Markus 14 - Buku Tomoroli' Pojanci to Bo'u

Totu'a to Yahudi mohawa' mpatehi Yesus

¹ Ro'eo-damo rata-mi Eo Paskah pai' Posusa' Roti to uma Raragii. Imam pangkeni pai' guru agama bula-ra mpali' akala-ra mpolede Yesus bona rapatehi bongo-i.

² Ra'uli': ”Aga neo' ulu tababehi nto'u eo bohe, nee–neo' mpai' bara' ntodea.”

Hadua tobine mpotuai Yesus hante langa honga

³ Nto'u Yesus hi ngata Betania, hilou-i hi tomi hadua tauna to rahanga' Simon topohaki' poko'. Bula-na hi ree, rata hadua tobine ngkeni hameha' butolo' ihia' lana honga to masuli' lia oli-na, to rababehi ngkai rali' kaju to mohonga. Bula-na Yesus ngkoni', tobine toei mpopengka butolo' toe pai' natua hi woo' Yesus bona mpobila'-i.

⁴ Ba hangkuja dua to hi ree, moroe-ra mpohilo napa to nababehi tobine toei. Momepololitai-ramo ra'uli': ”Napa-mi-hawo kalaua-na lana honga rakerei mara hewa toe!

⁵ Ke agina lau-pi-hawo rapobalu' nte oli tolu atu labi doi pera', pai' doi oli-na rawai'-raka tokabu.” Toe pai' moroe-ra mpokaroe tobine toei.

⁶ Na'uli' Yesus mpo'uli'-raka: ”Pelele' moto-i-hana. Napa pai' nipedahi nono-na? To nababehi hi Aku' toe-le, lompe'.

⁷ Apa' tokabu-hana, ria oa'-ra dohe-ni. Ane dota-koi ntulungi-ra, ria oa' loga-ni. Aga Aku', uma-a mpai' ria oa' dohe-ni.

⁸ Tobine toei mpobabehi napa to nakule' mpobabehi. Natuai-a hante lana honga mporodo ami'-mi woto-ku hi karatana-ku mpai', kako'ia-na rata tempo-na.

⁹ Mpu'u ku'uli'-kokoi: hi humalili' dunia', hiapa–apa Kareba Lompe' rapalele, napa to nababehi tobine toei bate ralolita, uma mpai' ralipo'–lipo'.”

Yudas mopatuju mpobalu' Yesus hi bali'-na

¹⁰ Nto'u toe, hadua ngkai ana'guru-na to hampulu' rodua, to rahanga' Yudas Iskariot, hilou hi imam pangkeni, mpo'uli'-raka patuju-na mpobalu' Yesus hi hira'.

¹¹ Goe'-ramo mpo'epe patuju-na toe, pai' rajanci-ki rawai'-i doi. Ngkai ree, Yudas mpopali' loga to lompe' mpobalu' Yesus hi bali'-na.

Yesus ngkoni' Posusa' Paskah hangkaa–ngkania hante ana'guru-na

¹² Rata-mi eo to lomo'-na hi Posusa' Roti to Uma Raragii, nto'u bima Paskah rasumale'. Nto'u toe, ana'guru-na Yesus mpo'uli'-ki: ”Hiapa-kai mporodo pongkoni' Paskah to takoni'-e mpai'? Hiapa konoa-nu?”

¹³ Yesus mpohubui rodua ana'guru-na, na'uli'-raka: ”Hilou-mokoi hi rala ngata. Ria mpai' to mpohirua'-kokoi hadua tomane to ngkeni pontomua'-na oti ntomu'. Tuku'-imi.

¹⁴ Ane mesua'-i hi rala tomi, uli'-ki pue' tomi: ’Na'uli' Guru: Hiapa-kuwo pobabehia-ku Posusa' Paskah hante ana'guru-ku?’

¹⁵ Pue' tomi toe mpai' mpotudo'-kokoi hameha' kamar to hi lolo-na to bohe. Kamar toe teporodo ami'-mi, hono'-mi rewa-na. Hi retu-mokoi mpai' mporodo-taka pongkoni' Paskah-ta.”

¹⁶ Hilou mpu'u-ramo ana'guru-na to rodua toera mesua' rala ngata. Rarata mpu'u-mi hewa to na'uli'-raka, pai'-ra mporodo-mi pongkoni' Paskah.

