Hebreos 6 - Popoluca Sayula New Testament

¹ Jemni'c nasiguiá̱tca pa jʉpm pa napíchinga oy mit Dios, mit itp ti nas̈yajcawa'n lo que napʉctajnʉ'jcaway cuandu nas̈-is̈cápcaj Cristu, mit nagamechpacchú̱chiga nije'yu ama̱s̈an. Jemni'c tʉgajanʉmgʉs̈ap jeme injawiganupay. Jinap incuyaguigaway ayé mal jeme caservia̱tway mit incupʉjcau Dios.

² Mit is̈ajque's̈cajau tu'c ama̱s̈an pi ninʉ'gutemgʉjʉ, mit is̈yajcajau icʉ'jat na'waywájat, is̈nʉmgajau ni'c jutucta̱jcáj á̱nimajat, mit is̈nʉmgajawey ni'c Dios juzga̱táj, mit lo que inʉmpay Dios tamp pa siempre.

³ Mit nasiguia̱tcáj pa jʉpm mit Dios, ni'c je' nas̈majyigap.

⁴ Mit una̱c jayajwat caja-oyáj inamjátca ni'c icuyaguigaway lo que icupʉjcaway. Ni'c i-is̈capcaway ayé oyway noticia, iproba̱tcaway ni'c oy lo que iyacpay Dios, mit ipʉctsougau Espíritu Santu.

⁵ Mit iproba̱tcawey ni'c oy ayé palabra iyacpay Dios, mit ijawigau ni'c Dios i-ajque's̈áj ipoder en ayé tiempu mi'námpay.

⁶ Mit como icuyaguigau ayé icupʉjcaway, nunca caja-oyáj inamjátca pa iguiyajcawa'natu ima̱lway to̱jwat, ni'c ayé jayajwat je'jatu ipensa̱tcap iguiyajcawa'natu Dios iway cunu̱s̈ni'c, mit por je'jat itucotscap Cristu.

⁷ Ni'c ayé as̈am na̱s̈ cuandu ica'u tu̱, i-acs̈o'cp oymanac, mit i-acs̈u̱mp nu'pʉjʉn cosecha ojyatway pa jeme iyos̈watcajapay, ni'c Dios ibendiciona̱t ayé na̱s̈.

⁸ Po te ayé na̱s̈ iyacp puru apit mit po'pwa̱tsan, ayé caservia̱tp, mit Dios imaldiciona̱táj, mit no'ctíninic icʉs̈cawa'n ayé.

Na-atsʉ̱ngap ayé premiu

⁹ Po mijchat tʉwangʉs̈pay, maja tʉs̈nʉmwa'naj we'n, tʉtsʉ̱ngap seguru ni'c mijchat ingawatcáj we'n ni'c mitsʉ̱nganup salva̱tic.

¹⁰ Ni'c Dios caje' as̈am maljayajwat. Je' iganijawiyo'tp lo que inwatcapay, ni'c inwangajap ijayajwat as̈amu is̈wánga je', ni'c inmajyigajau ijayajwat mit ayé inwatcap hasta jinap.

¹¹ Mit tʉnwangap cada jayau mam mijchat ma cuji'cs̈i más pa isiguia̱twa'n mit Dios, pa we'n tsʉ̱náj seguru pa iguipʉctsowa'n lo que i-atsʉ̱napay.

¹² Mit camcucandʉ'niga, más oy pi watca as̈am jeme ipʉctsougaway ayé promesa iyacway Dios. Je'jat ipʉctsougau ayé promesa ni'c cupʉjcau mit i-atsʉ̱ngau mit calma.

¹³ Ni'c cuandu Dios iguiyájcaj promesa Abraham, Dios je'yu jura̱t ni'c ca-itu jatu'c más mʉjninʉmicway inʉ'jutámpay.

¹⁴ Inʉm Dios: “Iyacs̈ta'cway mi̱ tʉbendiciona̱táj may, mit tʉmo'áj pi aguep may infamiliajat.”

¹⁵ Mit como Abraham i-atsʉ̱nau mit may calma, ipʉctso̱u ayé promesa iyacway Dios.

¹⁶ Ijura̱tcawa'n jayajwat, inʉ'jutcap tu'c más mʉjninʉmicway, mit je'jat jura̱tcap pa ma cʉs̈ nu'pʉjʉn tsuguin, mit itp ti icumplia̱twa'n.

¹⁷ Dios iyajcʉs̈au tu'c promesa ijayajwat, mit iwan ma jawiga ni'c je' icumplia̱táj ipromesa, mit catigatsp lo que je' inʉmpay, jemni'c je'yu ijura̱t pa ma jawiga ni'c pichináj iyacs̈ta'cway.

¹⁸ Mit ayé promesa mit ayé juramentu catigatscap ni'c Dios ca-oyap iwe̱t. Jemni'c na-aguepcap tu'c mʉjway consuelu ni'c Dios nas̈actsʉ̱ngap seguru, mit na-atsʉ̱ngáj ayé premiu iyagámpay Dios pa ʉjtsat.

¹⁹ Mit como na-atsʉ̱ngap ayé premiu, jinap natsʉ̱ngap mʉgʉc mit Dios ni'c je' nas̈actangap. Mit jinap oyap nas̈cutómiga Dios as̈am ámbanu ayé mʉjpa̱nijat iguicutómigaj Dios cuandu itʉ́gʉygaj templutujugum.

²⁰ Po en ayé lugar tsajpni'cway mam itsʉ̱na Dios, tʉgʉjyʉ'c Jesús pa ʉjtsat natʉgʉygawa'ney. Mit je' tʉgʉy pa itanwa'n meru mʉjpa̱nij pa siempre, as̈am itajn mʉjpa̱nij Melquisedec.