Proverbios 9 - El Nuevo Testamento Salmos y Proverbios

Ti kjuaxrexinkaon jína tꞌéye̱he̱ chojni

¹ Ti kjuaxrexinkaon jína mé éxi ijnko nkexro kjuíchꞌéna ndo̱e, la ko kjuíchꞌéna yato castillo kuènté ti nchia.

² La ko kjuasin ijnko kia la ikꞌuén iko tsochján, la kꞌóna ti vino tsíkjiko nkehe xraxé náxrjón la kjuákꞌekjen chritaón ti mesa.

³ La kꞌue̱tue̱hen tjan ti chojnichjin chꞌexín ixra̱ sátsji̱ chritaón ti ijna̱ imá noi itjen ti chjasin, la itsen tsꞌèya:

⁴ “Xrákira ntihi jahara chojni na̱xa̱ noahñara jína.” La ko ndáche tjan ti sin tjenka̱yáxinhña jína:

⁵ “Xrákira sintera la ko itsꞌira ti vino kjui̱tꞌána.”

⁶ Ti̱to̱héra ti kjualo̱nti̱ landá jína tsꞌejora la ko tsꞌájira ti nti̱a chónta kjuaxrexinkaon chaxín jína.

⁷ Ti chrókjuenduehé ti chojni nduáhya nixja la kjá jehó chrókꞌuándaxíha̱n sin, o̱ ti chrókjuenduehé chojni imá jie̱he la kjá tsjanoá sin ti jaha.

⁸ Chrokjuenduéhya ti chojni imá tꞌándaxíhan, ti náhí la imá tso̱nínkakohen sin ti jaha. Ícha jína chrókjuenduehé ti chojni nohe landá a̱ntsí tso̱tjua̱ha sin.

⁹ Tjinki̱tsa ti nkexro nohe la a̱ntsí tso̱nohe. Tjákohé ti nkexro jína la a̱ntsí tsꞌitja.

¹⁰ *Ti kjuaxrexinkaon jína la xránkíxixín ti tjikosayéheni Itꞌéni Díos; Ti choxián ti nkexro imá tjóá la tsochonta ti kjuaxrexinkaon jína.

¹¹ Ti tsjéyá ti kjuaxrexinkaon jína la tíha tsjajon itsjé ña̱o la ko itsjé nánó tsjakꞌe.

¹² Ti tso̱noha la tsꞌayéhé ti nkehe jína. A̱ndá ti tsꞌóna ijnko chojni tjate̱nkíhí la tíha tsjasótexián.

¹³ Ti kjualo̱nti̱ la éxi ijnko chojnichjin imá tꞌóyako la ko chji̱ñé nixja la noehña ninkehó,

¹⁴ tjetja̱xi̱n tjan ndója ndo̱e tjan o̱ tjakꞌetja̱xi̱n tjan ijnko silla chritaón ti ijna̱ imá noi kuènté ti chjasin.

¹⁵ Tꞌéye̱he̱ tjan ti chojni tꞌatsínka ti nti̱a, kjónté ixra̱ jína xritꞌejóxín sin,

¹⁶ la ndáchro tjan: “Xrákira ntihi chojni ndasoá noehña.” La ko ndáche tjan ti chojni tjenka̱yáxinhña jína:

¹⁷ “Ti ìnta̱ chrókueé la imá ixé, la ko ti nio̱tja̱ chrókjonte imó la a̱ntsí náxrjón.”

¹⁸ Kjánchó noehña sin kixin ntiha tjejó ti ncha̱kuén ti sin tsíkꞌen. Ti sin kꞌuéye̱he̱ tjan la ó tjejó sin nkaxehen ti tòye̱ ni̱nka tsꞌenxín chojni.