¹⁷ Mobengi-mi, rata-imi Yesus hante ana'guru-na to hampulu' rodua.

¹⁸ Bula-na mohura ngkoni', na'uli'-mi: ”Pe'epei-koi: Ria hadua ngkai koi', to ngkoni' hante Aku' toe lau, to mpobalu'-a mpai' hi bali'-ku.”

¹⁹ Mpo'epe tohe'e, kapeda'-nami nono-ra ana'guru-na, pai' mepekune'-ramo hadua bo hadua hi Yesus, ra'uli': ”Bela-hawo aku' to nutoa'-e Pue'?”

²⁰ Na'uli' Yesus: ”To mpobalu'-ale, hadua ngkai koi' to hampulu' rodua tohe'i-e, to mpodulu'-ka.

²¹ Makono mpu'u, Aku' Ana' Manusia' bate mate hewa to ralowa hi rala Buku Tomoroli'-e. Aga mpe'ahii' tauna to mpobalu'-a tetui. Ke lompe' lau-pi ane uma-i na'ote tina-na.”

Yesus mpobagi roti pai' anggur hi ana'guru-na

²² Bula-ra ngkoni', na'ala'-mi Yesus roti pai' naposampayai, mpo'uli' tarima kasi hi Alata'ala. Oti toe, napihe–pihe pai' natonu-raka, na'uli': ”Ala'-mi, koni'-mi. Toi-mi woto-ku.”

²³ Oti toe na'ala' wo'o sangkiri' to ihia' anggur, na'uli' tarima kasi hi Alata'ala pai' natonu-raka. Nginu omea-ramo ngkai sangkiri' toe.

²⁴ Na'uli'-raka: ”Toi-mi raa'-ku to rabowo ane mate-a mpai' bona mpotolo' wori' tauna. Raa'-ku toi mporohoi pojanci to mpoposidai' Alata'ala hante manusia'.

²⁵ Mpu'u ku'uli'-kokoi: ntepu'u ngkai wae lau, uma-apa nginu anggur duu'-na rata tempo-na Alata'ala jadi' Magau' hi dunia'. Nto'u toe-damo mpai', pai' lako' ku'inu anggur to bo'u hi rala Kamagaua'-na.”

²⁶ Oti toe, morona'-ramo hanyala rona' pe'une'. Kahudu-ra morona', malai-ramo ngkai ngata hilou hi Bulu' Zaitun.

Yesus mpolowa pancapu-na Petrus

²⁷ Na'uli' Yesus mpo'uli'-raka ana'guru-na: ”Hawe'ea-ni mpai', molengo pepangala'-ni hi Aku', apa' ria te'uki' Lolita Alata'ala to mpo'uli' hewa toi: ’Kupatehi topo'ewu toei, alaa-na bima-na pagaa'–gaa'-ramo.’

²⁸ Aga ane tuwu' nculii'-apa mpai', meri'ulu-a hilou hi tana' Galilea, bona hirua' hi ria-ta-damo mpai'.”

²⁹ Na'uli' Petrus: ”Nau' hawe'ea tauna molengo pepangala'-ra hi Iko Pue', aku' uma!”

³⁰ Na'uli' Yesus: ”Mpu'u ku'uli'-koko: Bengi toe mpai' lau, kako'ia-na turua' manu' karongkani-na, mpolia' tolu ngkani-moko mposapu kanu'inca-ku.”

³¹ Aga hangkedi' kanaperohoi-na Petrus lolita-na, na'uli': ”Nau'-a mate hangkaa–ngkania dohe-nu, uma mpu'u kusapu kaku'inca-nu!” Wae wo'o-rawo lolita-ra ana'guru-na to ntani'-na.

Yesus mosampaya hi Getsemani

³² Rata-ramo hi pampa to rahanga' Getsemani. Hi ree na'uli' Yesus mpo'uli'-raka ana'guru-na: ”Koi', mohura hi rei-mokoi mpopea-a, bula-ku hilou mosampaya.”

³³ Aga Petrus, Yakobus pai' Yohanes nabawai hilou dohe-na. Nto'u toe pepa-mi na'epe pai' mokaratu-mi nono-na.

³⁴ Na'uli'-raka: ”Susa' lia nono-ku, hewa to neo' mate-ama ku'epe. Rehe'i-mokoi ulu mojaga.”

