2 Corintios 1 - Popoluca Sayula New Testament

Pablo ija'ygʉs̈ap Corintojatway

¹ Ʉ̱ Pablo. Jesucristu tʉs̈yac pa apóstol ni'c we'n iguiwajn Dios. Ʉ̱ mit hermanu Timoteo tʉnja'ygajap Dios icupʉcpajyat tsʉ̱ngapay Corinto mit we'ney nu'pʉjʉn Dios ijayajwat tsʉ̱ngapay nu'pʉjʉn laj Acayajway na̱s̈.

² Dios Nate̱jat mit el Señor Jesucristu pi is̈moygac favor mit paz.

Nat iguitunas̈ Pablo

³ Na-oyninʉ́mga Dios, el Señor Jesucristu ite̱t. Dios Nate̱jat nas̈-ayo̱wis̈cap mit je' siempre nas̈consola̱tcap.

⁴ Dios nas̈consola̱tcap cuandu nas̈tunas̈ca, pa ma oya-ey ʉjtsat nas̈consolá̱tca jeme itunas̈capay, mit naconsola̱tcáj as̈am Dios nas̈consola̱tcap.

⁵ Ni'c ʉjtsat natunas̈cap as̈amu Cristu iguitunas̈, mit we'ney Dios nas̈consola̱tcap mayo'c ni'c namutʉgʉygau Cristu.

⁶ Mit te tʉntunas̈cap, ayé pa mijchat pi tsʉ̱nga consola̱tic mit pi tsʉ̱nga salva̱tic. Mit te Dios tʉs̈consola̱tcap, ayé pa ma is̈consola̱tcaguey mit ma is̈salva̱tcac. Pa we'n inmajmoygáj is̈tunas̈ca as̈am ʉjtsat tʉs̈majmóyga tʉs̈tunas̈ca.

⁷ Tʉconfia̱tcap mayo'c mit mijchat. Tʉnjawigap ni'c te intunas̈cap as̈am ʉjtsat, wename-ey Dios is̈consola̱tcáj as̈am ʉjtsat tʉs̈consola̱tcap.

⁸ Hermanujat, tʉnwangap pi jawiga nat tʉs̈tunás̈caj Asiajway na̱s̈, ni'c tʉntunas̈cau mayo'c hasta tʉngamajmoygawu mit tʉngajawigawu te tʉ-o'jcáj.

⁹ Mit tʉmpensa̱tcau ni'c tʉ-o'jcáj po tʉs̈jatcau we'n pa tʉganiconfiá̱tcʉjʉ ʉjtsatu, mejor tʉconfiá̱tca mit Dios jeme i-acjutucta̱jcʉs̈pay á̱nimajat.

¹⁰ Mit Dios tʉs̈libra̱tcau pa tʉga-o'jca feo mit tʉtsʉ̱ngap seguru ni'c je' siguia̱tp tʉs̈libra̱tcap.

¹¹ Is̈majyigapey ʉjtsat ni'c is̈-ora̱tcajap. Mit te mayo'c jayajwat tʉs̈-ora̱tcajap, we'ney mayo'c jayajwat inʉmgajáj Dios ni'ctiyu̱s̈ ni'c je' tʉs̈moygap may favor.

Pablo jego'c hasta inʉjcs̈ Corinto

¹² Tʉnjawigap ni'c tʉnwatcap oy, jemni'c iji'c tʉnjo̱jtat, ni'c tʉyo'ygap oy mit tʉnwatcap lo que iyacs̈ta'cway mam Dios tʉs̈-e'pcap. Tʉngawatcap as̈am jayajwat iguipensa̱tca po Dios tʉs̈majyigap pa tʉyo'yga oy en ayʉ̱́j mundu, mit wename-ey tʉniportá̱tcʉjʉj mit mijchat.

¹³ Nu'pʉjʉn cosa tʉja'ygajapay, mijchat oyap is̈cotsca mit oyap is̈-entendia̱tca, mit tʉnwamp pi entendia̱tca oy.

¹⁴ Mit jinap in-entendia̱tcap tu'c parte. Injawigap ni'c oyap is̈-oyninʉmgap ʉjtsat, mit ʉjtsat oyap tʉ-oyninʉ́mga mijchat hasta ayé s̈ʉjw imi'nwa'n el Sénor Jesús.

¹⁵ Mit como naniconfia̱tcʉjʉp, tʉnwanate tʉnas̈wa'n mechpac jaran mam mijchat pa ma ji'jca-atu injo̱jtat.

¹⁶ Mit tʉnwanate tʉnas̈ʉ'cwa'n mam mijchat tʉnʉjcs̈ pa Macedonia, mit tʉpitucnuwa'n Macedonia tʉnas̈ájatu mam mijchat, pa we'n mijchat nʉs̈ájate is̈yacta̱jcap pa Judeajway na̱s̈.

¹⁷ Mit como tʉngawatu we'n ¿is̈jawiga tʉntigatsí̱cp lo que tʉnyʉmpay? ¿Is̈jawiga tʉmpensa̱tp as̈am tu'c maljayau inʉmpay jo̱ mit ca̱j?

¹⁸ Dios inʉmp iyacs̈ta'cway, mit ʉjtsat we'ney tʉganʉmgajap jo̱ mit ca̱j.

¹⁹ Ʉ̱, Silvano mit Timoteo tʉnyʉmdacyo'ygau pi cupʉjca Jesucristu Dios iway, mit Jesucristu iganʉmp jo̱ mit ca̱j, po je' siempre inʉmp iyacs̈ta'cway.

²⁰ Ni'c Cristu icumplia̱t nu'pʉjʉn iprometia̱tway Dios, mit jemni'c ʉjtsat nanʉ́mga ni'c iyacs̈ta'cway lo que iwatway Cristu, pa Dios ma tsʉ̱na oyninʉmic.

²¹ Mit Dios tʉs̈moygap maj mit mijchat we'ney ni'c namutʉgʉygau Cristu, mit Dios nas̈yajcau pa nayos̈wátca pa je'.

²² Mit Dios nas̈je'jatcau mit je' nas̈moygau Espíritu Santu najo̱tni'jcat, mit je' nas̈actujawigap ni'c napʉctsougáj nu'pʉjʉn cosa oyway tsajpni'c.

²³ Mit tʉnyo'jtap Dios ma tan as̈am testigu ni'c je' ijawip ni'c tʉnyʉmp iyacs̈ta'cway, tʉganinʉs̈patu Corinto ni'c tʉngawanu tʉche'cta̱jcʉs̈wa'n mʉgʉc.

²⁴ Mit tʉga-obliga̱tcáj pi cupʉjca más ni'c mijchat micupʉjcanup mʉgʉc, po tʉnwamp tʉmajyigʉs̈wa'n pa ma ji'jca injo̱jtat.