Efesios 1 - Popoluca Sayula New Testament

Pablo isaluda̱tcʉs̈p Efesojatway

¹ Ʉ̱ Pablo. Jesucristu tʉs̈ajyu't pa apóstol ni'c we'n iguiwajn Dios. Tʉnja'ygʉs̈ap Dios ijayajwat jeme tsʉ̱ngapay nʉ'jcopac Efeso. Mijchat incupʉjcap Cristu Jesús mit inmutʉgʉygau je'.

² Dios Nate̱jat mit el Señor Jesucristu pi is̈moygac favor mit paz.

Natsʉ̱ngap oy mit Cristu

³ Na-oyninʉ́mga Dios, el Señor Jesucristu ite̱t. Dios nas̈watcajap oy ni'c namutʉgʉygau Cristu, mit nas̈moygap nu'pʉjʉn cosa ojyatway najo̱tni'jcat as̈am natsʉ̱nganupay mit je' tsajpni'c.

⁴ Antes iguiwajt ayʉ̱́j mundu Dios nas̈cupiugau mit jinap namutʉgʉygap Cristu. Nas̈cupiugau pa nayo'ygawa'n limpiu mit pa nagatsʉ̱nga culpa̱tic cuandu ijuzga̱twa'n Dios.

⁵ Dios nas̈wangau mit nas̈cupiugau desde ámbanu pa nas̈wayjatcáj. Iwat we'n ni'c Jesucristu o'c pa ʉjtsat, mit nas̈cupiugau ni'c we'n iguiwajn.

⁶ Jemni'c nas̈-oyninʉ́mga Dios ni'c je' nas̈wano'jcau. Dios nas̈wangap ni'c namutʉgʉygaway Cristu jeme Dios iwampay.

⁷ Cristu nas̈salva̱tcau ni'c je' o'c cunu̱s̈ni'c pa ʉjtsat, mit jinap perdona̱tic itsʉ̱na nu'pʉjʉn mal nawatcaway, ni'c je' nas̈wano'jcap.

⁸ Dios nas̈moygap may favor ni'c nas̈actujawigap mit nas̈actu-is̈capcap nu'pʉjʉn.

⁹ Dios nas̈actujawiganup lo que je' iwanway iguiwatwa'n, mit jayajwat igajawigapate ti ayé. Iwat we'n ni'c iwan nas̈actujawigáj, mit inʉm ámbanu ni'c i-ajyu'táj Cristu.

¹⁰ Mit Dios icumplia̱táj nu'pʉjʉn icojawa'n ayé tiempu, mit iyagáj Cristu pa iguimanda̱twa'n nu'pʉjʉn jeme tsʉ̱ngapay tsajpni'c mit na̱s̈ni'c, pa we'n Cristu imanda̱táj pareju nu'pʉjʉn.

¹¹ Napʉctsougáj nu'pʉjʉn lo que Dios ijtʉpay pa ʉjtsat ni'c namutʉgʉygau Cristu. Dios nas̈cupiugau ámbanu as̈am je' iguipensa̱jt, ni'c Dios iwatp lo que je' iwampay.

¹² Dios iwat wename pa ʉjtsat tʉmʉjninʉ́mga je', mit ʉjtsat primeru tʉnmutʉgʉygau Cristu.

¹³ Jinap mijchat inmutʉgʉygawey Cristu ni'c inmaraugau ayé palabra jeme iyacs̈ta'cway, mit ayé oyway noticia is̈actujawigau nat inyisalva̱tcʉjʉwa'n. Mit is̈cupʉ́jcaj Cristu, mitangau sella̱tic ni'c Dios is̈je'jatcau, jemni'c je' is̈moygau Espíritu Santu jeme je' iprometia̱tway.

¹⁴ Dios nas̈mojyʉ'jcau ayé Espíritu Santu pa najawiga ni'c iyacs̈ta'cway napʉctsougáj nu'pʉjʉn lo que nas̈prometia̱tcajaway. Mit cojáj tiempu cuandu Dios nas̈tu'mbaclibra̱tcáj ni'c ʉjtsat nas̈je'jat. Dios iwatáj we'n pa nu'pʉjʉn jayajwat ma oyninʉmga je' ni'c je' mʉjninʉmic.

Ayé Espíritu jeme nas̈actujawigapay

¹⁵ Tʉnmarau ni'c incupʉjcap el Señor Jesús mit inwangap nu'pʉjʉn Dios ijayajwat,

¹⁶ jemni'c tʉgatentamp tʉs̈nʉjma Dios ni'ctiyu̱s̈ por mijchat, mit tʉnijawigʉs̈p cuandu tʉs̈-ora̱jta Dios.

¹⁷ Tʉnyo'jtap Dios, el Señor Jesucristu ite̱t, ni'c je' más mʉjninʉmic. Tʉnyo'jtap pi is̈actujawigac más, pa más is̈-is̈capcawa'n Dios.

¹⁸ Tʉnyo'jtap Dios pi is̈actujawigac más claru ni'c je' is̈ya̱s̈cau pa is̈atsʉ̱ngawa'n lo que je' nas̈moygámpay, ni'c Dios ijtʉp nu'pʉjʉn, mit ayé iprometia̱t pa iguimoygʉs̈wa'n ijayajwat.

¹⁹ Pi jawiga-ey ni'c Dios mʉjo'c mit ʉjtsat nacupʉjcapay, mit je' ito'jcʉp poder mit oyap iguiwat nu'pʉjʉn.

²⁰ Dios i-ajque's̈ ipoder cuandu igui-acjutucta̱jc Cristu mam itsʉ̱nga á̱nimajat, mit i-acnitsʉ̱nda̱jcʉu i-oyimaycʉ'ni'c jem tsajpni'c.

²¹ Mit iyac Cristu ma manda̱t. Je' más manda̱tp que nu'pʉjʉn ángejlat jeme manda̱tcapay tsajpni'c, mit je' ipoder nepʉn igacojyap. Cristu manda̱tp jinap mit we'ney en ayé tiempu mi'námpay.

²² Mit Dios iyac nu'pʉjʉn cosajat Cristu ita'mpa'tm, mit imoy je' ma manda̱tcʉs̈ nu'pʉjʉn Dios icupʉcpajyat.

²³ Mit as̈am nacopac iguimanda̱t nacuerpu, wename-ey ayé cupʉcpajyat as̈am Jesús icuerpu ni'c je' imanda̱tcʉs̈p, mit je'jat Cristu igui-actsʉ̱ngap nu'tsic, mit Cristu tsʉ̱nap jʉmba'tu, mit tsʉ̱napey mit ijayajwat.