³⁵ Oti toe, hilou-imi molaa hangkedi', pai'-i motumpa hi tana' mosampaya. Rala posampaya-na merapi'-i bona ane ma'ala uma-i-hawo mporata kaparia toe.

³⁶ Na'uli': ”Tuama-ku! Uma ria to uma majadi' ane Iko Mama mpo'uli'. Wi'iha-ka-kuwo kaparia to neo' mporumpa'-a toi. Aga bela konoa-ku Aku' to jadi', agina konoa-nu Iko moto.”

³⁷ Oti toe, nculii'-imi hi ana'guru-na to tolu, narata-ra bula-ra leta' moto. Na'uli' mpo'uli'-ki Petrus: ”Simon! Ba leta'-dako-konae! Hajaa-wadi uma nudadahi mojaga?

³⁸ Mojaga pai' mosampaya-mokoi, bona neo'-koi mporata pesori. Hi rala nono-ni dota moto-koi mpobabehi to makono, aga uma nidadahi apa' manusia' bate lente.”

³⁹ Ngkai ree, hilou wo'o-imi mosampaya. Posampaya-na toe hibalia hante posampaya-na to lomo'-na.

⁴⁰ Oti toe, nculii' wo'o-imi mporata ana'guru-na, leta' wo'o-ra-wadi apa' mopoke' rahi mata-ra. Nakehele-ra, aga uma-ra winihi apa' uma ra'incai ba napa to ra'uli'-ki.

⁴¹ Hilou wo'o-imi mosampaya katolu ngkani-na, pai' oti toe, nculii' wo'o-imi hi ana'guru-na, na'uli'-raka: ”Turu pai' leta' oa'-pada-koi? Naporae'-mi! Rata-mi tempo-na Aku' Ana' Manusia' rapobalu' pai' ratonu hi tauna to dada'a.

⁴² Memata-mokoi! Hilo, etu-imi tumai to mpobalu'-a. Kita-mi lou.”

Yesus rahoko' pai' ana'guru-na metibo'

⁴³ Bula-na Yesus mololita-pidi, rata mpu'u-imi Yudas, hadua ngkai ana'guru-na to hampulu' rodua. Pai' dohe-na wori' wo'o tau ntani'-na to ngkeni piho' pai' sumampu. Hira' toe rapahawa' imam pangkeni, guru agama pai' totu'a to Yahudi.

⁴⁴ Yudas mpo'uli' ami'-miraka tanda bona ra'inca kato'uma-nai Yesus, na'uli': ”Hema mpai' to ku'eki, Hi'a-mi. Hoko'-imi, keni-i hilou, jaga lompe'-i.”

⁴⁵ Jadi', karata-ra hi ree, kahilou-nami Yudas mpohirua'-ki Yesus, na'uli': ”Guru!” pai'-i na'eki ntuku' ada-ra to Yahudi.

⁴⁶ Katumai-rami tauna to wori' mpohoko' Yesus.

⁴⁷ Ngkai ree, hadua tauna to mokore mohu' Yesus mpowute' piho'-na natime-ki batua Imam Bohe, bela mpoholu tilinga-na.

⁴⁸ Na'uli' Yesus mpo'uli'-raka tauna to mpohoko'-i: ”Ha toperampaki-a toi-e, pai' mingki' tumai-koi ntali piho' pai' sumampu mpohoko'-ae!

⁴⁹ Butu eo-na ria moto-a dohe-ni hi Tomi Alata'ala metudui', napa pai' uma-a nihoko' nto'u toe? Aga tohe'i kana jadi', bona madupa'-mi to te'uki' hi rala Buku Tomoroli'.”

⁵⁰ Ngkai ree, metibo'-ramo hawe'ea ana'guru-na mpalahii-i.

⁵¹ Ria wo'o hadua kabilasa mpotuku' Yesus nto'u toe, motapui'-i-wadi hante abe' to bula. Ria-ra to doko' mpohoko'-i,

⁵² toe pai' naroncu-mi abe'-na, pai'-i metibo' molawa.

Yesus hi nyanyoa topohura bohe to Yahudi

⁵³ Ngkai ree, Yesus rakeni hilou hi tomi Imam Bohe. Hi ria, morumpu-ramo hawe'ea imam pangkeni, guru agama pai' totu'a to Yahudi to ntani'-na.

