Efesios 5 - Popoluca Sayula New Testament

Dios iluz

¹ Watca oy as̈am Dios iguiwat ni'c mijchat Dios is̈wajyat, mit je' is̈wangap.

² Siempre niwángʉjʉ as̈am Cristu nas̈wangau mit iyac ivida pa i-o'cwa'n pa nama̱jlat, mit i-acji'jcau Dios ijo̱jt.

³ Nepʉn maganʉm ni'c michajyo'ygap, maganʉm ni'c inwatcap mal ne maganʉm ni'c inwangap jayje', po mijchat oy pi yo'yga as̈am Dios ijayajwat.

⁴ Camtʉ'tscotscayu, camnʉmga tonteríajat, cam-i̱jcotsca mit ma̱jlat, ni'c ayé cosajat caservia̱tp. Más oy nanʉmí̱jcaja Dios ni'ctiyu̱s̈.

⁵ Injawigap ni'c itp chajyo'ypajyat, malwatpajyat, mit jeme iwangapay jayje'. Jeme iwangapay jayje' ayé as̈am tiyu̱s̈wampajyat ni'c iyajcap menus Dios. Jayajwat as̈am aye'jatway igapʉctsougáj neti mam imanda̱tca Dios mit Cristu.

⁶ Pi is̈cawe̱jta̱jcac nepʉn mit nejʉmay we̱t, ni'c Dios icastiga̱tcʉs̈áj jeme cajayaumaygapay ni'c iwatcap ayé mal cosajat.

⁷ Mijchat cammutʉgʉyga ayé maljayajwat.

⁸ Ambanu miyo'ygau mal, mit ayé mal as̈am tu'c chitimic, po jinap inmutʉgʉygau el Señor mit je' is̈moygap luz pa inyo'ygawa'n yacs̈ic, yo'yga as̈am jeme iwangapay ayé luz iyacpay Dios.

⁹ Ni'c Espíritu Santu nas̈actuwatcap nu'pʉjʉn cosa oyway, mit nas̈acyo'ygap yacs̈ic mit nas̈actunʉmgap lo que iyacs̈ta'cway.

¹⁰ Mit oy pi jawiga ti ayé iwampay el Señor.

¹¹ Mit cammunipʉjcʉjʉ jeme yo'ygapay mal ni'c caservia̱tp lo que iwatcapay, mejor actujáwiga ni'c iwatcap mal.

¹² Ni'c tu'c winchu̱jc nas̈nʉmwa'n lo que je'jat iwatcapay anu'mu.

¹³ Te na-actujawigap ayé mal iwatcapay, cuque's̈áj lo que iwatcapay anu'mu, ni'c mam i-it luz, que's̈p nu'pʉjʉn cosajat itpay.

¹⁴ Jemni'c iguinʉm ayé dichu: Nigujútujcʉ te mima̱p, jutucta'c te mitsʉ̱nap as̈am o'guic, mit Cristu is̈mo'áj luz.

¹⁵ E'pca nat inyo'yga. Camyo'yga as̈am jayajwat iga-is̈capcapay neti, po yo'yga as̈am jeme i-is̈capcapay.

¹⁶ Aprovechá̱tca cada s̈ʉjw pa is̈watcawa'n oy, ni'c jinapay s̈ʉjwat malo'c imi'n.

¹⁷ Jemni'c camyo'yga as̈am igajawigapay neti, más oy pi jawiga ti ayé iwampay el Señor.

¹⁸ Cam-u̱ctupʉjca ni'c oyap is̈watca nu'pʉjʉn mal, más oy Espíritu Santu ma tsʉ̱na mʉgʉc injo̱tni'jcat.

¹⁹ Cuandu intsʉ̱ngawa'n apʉcmuguic, cótsca salmujat, ʉ́uga himnujat mit ʉ́uga jeme Espíritu Santu is̈moygámpay injo̱tni'jcat. Ʉugaja mit oyninʉ́mga el Señor mit nu'pʉjʉn injo̱jtat.

²⁰ Nʉmí̱jcaja Dios Nate̱jat ni'ctiyu̱s̈ pa nu'pʉjʉn cosajat ni'c incupʉjcap el Señor Jesucristu.

Nijayaumáygʉjʉ

²¹ Nijayaumáygʉjʉ minu'pʉjʉjnat ni'c impʉ̱tcap Dios.

²² To's̈ajyat ma jayaumayga ina'jwat as̈am iguijayaumáyga el Señor.

²³ Ni'c as̈am nacopac iguimanda̱t nu'pʉjʉn nacuerpu, we'ney tu'c jayau iguimanda̱twa'n ito's̈ay, mit we'ney Cristu iguimanda̱t icupʉcpajyat ni'c je'jat as̈am Cristu icuerpu, mit Cristu ayé iguisalva̱tcaway.

²⁴ Mit as̈am cupʉcpajyat iguijayaumáyga Cristu, we'ney to's̈ajyat ma jayaumayga nu'pʉjʉn inʉmgámpay ina'jwat.

²⁵ Jayajwat, wanga into's̈ajyat as̈am Cristu iguiwa'n icupʉcpajyat, mit iyac ivida pa je'jat.

²⁶ Ni'c Cristu iwan nas̈je'jatcáj, mit nas̈chi'tcajau nama̱jlat as̈am nas̈limpia̱tcapay mit nʉ' ni'c nacupʉjcajau ipalabra.

²⁷ Mit Cristu iwamp ʉjtsat nacupʉcpajyat naque's̈ta̱jcawa'n oymanac mam je'. Jinap naganimanchá̱tcʉjʉ mit ma̱jlat, natsʉ̱́nga as̈am tu'c jamuc cajo'ptucta'guicway, ne naganijíngʉjʉ mit nejʉmay cosa, nayo'yga limpiu.

²⁸ Mit jayajwat ma cuida̱tca ito's̈ajyat as̈am iguicuidá̱tca je'jatu icuerpujat. Jeme iwampay ito's̈ay, ayé as̈am je'yu niwajnʉpay.

²⁹ Ni'c nepʉn iga-amp je'yu icuerpu, siempre tu'c jayau icuida̱tp icuerpu mit cayan mit jamuc. Wename-ey Cristu iguicuida̱t icupʉcpajyat.

³⁰ Ni'c ʉjtsat nacupʉjcapay natsʉ̱ngap as̈am Jesús icuerpu, as̈am is̈is̈ mit ipajcat, ni'c namutʉgʉygau je'.

³¹ “Jemni'c tu'c jayau iyagáj ite̱t mit ima̱m pa iguipʉcwa'n ito's̈ay, mit ayé inimechcatij jatcáj as̈am tu'gu.”

³² Mʉjo'c lo que Dios nas̈actujawigapay, mit tʉs̈jawi ayé inʉmo'jcʉp ni'c Cristu tsʉ̱nap as̈am tu'gu mit icupʉcpajyat.

³³ Mit inʉmo'jcʉpey ni'c cada jayau mam mijchat ma wa'n ito's̈ay as̈am je'yu iniwajnʉ, mit tu'c to's̈ay ma jayaumay ina'u.