RUTH 1 - SHEEYU BAIBEL (BSI)

Elimelech alia Puhvei Kihikha mainou Moab hi Tayu

¹ Chikuapei maitao nou nuh khoa buyu phaki, teidei sühisü tokaayu vere, südonou Judah teidei hinou Bethlehem teanou kuyu nuh hi hrüa buyu kihikha maili, puhvei khapfü alia nahpoutu ahai sa-a Moab teidei hisü taho hrütare.

² Puh zhih hai Elimelech toue, alia puh khapfü zhih hai Naomi toue, ae puh nahpoutu ahai zhihsü Mahlon ae Chilion touwe; puh kihikhamai hai Judah teidei Bethlehem nuh hinou Ephrath mai khüe, puletao nou Moab mai teidei hi ve hrüe.

³ Anah Noami khapu Elimelech hai thaitare, süthai honapai nou nahpoutu ahai sa-a sühinou hrüa bue.

⁴ Puh hainou Moab maipfüye naloue; maipfü ali zhih hai Orpah toue alia ali napai zhih hai Ruth touwe. Puletao hai po kirou phali koa hrüe,

⁵ Mahlon alia Chilion sü thaitare, süthai Naomi hai nahpoutu ahai sa-a puhvei khapu ha-a hrüe.

Naomi ae Ruth nou Bethlehem hi Dakhai Veyu

⁶ Süthaisü Naomi nou puh vei maitao hai Mapao nou pa thoudzü veishoa chiloushe touyu sülou khaie, puhnou puh mou ahai sa-a Moab teidei thao-a dakhai tare donou soudaloue.

⁷ Südonou honapai nou buyu buh hinou puhvei mou ahai ye sa-a Judah teidei hi dakhai tare donou tashu tare.

⁸ Ana Naomi nou puh mou ahai hisü paoe, “Ne hai lahpfü teidei hi dakhai tabaio, Ne hai nou thai tayu mai hi alia Eye veih shoa zhupeiyu büa, Mapao panou nehai yesü zhuvea peitheo.

⁹ Mapao panou ne haiye sü shanghi soupuloua nou hrüyu soulou theo.” Süthai Naomi nou puhai yesü mü mupeie, ae puhai nou shusoua krare.

¹⁰ Alia mouhai nou puh hisü paoe, “Moe, ahaia neye koa ne mai hisü dakhai talai.”

¹¹ Ana Naomi nou paoe, “Anahpai haire, nehai dakhai tabaio, daisounou nehai Eye koa talai touwe? E nahpoutu hrüpuloua pa nehaiye napulaihi tea chowu?

¹² Dakhai ta baio, anah haire, daiolouzü nehaiye khapu phoupeire donou E tsülere. E nou zhou khei nghiloua nahpoutu hrülouyuma,

¹³ nehai puh dupayu kholousü hiwu? Süsü khoa nehai nou nghisha soumoa bulousüo? Moe, anahpai haire, sühai soulouhoe. Nehai ye donou Ae levea shore, daiolouzü Mapao nou ahi aetou moyu bure.”

¹⁴ Süthaisü puhai nou paichia krapu khaire; alia Orpah nou puh nai yesü mümu peia lah kihi dakhai tare, ana Ruth louzü puhye taotei loua tabare.

¹⁵ Naomi nou puh hi paoe, “Ruth, ne chi-o lah mai hi dakhai tare alia lah vei rah hi dakhai tare. Ne-a puhye koa dakhai tabaio.”

¹⁶ Ana Ruth nou chila peie, “Eye panou neye thaowuso alia ne thaifü moa kihi dakhai tare donou soupeiso; daiolouzü nenou tayu buh hisü E-a talai, alia nenou buyu bu hisü E-a bulai; nevei maitao hai avei mai soulai, alia ne Ramai sü a Ramai soulai;

¹⁷ Nenou thaiyu buh hisünou E-a thailai, alia sühinou E-a daovulai. Athai moa nou E neye thaowua rata louzü Mapao panou Eye souvea peitheo.”

¹⁸ Honapai nou Naomi ye sata vuzülai touyu le lahlouyu ngaolou khaie, puhnou chilia paopu more.

¹⁹ Sübüa nou puh hai nou Bethlehem hi vere donou tare. Puh hai nou Bethlehem hi velouyu phaki nuh hi buyu mai hrülai nou ngaokhu pare alia naotu maitao nou haibüa paore, “Hainapai hai Naomi mowu?”

²⁰ Puhnou homaitao hi chila peie, “Eye ‘Naomi’ teanou kuso, ‘Mara’ teanou kupeio, daiolouzü Hali-hala soulousüo Puhnou Eye sü khayu peia baie.

²¹ Enou haihi thaowua tayu phaki, phoutao poa tae, anou Mapao nou Eye hazhia panou haihi dakhai ve baie. Ramai Mapao nou ahi veayu alia hakayu peia baie, daisounou Eye ‘Naomi’ teanou kukhai laige?”

²² Südonou Naomi nou Moab hinou puh mou, Moab pfüpai Ruth ye koa Bethlehem hi dakhai ve-e. Puh hainou Bethlehem hi veyu phaki, sühi buyu mai hai shithou va tare.