⁵⁴ Petrus metuku' ngkawao-wadi, duu'-na rata hi berewe tomi Imam Bohe. Hi ria mohura-i moneru dohe topojaga.

⁵⁵ Nto'u toe, imam pangkeni pai' hawe'ea topohura agama mpali' sabi' to mpakilu Yesus, bona ngalai' rahuku' mate-i. Aga uma raruai' sala'-na.

⁵⁶ Wori' moto sabi' to mpopakilu-i, aga uma hibalia lolita-ra.

⁵⁷ Ria ba hangkuja dua to mokore pai' to mosabi' boa', ra'uli':

⁵⁸ ”Tauna toii, ki'epe-i-kaina mpo'uli' hewa toi: ’Kugero Tomi Alata'ala to nawangu manusia', pai' rala-na tolu eo kuwangu to ntani'-na, to bela manusia' mpowangu.’ ”

⁵⁹ Hiaa' posabi'-ra toe, uma wo'o-wadi hibalia.

⁶⁰ Kamokore-nami Imam Bohe hi nyanyoa hawe'ea topohura, pai' na'uli'-ki Yesus: ”Ha uma nutompoi'-ra to mpakilu-ko toe-e?”

⁶¹ Aga Yesus, uma-i winihi, uma-i metompoi' nau' hamelaa. Hangkani-pi Imam Bohe mpekune'-i: ”Ha Iko mpu'u-mi Magau' Topetolo', Ana' Alata'ala to Moroli'?”

⁶² Na'uli' Yesus: ”Aku'-mi, pai' nihilo moto-a mpai', Aku' Ana' Manusia', mohura pai' moparenta hi mali ka'ana Alata'ala to Mobaraka', pai' nihilo wo'o-a mana'u tumai ngkai suruga hi rala limu'.”

⁶³ Mpo'epe toe we'i, Imam Bohe mpoheu' baju-na ngkai kamoroe-na, pai' na'uli': ”Uma-pi mingki' ria sabi'!

⁶⁴ Ni'epe moto-mi-koiwo lolita-na mpokedi' Alata'ala. Beiwa-mi-koiwo kabotu'-ni?” Hibalia-mi kabotu'-ra omea, ra'uli': ”Bate masala'-imile, kana rahuku' mate-i!”

⁶⁵ Ngkai ree, ria-ra to mpo'uelikui-i, ria wo'o to mpopo'ore'-i: rakaramuai lio-na, raweba'-i, pai' ra'uli'-ki: ”Ee nabi! Pe'uli' pe' ba hema to mpoweba'-koe!” Topojaga wo'o-hawo, mehopo' wo'o-ramo-rawo.

Petrus mposapu kana'inca-na Yesus

⁶⁶ Nto'u toe, Petrus hi berewe-pidi. Bula-na hi berewe toe, tumai hadua tobine topobago hi tomi Imam Bohe.

⁶⁷ Kampohilo-na Petrus moneru, nanaa-i pai' na'uli'-ki: ”Ba iko wo'o-di hadua doo-na Yesus to Nazaret toei-e mai?”

⁶⁸ Aga nasapu Petrus, na'uli': ”Uma ku'incai-i, pai' uma kupaha ba napa to nu'uli'!” Ngkai ree moderu'-imi hilou mohu' hi wobo' wala. Turua'-mi manu'.

⁶⁹ Pehilo wo'o-imi tobine toei, na'uli'-raka tauna to hi ree: ”Hi'a tetu wo'o-di doo-na Yesus toei-e mai.”

⁷⁰ Aga nasapu mperii wo'o-wadi Petrus. Uma mahae ngkai ree, tauna to mokore hi ree mpo'uli' wo'o-miki: ”Iko mpu'u-di doo-nae! Apa' to Galilea wo'o-ko-kowo.”

⁷¹ Kamosumpa-nami Petrus mpotuna' woto-na, na'uli': ”Uma mpu'u ku'incai tauna to ni'uli' tetui!”

⁷² Nto'u toe, turua'-mi manu' karongkani-na. Nakiwoi-mi Petrus lolita-na Yesus ngone to mpo'uli'-ki: ”Kako'ia-na turua' manu' karongkani-na, mpolia' tolu ngkani-moko mposapu kanu'inca-ku.” Kageo'-nami Petrus kaka'utu–utu.