-oy tu'c jayau judíu iguimunipʉjcʉwa'n tu'c pe'ta̱may ne magatʉgʉywit itujugum. Po Dios tʉs̈actujawiu ni'c nejʉmay jayau tʉganʉmwit ni'c ca-oy o caje' limpiu.

²⁹ Cuandu ʉ̱ is̈ya̱s̈, tʉmín jaran mit tʉngapensa̱tu neti. Jinap tʉnwamp tʉs̈jawiwa'n tini'c is̈acmin.

³⁰ Mit cʉs̈ Cornelio ipo'n: —Ijtʉnup mactas̈p s̈ʉjw tʉ-ayuna̱t en ayʉ̱́j nije'yu hora. Mit a las tres de la tarde tʉ-ora̱jt tʉntujugum, mit tʉn-is̈ ni'c tu'c jayau tenap tʉnwiná̱m mit cuquijangada̱c ijamuc,

³¹ mit tʉs̈nʉjmau: “Cornelio, Dios imarau lo que inyo'jtaway, mit je' ijawinup ayé tumi̱n inyaguí̱cpay pa pro̱wijat.

³² Ajyu't pa nʉ'jcopac Jope, mit acmi'n ayé Simón jeme inʉ'jywayey Pedro. Ayé jayau tsʉ̱nap tʉc Simón jeme icurtia̱tpay pa̱gas̈-ác, mit ijtʉp itʉjc lama̱t-auni'c. Imi'nwa'n, je' is̈mucotsáj.”

³³ Mit cʉs̈ tʉ-acmin jaran, mit oyo'gu inmijn. Mit jinap tʉtsʉ̱nbʉ'ngap yam mam Dios tʉs̈-e'pcap, mit tʉnmaraugáj nu'pʉjʉn lo que Dios is̈manda̱tway pa is̈nʉmgajáj ʉjtsat.

Lo que inʉmway Pedro

³⁴ Mit Pedro cotsta̱c, inʉm: —Iyacs̈ta'cway jinap tʉnjawip ni'c Dios niwe'nu igui-e'pcʉs̈ nu'pʉjʉn jayajwat.

³⁵ Dios iwangʉs̈p nu'pʉjʉn jayajwat jeme je' iguipʉ̱tcapay mit jeme iwatcapay oy.

³⁶ Dios imucotscʉs̈ Israelway jayajwat, mit inʉmgʉs̈au tu'c oyway noticia ni'c Jesucristu nas̈cowangap mit Dios. Je' ayé el Señor pa ʉjtsat nanu'pʉjʉjnat.

³⁷ Mijchat injawigap jeme jatway en nu'pʉjʉn Judea. Chu̱chijʉ'c iguinʉmdacyo'yga oyway noticia Galileajway na̱s̈ después inʉmdacyo'jy Juan. Je' inʉm ni'c itp ti naninʉ'gutejmʉwa'n.

³⁸ Injawigap ni'c Dios icupi̱u Jesús Nazaretway, mit imoy Espíritu Santu mit poder. Ayé Jesús iwat cosa ojyatway mam iyo'jy, mit i-ac-oytangʉs̈ nu'pʉjʉn jeme Awayagatsna' iguidomina̱tcaway, ni'c Dios tsʉ̱nau mit Jesús.

³⁹ Mit ʉjtsat tʉn-is̈cau nu'pʉjʉn lo que iwatway Jesús Judeajway na̱s̈ mit en ayé nʉ'jcopac Jerusalén. Ayé Jesús i-ago'jcau mit iyajcau cunu̱s̈ni'c.

⁴⁰ Mit Dios i-acjutucta̱c Jesús imutu̱gupay s̈ʉjw, mit ʉjtsat tʉs̈actu-is̈cau ni'c jutucta̱c.

⁴¹ Po Jesús igaque's̈ta̱jcʉs̈awu nu'pʉjʉn nʉ'jcopac jayajwat. Solo tʉs̈que's̈ta̱jcajaújtsat ni'c Dios tʉs̈cupiugau desde ámbanu as̈am testigujat. Tʉnmucaygau je' mit tʉnmu-u̱jcau cʉs̈ ijutucta̱jc mam itsʉ̱ngaj á̱nimajat.

⁴² Mit je' tʉs̈manda̱tcau pa tʉs̈nʉmgajawa'n jayajwat ni'c Dios iyac Jesús pa iguijuzga̱tcʉs̈wa'n jeme tsʉ̱ngapnajway mit jeme o'guijcatway.

⁴³ Mit nu'pʉjʉn profetajat inʉmgau ámbanu ni'c nu'pʉjʉn jayajwat jeme icupʉjcapay Jesús, Dios iperdona̱tcʉs̈áj nu'pʉjʉn mal iwatcaway.

Jeme caje'jatway judíujat ipʉctsougap Espíritu Santu

⁴⁴ Mit Pedro imucotscʉs̈pnajate, Dios imoygʉs̈ Espíritu Santu pa nu'pʉjʉn jeme imaraugaway lo que inʉmway je'.

⁴⁵ Mit mingau mit Pedro judíujat jeme icupʉjcaway Jesús, mit nigu-épigʉjʉu ni'c Dios imoygʉs̈ Espíritu Santu pa jayajwat jeme caje'jatway judíujat.

⁴⁶ Mit imaraugau icótscaj en jatu'c ajwat, mit imaraugau igui-oyninʉ́mga Dios.

⁴⁷ Mit cʉs̈ Pedro inʉmgʉs̈au: —¿Pʉn i-atujcʉs̈áj ayʉ̱́jat maganinʉ'gutémgʉjʉ? ni'c je'jat ipʉctsougawey Espíritu Santu as̈am ʉjtsat nas̈pʉctsóugaj.

⁴⁸ Mit je' imanda̱tcʉs̈ ma ninʉ'gutémgʉjʉ inʉ'jyni'c Jesucristu. Mit cʉs̈ inʉmgajau Pedro ma tan una̱c s̈ʉjwat mit je'jat.