Proverbios 7 - El Nuevo Testamento Salmos y Proverbios

Titekákonhñara ti chojnichjin nduáhya ixri

¹ Xje̱eni, chrókuitekaoan ti nkehe nixja̱ha; la chrókjui̱nchekꞌitjáñahña ti nkehe kuétua̱han.

² Chrokuitekaoan ti nkehe kuétua̱han la jína tsjakꞌe, chrókꞌuayakohén ti nkehe kuétua̱han éxi tꞌayakohén ti ikuan,

³ mé tíha chrókjui̱nchentetoxian ti ndedo itjá; chróxraxinkaoan tíha kaín a̱sán.

⁴ Chrótjue̱hé ti kjuaxrexinkaon jína éxi ijnko kichua; kixin tíhi éxi ijnko nkexro kjéhya jaha,

⁵ kixin tíha mé tsjinki̱tsa kixin chrókjuichròehya jaha kixin ti chojnichjin nduáhya ixri kjónté náxrjón chrónixja tjan.

⁶ Ijnko ña̱o mé itjén janhan ti ventana ndo̱na la kꞌuíkua̱n

⁷ iso sin ndasoá na̱xa̱ chóntahya kjuaxrexinkaon jína. Ndá kꞌuíkua̱n íjnko chájan a̱ntsí lo̱nti̱,

⁸ kꞌuatóye̱ ti nti̱a a la sákjuí chꞌan ndoí ndo̱e ti tjan nduáhya ixri.

⁹ Mé ó tinkákóndanonte la ti ña̱o la ó tinkákjiataón la ó kjuankíxin tsꞌixin tie.

¹⁰ A̱ndá ti chojnichjin la tuénxín kꞌuaxrjexín ndo̱e la kjuichréhe̱ ti chojnindoa. Tsíkꞌitsá ika éxi ijnko nkexro nduáhya tjenka̱yáxin.

¹¹ Jehe tjan mé ijnko chojnichjin tsjehya nkexrín ixri la ko tósuèhya tjan, la tóxrìe̱nhña tjan tsjakꞌe tjan ndo̱e tjan,

¹² kixin nkochríxín ixri tjan nti̱a o̱ ndasin o̱ nkojnko esquina la tjechóhen tjan sátsjiko tjan ti chojni tsꞌatsínka ntiha.

¹³ A̱ndá kꞌuatsínka tjan ti itjen ti ndasoá la kjóa tjan la kjonieko tjan kochíto la kósuèhya tjan ndáchro tjan:

¹⁴ “Xrákia ndo̱eni sinieni ti nkehe chjéheni ti díos kuènténi. A̱ndá ijie xiteyá ti nkehe ndáchroni la siín into sinieni.

¹⁵ Méxra̱ ijie kꞌuaxrjeni kixin tsoxétani. Xritjeyáni ti jaha, a̱ndá ijie xéta kíchóni.

¹⁶ Ó kjua̱kꞌe̱yo̱xini ti cama la kjuakꞌetaóni ti ika náxrjón tsíkji̱xi̱n Egipto

¹⁷ la ko ó kjuasikjanjini mirra, áloe la ko canela, ti xro̱a̱n xraxé náxrjón.

¹⁸ Xrákia tsꞌajuani tsꞌejóni kuenté tie hasta tsꞌinkaséña. Tso̱chéhe̱ni kixin tjejóni.

¹⁹ Ti xiìna la tjenhña nchia ijie; kixin sákjuí chꞌan imá ikjín,

²⁰ sákjuíko chꞌan itsjé chichaon la tsokjanhña chꞌan hasta nko̱siñe nitjó.”

²¹ Mé xi̱kaha ichro tjan kjuachròe tjan ti ndasoá kixin ti nkehe náxrjón níxja tjan.

²² Ndá ti ndasoá la chréhe̱ nóton ti tjan a éxi ijnko koxinta sákjuíko sin itsꞌen o̱ éxi ijnko koxi̱jna̱ kꞌuitsínkayá ti trampa

²³ hasta tsjiatejña ijnko flecha ti a̱sén va. O̱ éxi ijnko koxroxe kꞌuíxehen ti trampa la noehña kixin ntiha tsꞌitjáñaxín.

²⁴ Méxra̱, xje̱eni, chrókjuakꞌe chrókuihín, chrókjuakꞌe chrókjui̱nchexiteyá ti nkehe ndáxrja̱n.

²⁵ Chróndáchrohya a̱sán kixin chróchréhé ti tjan a; chrókuákjáhya ti nti̱e tjan.

²⁶ Kixin nchónhña chojni kꞌuénxin ti iji̱é tjan; la nchónhña chojni xi̱kaha kjuíchꞌehe tjan.

²⁷ Kaín chojni tꞌixehen ti ndo̱e tjan mé takja sin ti nti̱a tsꞌenxín sin.