Proverbios 8 - El Nuevo Testamento Salmos y Proverbios

Tjetꞌèya ti kjuaxrexinkaon jína

¹ *¿Á jehya tjetꞌèya ti kjuaxrexinkaon ní? ¿Á jehya tjenixja itsen ti kjuaxrexinkaon jína ní?

² Éxi ijnko nkexro itjen chrínta nti̱a ti chjasin o̱ nko̱siñe nti̱a kixin jína tsꞌikon kaín chojni,

³ tíha mé tjetꞌèya ti ikon chjasin chjino ti puerta kuènté ti chjasin, ti tꞌixenxín chojni,

⁴ La ndáchro: “Janhan mé nixjahára kaínra, janhan mé tjénixja̱ha̱ kaín chojni.

⁵ Jahara ndasoára noehña ninkehó, chrókꞌuitjára tsjenka̱yáxinra jína; jahara chojni lo̱nti̱, chrókjuénka̱yáxinra jína.

⁶ Chrokuihínra ti nkehe tjetoan tsondáxrja̱n kixin kaín nkehe tsondáxrja̱n la nkehe ndoá.

⁷ Ti nkehe tsꞌaxrjexín irꞌua̱ la chaxín ndoá, kixin tóxrìnahña tsondáxrja̱n nkehe chaxínhña.

⁸ Kaín nkehe níxja la chaxín ndoá; ninkehó kjuachꞌia níxjahya.

⁹ Kaín ti nkehe níxja tienxín jína ti nkexro nohe. Ti sin nohe la tienxín kixin chaxín ti nkehe ndáxrja̱n.

¹⁰ A̱ntsí chrókóxríhanra ti itan tjákohára ke ti plata, la a̱ntsí chrókjuéyára kixin chrókónohara jína ke ti oro.”

¹¹ Kixin a̱ntsí sínkí ti kjuaxrexinkaon jína ke ti ixro̱ náxrjón tsjehe. Kohya íjnko nkehe chrókóyóhe̱ tíha.

¹² “Janhan éxi ti chojni chónta kjuaxrexinkaon jína la tjéki̱a̱n ti nkexro tjenka̱yáxin jína, la ko ó jína nona la ko tjénka̱yáxian jína nkexrín si̱tꞌa ixra̱.

¹³ Ti chojni tjikosáyehe Itꞌéni Díos la tóxrìe̱nhña ti nkehe jínahña; méxra̱ janhan la nínka̱konha̱n ti kjuahnke la ko ti ixri chojni nchejié a̱sén la ko ti nkehe náxrjónhña nixja chojni.

¹⁴ Méxra̱ janhan tjénka̱yáxian jína la ko tjánjua kjuaxrexinkaon jína, la ko jína tia̱nxia̱n kaín nkehe la ko chonta kaín kjuachaxin.

¹⁵ Ti kjuachaxin chonta janhan mé tꞌe̱to̱axín ti sin rey la ko janhan tjínki̱tsa ti sin tꞌe̱to̱an kixin jína tsꞌe̱to̱an sin.

¹⁶ Ti kjuachaxin kuénta̱na mé tꞌe̱to̱axín ti sin tꞌe̱to̱an, la ko janhan tjínki̱tsa kaín ti sin nchekito̱exín ijie̱ kixin ndoá sichꞌe sin ti ixra̱.

¹⁷ Janhan mé tjua̱ha̱ ti nkexro tjua̱na, la ko ti nkexro xritjeyá ti janhan mé tsꞌitja sin.

¹⁸ Ti nkehe tjete la ko ti kjuasàya la mé janhan tsjánjua, la ko ti nkehe tjete tsjeje̱hya.

¹⁹ A̱ntsí sínkí ti nkehe tso̱tja̱hára ke ti oro kjónté imá náxrjón, la ko a̱ntsí jína ti nkehe tso̱tja̱hára ke ti plata imá tjete.

²⁰ Janhan mé xria ti nti̱e ti sin ndoá tjenka̱yáxin la ko ti nti̱a jína.

²¹ Ti sin tjue̱he ti janhan mé tsotjaha̱ sin nkehe jína, la ko tso̱kaón ndo̱e sin ti nkehe tjete.

²² *Itꞌéni Díos mé kjuíchꞌéna chꞌan ti janhan, ti xránkíxixín kjuíchꞌéna chꞌan kaín nkehe.

²³ Janhan mé ti xránkíxixín kꞌóna, la xráxín itjén ti na̱xa̱ kꞌónahña chjasintajni.

²⁴ Ti na̱xa̱ kꞌónahña ti nda̱ñao imá ijié mé kꞌóna janhan la ko ti na̱xa̱ kohya nda̱río la ko ti sítꞌaxrje ìnta̱.

²⁵ Ti na̱xa̱ kjuákꞌehya ti ijna̱ la ko ti nte̱je̱ la xráxín kjuakꞌé.

²⁶ Ti na̱xa̱ kjuíchꞌénahña Itꞌéni Díos ti chjasintajni la ko ti nonte la ko ti inche chjasintajni la ó xráxín itjén janhan.

²⁷ A̱ndá ti ó kjuakꞌe Díos ti nka̱jní éxi ijnko ika ijié la ko kjuakꞌe ti nda̱ñao imá ijié la ó ntiha tjétsjaha̱.

²⁸ Kja̱xin ti kꞌóna ti itji̱ siín nka̱jní la ko ti kjuíchꞌéna Díos ti tjiá ìnta̱ la kja̱xin tjéntaxián janhan.

²⁹ Janhan kjuakꞌé ti kꞌuítuehen ti nda̱ñao kixin sátsjihya ókjé, la ko ti kjuákꞌe ti xránkíxixín ti chjasintajni.

³⁰ La ntiha kjuakꞌé janhan la kjuínki̱tsa ti ixra̱ la imá kóchána la ko kóxrìna kjuakꞌé ti itjen Díos.

³¹ Chàna itjén kixin ti chjasintajni kjuíchꞌéna chꞌan, la ko chàna kixin kjuíchꞌéna chꞌan ti chojni siín.

³² A̱ndá ijie, xje̱eni, tihín ti nkehe tsondáxrja̱n, náxrjón tsjakꞌe ti nkexro chréhe̱ ti nti̱a kuénta̱na.

³³ Chrokiénxian ti nkehe kuétua̱han la chrókónoha, la chrókuíto̱ehya tíha.

³⁴ Náxrjón chrókjuákꞌe ti nkexro tihin ti nkehe ndáxrja̱n la tsjakꞌechóhen ndója puerta ti ndo̱na nkojnko ña̱o.

³⁵ Ti nkexro tsꞌitja ti janhan mé tsꞌitja ti kjuachón, a̱ndá Itꞌéni Díos tso̱xríhi̱n tíha.

³⁶ A̱ndá ti nkexro tsíto̱he ti janhan, mé jehó sincheníhi a̱sén, la kaín ti nkexro nínkakohen ti janhan mé tjinkaon sin itsꞌen sin.”