Proverbios 6 - El Nuevo Testamento Salmos y Proverbios

Tjenka̱yáxian jína ti nkehe si̱chꞌe

¹ Xje̱eni, ti tsochronka ijnko nkexro choxián kixin tsanchajie̱he nkojín nkehe,

² la jaha ticháxi̱n tsjènka kjónté chontahya chichaon, kixin ó tsíndáchrua la xi̱kaha jahuá kjuéyá ti tsjasótexián.

³ Xje̱eni, ti tjinkakonhña kixin si̱chꞌehé ixra̱ ti nkexro choxián la ícha jína tjoka chrókjuichréhé ti nkexro la chróchronoéhé kixin chrókꞌóxika ti ihni̱á kꞌuínixín ntiha.

⁴ Chrokjuachrꞌichrinhña, chrókui̱toéhya kixin chrókꞌuikjehe̱ ti ikuan;

⁵ ícha jína tjoka sáchrókjuixián ntiha éxi tinká ijnko koxi̱jna̱ kixin chréhe̱ chojni chrókꞌóñá, o̱ éxi ijnko koxroxe ti ó tꞌaxrjexín nta̱nto̱a.

Ti sin séhe

⁶ Jaha chojni séhe, tsjehé ti kochꞌokan; tsjehé ti ixra̱ ichꞌe va, la tankihí va.

⁷ Chóntahya va nkexro tsꞌe̱tue̱hen va la ko kohya nkexro tsondáche va nkehe sichꞌe va,

⁸ la ti ña̱o tsotjá chojni la tꞌàya va ti nkehe sinie va la tꞌe̱nka̱chji̱na va ti nkehe.

⁹ Jaha chojni séhe, ¿xá nkesá tjinkaoan tsoxráxèxian? ¿Xá nkesá tsjìinhan ti kotáchrin?

¹⁰ *Intsí tjakꞌechrian, la ko tꞌitjen, la ko tjo̱a̱ itjá tjakꞌechrian,

¹¹ la ní tso̱noahña itsi ti ña̱o tso̱nóa éxi chrókui ijnko xíche̱e tsa̱aha ndá xi̱kaha tsochontahya ninkehó nkehe sinte.

Ti chojni chꞌia

¹² Ti chojni nduáhya tjenka̱yáxin la ko tósuèhya mé ixri sin tꞌoxika sin kjuachꞌia.

¹³ Ti chojni chrꞌáto ikon, la to̱té la ko itja mé tja̱ko̱xi̱n sin ti nkehe nduáhya tjinkaon sin sichꞌe sin.

¹⁴ Ti chojni a mé ikja tjenka̱yáxixín ti nkehe jínahña sichꞌe la nkochríxín xritje sin kjuanínkaon.

¹⁵ Méxra̱, titàya̱ itsié ti nkehe tsꞌitjáñaxín sin la tsꞌitjáña sin la kohya nketí tsaáxin sin.

Ti nkehe tóxriènhña Itꞌéni Díos

¹⁶ Siín injon nkehe, o̱ yato tóxrìe̱nhña Itꞌéni Díos:

¹⁷ ti chojni ihnke, ti chojni imá xrichꞌia, ti chojni tꞌóñá kícho,

¹⁸ ti chojni tjenka̱yáxin nkehe náxrjónhña, ti chojni xritinká sichꞌe ti nkehe nduáhya,

¹⁹ ti chojni nduáhya chronka la chꞌéna kjuachꞌia, la ko ti chojni tjehe kjuanínkaon ti kícho.

Chrèhya ti chojnichjin nduáhya xri

²⁰ Xje̱eni, xráxinkaoan nkochríxín ti nkehe kꞌue̱tua̱han itꞌá, la ko ti̱toéhya ti nkehe kjua̱ko̱ha ìná.

²¹ Xráxinkaoan tíha nkochríxín éxi ijnko nkehe chrókjuakꞌenkí isian kixin chrókꞌuitjáñahña.

²² Tíha mé tsja̱ko̱ha ti nti̱a jína la ko tsꞌayakohan ti ó tsjakꞌéchrian la ko tsonixja̱ha ti ó tjakꞌetsjehé,

²³ kixin ti nkehe kꞌuítuahan mé éxi ijnko xrohi tꞌinkaséñaxín nti̱a. Ti nkehe xrako̱ha mé ti xrohi tsꞌinkaséñaxián la ndá ti nkehe kjuenduáhá sin mé tsjinki̱tsa kixin tsꞌájia ti nti̱a jína.

²⁴ La ko tíha chrókjuinki̱tsa kixin nijnko chojnichjin nduáhya ixri chrókjuachròe ti jaha, kjónté imá náxrjón chrónixja sin la chrókiénhña jaha.

²⁵ Chrokjuakéhya a̱sán ti náxrjón tsjehe tjan, chrókjuaníehña kixin chrókjuachròexian tjan ti ikon tjan.

²⁶ Ti tsochrehé ti chojnichjin nduáhya ixri la sinchexéhen iso chi̱cha̱ko̱an, kjánchó ti tsochrehé ti chojnichjin chónta xìi la tsꞌitjáña jaha.

²⁷ Ti chojni tóchjinehe ti síche xrohi la, ¿xá chróchehya ti iké sin a ní?

²⁸ O̱ ti ijnko chojni chrókuitaón ti xrinta, la, ¿á chróchjánhña ti to̱té sin a ní?

²⁹ Mé xi̱kaha ti nkexro tsochónta ichjién íjnko chojni la chaxín tsjasóte.

³⁰ Ninkexró tekahya ijie̱ ijnko chojni ti teé kixin ikꞌuén kjinta.

³¹ A̱ndá ti tso̱noxíxin la tsicháxi̱n tsꞌókjan yato vece ti nkehe kueé la tsjajon kaín ti nkehe chónta.

³² Ti chojni lo̱nti̱ chónta íjnko chojnichjin jehya ichjién la í tjenka̱yáxinhña sin jína, la sinchekꞌitjáña a̱sén kixin xi̱kaha kjuíchꞌe.

³³ Mé xi̱kaha tsjasótexín chꞌan la ko tsꞌekon chꞌan la ko tso̱suéhe̱ chꞌan la ko xitjahya tsꞌóxika ti kjuatosuéhe̱ tsochónta.

³⁴ Ti ó tso̱nohe xìi ti tjan a, la imá tso̱nínkaon la ko imá tso̱chjio la í tsi̱konoèhña chꞌan ti nkexro a.

³⁵ Jehe chꞌan la imá tso̱nínkaon chꞌan la tsochrohya chꞌan tsákja chꞌan ninkehó kixin tsꞌitjáñaxín ti kjuanínkaon kuènté chꞌan, kjónté kaín ti oro siín chjasintajni chrókjuiko̱he̱ sin chꞌan.